再一次愛上沒有放下的舊情人: 十八

我出到去，佢地見我拎住封信，神色沉重，即刻送上問候

「點呀你，老闆岩岩講咩呀」「你有冇事呀」「岩岩做咩呀」四面八方傳黎問候

我一於唔出聲，去我個位到執野

呀Wing可能以為自己幫我慶祝搞到我比人炒，行過黎細細聲問：「係咪我搞到你比人炒呀？」

我見佢一面內疚，亦都唔想再咁樣玩佢，畢竟琴日我都好似玩佢咁



「無呀，老闆升我職姐」我無精神地說

「咁你又咁既樣既」呀Wing一臉不解

「岩岩跑番黎嘛」我摸一摸佢個頭，然後收拾好檯面既野，就將所有野拎入間房

我坐左係間房，仲未回氣，檯頭既電話已經響起

「喂」我說



「點呀，間房岩唔岩用呀」老闆電話說

「都幾好呀，我都未問我係升做咩職位」我問

「副經理呀嘛，封信有寫架」

副經理！！！係個幾鐘之前我都仲係一個文員仔，點會無啦啦變左副經理架

諗番岩岩我都未睇過封信內容，只係見到升職個兩個字



望一望，的確係升做副經理，再望一望人工個到

嘩屌，人工加三萬，我本身都係得一萬，一個鐘之後加我四倍人工

「咁我有咩做架？」我問老闆

「我一陣叫你秘書同你講下啦，你休息下先」

平時番工，大把野要做，又要預備文件，打字，突然咩都唔洗做，天生辛苦命總係唔可以唔做野

「呀Wing你做緊咩呀？」我出去問

「打緊字囉，你就好啦咁得閒」呀Wing失望地說

「你有冇咩做唔曬架？」我問



「做咩呀，你想幫我做呀？唔洗啦，一陣比其他同事知道又要你幫佢地架啦」

佢講起，我都望一望其他同事，佢地係到不停咁做野，就好似以前我地一睇到老闆就扮做野咁

見佢地扮得咁辛苦，我都入番房就算，諗住下次先搵個機會再同佢地講，叫佢地係我面前唔洗扮野

入到房，我唔需要再好似以前咁用電話偷偷摸摸，我whatsapp Karen同佢講我升職既事