第一集 ~ 雞︰我今日真係初出茅廬啊!

從前,喺一間靠住山邊嘅茅屋裡面…

有當時只有幾歲大嘅我,同埋我師父…

「起身喇,雞仔!」

「做乜嘢!咁…早…剿醒人噃,師父。」



冇錯,我就係雞仔,當時我仲好眼訓,檬檬鬆鬆咁。

「帶你去見識吓啊。」

「見識!?見識D咩啊?」

「捉鬼啊,你去唔去啊?」

「捉鬼…吓!捉鬼!?好啊!我等咗好耐喇!」



我其實有D驚嫁,不過興奮嘅心情完全掩蓋咗我驚喳嘛。

我跟咗師父半年,半年嚟,每日都只係練功﹑紮馬﹑裝香﹑拜神等等等等,好悶家嘛,所以其實我一早就好想去跟師父治邪捉鬼嫁喇。

「師父呀,咁幾時出發啊?」我當然係好雀躍。

「嘢都執好晒喇,等你起身出發咋。」

「係!即刻出發!」



興奮嘅心情,驅使我只係用咗半分鐘,半分鐘就梳洗完喇。

「好嘢,出發!」

行咗唔夠一段小路,我突然諗起一D嘢,就問師父︰

「咦,師父呀,做乜唔叫埋師兄去啊?」

「唔使搵人睇住我間屋呀?你係咪想留低睇屋丫?」

「傻喱(SORRY)。」冇錯,我係識少少英文,至於點解,遲D有機會先再講啦。

師父將師兄留低睇屋,而我就跟咗佢出門去隔離村捉鬼喇!

興奮嘅心情持續,沿途嘅我根本冇聽到師父講過咩,只係一直係咁諗︰



「唔知鬼係咩樣嘅呢?恐唔恐佈嘅呢?我又會唔會有危險呢?」

天真爛漫嘅我,貪玩嘅性格,令到自己唔記得咗個「驚」字。

行咗一段時間,終於嚟咗商寶城鎮,呢個城鎮出名多大商家嫁。

我一直就跟住師父佢行,終於到咗一間…

豪門大宅!?

「師父呀,唔係捉鬼咩?點解嚟咗呢間大屋嘅?」

「你個問題咁得意嘅,講到好似大屋就唔可以有鬼一樣,你以為荒山野嶺先會有鬼呀?」



「我…我只係覺得呢度咁整齊光鮮唔似有鬼喳嘛。」

「衰仔,學到D嘢噃,你都唔係錯晒,睇嚟你有D感應力,感覺到呢度冇鬼,的而且確,呢度唔係有鬼嘅地方,呢度係請師父嚟嘅員外住嘅地方,我哋嚟見一見老闆先啫。」

「嘻嘻。」聽到師父讚噃,當然係開心啦。

之後我諗住去敲門啦,點知…

突然有一個又高又瘦嘅男人行咗出嚟迎接我哋…

「先生係道士?」

師父及咗吓頭。

「呢邊請。」



之後,我哋倆師徒就跟咗「高瘦男」入去…

呢度亭園好大,又有個大魚池,好有氣派嫁…

「高瘦男」帶咗我哋去一個大廳度等…

仲請埋我哋食麵添…

「咦,陽春麵噃,正啊!」

我一見到陽春麵,即刻瘋狂咁食,因為我日日都係食乾糧饅頭嫁咋。

當我食到第三大啖嘅時候,我望一望師父…



「咦,師父呀,做乜唔食啊?」

「衰仔,啱啱讚壞咗你呀?你唔覺得個男僕人好有問題咩?仲有啊,唔係自己熟悉嘅地方,唔好亂咁食人哋俾你食嘅嘢啊,你記住喇。」

「哦,咁…師父呀,我可唔可以食埋呢個陽春麵先啊?」

「你都食晒咁滯嚧,食啦。」

(雪~ 雪~ 雪~)

「食完!咦,師父呀,你嗰碗係咪唔食嫁喇?」

點知我一問完,師父就一手攪住碗麵唔俾我攞,仲問︰

「好好味嫁咩?」

「係啊,師父,真係好好味嫁!」

之後師父…

(雪~ 雪~ 雪~)

「師父,你又話人哋D嘢都唔好亂食嘅?」

(雪~ 雪~ 雪~)

師父冇回應我,仲只係用咗六啖,就食咗我個頭咁大碗嘅陽春麵。

「又真係幾…好…味…」

但係…

「師父!」

師父佢暈咗。

唔通D陽春麵真係有問題?!

正當我想叫醒師父之際,身後突然傳出人嘅腳步聲…

我另轉頭一睇,係嗰個「高瘦男」啊!

