第三十三集 ~ 雞︰呢次仲唔苦盡甘來?
 
「邊個夠我慘啊?」呢一句經典對白,用嚟形容我嘅慘況,真係一絕。
 
朋友犧牲,就連佢變咗士啤呔喺我旁邊都唔知…
 
愛人死咗,就連佢個靈魂我都保護唔到…
 
師父失蹤,就連佢而家點樣我都冇辦法知…
 


養父辭世,就連佢最後一面我都見唔到…
 
而家我仲全身殘廢,根本就係活活受罪。
 
得知Father佢嘅死訊之後,就連背景音樂都變成《男人哭吧不是罪》…
 
想睇我喊啫,使唔使攪埋我D親朋戚友啊?
 
呢D說話都係我食住Father留俾我嘅餅乾時候嘅問個天嘅…
 



 
「喂,攪乜啊?食餅呀?」
 
金玉麟佢行到去我監牢前面,想喺我手上搶走我養父俾我嘅餅罐…
 
我當然唔可以俾佢搶啦,係Father佢留俾我嘅遺物嚟嫁,邊個都唔掂得…
 
所以我不單止唔俾,仲一巴打埋去…
 


(啪 ~)
 
我打中咗佢,仲打到正一正佢塊面…
 
雖然佢冇受咩傷,但係就俾我嚇呆咗…
 
「你…你打我?你…你打中我塊面!?」
 
「我…我話俾你知!我唔會怕你嫁!我係邊個啊?我係我養父,Father Thomas嘅仔!我行不改名,坐不改姓,改正趴街,我叫陳鳳初,Phoenix,陳鳳初啊!你記住我!我一定會打敗你嫁!」
 
但係…
 
「哈哈哈哈哈哈哈~!原來係你?原來係你!我等到喇!哈哈哈!」
 
金玉麟好似傻咗咁喺我面前笑,我唔知佢咩葫蘆賣咩葫蘆。


 
「死喇!死喇!」沙藤妖都驚起嚟,佢驚我有事,都緊張到現埋形。
 
「咦,乜原來仲有隻妖怪喺度架?」
 
沙藤妖聽到佢咁講,即刻驚到隱返形。
 
「哈哈,唔使驚,我搵到佢喇,我唔會再虐待佢,佢就係我要搵嘅人。」
 
金玉麟佢竟然話我係佢要搵嘅人?
 
「你…你想點啊?虐待我肉體仲唔夠?仲想虐待埋我精神呀?」我問。
 
「哈哈,你誤會喇,我並唔係一個虐待狂…」
 


喺一個足足虐待咗我兩三年嘅人把口度聽到呢句,真係諷刺…
 
「我虐待你有兩個原因,第一,朱謀秉其實係想你死,要佢滿意,你又唔使死嘅方法,就唯有係俾佢睇到你被虐待,佢其實每次當我虐待你嗰陣,佢都喺刑場度嘅一個窿度睇住你俾我虐待…」
 
吓!?真正虐待狂原來又係師姐個冇人性嘅老豆…
 
使唔使冇人性成咁啊?我又冇得罪佢D乜。
 
「其實我已經算係咁,雖然係虐待你,但係每次都快快咁整暈你,等你受少D痛苦,我每次都只係傷你D可以復元嘅地方,除咗雙腳。因為我驚你會偷走,如果你偷走出去,你就會更加危險喇,所以我必須咁做…」
 
「哼,咁我係咪應該多謝你虐待我啊?」我咁問。
 
「多謝又唔使。不過我未講完,第二個原因係因為風木林嘅前輩佢同我講,話我嘅命運就喺呢度,所以我嚟咗呢度;佢仲同我講,話有一個人會一巴打中我塊面,而佢就會係我真命天子…」
 
