超靈視雜誌社: 三章－上帝的手指（２）
要理解月亮空亡，首先要明白什麼叫做相位。
簡單來說，相位就是天空中某兩點所形成的特別角度距離。例如日食的話，太陽和月亮都在同一方位，角距是 0 度，占星學上面就把這種狀態稱為「合相」。
另一個例子是月食。雖然同樣是太陽、地球、月亮連成一直線，不過今次地球夾在中間，從地球上看太陽和月亮天各一方，相距 180 度。這個角距也是一個相位，叫做「二分相」，或者「對分相」。
其他相位還有「三分相」、「四分相」、「六分相」等等，分別對應角距 120 度、90 度、60 度。譬如當月亮和水星的角距相差 90 度，用占星學的語言來說它們就是呈「四分相」。
值得留意的是，占星學通常都是討論「重要天體」的相位。所謂「重要天體」包括太陽、月亮、還有「九大行星」──縱使冥王星在２００６年被剔出行星之列，它在占星學上仍然占有一個重要席位。
由此可見，月亮不可能年中無休地和重要天體呈特別相位。當月亮離開了當前的相位，在進入另一個相位或星座之前她只能夠「漂浮」在星盤上，和其他天體「失去聯繫」。這種狀態就是「月亮空亡」。
月亮空亡大約每兩、三天就會出現一次，並不是什麼罕見的現象。不過占星學相信如果在月亮空亡的期間作決定，那個決定通常都不會有成果，應當盡量避免。
以上資訊由 Google 老師和紡瑩老師熱情提供。
聽完之後我在想，如果有一對十分迷信的新人要擇日子結婚，首先他們會剔除雙方父母的生日月份、相沖的日子、又要避免清明重陽盂蘭月。假使最後連月亮空亡的日子都不能選的話，我很懷疑他們到底能否成功結婚。
星期四的下午，月亮進入雙子座，剛好結束持續了一天的月亮空亡。我和紡瑩正在一間咖啡店門口等待著電郵主人的出現。
不過夏天的三點鐘，烈日當空，這是我最大的誤算。雖然正在吃雪糕的紡瑩看起來沒有感到很辛苦，但我有像雪糕一樣快要融掉的感覺。這一刻我覺得我和太陽是相沖的。
「請問……你地係唔係雜誌社既人？」一位長頭髮，戴著粗框眼鏡的女生走過來問。我自己不算高，不過那個女生比我還要矮半個頭，感覺像一名中學生。
「妳就係 Candy？」紡瑩問。
「嗯。」
「妳好，我叫紡瑩呀。同隔離既阿翔都係超靈視雜誌社既記者。」
「電話入面嗰個人？」Candy 望著我問。
「係呀，妳好，我係阿翔。不如我地入去入面買杯咖啡，涼下冷氣先啦。」
為了消暑，我買了一杯冰拿鐵，然後找了一張圓枱坐下來。Candy 和我一樣都是一杯冰拿鐵。至於紡瑩，礙於她只剩下一種味覺，摩卡是她的不二之選。
大家都坐了下來，紡瑩首先開口說：
「唔駛咁緊張，當大家傾下偈就可以。妳而家係讀緊書？」
「嗯，讀緊大學，就黎 year 3。」
「哦，同阿翔一樣呀。」
這個的確是意料之外，因為 Candy 看起來很像小朋友。
「係呢，Candy，妳好鐘意占星架？」紡瑩問。
「嗯。」
「咁可唔可以幫我睇下我個命盤會係點丫？」
「可以，妳俾妳出世既時間同地點俾我就得。」
於是紡瑩靠近 Candy 耳語，並把自己的出生時間和地點告訴給她。
其實紡瑩要求 Candy 幫自己看命盤，看起來好像閒談，卻很有作用。如果 Candy 的占星不準確的話，就不用再擔心什麼快要死去之類的話了。
Candy 在 iPad 輸入資料後，沉默了數分鐘，然後開始解說：
