米米蓮妖怪作品 -《再遇見到你》(長篇) (暫停刊): 第二十七集 ~ 鳳︰人頭花？唔係吓話？靈兒死埋？唔係吓話？
第二十七集 ~ 鳳︰人頭花？唔係吓話？靈兒死埋？唔係吓話？
雞仔嗰邊睇到我好緊張，乜當時係咁嫁咩？
師姐個死人老豆真係人人得而誅之…
冇人性嫁！
唉~ 算喇，都係醫返我兩個兄弟先…
「你都知呢度規矩啦，要答中我出嘅智力題先可以救人。」靈兒咁講。
「吓！？咁…你出啦。」雖然我擔心解答唔到，但係都冇辦法啦。
「一蚊三隻小雞，三蚊一隻中雞，五蚊一隻大雞，點樣用一百蚊買到一百隻雞？」
我當時係呆咗，我就咁聽，呢個應該係數學題，亦即係我最差嗰科，但係…
忠義同雞仔都望住我，就好似期待住我去解答咁。
「望咩啫，腳係你哋嫁，你哋答啦！」我咁回應佢哋嘅眼神。
「但係…」忠義講。
「唔係話你係教書嫁咩？」雞仔駁住講。
「我教英文同游水嫁咋！」
好唔好意思咁，我嘅慌張，換嚟佢哋失望嘅眼神。
我都唔記得咗，雞仔咪即係自己，我唔識，佢又點會識丫。
當大家都呆晒，諗唔到答案嗰陣，忠義佢突然咁問…
「阿哥，你估你識唔識丫嗱？」佢竟然問個弱智嘅林十九。
林十九當時一直冇聽我哋講嘢，因為佢好好奇咁望緊四周圍嘅環境…
直到佢聽到忠義問呢句佢先回應︰
「細佬，咩識唔識啊？」
「冇，只係有個問題要解決，我諗唔到點樣用一百蚊買一百隻雞啫。」
估唔到嘅係…
林十九真係諗，仲…
「細佬，我識啊！」
「吓！？你識！？」我哋四個，包括埋靈兒都覺得好愕然。
之後，林十九佢喺個袋度攞咗一大舊錢出嚟，仲…
「一蚊雞，兩蚊雞，三蚊雞…」
佢就係咁喺度數一蚊紙，而我哋就你眼望我眼咁，我諗大家都明喇，佢係想…
「呢度一百張一蚊雞，一百蚊有一百隻雞！」
林十九講完呢句，雖然正常人都知係亂嚟，但係大家都望咗去靈兒度…
睇吓佢有咩反應。
「望咩啫？佢…算啦，當佢啱啦，我可以醫佢隻腳。」佢指住忠義隻腳。
「Yeah！」忠義。
「Yeah！」雞仔。
「你開心咩啫，我應承醫佢，唔係醫你噃，你要答到我本來個答案先得。」佢對住雞仔咁講。
雞仔絕望嘅眼神再次出現，亦再次望返向我，我真係…
想一棍打死後生嘅自已(雞仔)，總係將困難交俾人哋解決嘅。
不過冇計啦，始終係「自己」嚟，係要救嘅。
「你哋好快D喇，得返半柱香咋！」靈兒。
「嘩，你碌咩香嚟嫁？燒得咁快嘅！」雞仔講。
「臨尾香。」靈兒佢擺明唔係答緊佢隻香個名，而係串緊佢就嚟輸。
「喂喂喂，唔好住，我諗到少少，我諗到少少，唔好買大雞好似得。」忠義講。
雞仔可能後生D，轉數快D，佢一聽到忠義講呢句…
就喺支香燒完嘅呢一刻，大嗌咗出嚟︰
「二十五蚊買細雞，七十五蚊買中雞！」
… (大家停頓咗兩秒)
我聽完都覺得應該係啱咗。
「哎吔，唔記得俾D限制你哋添，本來應該大雞係要比中雞多嘅，唉…不過算啦，我醫你哋啦！」靈兒回應。
「Yeah！」忠義。
「Yeah！」雞仔。
「Yeah！」十九。
「但係…」靈兒再講。
「又但係！？」我驚再要答呢D題目，所以驚起嚟。
「我要藥引，你！健全呢個，幫我去後山山頂攞個藥引！」靈兒對住我講。
「哦，藥引咋呀，咩樣嫁？我去攞啦。」我回應。
「人樣，人頭花！」
「吓！？人頭花？唔係真係人樣嫁呀？」雞仔問。
「無錯，真係人樣。」
「咁恐怖？」雞仔講。
