第十一集 ~ 鳳︰我討厭嘅余二十出現喇!
 
上次講到我搵唔到瑞基,所以去搵咗余二十先…
 
點知又係未搵到佢,見有人大嗌︰
 
「方家大少爺徵婚,有意嘅妙齡少女好快D去喇喂!」
 
所以我就去咗湊吓熱鬧…
 


我去到個徵婚大台度,見到上面有堆女仔企咗喺度,高矮肥瘦樣樣齊…
 
就係冇個靚嘅。
 
「嘩,好多靚女啊!」
 
我身邊D人都咁講,我開始懷疑係咪我自己D審美標準有問題,但係…
 
最少我覺得我嘅瑞基靚過晒佢哋丫。
 


「嘩,嗰個女仔好靚啊!」
 
我跟住呢條誇張派去望一望…
 
的確見到一個幾靚嘅女仔,但係…
 
呢個女仔個樣好妖邪,一睇就知唔係正經女仔…
 
如果喺香港砵蘭街,我估佢一定俾人問價。



即係佢個樣似妓女,香港叫做「雞」,仲有個俗稱叫做「企街」。

「大家話,我係咪靚過晒佢哋啊?」「企街」咁問。
 
「係!」一群「狗公」大嗌。
 
「咁我而家改改呢度個規則,大家會唔會遷就我啊?」
 
「就!」
 
「而家改為比武招親!有冇人要上嚟?」
 
「有!」
 
「我問挑戰我嘅人噃,唔係問你哋呢D靚仔啊,仲有邊鬼個敢上嚟啊?」


 
「鬼!」
 
班狗公語無倫次,擺明撞邪,「係,就,有,鬼」四個字都講到出晒口嚧…
 
我冇晒靈力都知此地不宜久留,所以我嗱嗱聲就走咗。
 


去到一個荒野郊區,要搵嘅就係一棵靈樹…
 
所謂「靈樹」,其實係粗碌嘅大樹,靈力強大先可以孕育大樹成長…
 
所以越大嘅樹儲存靈力就會越多…
 


靈嘅力量其實一直喺人類嘅身邊游走,就好似電波或者空氣一樣…
 
學術學道之人亦都一早跟住時代進步,將技術都提升咗。
 
我講咁耐,其實係想講一樣嘢…
 
就係我一早將我十分之一嘅靈力用地端技術,英文名iLand,儲存喺大地…
 
到要用嗰陣,只要搵到一棵靈樹去提取就得。
 
終於,我喺郊外搵到呢棵靈樹,亦提取返我十分之一嘅靈力。
 
靈力提取之後,當然…
 
就係要用啦。


 
「天靈靈地靈靈,地藏神快上嚟!」
 
(焦~!) 地藏神喺地下標咗出嚟。
 
「地藏兄,終於見到你喇,我太開心喇!」我開心到忍唔住攬咗埋去。
 
但係…
 
點解個心口咁頂嘅?
 
「男…男女授受不親,我係女性嚟嫁,唔該自重吓。」地藏神竟然咁講。
 
「咩話!?我都係第一次見女人做地藏咋。」
 


「我夠第一次見有男人會攬地藏囉。」
 
「係嘅,係嘅,對唔住,地藏女神。」
 
「仲有,下次唔該唔好再天靈靈地靈靈,呢招好耐冇人用喇。」
 
「哦,咁…請問地藏女神你知道西斜余二十喺邊啊?丫,順便問吓,你又知唔知有個叫陸瑞基嘅女仔去咗邊?」
 
「余二十個名咁難聽,一講我就記得前排睇過佢D資料,佢應該早幾日離開咗我負責嘅呢區,去咗隔離個大城度,陸瑞基就…聽月老講好似將會嫁俾方家大少爺。」
 
「嫁俾方家大少爺!?月老佢攪咩啊?佢…佢…」
 
「佢咩啊?」
 
「瑞基佢係我女人嚟嫁!」
 
「你女人!?真係枉我…」
 
「枉你!?」
 
「冇嘢喇,你去死啦!」
 
之後,地藏女神走咗。
 
咦,點解佢會同月老傾瑞基D嘢嘅?
 
雖然我覺得地藏女神似曾相識,對住佢嘅嗰個感覺好奇怪,但係我都係決定咗…
 
先唔理佢,去搵咗余二十先…
 
唔係噃,都係搵返瑞基先,唔係噃,我同佢有緣無份,根本唔同世界…
 
唔應該繼續糾纏落去,而家佢嫁咗俾有錢人家,應該可以快樂嘅…
 
(我但願~ 他珍惜妳~)
(愛可一生一世永沒盡頭~)
(不要我~ 內心輾轉~ 無盡無盡掛牽~)
(愛妳卻未開口~ 寧願像現在是好友~)
(願妳開心~ 偶然想到我~)

 
都係唔好,都係唔好,唔好再諗起我喇,你快樂就好,我都係去搵余二十算喇。
 

 
我即使有千萬個唔捨得都好,始終雙腳都係引領我離開咗瑞基…
 
去到余二十應該喺度嘅呢個大城度,蓮花山鎮…
 
「請問…」
 
我又打探咗一輪…
 
終於知道余二十嘅下落。
 
佢原來去咗「七彩」裡面嘅「蘭」,蘭花山莊嗰度…
 
究竟佢想點呢?
 