「估唔到名震四方嘅大師級道士都竟然咁唔小心,少少蒙汗藥就攪掂喇,哈哈。」

我完全唔知發生咩事,唯有咁問︰

「大奸狗,你想點?」

「冇乜點,只係我家主人想要你間茅屋啫。」

我估唔到我叫佢「大奸狗」,佢竟然會應。但係…

「你要我師父間茅屋做咩啫?又殘又舊又污糟,仲有我師父陣體臭味。」

「我家主人係大地主,當然唔係要你間屋咁簡單啦,佢只係想要你哋塊地。至於我,哈哈,一方面,我係幫我家主人嚟禁固你師父,另一方面,到我家主人攞到塊地就正喇,聽講你師父師傳咗一套道術神功,而呢套神功就係喺間茅屋度,我想要呢套道術神功好耐嫁喇。」

「道術神功!?我跟咗師父半年嚟都未聽過任何有關你所講嘅「道術神功」噃,你會唔會攪錯呀?或者…你整返醒我師父,問吓佢老人家丫。」

「你當我傻架?佢醒返,我咪功虧一簣。」

「佢冇當你傻,係你當我傻啫。」

師父突然醒返…

「師父,你冇事喇?」

「頭先邊個話我有體臭同老嘅話?」

「吓!?係條大奸狗囉!」我望住師父,指住「高瘦男」。

「衰仔,學人卸膊。」師父拍咗我個頭一吓。

師父醒返就好喇,拍多兩吓都冇所謂。

「我諗住快D知道你哋咩葫蘆賣咩藥,所以就嗱嗱林搵個位俾你哋以為自己得逞啫,扮暈中你哋招,我諗應該係最快呃到你咩都講晒出嚟嘅方法。」師父咁講。

「但係…但係…但係你冇可能睇到碗麵有蒙汗藥嫁喎,如果我冇落,咁你嘅暈咪太明顯係扮嘢嫁囉。」

師父搲搲頭,望一望上,好似諗一諗嘢咁,之後答︰

「講真,你即使冇落藥,甚至我冇食到碗麵,你見到我暈咗一段時間,你咪一樣會行出嚟講頭先D嘢。」

「高瘦男」好愕然…

「高人,果然係高人,難怪我哋呢D小術士…真係做唔到高人你咁嘅境界,但係小人真係好想有機會見識一吓高人你師承嘅道術神功,唔知有冇機會見識到呢?」

「我問你幾樣嘢,你答完我先,答案都啱我心水嘅,就俾機會你睇吓啦。」

「咁高人請問。」

「你老闆,帶咗幾多人去我茅屋?你老闆,點解要請你?你老闆,附近係咪真係有鬼怪出現?」

「小人唔敢隱瞞高人,我家主人係帶咗二十人去高人嘅茅屋,而我家主人請我係因為我識捉邪治鬼之術,仲有,其實附近的確係有鬼怪出現,後山森林其實我家主人一直 都想去奪取,但係曾經試過派幾百人去諗住伐木鏟平嗰度,結果冇一個人返到嚟,所以我家主人都打消咗呢個念頭,轉移去奪取高人你嘅茅屋,請我亦係因為我家主 人怕鬼怪攪到落嚟我哋呢條村啫。」

「哦,都算你知機,我估你都唔敢呃我。襯天未黑,我哋去後山睇睇啦。」

之後,我哋一行三人就一齊行咗去後山,「高瘦男」帶路,我倆師徒就行後…

「師父呀,你唔驚呢個大奸狗係呃你咩?仲有啊,你唔使理間茅屋喇?」

「呃我!?佢夠資格咩?佢郁起條尾我都知佢想點。仲有,佢頭先一段說話裡面冇斷斷續續,而佢講嘅嘢最後嗰段,我肯定佢冇講大話。因為呢個山頭本嚟就好猛鬼,因 為呢度係山墳嚟,亦係出名嘅「百鬼墓」,亦係我想嚟呢邊睇睇嘅原因之一。至於間茅屋,你師兄如果保唔到我間屋嘅,以後就你做師兄!」

「吓!?我做師兄!?」

「你師兄好似你咁大就已經一個打五個大人喇,而家我估佢以一敵百都冇問題,二十條友仔冇可能係佢對手,仲有,佢如果真係唔夠打都冇問題,用我教佢嘅掩眼法就得,佢一定有足夠能力保護到我間茅屋,如果保唔到,都唔係我唔要佢做我徒弟喇,到嗰時,佢俾人打都打死喇。」

「咁師兄咪有危險?」

「放心啦,如果個員外有D真係咁勁嘅手下,就唔使去搶我間茅屋,佢都嚟咗呢邊攪掂呢個山頭先啦。」

「嘩,諗得咁深入同複雜嘅,師父你真係好叻啊!」

「唔係你估。」

之後我哋三個人行到去一個地方,一望上去…

竟然有幾十副棺木喺石崖牆身度…

「師父,呢度就係「百鬼墓」喇?」

「唔係。」

師父望來望去,「高瘦男」都覺得好奇怪咁,而我就唔知發生咩事,所以…

「即係點啊,師父?我哋嚟錯地方定係點啊?」

「呢度有D問題,有人喺近「百鬼墓」嘅呢度練緊屍。」

「練屍!?即係會點嫁。」我唔驚,反而顯得好雀躍。

「細路,死屍噃,練完之後仲會識行識走噃,你唔驚咩?」「高瘦男」問。

「車,你知唔知我係邊個丫?」

「邊個咁巴閉啊?」

「好話喇,火鳳派傳人第二大弟子,陳,鳳,初!」

(待續)

下集預告︰

我叫陸瑞基…
已有 0 人追稿