米米蓮妖怪作品 -《再遇見到你》(長篇) (暫停刊): 第三十二集 ~ 雞︰哈哈，哈哈…(我基本傻咗，因為太慘痛…)
第三十二集 ~ 雞︰哈哈，哈哈…(我基本傻咗，因為太慘痛…)
乜「龜匙」嗰邊咁多妖怪嫁？
不過我呢邊都有隻…
佢叫沙藤妖，一隻可以依附喺牆上面，有保護色嘅妖怪…
我喺呢度，喺呢個監牢裡面認識咗佢。
上次講到我俾個變態獄警完爆咗，我淨係知佢叫金玉麟…
對住佢，我就連還手嘅力量都冇，仲俾佢打到暈咗…
…
「起身喇！食飯喇！」我係惡夢中醒過嚟，隱約聽到有飯食…
身體自然反應即刻驅使我咩都冇理就去咗攞呢碗飯隊咗入口…
奇怪嘅係竟然仲有一隻大燒雞喺度。
「沙藤妖！沙藤妖！知唔知做乜事我會有雞食啊？」我一邊喪食，一邊嗌。
我真係好肚餓，就連少少防人之心都冇埋，見乜就隊乜入口。
「唔使嗌喇！我一直喺你身邊，你食得就食啦！話時話，你隻腳唔痛咩？」
「痛！？」我望一望我隻右腳，原來…
已經廢咗，我就連一D知覺都冇…
呢一刻我真係想喊出嚟…
(在我年少的時候 ~ 身邊的人說不可以流淚 ~)
「男人大丈夫，流血不流淚」係師父成日教我嘅…
所以呢啖眼淚，我就忍咗佢…
「你又唔使心痛嘅…」沙藤妖竟然對我咁講，就好似取笑我一樣。
「哈哈，唔使心痛！？我而家冇咗隻腳啊…」我苦笑住講，對眼就離唔開隻腳。
「原本你冇咗條命添啦。」但係佢竟然仲咁講。
「你…你想講咩啊？」我好奇，所以反問。
「唔想講嗰句都講埋喇，你原本差D就死咗，係我一個老朋友救咗你，你當時中咗朱謀秉嘅屍毒梅花針，佢唔理你，你早就死咗喇，所以我覺得你點都唔可以辜負佢嘅一番心血。」
「佢…佢係邊個啊？」我問。
「佢係邊個！？哈哈，真係諷刺，佢救完你，叫我唔好講，你又偏偏要問，咁你叫我講唔講好？佢甚至冇同我講你哋係咩關係，不過佢就叫我睇住你，叫我點都唔可以俾你死…」沙藤妖回應我。
「咁…咁佢而家喺邊？」我再問。
「咪喺你後面囉！條士啤呔啊！」
「士…士啤呔！？」
我另轉頭一睇，我入嚟嗰陣已經有嘅呢條士啤呔？佢…佢救咗我！？
「佢係…」
「米米蓮啊，係都要逼人講嘅，你唔會唔識佢呱？」
(在我成熟了以後 ~ 對鏡子說我不可以後悔 ~)
呢一刻，我好想喊，但係我依然冇咁做到，又一次強忍淚水…
我淨係好用力咁抱住米米蓮化成嘅呢條士啤呔，我好感謝佢…
「米…米米蓮，我唔會放棄自己嘅，我應承你，我一定平安無事返出去！」
「咁都好D，唔係佢嘅犧牲就唔值嚧…咦，有人嚟！」沙藤妖講。
沙藤妖佢有保護色，一般人睇佢唔到，只會覺得係我自言自語。
「喂，起咗身喇，有封信俾你啊。睇完又要去被虐喇你，我勸你快D習慣吓，最好快D變埋被虐狂添，唔係我哋個虐待狂大哥有排虐待你，你有排痛苦啊！」一個獄警行咗過嚟咁講。
「哼！」我執起咗封信嚟睇…
-------------------------
Phoenix
身體如何？為父者…
努力想辨法救你中…
我梳通了警圍…
希望他們對你好。
莫掛念。
Father Thomas
-------------------------
內容好長，我冇盡錄，當中有唔少錯字，所以我肯定係我養父寫嘅…
我見到呢封信，明白到點解我有燒雞食，亦同時…
好想喊，但係我又冇，我話俾自己聽，我要忍，我要忍，我死都要忍…
(在一個範圍不停的徘徊 ~ 心在生命線上不斷的輪迴 ~)
「時間夠喇，又到虐待時間！」獄警講。
(人在日日夜夜撐著面具睡 ~我心力交瘁~)
佢之後拖咗我去刑場…
我又喺度見到金玉麟…
我嘅憤怒已經谷到爆…
我從來未試過咁想去殺一個人…
「咩啊？想殺死我呀？你諗吓自己乜料先啦，同有錢人鬥已經戇居，仲不自量力到想同我鬥？今日我就要你完全殘廢！」
金玉麟一講完，又將一支燒紅咗嘅鐵叉拮落我隻左腳度…
「吔~~~！丫~~~！」
