第十五集 ~ 龜︰「低域」佢竟然…;易面容佢仲帶埋個怪人嚟找我晦氣?

上次講到變臉大師易面容想害我同西施嬸嬸,好在有鳳初嘅力量保護我咋…

易面容俾鳳初嘅力量彈開咗,仲噴晒血咁,呢個時候仲突然嚟咗一個…

清明大師,佢哋兩個高手你一言我一句咁,其實都幾煩。

易面容知道自己已經事敗,所以走咗。



而喺呢個時候,我早年心儀嘅對象,方家少爺方帶銅「低域」佢行咗出嚟…

「媽,今日係咪幫我招咗親啊?」

「係啊,呢位小姐就係你老婆喇!」方夫人講。

「係,你好,我都有個洋名嫁,我叫龜匙。」我講。

「GRACE!?GREAT!幾好聽噃,你入一入嚟我房丫。」低域講。



我望一望大家,方夫人同僕人都呆咗冇表情,西施嬸嬸就竟然喺度淫笑,清明大師就一幅懶正經咁低頭「善哉」,而我對腳就好自然咁跟咗「低域」佢行…

我一個女仔跟住咗自己鍾意咗咁耐嘅男仔行,感覺真係…

我唔識形容,淨係知我諗諗吓已經去咗佢個房。

佢個房都幾大,有張圓枱喺中間,有幾張櫈,我入到去有D驚佢會帶我上床度…

所以立即就斜斜地背住佢坐咗喺圓枱度,而低域就坐咗喺床度…



「GRACE,我有樣嘢想請你幫忙,可能係有D過份,但係我…我真係想你幫我。」

「咩…咩事啊?」(唔會係想…想鹹濕我呱…)

「我想你同我做一對有名無實嘅夫妻,因為…因為我早就已經有個鍾意嘅人。」

(呼~)「係咁咋呀?冇問題丫!」

低域俾我嘅爽快嚇到呆咗。

而我根本淨係掛住鳳初,對「低域」,我個心就好似有一份永恆嘅仰慕一樣,再唔會開花結果,反而變成尊敬同尊重,所以我都想去盡量幫佢。

「係呢,介唔介意講吓你鍾意嘅人係點嫁?」

其實我係想試吓佢,因為聽方夫人講,低域之前應該係中過邪,俾鬼迷惑過。



「阿媽梗係同你哋講,話我俾鬼迷呀呢?」

「吓!?佢…方夫人的確係咁講過,但係…咩唔係嫁咩?」

「見你應承咗我,我就講你聽啦,其實我鍾意嘅…係阿媽。」

「吓!?方夫人!?你…你…」(戀母狂!?)

「好奇怪呀可?接受唔到呀可?我明白嘅。但係…但係其實佢唔係我親生阿媽,我親生阿媽生咗我落嚟就死咗。蔣盈,即係而家嘅方夫人,你所知嘅我阿媽,其實係 呢度另一家大戶人家嘅女,大約十年前,當時我十幾歲,情竇初開,而蔣盈佢廿幾歲,我第一眼見到佢就已經鍾情於佢,當時我阿爸都未識佢,我開始咗日日搵機會 去見吓佢撞吓佢,每日只要見到佢一面,我都已經好開心…」

佢講到呢度,我不禁覺得我同佢同病相憐,我差D仲回應咗句︰

「對你,我當時咪又係咁樣…」



「之後,阿爸因為覺得阿盈屋企嘅家業可以幫到佢賺錢,所以就娶咗阿盈,其實佢根本唔鍾意阿盈,佢對阿盈仲好冷漠,我每次見到阿盈偷偷落淚,我個心都覺得好 痛,我好想去保護佢,我明白係呢個時代,冇人會接受到個仔鍾意阿媽,阿盈都係一樣,其實我…我曾經同佢表白過,但係舊思想嘅佢,當然係拒絕啦,而之後佢亦 唔敢再同我單獨相處,甚至唔理我,所以我出此下策,扮中邪,等佢留意多D我,終於就攪成而家咁…」

(啪啪啪~ 啪啪啪~)(拍掌聲)

