正當我自信滿滿,自為可以擊敗眼前呢個死神既時候,另一把聲又係遠處響起。佢把聲好似一個老人家既聲,係屋入邊久久不散。「阿頌,我好失望,你竟然咁都唔夠一個小伙子黎。」

     我抬頭周圍望,見唔到有任何人。把聲好似就係黑暗本身。 「阿讚,呢個細路恃住有我蠱蟲既剋星,所以我先奈佢唔何。」 黑暗又再開口,我聽到一啲念經聲,但係我唔明佢講咩...愈聽,我全身上下,尤其是我小腿,就愈痛,好似比無數利針不停拮咁。「哎...你收聲..收聲呀!!」我抱頭痛苦大叫。 與此同時,個個叫阿頌既蠱師已經帶領百蟲退下,投放所有既戰力係條蠱蟲剋星身上。相反,有一個滿身經文,著住一件橙色衣服既老人行左出黎。佢不停咁低聲念咒。雖然一開頭個痛楚係極巨大,但係佢一路唸,我又慢慢覺得唔係好痛啦喎。我仲好快就企返好,佢都停止左念咒。 「嗯...阿頌,佢有神功護體?點解你頭先一路驅蟲上去,佢都無沾到好多蟲液?」阿讚開口問。 我忽然靈機一觸。要配合蟲液黎施法?嗯,降頭術中的確係有降蠱合璧既特殊降頭。所謂降頭,蠱術,其實本來都係雲南巫術既一條分支,自然兩者可以相配,威力大增。而蠱都有好多種,阿頌既蠱就係生蠱,姐係用活物來直接落蠱,呢種既蠱係雲南黎講算係少數,因為見到蟲個個都驚到走啦,仲邊可能接近到人。 「佢有土地助陣,我無辦法破到佢。我只可犧牲一啲蠱令佢身上沾有個D汁液。」我見開聲個阿頌比條蛇搞到手忙腳亂,又撒粉又跳舞咁。條蛇依然肆無忌憚咁不停食蠱。 「哦。唔緊要。」阿讚雖然有些少訝異,但係面上表情都係同頭先出場一樣。 就係呢段期間,我可以安安靜靜咁觀察到呢個老人。佢頭髮稀疏而且發白,睇得出佢有返咁上下年紀。嗯,呢個同佢打肉搏應該夠打。至於佢身上唯一一件既衫,其實係一件佛布。佛布其實就好似一個移動法壇咁樣,可以令降頭師法力倍增。正常黎講唔係一個普通降頭師可以拎到...而佢又叫阿讚..唔通... 黑暗中,我同個阿讚隔空對望。而雨瑤就係我身後,連同隻比我扎到實一實既飛頭蠻一齊,睇住成場戰鬥。但係一路都好安靜既飛頭蠻,突然係呢個時開始有D燥動不安。 阿讚望一望隻飛頭蠻。跟住又望一望我。 「呵呵,太好,既然你同飛頭蠻打過,咁睇黎唔使蠱,我只係用降頭已經可以將你殺死」。