我係好憤怒，死頂咗一秒，但係最終我都係敵唔過痛楚，所以無奈…
只有再一次暈倒…
…
過咗唔知幾耐，我開返眼，但係仲訓緊喺地下…
「你終於醒喇？」沙藤妖走到我面前講。
我冇第一時間回應佢，我反而係嘗試感覺一吓下身，但係…
(明明流淚的時候 ~ 卻忘了眼睛怎樣去流淚 ~)
我兩隻腳都冇晒感覺…
「記住啊，你唔好辜負米米蓮同你養父嘅期望啊。」沙藤妖把口雖然咁講，但係就連佢眼神都話俾我聽我冇晒希望，我唯一嘅精神支柱就係佢哋俾我嘅期望。
「沙藤妖，點…點解你唔幫我離開呢度？」我訓喺度問。
「唔係我唔想幫你，而係我幫唔到你D乜，因為…」
「你講啦，你點先肯幫我？」
「唔係肯唔肯，係我唔敢同金玉麟作對，我只係一隻老妖怪，對住金玉麟，我就好似廢物一樣，我可以點幫你丫？唉~」
我只有訓喺度，無奈咁眼定定望住佢…
「金玉麟，你知唔知佢有咩料啊？我就話俾你知啦，等你殘廢都殘廢得有個知字丫。金玉麟係金家，即係七彩八扇裡面嘅「鏟」，鏟家客棧連鎖飯店嘅前人。金家當年出名刀劍二絕，金刀金劍，殺怕所有妖魔鬼怪，我都差D俾金玉麟阿爸金滿樓殺咗。金滿樓佢覺得自己前幾代都冇再進步，而自己雙手刀劍都好似有所局限，冇進步空間咁，所以將金刀金劍俾咗佢兩個仔，希望佢哋喺獨立範疇上面進步。刀，俾咗大仔，劍，俾咗細仔，大仔有生意頭腦，練得一手厲害金刀之餘，仲將家財發大；至於細仔，無錯，就係金玉麟，佢醉心劍術，劍術雖然未講得上係當世無雙，但係就稱得上係一等一高手，所以你話我哋點同佢鬥丫？」沙藤妖講。
「哼，你講呢D嘢俾我知做乜啫？佢D嘢我根本唔想知。」我回應佢。
「知己知彼，方能制勝，知多D敵人底細，點都會有好處嘅…咦，有人嚟！」
…
「咦，醒喇，又係時候玩虐待喇，睇埋呢封信先啦。」個獄警又行過嚟，又講D唔係人講嘅說話。
我接咗封信，打開一睇…
-------------------------
Phoenix
身體可以嗎？
聽說你的腳好像受傷了…
你知道嗎？耶和華，我主都一樣受過苦難…
受過苦難才能成長…
你一定要加油…
為父依然會努力想辨法救你
莫掛念。
Father Thomas
-------------------------
哈，Father佢始終都係寫錯個辦法個辦字做辨…
唔知點解，我每次睇到佢封信都會諗起佢老人家嘅笑容…
「呵呵呵 ~」真係好似聖誕老人。
睇到佢封信，我總算有D安慰。
之後，個獄警又捉我出去俾金玉麟虐待…
我有時覺得，呢班獄警，俾金玉麟佢仲似變態，竟然助紂為虐…
一如以往，我又再次被虐待到不似人形，慘痛嘅經歷，我真係唔想再提…
只係知道…
我又再次暈倒…
就係咁樣…
我起身，食雞，被虐，暈低，起身，食雞，被虐，暈低…
都唔知試過幾多次，我根本除咗未死，全身皮膚筋骨都死晒咁…
可以斷嘅斷過，可以爛嘅爛過…
不過都有好過吓，好返佢哋又虐待過我囉，我就只有雙腳係真係完全殘廢…
仲算係好運嘅係…
我每次起身都仲有雞食，仲有米米蓮士啤呔同沙藤妖佢哋陪住我。
有雞食，即係Father Thomas仲有俾錢D獄警，即係佢仲關心我…
即係佢都仲健康。
我嚟咗呢度之後，真正明白到健康係幾咁重要，自己就話冇晒希望啫…
都想自己識嘅人喺出面健康快樂，尤其係我養父佢年紀唔細…
我真係唔想佢有事…
所以我每次起返身，都會對住窗口位祈禱…
希望我養父Father Thomas佢老人家健康，希望師姐佢冇事…
希望師父佢…我都冇再希望佢救我喇，只係希望佢安好…
希望師兄佢搵到佢細佬…
希望大家都開心﹑健康﹑快樂…
呢晚我又暈完起返身，訓喺度望出鐵窗外面…
外面係夜晚，滂沱大雨，就好似為我而喊嘅咁…
「老天爺，我唔求我自己安全平安喇，我只係希望我養父師父佢哋可以身體健康，師姐佢可以安然無恙…」呢番說話我近乎每晚都講。
我講完，望一望側邊，見到沙藤妖…
「我又暈咗幾耐啊？」我問佢。