我一個人慢慢行到去蘭花山莊嘅門口,見到一個老人家…
 
「請問…有冇一位叫做余二十嘅人嚟過啊?」
 
我本來預咗人哋又係唔知我講緊邊個,但係…
 
「你搵余英雄呀?請嚟呢邊丫,余英雄咁啱同我哋主人喺大堂傾緊計。」
 
呢一吓,真係嚇親我,感覺真係好奇怪…
 
點解佢會變咗做英雄?仲要同蘭花山莊莊主花米蘭傾緊計?
 
呢位老兄帶咗我去大堂…
 
「余英雄,呢位先生係咪你朋友啊?佢嚟搵你嫁。」
 
我望一望呢位老兄所講,而家坐咗喺度嘅余英雄,但係…
 
佢冇鬍冇鬚,亦唔醜樣,仲有幾分英俊添…
 
「鳳初兄!?」
 
佢竟然叫得出我個名?
 
「坐低一齊傾吓計丫,呢位花米蘭莊主,呢位陳鳳初,鳳派高人。」
 
「鳳派!?傳人唔係江雲林咩?」花米蘭講。
 
「江雲林係佢師父,佢好後生嫁咋,佢個樣老啫。」余二十講。
 
「原來如此,陳兄,你好,請坐丫。」花米蘭同我講。
 
雖然兄前兄後真係好難頂,但係我又冇理由叫人老弟啊,細佬啊咁架…
 
所以我坐低咗,跟埋大家咁互相稱呼…
 
「唔好意思,我想問…你真係余二十!?」
 
「哈哈,如假包換,貨真價實,西斜余二十是也。」
 
「花兄,你冇理由唔知西斜係邪術之士,點解會同佢同流合污?」我問花米蘭。
 
「我唔知咩邪術士,我只係知感恩圖報啫,余兄就啱啱幫我解決咗一隻妖邪,仲救咗我一莊之寶。」
 
「你花米蘭本來就係出名嘅高手,竟然要佢出手幫?」
 
「慚愧,的確係要余兄出手相助先可以解決,因為對手係「八扇」之一,鐵扇神臂車魯毛,如果淨係得我一個去對付佢,我諗最多打個平手。」
 
「車魯毛!?點解佢又要攪你啊?」
 
「實不相瞞,我家世代相傳,有把九曲追魂劍,名劍加劍譜,一直以嚟都有唔少人想打佢主意,所以間唔中就會有呢D妖邪之士會嚟攪事。」
 
佢講到呢度,我終於明白晒,九曲追魂劍,正正就係2000年余二十嘅絕技之一。
 
我亦估到呢個余二十應該係呢個世界嘅余二十,後生時候嘅余二十,並唔係我真係想搵嗰個。
 
至於佢識我,估計應該係因為佢識得後生時候嘅我…

依家擺明余二十就係要嚟呃花米蘭把九曲追魂劍,我冇理由袖手旁觀嫁啫?所以…
 
我用咗最簡單直接嘅方法去處理,就係直接講︰
 
「花兄,余兄先係最想攞你家傳之寶嗰個,千祈千祈唔好俾佢。」
 
「吓!?」花米蘭望住余二十。
 
「鳳初兄,點解要咁冤枉我啊?」余二十咁講。
 
花米蘭就望返住我。
 
「總之…總之我知道佢係想啦,我提就提咗你嫁喇,你點處理唔關我事,我走喇。」
 
我頭都冇另返轉頭就一口氣大步大步咁行咗出門口。仲喺門口嗰度…
 
「咦,先生你走喇?」之前嗰位老兄。
 
「老兄,你手上俾布包住嘅係咩啊?」
 
「我哋家主人嘅家傳之寶,九曲追魂劍。」
 
「俾余二十睇?」
 
「係啊,余英雄想見識吓。」
 
我希望盡我綿力去幫到佢哋啦。
 
「老兄,你聽我講,冇人係信得過嘅,包括你哋個余英雄,所以劍可以俾佢欣賞,譜就千祈唔好俾佢睇,記得。」
 
「吓!?但係…」
 
佢好似更加唔信嘅係我,所以我出此下策,講︰
 
「我其實係…佢嘅同黨…」
 
「吓!?你想點啊?」佢突然捉到把劍實一實。
 
「啱喇,就係應該咁,保護好把劍啦。我雖然係佢同黨,但係我哋而家傾唔掂數啊,我同佢反咗面,而家想一鑊熟,所以我得唔到都唔想佢得到囉,咁會唔會啱聽好多?」
 
「哦!」
 
我個人覺得我已經盡咗力,所以我都冇再理呢單嘢,出咗門,再去搵我要搵嘅余二十。
 
行返去大街,見都夜喇,咪去咗間茶樓度囉…

我用咗瑞基留俾我嘅錢,諗住食返個麵,點知…
 
我諗我呢世都估唔到嘅事情,就喺呢一刻,喺我面前發生咗…
 
「你條死蠢,食嘢唔做嘢,做嘢打爛嘢,同我快D執返好晒D嘢啊!」
 
本來一個茶樓老闆鬧一個職員只係一件好普通嘅事,但係…
 
我見到…
 
個職員好似係…
 
余二十!?唔通呢個先係同我一齊通過「幾何黑洞」嘅時空轉移嚟咗呢度嘅余二十?
 
下集預告︰
 
清林寺嘅大師,清明大師…
 
已有 0 人追稿