「紡瑩係一個好幸運既人，同屋企關係好好，亦都好有朋友緣。係紡瑩既本命盤入面，有好多星星都落係『創始星座』，尤其係牡羊座。妳係一個好鐘意行動、同埋創新既人。但係呢方面既傾向太大，可能唔容易同其他人合作。」
「我係咁架咩？」紡瑩問。
「嗯，我覺得 Candy 講得好啱。」我說。
Candy 沒有理會我們，繼續解釋：
「不過其實妳係一個思想好細膩，好聰明既女仔。可能其他人唔了解妳所以未必咁容易可以同妳合作到。」
「吓，紡瑩係一個好聰明既女仔？冇可能。」
「哦！就係咁。都係阿翔太蠢所以先至咁難合作！」紡瑩感到很有趣，繼續問：「咁我既真命天子幾時會出現？」
「妳既人緣好好，姻緣亦都好好，應該會好早拍拖同結婚。我諗妳既真命天子應該好快會出現，或者已經出現左？妳今年都廿──」
「ＳＴＯＰ！話明唔准講年齡架！」紡瑩伸手阻止了 Candy 繼續說下去。
之後對於紡瑩本命盤的解說都是一些比較空泛的描述，有時候紡瑩十分同意但我反對，又有一些描述我很認同但紡瑩堅拒承認。
為了再測試一下 Candy 的占星準確度，我也把自己的出生時間和地點告訴給她。她同樣地在 iPad 上工作一會，然後開始沉思。
「好奇怪。」Candy 說：「阿翔既本命盤毫無特色……或者應該話包含晒所有特質……好奇怪。就好似唔係一個人既命盤咁。」
「唔會卦，我點睇都係一個人黎架喎。」
「唯一既共通點……就係冇父母緣。同屋企關係好差。」
「呢一點我唔否認……」
「總之好奇怪，係阿翔既本命盤入面有好多矛盾……我唔想睇。」Candy 突然轉變話題，問：「其實你地係唔係唔信我？」
我連忙否認，並解釋我們只是純粹對占星感興趣而已。
當然這個只是借口，我真正感興趣是別的東西：
「Candy，妳知道自己就黎會死，係唔係？」
「嗯。一星期後。」
「……係用占星推算出黎既？」
「除左占星之外，我本身有靈力，對其他人既死特別敏感。」
「欸？但係妳好似好平靜咁……唔通妳覺得死左都冇所謂？」
「嗯，冇所謂。只要其他人知道我冇講大話就好。」
「妳想我地做證人，就係要證明妳既預言唔係講大話？」
「嗯。」
「呢樣野對妳黎講好重要？比起自己性命更加重要？」
「嗯。」
我想不通，Candy 叫我們來就是要證明她可以預測自己的死期，不是說謊。這樣很重要嗎？自己的性命卻不重要？這樣看來，她甚至願意為了實現結果而選擇自己結束生命。只有這一點是一定要阻止的。
「Candy，如果妳離開左，一定會有人好傷心架。」紡瑩的語氣帶有一點寂寞。
「唔會有人傷心。我父母已經唔係度，親戚個個都唔鐘意我。我亦都冇朋友，所以死左都冇所謂……應該話死左仲好。」Candy 依然很平淡地說，就像說著和自己無關的事：「如果我真係死左，你地雜誌社就可以幫我做證我冇講大話……我就可以安心咁同媽媽講我真係冇講大話……電視上面嗰次只係意外……」
「電視？」紡瑩輕聲問。
「係……以前媽媽帶我上過一個電視節目，節目係專門講一啲有超自然能力既小朋友，同埋會係現場驗證佢地既超能力。」
「但係嗰次我失敗左，我同媽媽都俾人話係講大話、呃神騙鬼。最後媽媽抵受唔到壓力抱住我一齊自殺……」
「所以我想俾其他人知道……我冇講大話。」
以上就是 Candy 的心跡。
「我明白喇。」我告訴 Candy：「我地會整理一下資料，然後聽日再搵妳，可以嗎？」
Candy 只是默默地點頭回應。