第四集 ~ 雞︰英咩美男人啊!?殭屍好肉酸啊!

上回講到,師父發現有人喺「百鬼墓」度練緊屍…

「練屍!?即係會點嫁。」我唔驚,反而顯得好雀躍。

「細路,死屍噃,練完之後仲會識行識走噃,你唔驚咩?」「高瘦男」問。

「車,你知唔知我係邊個丫?」



「邊個咁巴閉啊?」

「好話喇,火鳳派傳人第二大弟子,陳,鳳,初!」

我連個初字都未講完啫,師父就兜頭拍埋嚟…

「衰仔,好叻咩?咪又係要放火鳳派喺前面,仲要咩咩咩第二大弟子咁,我得兩個徒弟喳嘛,細徒弟仔就細徒弟仔啦,仲要大大聲講自己個全名添?鳳咩初啫,雞仔就雞仔啦。」

「師父啊,鳳凰細個都係鳳凰嚟嫁,做乜成日叫人雞仔噃,攪到人哋冇晒霸氣。」



「霸氣要嚟做咩呀?從來霸者都係慘死嫁,要做就做皇者,雞有咩唔好啊?精精神神,鶴立雞群。」

唉,師父成日都講呢句嘢,其實佢知唔知「鶴立雞群」點解嫁?而家佢明明就係叫緊我做「雞」啊。

「高瘦男」好驚訝咁望住我哋倆師徒…

「做咩啊?你想點啊?」師父問「高瘦男」。

「哦哦…我…冇…只係覺得高人真係高人,連個徒弟都咁叻,好犀利,我咁細個嗰陣,見到鬼啊屍啊,淨係識驚嫁啫,點會好似小師父咁嫁。」



嘩,呢個「高瘦男」丫,竟然改埋口叫我「小師父」添。

「你都係做呢行嫁啦,你而家見到咁,你覺得應該點做丫?」師父問「高瘦男」。

「真係唔敢班門弄斧,不過我諗我會襯時間仲早,起一條屍嚟睇睇囉。」

「咁你起丫。」

「吓!?真係起呀?」

「咁你都覺得應該咁做囉,點解唔起啊?」

「Eee…好,就最低呢個棺材嚟睇睇啦。」

「高瘦男」講完呢句就行咗埋最近我哋嘅棺材度…



但係…

佢想點攞個棺材出嚟啊?個棺材好大副吓嫁喎,仲要嵌入咗石崖裡面添…

我見住佢…

一手噤住咗個棺材,之後…

「虹吸之術!」

「哼~」係師父一吓不齒嘅聲音。

但係完完整整一副棺材俾「高瘦男」扯咗出嚟…



「虹霞門。」師父咁講。

「丫,係啊,高人,小人係虹霞門嘅弟子。」

「高瘦男」嘅過份恭敬,真係有D乞人憎。

「弟咩子丫,喺我面前唔好扮嘢,我最憎人扮晒嘢咁,你叫高秀藍,係虹霞門大弟子,俾你師父洪連夏趕咗出師門兩年倒啦,啱唔啱啊?」

我好驚奇…

唔係因為呢個「高瘦男」都似乎係高手,而係驚奇佢點解…

個名咁完整地形容佢嘅外表。

「雞仔,教你D江湖嘢…」



「哦,師父。」

「七彩八扇,江湖上有七個門派都係捉邪捉妖嘅名門,分別係,虹,鏟,皇,錄,清,蘭,子,D人攞個諧音就老作佢哋係「七彩」,至於「八扇」就係講緊八個邪 術士,當中我冇記錯只有三個鍾意用扇,但係就俾人老屈稱之謂「八扇」,呢個高秀藍就係七彩裡面嘅「虹」,虹霞門嘅大弟子,虹霞門出名嘅係一吸一放嘅內 功。」

「高瘦男」露出尷尬表情…

「高人,果然係高人,真係眼利,只係睇我用一招就知我係乜水。」

我理得佢係乜水丫,反而…

「師父呀,其實…」

「有屎就屙,有屁就放啦,做乜鬼嘢好似屙唔出咁啫。」



「點解…你突然好似變咗做神仙咁嘅,我跟咗你半年嚟又唔覺得你咁唔正常噃。」

「你就唔正常。江湖術士一般都要有D自己門派嘅獨門絕技先可以喺江湖立足嫁,唔係學咩人開宗立派啊?」

「但係你哋似係識打交多過識捉鬼噃。」

「你估捉鬼咁易呀?妖,魔,鬼,怪,精,屍,人,靈等等等等,樣樣嘢都要落手落腳對付,唔打得點對付佢哋啊?所以講真,學道之士本嚟就閒閒地要一個打百九幾個,唔係做咩收你師兄做徒弟啊?又使乜鬼你日日紮馬練功啊?你估師父真係食飽飯冇嘢做等屙呀?」

「係啊,小師父,我細個時候都係日日練功嫁。」「高瘦男」突然插口。

嘩,佢竟然敢插口,肯定未試過俾我師父敲個天靈蓋。

「我教緊徒弟又關唔關你事啊?開你嘅棺材啦!」師父好兇啊!

「係,係。」

「高瘦男」兩手噤住棺材蓋…

「虹吸之術!」

我真係有少少想鬧佢,推開咪得囉,嗌乜差嘢「虹吸之術」啫。

但係…

喺呢一刻…

天空突然風雲色變…

「哼,竟然有人想以卵擊石,仲要係一條懵卵!」師父突然咁講。

「懵!?睇吓點?」「高瘦男」個樣突然變得好奸。

「我仲以為你會識驚添,估唔到你真係會撩我打你。」

「錯喇,高~ 人~,你要打嘅係呢條用咗好多陰氣練出嚟嘅殭屍啊,哈哈哈。」

「有咩好笑。」

(嘭~)

突然,棺材嗰邊有D嘢彈咗起身…

「一般嘅殭屍未必夠你打,但係…哈哈哈,虹吸吐霞之術!」

「高瘦男」一吸一呼,好似將一D力量灌入殭屍當中…

而且,殭屍郁喇,佢一另個身過嚟,我就見到佢…

面爛口裂,當中仲要濕淋淋咁,唔知係血水定係乜,好嘔心啊!

「教你嘢啦,衰仔,打殭屍基本功,係閉氣,隱身咒冇效嘅,佢唔係用眼睇,要真係當佢人咁打,不過佢身體會超硬,因為佢係凍到僵硬嘅,所以要你自己變熱,至於變熱嘅方法,喺我哋門派就簡單啦,所以打殭屍係我哋門派強項,你去打啦!」

「咩話!?我去打!?唔係你去咩?」

「哈哈哈,仲以為火鳳派傳人係咩高手添,原來只係下三流術士,仲要推個垃圾徒弟出嚟死,廢物師父廢徒弟。」「高瘦男」串串貢咁話我哋倆師徒。

我冇理佢,淨係即刻跟師父教過我嘅嘢去做…

「馬要實,腰要直,手要定,掌要形,勢要強,氣要穩,心領神匯…」

「噏乜差嘢啊,殭屍,上!」

「火從拳掌而生,鳳凰擺駕!」

(待續)

下集預告︰

天靈靈地靈靈,地藏神請上來…
已有 0 人追稿