《等那一天我們在操場上接吻》: 晨曦
～. 19 晨曦
12月21日。聖誕節校園祭。
早上06:30。
尤天勇梳洗完畢，穿起白襯衫與黑長褲。父母還在睡覺，這是一年內，他鮮有會比父母早起的日子。他回到自己的睡房裡，坐在床邊的椅子上，看著日出前的晨光，微藍的天色令深冬的寒意像一幅優雅的水彩畫。
「我仲記得，四月果陣，我問過林之年。我問佢，點解淨係提名我一個。許愛悠雖然離開左學生會，但你一樣可以提名佢。」
「佢話，許愛悠唔係你依種人。」
「我問佢，咁我係咩人，許愛悠又係咩人。」
「林之年答我，許愛悠眼中既世界好大，佢就好似史詩式神話既創作者咁。而尤天勇，你呢，你就係一個普通故事入面既普通人物，你識得維持現有制度，你識係制度入面平衡利益，你知道制度既極限同彈性係邊度。制度係令人減少爭執，並唔需要愛﹑勇氣同自由。」
「咁我話，咦，咁我咪姐係永遠都比唔上許愛悠。我始終都無贏到佢。」
「林之年搭住我膊頭講，但係，有學生會，就有學生會會長，你做到既野，許愛悠永遠都做唔到。而許愛悠呢，佢永遠唔知做佢想既野，會唔會真係做到。」
「佢繼續講，或者有一日，當依個世界唔再有學生會同制度既時侯，許愛悠真係會凌駕係好多人上面，但依一刻唔會，你先至係學生會既主人。」
「林之年話，明年當你成學生會會長之後，自由身既許愛悠可能會做好多野，去挑戰學生會既存在，但有你係度，我相信你可以抵擋得到，你唔好諗贏輸既問題。而係去諗，有咩係你應該要做，身為學生會會長，身為制度既一份子。」
「然後，我問左林之年最後一個問題，我問佢，果陣，你係咪專登逼許愛悠退出學生會。」
「佢搖頭，佢話唔係，佢話，許愛悠離開，始終係佢自己既決定。」
「我一直覺得，即使林之年到分手既時侯，仍然都好愛許愛悠，甚至許愛悠都係，佢地唔想分開，但係，就係因為校園祭，所以佢地心入面有把鎖，始終都解唔開。」
「所以，Mimi，我真係好感激妳，我知道妳一直懷疑，我係咪真係鐘意你。但依一刻，我可以好肯定咁講，我唔可以無左妳。我唔係林之年，妳亦唔係許愛悠，我尤天勇，有你傅恩薇，係我既榮幸。」
尤天勇望向床上的Mimi，她剛睡來，抱著綿被，不捨得離開溫暖的被窩。她泛起睡相迷糊的微笑，看著尤天勇。
「夠鐘起身喇，浴室無人用，妳快啲去沖涼先。」
「Espresso？Latte？」她輕聲說。
「Macchiato，要甜啲。」
Mimi爬起來，她穿著尤天勇的睡衣，親吻尤天勇的臉頰，帶著仍未消散的睡意，軟軟地抱著尤天勇。
窗欞外昇起了陽光，日出了，尤天勇想像學校的操場，新舊翼校舍，也渡上了一層明亮的金黃色。
又一年的聖誕，最後一年的校園祭。
最後一年的學生會，又一年再碰上許愛悠。
█
07:03
何子晉穿著童軍副隊長的制服，飛奔向男童軍的雜物室。
「點樣，咩情況！」何子晉壓抑著氣喘急道。
「隊﹑隊長﹑個﹑個鎖──！」其中一位低年級的隊員，結結巴巴地說。
何子晉走到雜物室門前，舊式的鐵門上，扣上了三個鐵鎖。
其中一個鐵鎖是男童軍自己的門鎖，而另外兩個，來歷不明。
