米米蓮妖怪作品 -《再遇見到你》(長篇) (暫停刊): 第十集 ~ 雞︰我心愛嘅師姐出現喇！
第十集 ~ 雞︰我心愛嘅師姐出現喇！
上次講到仙女姐姐出現咗喺我面前…
之後師父出咗嚟，講咗幾句就帶咗仙女姐姐入茅屋坐低…
而我…
就一直眼甘甘咁望住仙女姐姐…
「你而家係我徒弟喇，咁我可唔可以問吓點解你咁想做我徒弟呢？」
「我頭先講咗囉！我有我嘅原因，你教晒我你識嘅嘢就得喇！」
「我識得尊師重道噃，你係咪真係想學嫁？」
「我要捉邪治鬼嘅能力啊！」
「哦~~~ 咁少則兩三年，大則幾十年，你有排學噃！」
「冇D速學嘅方法咩？」
「有，不過冇速教嘅方法囉。」
「總之我有錢，我就係要好快好快咁學識捉鬼！」
「哦。」
之後師父竟然…
推咗我埋仙女姐姐度，而仙女姐姐亦都好自然反應咁攬住咗我…
我當然面都紅晒啦。
「恭喜你，你捉到喇！」師父講。
「攪乜嘢啊？我要捉鬼啊！」
「頭先我咪講過我個徒弟係奀皮鬼囉。」
「我要捉衰鬼啊！」
「阿達，出嚟俾佢捉！」
「我要捉惡鬼啊！」
「要幾惡？」
「好惡好惡啊！」
(嘭~！)
「八婆，即刻同我躝屍趌路！」師父拍檯鬧人。
大家當場嚇到呆咗，我都未見過師父咁惡，唔通師父真係發脾氣？
「咁…唔知夠唔夠惡呢，徒弟妹妹？」
師父突然轉晒面口，變到好和藹可親咁同仙女姐姐講。
大家都表示無奈，仙女姐姐呆完之後就回答︰
「係…係…係咁喇，隻…隻惡鬼…嗚嗚嗚嗚嗚…」
仙女姐姐仲喊起上嚟。
我見到佢咁，我都忍唔住喊埋一份。
(啪~) 師父拍我膊頭。
「男子漢大丈夫，流血不流淚！」師父係同我講。
「你終於肯講喇咩？講晒出嚟先啦，師父會幫你處理。」師父轉向仙女姐姐問。
「我…我親眼睇住我嫲嫲俾隻惡鬼咬死咗…嗚嗚…」
「鬼！？咬死人？你會唔會係見到殭屍啊？」
「殭屍！？」
「徒弟妹妹，你先解答我三樣嘢，第一，你嫲嫲條屍而家喺邊？第二，點解當時你會冇事？第三，點解會得你一個嚟搵我，D大人呢？丫，仲有添啊，點解你想跟我學法，而唔係請我去處理？」
「嫲嫲條屍喺我屋企後山個家墳度，我冇事係因為爸爸都在場，隻惡鬼俾佢哋打走咗，至於我點解一個人嚟，係因為爸爸其實唔俾我搵其他人幫手，仲有，我想跟你學法，係因為我想親手幫嫲嫲報仇同埋唔可以俾我爸爸知，爸爸好反對我搵其他人幫手嫁。」
「哦~ 睇你一身裝扮，再聽你講話你爸爸唔俾，咁我應該大概估到你係邊條友個女喇，你應該唔係「七彩」裡面嘅 「鏟」，「鏟家客棧」大老闆金產權嘅女，就係「皇」，所謂嘅皇族後裔，朱投秉嘅女，你係邊個個女啊？」
仙女姐姐呆咗咁望住師父，好似好凝重，仲好似嬲嬲地咁…
「我爸爸叫朱謀秉，唔係朱投秉，謀係謀略個謀，秉係秉承個秉，有秉承前人謀略能力嘅意思嫁。」
「哦~ 我知啊！」
「你知又叫佢豬頭丙？」
「我係要叫佢豬頭丙啊，你唔俾我叫，我偏要叫，你唔跟我叫，我就唔教你嘢。」
「Mmm…咁…咁…」
我見到仙女姐姐有口難言，受盡委屈咁，所以…
「師父呀，唔好咁啦，你唔係成日教我要尊重人哋咩？唔好咁話人哋爸爸啦。」
