米米蓮妖怪作品 -《再遇見到你》(長篇) (暫停刊): 第八集 ~ 鳳︰神劍！？咪又係呢D招數…搵返條余二十先啦。

第八集 ~ 鳳︰神劍！？咪又係呢D招數…搵返條余二十先啦。

上次講到瑞基唔知因乜事離開咗我，淨係留低咗一幅唔知講乜嘅「雞圖」…

我嘗試過四圍搵返佢，但係都搵唔到…

最後仲搵到去城鎮大街添。

「哼，估唔到我陳鳳初痴情半生，到頭來第一次竟然衰咗喺一個後生女手上，究竟我係賺咗，定係對唔住我咁多年嘅痴情呢？哈哈哈哈…」





我傻咗咁喺街口自言自語，仲要喪咗咁自嘲大笑。

「抄你撈胡丫！沈魚飛拳！」

(啪~)

咦，嗰邊D檔口度好似有人打緊交噃。

不過我冇理，因為我知道，我而家最緊要係快D搵到余二十…





係條死木嘴攪到我返咗二十年前嘅呢度嘅。但係…

佢條友會唔會俾水沖咗去，或者死咗呢？

當我咁諗嘅時候，突然我見到遠處有個告示板，上面有張通告…

正確D嚟講，係張通緝令，我覺得突然嘅原因，我諗大家都可想而知…

就係通緝令上面嘅畫像，十足十就係余二十。





但係…

點解佢咁犀利，咁少時間就可以俾人通緝？唔通壞人真係要壞到出晒面成咁先得嘅？

「哼~」我喺心裡面無奈到黐肺咁笑咗一吓。

不過都好，起碼我知道佢應該離呢度唔遠，同埋仲未死。

最衰我而家冇晒靈力，請唔到神，問唔到地藏啦。

所以我只好…

「呢位阿哥，請問知唔知道呢個被通緝嘅犯咗咩罪啊？」

我問咗一個都係喺度睇緊個告示嘅男人。





「知我就唔使行埋嚟睇啦，仲有啊，你睇唔到上面有寫咩？你唔識字架？」

我本來好想正常地好似喺香港咁忍手，因為有法律丫嘛，但係…

一來呢度係大陸，二來呢度係二十年前，所以…

呢一刻我真係忍唔到手，我冇晒靈力啫，但係我拳力仲可以好大…

「串丫嗱？串丫嗱？」

(電視機前面嘅小朋友千祈唔好學)

我只係用我強而有力嘅拳頭鍚咗佢幾啖啫…





之後個男人正常地訓咗喺地下度，我就正常地繼續睇個通緝令…

「吓！？食霸王餐？」

原來余二十只係因為食霸王餐而被通緝？咁…唔通佢同我一樣冇晒靈力？

因為以佢嘅力量，絕對可以用邪術控制人哋，絕對唔使做到要被通緝咁坎坷。

唔知邊度嚟到個感覺…

我覺得應該係可以沿住呢個途徑搵到余二十…

我諗咗諗究竟二十年前有邊家食店可以咁惡，要求到當地部門發呢張通緝令呢？

無錯，就係佢，同係同行，「七彩八扇」，「七彩」裡面嘅「鏟」，鏟家客棧。





之後我立即問路人鏟家客棧喺邊，嗱嗱聲就去咗嗰度…

「店小二，請問一吓，係咪早前有個人食過霸王餐，所以你哋客棧報咗…警嫁？」

「店你媽個小二咩？服務員啊，一百年前呀？呢度日日都有人食霸王餐咁滯啦，鬼知你講邊個呀？」

我之後亦都好正常地引領佢到一旁，再用拳頭嚟錫錫佢。

真係唔明，二十年前嘅人點解都係咁嫁咩？我印象中好似唔係嫁喎。

「請問金產權喺唔喺度啊？」我再向另一個職員問。

鏟家客棧其實係間食店嘅名，並唔係真係一間客棧，佢嘅分店遍佈各地，係家族生意嚟。鏟家有個傳統，就係唔知由邊代開始，所有男性都會以「金產」二字開頭造名，其實佢哋係姓金嘅。我冇記錯嘅話，而家掌權嘅應該係叫做金產權。





「你講我哋老闆啊？今日係…哦，佢應該去咗修練啊。」

修練二字對我嚟講一D都唔覺得奇，因為當年我早有聽聞，金產家有個習慣，就係每逢某D日子就會去深山修練，估唔到今年今日，都已經咁有錢，仲會維持到呢個習慣啫。

「呢位有禮貌嘅老兄，其實我係想搵早一段時間，嚟過呢度食過霸王餐，一個又長又瘦又樣衰，一見到佢就想打佢嘅人啊。請問聲，你知唔知佢去咗邊啊？」

「知就好喇，我哋就唔使搵人通緝佢喇，你講條友我記得，佢條友偷咗我哋鎮店之寶，我哋用食霸王餐嚟做藉口都係唔想俾老闆知咋，而家都唔知點算。咦，老兄，你識佢架？」

「Eee…殺父仇人。」

「咦，咁我哋咪同仇敵愾，我係呢度店長，見你咁慘，請你食碗麵啦。」

店長同店員真係唔同D，抵佢做店長嘅，我恭敬不如從命，就坐低咗…

一邊享受食物，一邊諗吓其他方法去搵余二十。

「老兄呀，頭先你講嘅鎮店之寶，介唔介意講俾我聽係咩嚟嫁？」

「人蔘囉。係呢，老兄，你頭先嚟嗰陣見唔見到我哋個職員啊？條友唔知係咪又去咗偷懶呢？」

嘩，聽到呢句，仲唔走夾唔抖咩。

「唔知，多謝，走先！」

我衝咗去大街，突然…

有條唔知乜水嘅後生仔大嗌︰

「方家大少爺徵婚，有意嘅妙齡少女好快D去喇喂！」

咩呢個年代仲有人徵婚嫁咩？仲要男人徵女人，咁奇怪咁嘅？

我見無聊又未諗到要去邊搵余二十，所以就行咗去湊熱鬧。

(待續)

下集預告︰

比武招親？黐孖筋…