「幾好聽丫。」一把熟悉嘅聲音喺屋頂傳嚟。

「點解吓吓都要有人喺上面偷聽嫁啫?」我唔耐煩所以大嗌。

「我唔係啊,我喺你下面~」一把鬼聲鬼氣嘅聲音喺地下傳嚟。

我望一望地下,成個地下都係眼﹑耳﹑口同鼻…

場面嘅詭異令我幾乎抖唔到氣,之後仲…

D眼耳口鼻慢慢形成個頭喺地下浮出嚟…



「你哋好啊!」隻怪物仲同我哋問好。

「低域」當堂暈咗,而我就要繼續面對…

呢兩隻怪物。

天上面嘅原來係…

「啱啱我先扮走咗咋,你唔記得我喇?」

把聲係易面容啊!佢真貌原來咁恐怖…

紅唇裂嘴﹑皮膚蒼白﹑雙眼青根暴現…



而我面前嘅呢隻怪物就更加恐怖,一堆眼耳口鼻喺塊面度,但係冇一樣係啱位嘅。

「你…你哋想點啊?」

「我很醜,但我很溫柔。」眼耳口鼻怪講。

「唔好攪我啊!我…我有神力護身,頭先易面容都試過嫁啦!」我咁講。

「我哋就係想要你嘅神力!」易面容講。

「吓!?你哋究竟想點?如果要打…就…唔好怪我唔客氣喇!」

我硬住頭皮,裝腔作勢…

「高人!」眼耳口鼻怪突然向我叩頭。

我一時之間真係唔知佢想點…

「高人,求你幫吓我哋啦!」易面容亦都落咗嚟向我叩頭。

「究竟…究竟發生咩嘢事啊?你哋究竟想點啊?」

「我哋想高人你幫手救吓我哋朋友!」佢哋一齊講。

「救…你哋朋友?」

「係啊,雙面神偷申月兒。」易面容講。

「我哋三個都係天生殘缺嘅人,由細到大都係俾人蝦,俾人當怪物嘅,機緣巧合底下,我哋認識咗大家,仲結成生死之交,我哋三個都江湖人稱八扇嘅一員,純粹因 為樣衰就俾人定為邪術之士,其實我哋做嘅好事仲多啊,不過我哋為咗生活,先間中呃吓人哋錢啫,我係鬼面怪物錢阿土,希望高人你可以幫吓我哋,救吓我嘅朋友 月兒佢啦。」眼耳口鼻怪講。

「咁…咁…但係…但係…你哋已經係出名高手,點解仲…需要我嚟幫啊?」

其實一來我唔太信佢哋,二來我又驚佢哋,三來我其實係冇料家嘛,點幫佢哋啫?

「因為捉咗月兒嘅係錄欽城城主陸羽石,呢個人出名貪財好色,好在嘅係佢貪財多過好色,佢要我哋俾一筆贖金先放月兒,唔係就將佢姦完再姦啊…」

講到呢度,錢阿土嗰幾隻唔啱位嘅眼都流晒眼淚,我睇得出佢係真心嘅。

「係啊,係啊,呢個亦都係我點解要趕住攞方家家產嘅原因,我哋只係想救我哋朋友月兒咋。」

就連易面容個裂向上嘅口都向咗下,睇嚟佢哋真係真心。

「我仲有一個疑問,你哋…唔好怪我直接,你哋個樣咁怪,你話申月兒都係同你哋一樣嘅話,咁…咁陸羽石點會想攪佢啊?」

「其實月兒佢好似高人你咁靚嫁,不過…」錢阿土講。

佢話我靚,攪到我面都紅晒。

「不過咩啊?」

「佢前面同後面都有塊面喳嘛。」

我突然覺得好嘔心,所以都停咗落嚟冇再問。

「但係其實陸羽石個衰人,鹹濕起嚟,佢點會理對方係咩丫,見…乜就入嫁啦。」

佢講個「乜」字嗰陣好明顯係有D避忌,可能係對女性有D冒犯嘅字啦。

「我都係唔明,陸羽石一個高人可以對付到你哋三個高人?但係你哋又話我可以幫到你哋,咁唔通我一個去打佢又夠喇?定係你哋想我做D咩啊?」

「陸羽石所用嘅術屬金,而家仲要脅持咗月兒,我哋兩個根本埋唔到佢身,我知道高人你嘅靈力火氣好重,所以應該最啱對付佢。」

「真係唔好意思,我幫唔到你哋,我只係一個…有靈力而唔識用嘅人嚟咋。」

「吓!?」錢阿土講。

「阿土,我哋無謂強人所難喇,再諗辦法啦。」易面容一面無奈咁講。

「Mmm…不如…你哋去搵頭先嗰個清明大師丫。」

「冇用嫁,清明禿驢只會講正邪不兩立,佢反而會幫埋陸羽石添。」

「咁你哋仲諗到咩辦法啊?」我再問。

「冇嫁喇,我哋都好沮喪,其實已經試過好多辦法。」

「咁…咁啦,我識得一個人應該可以幫到你哋,但係…我唔敢再見佢,你哋試吓去搵搵我嘅靈力本來嘅擁有者丫,佢叫陳鳳初,一個英偉不凡嘅男子漢大丈夫嚟嫁!」

(待續)

下集預告︰

米米蓮變成一隻手抱毛公仔…
已有 0 人追稿