「衰仔，手指拗出唔拗入，你信唔信我以後都叫埋你做豬頭丙丫嗱？你哋講丫，今時今日佢呢個門派仲係傳男不傳女，到佢呢代都唔肯改，你話佢豬唔豬？家族世代 傳承嘅「金身布衣」，因為傳男不傳女，而家淨係得返佢自己識，你話佢豬唔豬？而家都仲咁迂腐，自己唔教，仲要唔俾個女去第二度學嘢，你話佢豬唔豬？佢唔係 豬頭丙係咩啊？」
我望望仙女姐姐，佢嘅表情都好似某程度上認同咗咁，而且仲報以一對渴求高人指點嘅眼神望埋師父度…
「我…我淨係想為我嫲嫲報仇咋，師父，你可唔可以幫我啊？」
「你係有心學嘅，我可以教你，當係串吓你老豆都好，但係你要親手報仇嘅話，首先，我唔希望人一直有仇恨埋喺個心度，咁樣會好唔開心，不覺對手係鬼怪就算啦，仲有，要親手報仇嘅話，我可以同你講，冇返三五七年係冇可能，咁你仲想唔想學？定係返去同你老豆去捉隻嘢就算？」
「我…我想學！請師父你教我。」
「好，叫聲師父同兩位師兄先啦！我出一出門，如果想今日就開始學嘢嘅話，問住師兄先。晏D我返嚟，再同你去案發現場睇吓。」
講完呢句，師父就出咗門。
「Eee…師妹呀，你想學咩啊？睇吓我可唔可以教到你。」我向仙女姐姐咁講。
「你！？唔使喇，我只係想學師父D嘢，仲有，我明顯比你大，以後你唔該叫我師姐，唔係我唔會睬你。」
「哼，大小姐脾氣。」呢個係師兄喺廚房到講嘅。
至於我，我唔理佢係師姐又好，師妹又好，我只在乎佢睬唔睬我，所以…
「咁師姐你想學咩丫？我可以幫到你嘅我一定幫你。」
「咁你識D咩丫？捉鬼你識咩？我驚你見到鬼，尿到瀨埋啊。」
「此言差矣，我自懂性以嚟，未曾瀨過尿…」
「淨係瀨過屎啫…」師兄又多口。
「師兄！」我當然大嗌，制止佢再誣衊我。
「師姐，你等等我。」
我喺褲浪度攞咗本筆記出嚟，仲打開俾師姐佢睇…
「師姐，呢D就係我捉邪捉鬼嘅記錄喇，我最叻嗰次就係用我嘅…神劍嚟打敗咗虹霞門被遂出師門，而且仲走火入魔嘅大師兄高秀藍喇！」
「屎，眼，神…」師姐睇住我本嘢D字讀出嚟。
「哦！我寫得樣衰啫，其實係我想寫…屍眼神劍，屍係殭屍個屍，意思係…我嘅神劍專係追住妖邪隻眼去攻擊嘅…」
「嘩，師弟，係威噃！咁都俾你講得通…」師兄再插口。
「師兄！」
「師姐呀，唔使理佢，神劍就教唔到你喇，因為男性專用嘅，女性用有D失儀態，不過我可以教你鳳凰擺駕！」我連動作都做埋。
「嘻嘻，你好攪笑，不過唔使喇，我等師父返嚟就得，我都出一出去，應該會比師父快返嚟嘅，如果師父真係快過我返嚟，師弟你就同佢講聲我好快返啦。」
「哦。」
師姐講完就走咗…
好奇驅使我想跟佢尾去睇吓…
「師兄，我出一出門！」
「你咪出囉，關我鬼事咩。」
我一直跟住師姐，經過大街，穿過窄巷，終於嚟到…
「虹霞門！？」
師姐入咗去裡面做咩呢？
好奇再次驅使我再去做D瘋狂嘅嘢，我偷偷地由狗窿入咗去虹霞門…
我見到師姐同…虹霞門幾位師兄…
「喂，我想搵你哋虹霞門嘅掌門！」
「師父唔喺度噃，靚女，有咩貴幹呢？」回應嘅係新任虹霞門大師兄高傲正。
「關你哋咩事，佢幾時返？」
「你咁冇禮貌，我真係唔想答你噃。」
