再一次愛上沒有放下的舊情人: 八

睇完張紙仔，我即刻打比Karen問個明白，但始終打唔通，我亦都唔可以坐以待斃等佢回覆，搵個衫就出門

一路上我都不停打比佢，但每次都飛左去留言信箱，我唯有馬上前往地鐵站

依個遊戲雖然好簡單，但其實要搵，一日都未必搵得到，假設好仔細搵曬成個站，至少都要10分鐘

而每個站之間都要3-4分鐘，加上，地鐵延誤/壞車/太多人等等問題，又要加時間，要一日搵曬可能性唔太大

我決定由同佢一齊去過既地方搵起



屯門，係我同佢第一次行沙灘既時候去，雖然個次純粹係班會活動去BBQ，但我同佢私下係沙灘附近行左好耐

天水圍，我住既地方，係未同屋企人分開住之前我都係住係天水圍，搬左出去住之後我選擇係番天水圍，希望可以照顧到父母，有咩事都可以第一時間趕到番去

依個係我地回憶最多既地方，一齊咁耐差唔到咩都係依個區到過

尖沙咀，我第一次約佢出街既地方，亦都係我人生一日洗最多錢既地方，不過依到對我黎講係最有意義，因為依到係我表白同埋第一次錫佢既地方

旺角，拍拖前後都會同佢出去行，多數都係陪佢睇下衫，佢又陪我行下信和，行完食放題或者韓燒咁



至於其他地方，我真係諗唔到有邊到係值得佢係個到等我

因為我出門口都已經1點幾，搵完成條西鐵線都搵唔到，決定先去食小小野

可能心情比較沉重，胃口亦都無咩，食龍肉都無味，所以只係買左個蘋果批食算，依個時候電話突然響起

「呀成，你係邊呀？」電話中既女性說，似乎帶點醉意

「我搵緊人呀」



「我好唔開心呀，你係邊呀」

「你係咪飲醉左酒呀Wing，不如我去同你番屋企先啦」我說

「唔要唔要，我要你陪我飲酒，嘻嘻」

「你唔好飲啦，我好忙唔得閒陪你呀」

「衰人」

「我...」我都仲未解釋佢就收左我線

呀Wing係我公司同事，平時放左工佢都會同我地一齊去玩，而且好鐘意飲酒，不過佢份人性格比較豪爽，公司都無咩人對佢有興趣

雖然曾經同我表白過，但我始終放唔低Karen所以拒絕左，之後佢就變到日日落club玩，放假由朝飲到黑，令到我好後悔



至於依刻，我真係唔想理佢住，我唔想再扔低我最愛既人

收左線之後，我落番尖沙咀地鐵站，有去過既人都知道依個站比其他站複雜小小

正當我落到地鐵站時，我見到，Karen既背影