舊式的鐵門門把上，鎖環的空間會比較大，所以能容納不只一把鐵鎖。何子晉身為副團長，當然有儲藏室的門匙，可是另外的兩把呢？另外兩把鎖匙根本無法打開。
「我地﹑我地既軍旗﹑旗杆﹑校旗都係入面……」
他的隊員向驚惶失措地說。
風紀委。
何子晉這個月來一直處於戒備狀態，每次的操練都小心躲開風紀。但就是沒想舊鐵門門鎖的結構。
距離校園祭開幕典禮還有一小時，而且需要與女童軍作最後採排。男童軍的軍旗可以濛混過去，但學校的校旗呢，那不可能置之不理。
沒有其他方法進入儲藏室。唯一方法用鎖剪將鎖剪開。而學校裡唯一提供此服務的，是學生會。
「仲有﹑隊長……仲有一樣野。」其中一名隊員怯懦地說。「我地尋晚……練完步操之後，因為太夜……所以……我地有幾個人，無將制服拎番屋企，果陣……所以﹑所以將啲衫放左入去……」
「屌。」何子晉聽到這裡，向這位低年級的男童軍怒目而視。但心裡也不其然責怪，自己實在太信任下屬。
「對唔住，我地唔應該聽佢講……」
「佢？」
「總籌委……師姐佢尋晚黎睇過我地，之後就話，不如你地將啲制服放係度啦，聽日返黎著番咪得囉。」
鄭雪蕾？
何子晉望向跑道前方的開幕禮台。她才是始作俑者，而不是風紀委？
風紀委，學生會，鄭雪蕾。到底哪一個才是幕後黑手。
何子晉晃了晃頭，他無法思考這種人性的命題，他拿起手機，決定尋求那位專家的意見。
█
07:12
問答隊的社團室內，鄭雪蕾再一次檢視今天各項活動的日程，檢查各個活動負責人的聯絡電話。
在她旁邊，郭允箏手中握著兩把鐵鎖的鑰匙，然後遞出手機。
「妳同班男童軍走左之後，我就鎖左另外兩個鎖上去，無耐，就有風紀黎到，我唔太肯定佢地手上面有啲咩，但我望落去，好似係較剪﹑cutter既野……」
手機模糊的畫面上，依稀看見三個穿著校服的風紀，走到男童軍的儲藏室探頭探腦，對於男童軍上突然多出的兩把門鎖，他們也非常困惑。
「而且……個班風紀有儲藏室既鑰匙。」郭允箏展示著照片。
連拍的照片之下，看到其一個風紀拿出了鑰匙，試圖打了男童軍儲藏室的門鎖，可是發現另外兩把門鎖根本打不開，便將原先的門鎖鎖回去了。
「Mimi。」鄭雪蕾說「尤天勇同Mimi，早就同風紀委聯手，佢地想令男童軍係無辦法進行開幕典禮。然後係老師面前，連帶將責任推去我度。一方面可以壓低男童軍既地位，另一方面就攻擊埋我。好彩我地先發制人，依家只有我能夠解救到男童軍。」
「點解……男童軍明明係十二大社團，點解尤天勇要排除男童軍？」
鄭雪蕾站起來，收起文件，看了一次開幕典禮的講稿，走到鏡前整理妝容，微曲長髮內的雙頰，抹好了適合冬天的淡櫻色，嘴唇則是較深豔的紅色。
「萬聖節你都有去架，果晚男童軍同風紀委既衝突，你都在場。」鄭雪蕾說。
「有咩問題？風紀佢地成日都管依樣管果樣。」
「有問題係唔係男童軍或者風紀委，而係果個叫林強既人。」
「林強……？」
「上幾個星期既全港橋牌學會大賽，我有去睇。」鄭雪蕾披起深紅色毛衣外套，純黑色的羊毛圍巾，將保暖的暖包放在校裙裡，戴起聖誕帽「林強係橋牌學會既人，佢拍檔佢地既會長出賽，但佢根本就唔識玩，如果唔係佢亂黎，佢地既會長唔會得第三名，而會係冠軍。」
