果個女仔做咩一直係到望住我: 15

始終，我仲未肯定自己係咪真係中意佢。 

「喂，沖完水啦，搽D盪火膏啦。」 

係呢刻既我，我選擇左迴避佢既問題。 

黃穎希隨即臉露失望，都無再追問。 

我伸手摸摸佢額頭，仲好熱咁。 



再摸摸佢條頸，係非常熱。睇黎佢仲未退燒。 

「黃穎希，妳同我坐係到，唔好亂行。我拎D粥出黎，妳千其咪鬼走入黎，廢時又麻煩到我呀。」 

我拉開飯廳既椅子，招呼佢坐低，然後自己再走入去廚房，用兩個碗裝左D粥， 

拎出去，再去急救箱拎盪火膏。 

「喂，用左手食野，我幫妳搽左藥膏先。」 



我捉住佢隻右手，慢慢咁塗上盪火膏。 

佢隻手好滑，亦都好凍，係好典型既女仔手， 

同時都散發左陣陣休香，老老實實，真係好吸引。 

「喂，自以為靚仔果個。估唔到你平時煮飯好食，煲粥都幾有水準嫁啵。」 

我同黃穎希有約定，煮飯我做，家務就佢做，男女平等! 



我望一望地下，有D塵。再望一望黃穎希，見到佢塊面仲好紅， 

隻手有少少震咁，男子氣慨突然湧現，腦入面即刻有左個決定。 

「黃穎希小姐，妳而家病左，咁家務同煮飯就我做，遲D先同妳慢慢計番。」 

我定神咁望住黃穎希。 

「咁好死? 」 

佢有D疑惑。 

「而家係咪對妳好，妳都唔滿意呀? 」 

我真係頂佢唔順。 



「唔係唔係。」 

佢甜絲絲咁笑左笑。雙額紅腫，雙目佈滿血絲，更顯呢位美女楚楚可憐。 

「不過咁，你係自願既，所以唔可以同我計翻! 」 

黃穎希眼仔又再次轉動，佢又想壓榨我。 

「好好好!就咁話啦。」 

咁都中伏….. 

突然，佢鍚左我塊面一下，我個心跳得好快，dup低頭，唔敢望住佢。 



「做咩啫妳。」我自覺塊面熱到可以煎雞蛋，仍然唔敢望住佢。 

「就當係多謝你啦。」說畢，黃穎希即刻9沖入房。 

黃穎希鍚我!黃穎希鍚我! 

摸摸岩岩俾黃穎希鍚果到，諗起岩岩佢鍚落黎果一刻，諗起佢個傻瓜樣，忍唔住笑左聲出黎。 

「喂!妳D粥呀!」 

我大叫。 

黃穎希出番黎，各自低頭食野。 

雖然無任何交流，但係心中，大家都明白大家。