「你每次暈都幾個月，我每次都以為你死咗。」
「咁…其實我嚟咗呢度幾耐啊？」
「實際時間我唔記得嚧，不過我諗都有三兩年喇…」
「哈 ~」我苦笑。
(明明後悔的時候 ~ 卻忘了心裡怎樣去後悔 ~)
後悔！？我有問過自己，我有做錯咩？
我答過自己，我冇！我只係想去救我愛嘅人！
(咁你魯莽去救人嗰陣，又有冇諗過愛你嘅人啊？)
「神音」總係要問我一D咁難答嘅問題，不過好在…
Father Thomas幫我答咗，今日佢又有一封信嚟咗，睇嚟佢又使咗好多錢…
-------------------------
Phoenix
安好嗎？
他們不給我探你…
我還在努力想辦法救你…
我疏通了警衛…
希望他們對你好。
我身體好好，你不需掛念。
Father Thomas
-------------------------
睇嚟Father佢叻咗好多，D字都冇乜錯喇，聽到佢健康，我總算有D安慰。
「世上只有父母會無時無刻掛住仔女啫，邊會有仔女會冇事嗰陣諗吓父母丫。」
聽到沙藤妖咁講，我真係慚愧…
點解我好地地嗰陣，連佢整俾我食嘅餅乾都要嫌棄…
「喂，又發吽哣呀？又到虐待時間喇，真係好煩啊你，總係要人虐待你嘅…」
獄警又再帶我去刑場。
但係呢次金玉麟仲未準備好，佢一直喺度掀日曆，就好似等緊某一日咁…
「長官，個犯到喇。」獄警同金玉麟講。
「你死架？見唔到我諗緊嘢咩？今日咩日子啊？」金玉麟鬧個獄警。
獄警冇回應，驚咗佢咁縮低咗個頭。
而金玉麟佢竟然突然…
「今日冇心情啊！」
佢一連三拳，將我左右手連胸骨打斷…
我再一次暈倒，全身就好似癱瘓咁，血流唔到應該位置…
郁唔到，半夢半醒間只係感覺到麻痺嘅感覺…
我就只可以訓喺度，但係訓唔到，俾麻痺感覺煎熬…
…
話訓唔到，但係最後都係訓著咗…
我再次醒返，踭開雙眼，又係沙藤妖…
「哈，見到你，我即係應該又未死啊，哈哈，哈哈，咳咳…」我訓喺度講。
但係…
「沙藤妖，你…你手上面嘅罐…你…你做乜喊啊？唔似你噃，發生咩事啊？」
我見到佢揸住D嘢，仲對住我喊，佢咁嘅反應，我擔心起嚟…
佢手上係一封信同一個圓罐，面上面嘅係一幅哭喪嘅面…
「信…信！？我…我郁唔到啊，你快D讀俾我聽，我要聽，我要聽啊！」
「我…我唔想讀…」
「快D讀，快D讀啊！」
「好…」
佢慢慢打開封信…
「寫信俾你嘅…係一個叫大Ben哥嘅人…」
「大…大Ben哥…咁…咁點啊？咁點啊？」
「一個英文字，我見次次你D信都有，喺抬頭，我估係你個英文名，之後係…自你入獄以後，神父非常擔心，四處尋覓方法營救你，可惜只是單單要你在牢獄內過得好，就已經耗盡他的所有財產，財產事小，身體健康為大，終日奔波的他，大約在半年前，終於病倒，神父他久病未癒，之後所有書信都由我來代筆，現在…」
「點啊？做乜停咗啊？點啊？」
「中間堆嘢我唔講喇，讀最後一句啦，神父已魂歸天國，莫再掛念，祝 萬事安好，保重。」
(無形的壓力壓得我好累 ~ 開始覺得呼吸有一點難為 ~)
呢一刻，我強行撐起自己，撐起自己抖震嘅身體…
(開始慢慢卸下防衛 ~ 慢慢後悔 ~ 慢慢流淚~)
伸出麻痺嘅右手，慢慢推開圓罐，攞出餅乾…
(男人哭吧哭吧哭吧 ~ 不是罪 ~ 再強的人也有權利去疲憊 ~)
再放入口…
(微笑背後若只剩心碎 ~ 做人何必撐得那麼狼狽 ~)
「好…好食…好食啊！你…你想唔想食啊？不過我…我唔會俾你嫁，係…係我爸爸，我爸爸佢親手整俾我食嫁，我唔會俾你嫁，我…好…好好食啊…真係好好食啊…」
「雞仔…」
(男人哭吧哭吧哭吧 ~ 不是罪 ~ 嚐嚐闊別已久眼淚的滋味 ~)
(就算下雨也是一種美 ~ 不如好好把握這個機會 ~ 痛哭一回 ~ 不是罪！~~~)
下集預告︰
再者，我仲喺佢度得知，原來師姐平安無事…
註腳︰首歌係劉德華嘅《男人哭吧不是罪》，不過斬開晒。