郭允箏看著穿戴好的鄭雪蕾，一派貴氣。
「你覺得，一個咁既白痴。會有可能夠膽拎住個火把同個風紀對峙，仲要講到咁型既說話咩？」鄭雪蕾笑說「你都唔得啦。所以，林強背後一定有人。」
「佢地既會長？」
郭允箏又想不起來，到底橋牌學會會長叫什麼名字。
「橋牌學會會長阿北，依個人好低調，好少參與活動，聯席會議記錄上都無佢既發言紀錄，但係……就係萬聖節個晚，佢同林強都出現左，仲要係林強好神奇咁解開左三個封印。」鄭雪蕾說：「就當阿北﹑林強真係同男童軍合作，而尤天勇同風紀委又真係針對埋佢地兩個，你唔覺得，如果加多個一個人名上去，成件事會合理好多咩。萬聖節既幕後搞手。」
郭允箏跟鄭雪蕾同樣，其實從未見過許愛悠。
鄭雪蕾瞟了一眼郭允箏，笑說：「所以，你今日既任務，就係留意阿北，仲有林強。如果阿北同林強，真係同許愛悠合作緊既話，你一定會搵到阿北﹑或者林強既罪證。到時許愛悠就會──」
這時侯，鄭雪蕾的電話響起，她看了看來電名字，欣然微笑接聽。
「子晉師兄？請問有咩事？」
郭允箏無法聽見何子晉向鄭雪蕾說了什麼，但鄭雪蕾用手勢指示郭允箏將昨夜風紀委的照片傳給她。
「我依家好快過黎，請你等一等我。我再同你解釋。」
鄭雪蕾接過郭允箏給她的兩把鑰匙，準備離開問答隊社團室。
「小蕾。」鄭雪蕾快要離開門前的時侯，郭允箏突然說。「今晚舞會……我係咪可以同你跳舞。」
鄭雪蕾面無表情，冷冷地看著郭允箏。
「妳做左會長之後，我諗我地好難好似依家咁……所以，我想趁仲有機會……」
鄭雪蕾仍然沒有回答，臉上彎起了淺淺的微笑，便離開了。
█
07:25。
校門口小賣部。
他付了錢，接過老闆手上的熱奶茶。
老闆是個上年紀，白髮蒼蒼卻一臉和藹的大叔，他將零錢遞出去，笑說：「咁有心番黎睇呀？」
他呷了一口熱奶茶，呼出滿足的飽息，笑說：「老闆，你啲手勢一啲都無退步喎！」
「梗係啦，依度做左幾十年啦！」老闆拿起報紙「你咁做既，未有咁早開始喎！」
07:00，男童軍開始作最後總採排。07:30，男女童軍作最後總採排。07:45，學生會會長﹑校園祭總籌委會在禮台上準備迎接老師，順便作最後的協調。08:00，學生進場。08:20男女童軍預備。08:30……
一年過去了，這些流程還是沒有改變。
改變的往往不是制度，而是人。
「今日唔早啲唔得啦。我有幾個師弟師妹，佢地今日……會好忙，要搵齊佢地，就梗係要早啲番黎。」
「係咪，你地感情咁好呀。」
「感情既野……」林之年笑說「……從來都估你唔到。」
老闆說了一聲「挑」，回敬林之年的裝帥。
林之年步進校園。每個畢業生都會有這種震撼：你以為中學不過是平平無奇的一所學校，但當你畢業，重回舊地，當六年來的刻印與闊別一年的重逢相疊，便會發現時間像死神一樣吞噬了所有的可能，而遺下裹足躊躇的當下－－年輕卻實在的老去。
林之年看著校園的每一個角落，都浮現起幻覺一樣的回憶。
林之年經過跑道後方，聽見男童軍整齊幹練的步操聲。男女童軍要作最後採排了吧。
那麼，妳會在哪裡呢？
█