第十六集 ~ 雞︰大戰殭屍王,上集!

神通先生溜夜嚟搵我哋,我哋就溜夜跟住佢出咗去…

去到百鬼墓度,會合埋幾位高手,我哋就開始出發去搵殭屍王!

喺呢度,我仲認識咗百龍師兄添。

大家就係咁,一齊浩浩蕩蕩咁行咗去一條村…





(夜媽媽一堆麻甩佬喺度遊蕩就真~)

呢條村叫做「葵花村」。

人哋就係行嘅,而我就揀咗一種更方便同快捷嘅方法,就係…

碌前去…

仲訓咗喺地添。我坐返起身,直望前去,見到…





一大堆唔知做乜喺個地下執嘢食嘅怪人,佢哋仲要…

而家一齊另晒個頭過嚟望住我添。

佢哋全部雙眼發出血紅螢光,依吓依吓D牙,好似想食咗我咁。

但係佢哋真係唔知死,我係邊個啊?我係陳鳳初噃,佢哋真係當我傻仔…

我忍唔住手咪整個「火鳳炎鱗」佢哋嘆吓囉。





(焦焦焦焦焦~ 焦焦焦焦焦~)

帶有火焰嘅鳳鱗就係咁一支支咁俾我飛埋去佢哋度…

(其實係師父雞毛掃D毛嚟~)

我兩三吓手勢啫,就將佢哋攪掂晒,點知突然…

(嘭~!)

我身後面傳嚟一大吓爆炸聲!

仲有一堆爛肉飛埋嚟我身邊添…

我驚起嚟,想一個轉身就打埋去,點知…





(啪~)

俾條友一下打咗落後尾枕…

原來係師父嚟!

「衰仔,精精神神,鶴立雞群啊,後面有咁大隻嘢想攻擊你都唔知!」師父講。

「哦,多…謝…師父。」原來師父幫我打爆咗隻行屍。

師父打人真係唔係人咁品,求其一吓就打爆咗隻行屍,如果頭先打我嗰吓都係咁嘅話,我個頭肯定爆得。

「呢D行屍小怪,就俾你兩師兄弟玩吓啦,阿達!同雞仔去幫大家開路。」





「係,師父!」

呢度一條大直路,旁邊都係舖頭,我同達師兄就一路行前一路開路…

百龍師兄佢都幫埋我哋手,佢手執一把銅錢劍,一劍一劍咁拮死D行屍…

又幾好玩噃,達師兄就用佢自己嘅方法打妖,而我就…

喺褲浪度攞咗我收埋咗嘅師父牌藤條出嚟,附上「鳳凰擺駕」嘅靈力…

一鞭鞭咁打D行屍,爽啊!

「師弟,你死喇,你睇吓師父個樣,佢已經發現咗你偷咗佢條藤條喇。」

我掛住打行屍爽,邊理得咁多丫,返屋企先算啦。





我哋就係咁,一路打,一直向前行,好快啫,就到咗…

另一條村,「梅花村」。

呢邊冇晒行屍,原因係…

「久仰各位大名!」
「久仰各位大名!」
「久仰各位大名!」

一堆三山五岳嘅人行埋我哋班人度問好。

原來佢哋係另一堆學道之士,圍數都唔少嫁,有成過百人。





睇嚟呢度D妖魔鬼怪就係俾佢哋清晒。

估唔到呢隻殭屍王真係有D料,竟然有咁多道士慕名而來…

「估唔到連八扇之一,煽風點火臭八婆都會嚟噃!」師父對住一個女人講。

「周白波啊,不過雲林你想點叫我就點叫我啦,最多我叫返你八公啫,嘻嘻。」

「吓…你…我…我仲以為殭屍王單嘢你會有份攪出嚟添。」

師父突然樣都變埋,變得有D滑稽嗰隻。

「殭屍王有咩好攪丫,攪都攪你先啦,八公,嘻嘻。」

呢個女人真係好可怕啊,一幅八婆樣,仲好似好鍾意師父佢添。

師父怕咗佢,仲縮咗喺我同師兄後面,師父解釋話呢個女人除咗鍾意搬弄是非,小事化大,唱通街之餘,仲係地球少有會強姦男人嘅女人。

大家寒喧幾句之後,就再浩浩蕩蕩咁百幾人一齊鏟去估計就喺殭屍王嘅所在地…

下一條村,「菊花村」!

(呢個名好似有D…)

呢度好恐怖,滿地紫紫黑黑嘅菊花瓣,仲有勁多頭先嗰D咁嘅行屍,成個死城咁…

D道士見到周圍都係行屍就即刻衝晒出去打…

但係…行屍堆之中好似多咗一堆靈力好強嘅妖人…

「D招魂師俾殭屍王變咗做同類。」師父講。

「唔止添啊,D招魂師仲召咗唔少惡靈上嚟。」千龍前輩講。

「因為靈氣重,仲招惹咗唔少妖怪嚟添,嘻嘻。」周白波講。

「仲有…咆鴞啊!」百龍師兄突然大嗌!

一隻羊身人面,雙眼生喺隔勒底,老虎牙人爪嘅怪物撲咗埋百龍師兄度…

「黃龍金甲!」百龍師兄即刻用防禦術。

「啞~~~~~!」隻怪物嗌起嚟成個BB咁,好刺耳啊!

