第二十八集 ~ 龜︰周白波收我做徒弟?唔係吓話?

點解鳳初嗰邊會咁慘嫁?發生咩事啊?

(專心D,唔好成日掛住你個鳳初啦,理吓周白波佢哋先啦。)

我個心又提醒我喇。

「邊個再嘈住我訓覺,我就燒佢下部!」周白波突然大嗌。



易面容同錢阿土即刻就扮訓覺。

我一時之間,冇任何反應,就咁企咗喺度…

四處荒涼,夜幕籠罩,草聲霎霎咁…

周白波佢起咗身,仲…

「靚仔哥哥,你過嚟丫。」



「吓!?姐姐乜事啊?我…我唔敢啊…」我一諗起話佢會強姦男人,我就驚喇。

「我講過我唔會逼人做我性奴家嘛,你驚咩啫。」

「但係你又講過捉幾個人返去姦完再姦好容易噃。」

「你再唔過嚟,我就真係即刻將你就地正法!」

「吓!?唔好啊,我過喇…」



我驚到唔敢唔行埋去,但係對眼就望住易面容同錢阿土,渴求佢哋嘅請救,但係…

佢哋竟然另轉身,趴咗喺度,笑笑口等睇戲咁款…

我真係…真係想殺咗佢哋。

「邊個夠膽望過嚟,我就燒佢下部!」周白波再嗌。

就連我都唔敢再望佢,耷低頭慢慢行埋佢度。

「你唔使,你跟我嚟啦。」

我肉隨砧板上,唯有戰戰兢兢咁跟咗佢行開咗一邊…

「你頭先都見到佢兩個醜樣佬個樣啦,佢哋都知我唔會傷害你,所以笑笑口。」



「係咩?我覺得係幸災樂禍似D噃。」

「哈哈,算啦,唔使理佢哋。」

佢講完呢句之後,停頓咗一陣,仲扭吓扭吓,好似有心事同我講咁…

「你…你唔使呃我喇…」周白波講。

「吓!?」我心諗,唔通佢知道咗我係女仔?

「我知你係乜水。」

「吓!?」連我係邊個佢都知添,死喇,死喇!佢肯定會殺死我喇。



「你師父喺邊啊?」

「師…師父!?咩師父啊?」但係佢竟然咁問,究竟佢講緊咩啊?

「你唔使扮喇,我感覺到你嘅靈氣,鳳派家嘛,你係江雲林個徒弟,雞仔丫嘛。」

「我…我係雞仔!?」我完全唔知佢講咩。

「唔係咩?你唔好扮嘢噃。」

我諗一諗,我身上嘅能力應該係鳳初俾我嘅,咁樣講,如果周白波嘅感覺都係冇錯嘅話,佢講緊嘅雞仔應該就係鳳初,所以我就唯有咁樣…

「哦…我…我知喇,你講緊嘅雞仔,係我師父。」我扮係鳳初嘅徒弟。

「咩話!?雞仔係你師父?你好似…同佢差唔多年紀咋喎。」



「差唔多年紀!?」呢個又奇怪,應該無理由嫁喎,鳳初佢即使唔係年紀好大,但係都最少有三十幾歲嫁啦,究竟攪錯咗D乜呢?

「唉,算喇,你話係就係啦,不過…我想知你師公江雲林佢去咗邊啊?」

(匙匙匙 ~ 匙匙匙 ~) 草叢度突然出現咁嘅聲。

「嗰邊好似有D嘢啊。」我聽到呢D怪聲,所以咁講。

「邊個阻住我問嘢!」周白波突然發嬲,仲一個火球掟埋去草叢度…

井口咁大嘅圓形位置俾佢一吓就燒成焦土,我見到咁都嚇到呆咗一陣…

唔怪得之易面容佢哋兩個都怕咗佢啦,原來周白波真係唔係好惹。



不過原來「匙匙」聲嘅,只係一條蛇,條蛇俾佢燒到變咗一條炭。

「小小蛇精,夠膽阻我好事。咦,係呢,頭先講到邊到話?丫,係啊,你師公江雲林佢去咗邊啊?」佢嘅面口都轉得幾快噃。

「佢呀!?我…我唔知啊,其實我未見過師公嫁。」

「吓,原…原來係咁啊,咁算啦,我仲諗住可以見返吓佢添。」

「你…你鍾意我師公啊?」

「鍾意!?哈哈,鍾意,都幾十歲人啦,仲講鍾意好似好尷尬咁,你訓唔訓得著丫?如果你唔訓,我就講多D嘢你聽啦。」

八妹仔嘅我,又點會錯過聽故仔嘅機會丫,所以我及頭回應咗周白波表示想聽。

「咁好啦,就講你聽吓啦。火神你識邊D啊?」

「祝…融!?」

「都啱嘅,其實仲有回祿同炎德星君,我師父流派所信奉嘅就係炎德星君,全名係南方火德熒惑執法星君,我師父自命為炎德師太,用嘅係火,以火法去降魔伏妖﹑ 治邪捉鬼﹑驅魔通靈咁,我好細個,咩都未識就跟咗佢學道學法,所以比起同年齡嘅人,我就好似仙人一樣,所以我從來都睇唔起人,尤其係男人,直至我十幾歲嗰年,見到佢…」