「吓!?真命天子!?你唔係想…想咩我啊?」我再問。


 
「咩即係咩啊?唉 ~ 算,我意思係我嘅主人,我自命不凡,可惜英年早逝,我其實係劍靈,靈魂已經同金劍合二為一,而家我呢把玉麟金劍由今日起,就係屬於你嫁喇!」
 
「吓!?玉麟金劍!?屬於我!?咁…咁你又…同你虐待我有咩關係?」
 
「丫,唔記得講添,風木林嘅前輩仲送咗我兩個字,叫我咁樣對待D犯人就無錯喇,就係呢兩個字!虐待!」
 
佢將風木林嗰位前輩俾佢嘅一塊寫有兩個字嘅一塊布隊俾我睇…
 
(…) 認真。
 
(…) 無奈。
 
(…) 憤怒。
 


我用心睇完之後…
 
我真係想殺咗佢…
 
「大哥,你識唔識字嫁?善待啊!係善待,唔係虐待啊!」
 
「吓!?乜原來呢兩個字係善待咩?唔怪得之我就係覺得怪怪地啦,我之前諗極都唔明俾我虐待嘅人點樣有能力打我到塊面一吓,不過好在有你咋,你果然係我真命天子。」
 
「$%^& (粗口),我唔理咁多喇,如果你講嘅係真嘅,咁快D醫返好我,快D幫我離開呢度啦!」
 
「唔得!」
 
「唔得!?你又想點啊?玩我啊?」
 
「唔係啊,只係風木林個前輩仲有講過,話當我同我真命天子相認之後嘅第二日,就會有另外一個人會嚟拯救你,不如你就準備一下,聽日跟呢個人走啦。」
 
「聽日!?如果冇呢個人呢?」
 
「咁我咪試吓做呢個人囉,等埋聽日先算啦。」
 
「點解你咁信風木林嗰個人講啊?」
 
「乜你唔知咩?風木林本來就係醫卜星相最犀利嘅族群住嘅地方。同我講嘢,俾「虐待」兩個字我嘅嗰位前輩,仲要係風婦臣婆,占星二絕嘅風婦前輩。我本來都唔信佢,但係我好細個就接觸到呢個人,當時佢仲話我會英年早逝,死得好慘,我當然唔信,因為我大個之後,事事如意,如日中天,能力足以以一敵百,但係偏偏佢當日講嘅嘢,喺我死之前全部應驗晒,我嘅靈魂仲真係如佢所講咁,同金劍合二為一;好似而家咁丫,真係有你呢個可以打到我一巴嘅人,講真,呢個世界上可以當住我面,打中我塊面嘅人真係少之有少,但係我偏偏就遇到喇,嗰個就係你,你話我信唔信佢好丫?」
 
「哼…」
 
我冇再理佢…
 
「以後,你想用我,就大嗌,玉,麟,金,劍!嚟召喚我啦!」
 
我早就冇晒辦法,呢次可能係我唯一出路,唯有試吓信佢啦。
 
我匿埋一邊,攬住米米蓮士啤呔,就等待聽日嘅來臨…
 
我全身依然麻痺,不過其實我諗諗吓,金玉麟佢真係冇呃我…
 
因為其實我雖然每次都暈好耐,但係就次次都好快好返…
 
而家我呆咗咁望住鐵窗出面…
 
再次為養父師父師姐佢哋祈禱…
 
「Father,兒子不孝,希望你喺天上面真係可以跟到耶蘇,快快樂樂咁喺天堂生活啦,我會,我一定會嚟你墓前拜你嘅,你放心啦;師父,我唔知你去咗邊,亦唔知點解你好似冇諗過嚟救我咁,不過我唔會怪你嫁,你要繼續努力生活啊,快D搵返個師母,開心快樂咁生活啦;師姐,唔知你點呢?我真係好想嚟救你,但係我真係無能為力,如果你仲在生,我意思你靈魂仲喺人間嘅話,你一定要等我啊!我一定會再次嚟救你!」
 
「你放心啦,麗葉佢冇事,呢幾年都只係做佢老豆嘅傀儡搵錢啫…」
 
呢一把聲音…
 
呢一把熟悉嘅聲音…
 
「你係…」我當堂再次流淚。
 
沙藤妖喺我旁邊開心咁笑咗出嚟。
 
「佢係…」我問沙藤妖。
 
「米米蓮啊!」
 
「米…米米蓮,你未死呀?」我攬住條士啤呔問。
 
「邊個話我死啫?只係救你嗰陣耗盡我嘅靈力,一時之間恢復唔嚟啫,都過咗幾年啦,我靈力慢慢恢復喇,好在有你養父俾錢買嘅燒雞咋…」士啤呔回應。
 
「唔怪得之近排次次我食隻燒雞嗰陣都冇咗隻左脾啦,原來係你食咗…」
 
「你唔係怪我丫嘛?」
 
「當然唔會,我見返你我已經好開心喇,只要我有能力,以後我日日請你食燒雞又點話丫。」
 
見返米米蓮,我真係好開心,起碼我累少一個人丫…
 
再者,我仲喺佢度得知,原來師姐平安無事…
 
只要聽日嚟嘅人救我出去,我再醫返好對腳,我一定會返去營救師姐!
 
呢一晚,我滿腦都係期待…
 
期待,期待,期待,期待…
 
終於訓著咗。
 

 
「我冇殺過人,但係殺過邪,殺過魔,殺過妖精,所以出名,我冇放過火,但係放過水,放過風,放過雷電,都係妖術嚟,我冇試過姦淫擄掠,淨係試過偷呃拐騙,所以個名臭咗,俾人當咗係邪術妖士。」
 
呢把聲音嘈醒咗我…
 
「邊鬼個嘈喧巴閉啊?」所以我大嗌。
 
我踭開眼一睇,係兩個男性,其中一個個樣同我有D似…
 
「你係邊個啊?」佢哋問我。
 
「行不改名,坐不改名,死姓不改,改正趴街,陳鳳初就係我喇!」
 
當時嘅我未完全訓醒,所以語氣都好重,但係…
 
唔通佢哋兩個就係金玉麟所講,會救到我出去嘅人?
 
(待續)
 
下集預告︰
 
你係神,我係人,你問我點?
 
已有 0 人追稿