「紫龍神劍!」百龍師兄再立即以指代劍,直隊埋去怪物個肚度…

隻怪物當場彈開,冇再攻擊百龍師兄,而係轉去攻擊其他人…

「嘩,頂你丫,尚付﹑鴸鳥﹑豪彘呢D怪物都出晒嚟嘅?」師父講。

「咩嚟嫁?」我問。

「呢~ 嗰隻三個頭,六隻眼,六隻腳,成隻雞咁嘅就係尚付,有對人手嘅嗰隻雀就係鴸鳥,呢邊呢隻白毛豬就係豪彘…」

「嗰兩隻雞好核突啊!隻豬就…其實幾可愛丫…」

「可愛!?」

「哇~!」隻白毛豬突然擘大個口大嗌…

我當場嚇呆咗…

因為裡面有幾十層參差不齊嘅尖牙喺度,牙罅仲有人骨添。

我唔係驚,係覺得好嘔心。

「雞仔,仲可唔可愛啊?認真喇,要打交喇,阿達!旁住雞仔,師父去打大嘢!」

「係,師父!」達師兄回應。

呢度咁多高手,大嘅,勁嘅,樣衰嘅,當然由師兄處理啦!

而我就去咗打…

一隻一身車呔,但係白璽璽嘅妖怪!

「哈哈哈,小鬼,就憑你!?點對付我啊?」車呔怪大言不慚。

「如果我贏咗點先?」

「請你去法國,再送你一套贈品。」

「唔制,我要你做我…吉祥物啦!」

一時之間,我又唔太想去法國,又諗唔到要佢做乜好,所以咁講。

「吉祥物!?好,就同你打賭,你贏咗,我以後跟你。」

「好,接招啦,鳳凰擺駕!」呢次我將靈力灌注喺舊石度掟出去。

「橫中腰士啤呔!」俾車呔怪擋咗添。

「火鳳炎鱗!」我即刻再接招!

「兩腳一伸,連環車呔拳!」佢先訓低避開我嘅招數,再彈起身向我連環快打。

「火鳳麟牆!」一招新招,護身外層係火焰,可以轉守為攻嘅招數。

(嚓嚓~)

車呔俾我燒中,我亦立即再出招,我一躍而上,「鳳凰擺駕!」

為咗覆蓋面更大,呢次我攞咗師兄條底褲掟出去…

「哎吔!」車呔怪大嗌,但係其實佢喺擋到我呢招嘅,問題係…

「好臭啊!」師兄嘅體臭有師父一半功力。

係時候喇!我立即從佢下身跣到佢後面,再用我嘅必殺技!

「屍眼神劍!」上次同師姐講完之後,我就用咗呢個名。

我劍指一伸,夾於兩山之內,退不得,進亦難…
(為免太重口味,所以咁講,睇吓會唔會好D,希望大家明啦。)

適時…車呔怪另轉個頭嚟望住我,我驚起嚟…

既然…退不得,進亦難,亦只有一路可行,迎難而上啦!

我運勁於劍指,使力向前一推,車呔怪知痛,兩山崩開…

(呠~~~~~)

泄出妖氣…

當時嘅我係幾咁難受,大家可想而知,我差D就暈咗。

妖氣驅散之後,車呔怪突然轉變…

「多謝你啊!」變得懶精靈可愛,仲擺晒甫士,真係令人無奈。

「我叫米米蓮啊,以後我就跟定你喇!」

米米蓮變成一隻手抱毛公仔,坐咗喺我手上面。我望一望周圍,睇嚟大家都仲惡鬥緊,而我就可以專心睇師父佢哋嗰邊喇!

「殭屍王,你終於出嚟喇咩?」師父向住一個方向講。

一隻…好有威嚴,仲好霸氣,有成兩米高嘅殭屍喺地下泥土慢慢升上嚟…

「乜咁多人啊?點解人類總係唔可以同我哋共處嘅呢?」殭屍王講。

「一派胡言!」神通大師講。「就等我來消滅你,神掌!」

簡單而且直接嘅一招,神通大師一掌就打埋去。

但係呢隻殭屍王,一D都唔僵硬,仲好靈活添…

佢一吓…

「化屍掌!」一掌對一掌,完完全全對衡咗,佢哋就好似定咗格咁…

我襯有時間,就望一望師父,再望一望其他同我哋同行嘅四位高手。

兩個西方聖人就各執一本聖經,身體發出白光,白光再由頭頂飛出,自動自覺去攻擊鬼怪,有D屈機。

虫節大師就一吓雷一吓電咁,霹靂啪嘞,打到D鬼怪散晒,有D殘忍。

千龍前輩就,嘩!一件黃色道袍,手執幾件聖器咁,又劍,又八卦鏡,成個人發出金光咁一直打緊D鬼怪,好有型啊!

至於師父,佢…

竟然企咗喺我身邊食花生。(無奈)

「我納蘭以德重生,又點會咁容易俾你破壞我嘅好事啊?」

殭屍王原來有名,佢推開咗神通大師。

「喂,殭屍王,究竟邊個攪你返出嚟嫁?」師父大嗌。

「哼~!」殭屍王好似唔想應師父咁。

「你老祖丫,咁冇禮貌丫嗱,鳳凰火炎,出鞘!」

一把三尖兩刃嘅火劍喺後山標出嚟,就好似流星咁一吓飛埋去殭屍王度…

「混元屍氣!」

(嘭~!)

屍氣凝聚嘅能量爆開,但就抵擋咗鳳凰火炎嘅衝勢…

師父一吓跳埋去,舉手就握實鳳凰火炎,再…

「先祖之靈,天靈地靈,火鳳仙袍護身!」

師父嘅道袍突然變成火炎,仲好似鳳凰咁,袍尾變成鳳尾…

師父好型啊!

「鳳凰火焰槍!」

(待續)

下集預告︰

「好,紫青合一,青龍神劍!」
「鳳凰七重天,鳳凰破!」
「聖氣靈魂,通神掌!」
已有 0 人追稿