「佢就係我師公?」

「冇錯,就係你師公,正確D嚟講,係你太師公先啱,你太師公個名叫關海山,關海山有幾勁,遲D有時間再同你講,我師父就係唔抵得大家都係用火法道術嘅,點解世人都總係覺得火鳳派叻D,所以就去挑戰佢。」

「挑戰師公!?」

「係,但係關海山先冇我師父咁傻,大家都係捉邪捉鬼啫,根本冇嘢好鬥,所以佢淨係吩咐咗江雲林嚟處理我同師父嘅事,我師父咁小氣,當然唔肯放過佢哋啦,但係又咁啱得咁蹺,附近出現咗隻妖怪,係隻六足年獸…」

「六…六足年獸?咩樣嫁?」

「貓樣,但係係一隻一層樓咁高,成間屋咁大嘅一隻貓妖,呢隻嘢唔係普通貨色,尤其係對前臂,佢犀利嘅地方就係佢前臂奇怪地可以抵禦所有道法術士嘅道法…」

「咁樣你哋點對付到佢啊?」

「嘻,你講得冇錯,我同師父就係對付佢唔到。當時江雲林就係用呢隻妖怪同我哋打賭,佢話邊個收伏到隻妖怪,就當係邊個贏,我師父求勝心切,都冇再理係關海山定係江雲林嚧,直接就衝咗去打呢隻妖怪,我跟住佢跑咗大約四分一個時辰,即係半個鐘,就到咗隻妖怪肆虐嘅地方,當時我未知隻妖怪嘅前臂有咁奇怪嘅能力, 就連師父佢都唔知,所以一直就係咁傻吓傻咁,一招一招咁打埋去,但係都對隻妖怪都係冇用,途中當然隻嘢都會反手攻擊吓我哋啦,但係以我同師父嘅能力,佢就 一定打唔到我哋架喇,問題係我哋都打佢唔入,果種挫敗感真係唔係講笑,從未如此挫敗過,妖魔鬼怪對我同師父嚟講,以我哋嘅火法,應該係大人蝦細路咁,但係呢次竟然贏唔到,仲要…」

「師公佢有方法攪掂?」

「就係有,仲好有型添。佢先用力量,用男性孔武有力嘅力量,直接同隻妖怪對打,仲徒手將隻比佢大十倍嘅妖怪嘅前臂扯斷,再之後好簡單咁用一把銀劍,配上鍾馗劍法,將隻妖怪收伏咗。嘻,當時嘅我,就好似小妹妹睇住D大哥哥表演咁,師父就唔服氣,但係我就由嗰一次開始,開始仰慕呢個大哥哥。」

「女仔仰慕大哥哥呢個我明啊!」

「真係明?」

「丫~!」我大嗌。

因為周白波突然雙手搾埋我心口度,一陣鬆軟感覺令我大嗌起嚟。

佢一鬆返開雙手就對住我奸笑…

而我就好自然咁噤返住自己心口。

「原來係個女仔嚟。」周白波對住我咁講。

「吓!?係…係…」我無奈回應。

「你兩個係咪想俾我燒下部?」周白波突然對住我後面講。

原來易面容佢哋兩個驚我被識穿之後危險,即刻就衝咗前嚟…

「周白波…」
「周白波…」

「你哋兩個唔使講嘢,去訓啦,我會照樣幫靚仔妹妹手嘅…」

「多謝。」
「多謝。」

「不過行遠D,我想同妹妹傾多陣計。」

之後易面容同錢阿土都冇再偷聽,真係行遠咗休息。

「姐姐,你唔嬲我呃你就好喇。」我講。

「你都係想幫人啫,你無錯丫,係蠢D啫,佢哋係好人定壞人你都未知,你就去幫佢哋,你真係傻傻地。」

「嘻嘻。」我有少少尷尬,傻傻地咁笑咗兩吓。

「不過我後生都同你一樣,傻傻地嘅,大戰殭屍王嗰次,我知道江雲林會去,所以一早就先到一步,都唔知等咗佢幾耐,終於等到佢,點知佢淨係記得我個臭名,根本都唔記得當年嗰件事,不過唔緊要啦,我都預咗,都慣喇,所以都暗中幫佢作咗個大名,仲宣傳晒開去,南龍北鳳東虫西聖就係我作嫁喇,我唔想佢懶叻,所以專登放南龍喺佢前面嘅。」

「嘻嘻,呢個心態我都明啊。」

「其實你都幾似我嫁喎,你跟雞仔學過D咩啊?」

「其實…其實…」

「吞吞吐吐,你唔使講喇,我係邊個丫,我乜都知道晒啦,冇學過道法,又有咁強大靈力,應該第一個原因嫁啫…」

我聽到佢咁講,即刻面都紅晒,唔敢講嘢。

「既然你有咁嘅靈力,就要有一定底力去載返咁多靈力,唔係會慢慢冇晒嫁。不如咁啦,以後你跟我啦,我教你嘢。」

(待續)

下集預告︰

…係依附喺牆上面嘅妖怪,專食人嘅…
已有 0 人追稿