「人頭花唔恐怖喇，人頭樹，人頭躝藤仲恐怖啊。佢哋一樣可以做藥引，你要唔要用佢哋丫？」
「算喇，我出發去搵啦，你哋三個就喺度休息吓先啦。」我講。
「唔好話我唔提你啊，有陽光先好攞佢哋走，唔係好大鑊嫁！」靈兒溫馨提示。
我轉個身就走咗去後山，好快就走到去山頂…
我預咗D人頭花係好恐怖同好難搵嫁喇，但係…
想像同現實總係好大落差嘅，不過似乎係好事…
山頂呢度原來係人頭花樂園，燦爛陽光底下，佢哋向住太陽載歌載舞…
好似好開心咁，佢哋每一朵都好似小朋友扮太陽花咁，原來係好可愛嫁…
個開心歡樂嘅畫面睇到我都覺得身心舒暢，所以我都停咗落嚟…
坐咗埋一邊睇住佢哋跳咗陣舞。
但係開心嘅時光總係過得好快，我見到有舊雨雲過緊嚟…
所以我都事不而遲，將其中一個「小朋友」帶走咗…
(隆隆~) 天上面突然仲行起雷嚟添。
天上雨雲突然變成灰黑，行雷閃電仲要配埋大雨添…
我急不及待就諗住帶呢個「小朋友」返去「竹林深處人家」…
但係…
「邊個捉咗我個仔仔？」一把妖邪老聲震動整個山頂。
我另轉頭一望，原來係…
「人頭樹！？」一棵巨型大樹，樹上面滿佈果實…
唔啱，應該係滿佈人頭，D人頭個樣就係人頭花D小朋友…
但係佢哋而家已經唔係黃色同笑緊…
而係部份變成深藍色喊緊，部份變成紅色發緊嬲，部份變成灰色，好似屍體咁…
「人頭樹」就係咁追住我想攞返個仔。
即使係身經百戰嘅我一時間都適應唔到，真係有D驚。
我係咁走係咁走，手上面嘅呢個「小朋友」就變成咗藍色喊緊…
而家嘅我，就真係好似拐子佬咁，小朋友喺我手上面喊…
就好似叫緊佢爸爸媽媽嚟救佢咁…
我…我…雖然以我嘅能力終於真係擺脫咗「人頭樹」，但係…
我過唔到自己，我好慚愧，所以…我將「小朋友」佢放低咗，仲…
「小朋友，對唔住啊，令你咁傷心添，我…我冇心嫁，希望你原諒我啦，我唔知會咁，我只係想救我朋友嫁咋，不過…算啦，你返去啦，你返去繼續開心快樂咁跳舞啦，我會再諗其他辦法救我朋友嫁喇。」
「你係想我做藥引？」佢突然變得好精靈咁同我講。
「係…係啊，真係慚愧。」
「咁你早D講丫嘛！」我後面突然傳嚟一把老聲。
個天都變返陽光燦爛…
我另返轉頭一睇，係「人頭樹」，但係佢個樣唔同晒，歡顏好多…
「我最鐘意我D仔仔去幫人，去做藥引嫁喇！」
「吓！？但係…佢哋會死嫁喎。」佢變返好樣，我都唔使再有任何顧慮。
「傻嘅，邊個話做藥引會死嫁？我D仔仔每次救人都會成長，做藥引係令佢哋成長嘅好方法。」
「原…原來係咁啊，咁就好喇，希望你哋可以幫吓我啦。」
「得得B，你就跟呢位先生去成長一吓啦。」
「係，爸爸！」
之後，我就帶「得得B」返去「竹林深處人家」。
…
奇怪嘅事總係接踵而来嘅…
正當我滿心歡喜，諗住可以救到我兩個兄弟嗰陣…
「喂，我搵到人頭花喇，原來佢哋好可愛嫁，你哋對腳有救喇！」我喺門後大嗌。
但係…
我一入到去…
見到…
三隻腳，係三隻血淋淋離開咗身體嘅腳…
係屬於忠義同雞仔嘅腳，佢哋兩個都暈咗喺度，甚至好似係死咗咁…
而且靈兒佢都…
訓咗喺地下，只有…
「忠義阿哥，究…究竟發生咩事啊？」只有林十九呆咗咁抱住余忠義。
「個…個妖女襯住我唔為意，斬咗細佬佢哋D腳啊！我…我驚起嚟咪打佢囉…點知…點知殺咗佢啊。」
「你…你殺咗靈兒？」
(待續)
下集預告︰
周白波突然發嬲，仲一個火球掟埋去…