「我有錢，咁答唔答？」
「哦~ 有錢就好辦事啦，師弟閂門，放…狗定殭屍好呢？」
「殭屍啦，師兄，我哋啱啱學識控屍術，玩吓都好嫁。」高傲正嘅師弟回應。
「你…你哋想點啊？」師姐已經有D驚慌。
「錢你估我哋冇咩？我亦唔信你一個女仔可以俾得起幾多錢我哋。你咁冇禮貌，我哋唔教訓吓你，我諗你唔知死，好啦，師弟，放殭屍阿布出嚟。」
「係！」一個師弟回應之後，走咗入內堂。
成班禽獸就淨係企喺度奸笑，師姐就想走，但係俾其中一隻禽獸阻止…
(噗~~ 噗~~ 噗~~)
突然，內堂跳咗一條屍出嚟，個樣唔算恐怖嗰隻，只係一般面青口唇白，但係…
足已嚇親我心愛嘅師姐…
「唔好啊！唔好啊！救命啊！」
「你求我哋放過你先啦，唔係唔使旨意我哋放你走。」
喺呢個時候，我諗係我出場嘅最佳時機喇！
我斯斯然咁行出去…
「師兄們，唔使咁嘅，我師…妹嚟問侯吓你哋師父佢老人家啫。」
「哼，雞仔！？你出嚟做架兩呀？你師妹？做咩嚟我哋度攪事啊？」
「冇攪事丫，我師妹佢講嘢直接啫，咁我哋而家走得未丫？」
「走！？柴米油鹽醬醋茶都有，就係冇酒。」
「咁師兄們想點丫？」
「你哋鳳派咪好勁嘅，我就想睇吓你點對付到我哚嘅隻殭屍。」
「哼，你哋大師兄我都未驚過，會驚你哋？放馬過嚟啦！」
「哼，殭屍上！」
「鳳凰擺駕！」
(嘭~！)
「咩話！？真係咁勁嘅？」虹霞門弟子甲。
「一吓咋喎，我哋隻殭屍…師兄…」虹霞門弟子乙。
「係囉，唔係呀？Eee…師弟，放埋，殭屍阿哥同殭屍阿倫出嚟！」
我就當然趾高氣揚，喺師姐面前威威噃！
(噗噗~~ 噗噗~~ 噗噗~~)
又兩條死屍跳咗出嚟…
「火鳳炎鱗！」我近排先學識，用嚟一個打幾個嘅。
我一下子又將兩條死屍打到訓咗喺地。
「哈哈！」
「師兄，點算啊？好瘀噃！」弟子甲。
「Eee…」
「師兄呀，佢識術先打到殭屍啫，不如我哋還原基本步，圍毆佢啦。」弟子乙。
佢哋班禽獸，真係連禽獸都不如，能力唔夠人勁，竟然一齊出手打人…
佢哋一湧而上，我一個人點打咁多個丫，我就只有…
保護好師姐，任佢哋每拳每腳都打中我…
「唔好啊！唔好啊！」
「停手！」突然有人大嗌一聲。
但係佢哋都冇停到，仲繼續向我拳打腳踢，之後…
(呯~！ 嘭~！ 龐~！ 叭~！)
一個英雄出手，將佢哋班打靶打到一仆一碌…
而我就一早已經口腫面腫…
「師弟，你冇事丫嘛？」
原來「英雄」係師兄。
「師兄，你睇我個樣似有事咩？」
「仲死撐！？好嘢，男子漢大丈夫。」
之後，師兄帶住我同師姐離開呢度，返去茅屋…
「多謝你啊，雞仔。」呢句嘢係師姐第一次用相對有禮貌嘅語氣同我講嘅嘢。
「不過頭先你做咩喺人哋面前叫我師妹啊？等我唔睬你先。」
「唔好啊，我唔敢喇！」
「嘻嘻，講笑咋。」呢個係師姐第一次對我笑，其實師姐都唔係咁難相語啫。
「衰仔，出親門都衝禍嘅，好在我煮好飯，驚你出事嚟搵你咋。」師兄講。
「係呢，師兄，點解你咁好打嘅？」我問。
「仲講打？我諗師父好快就會知，一陣返到去你就知死。」
(待續)
下集預告︰
咩話！？我都係第一次見女人做地藏咋…