米米蓮妖怪作品 -《再遇見到你》(長篇) (暫停刊): 第四十八集 ~ 龜︰甩咗D咩啊？我睇到喇！仲睇到…
第四十八集 ~ 龜︰甩咗D咩啊？我睇到喇！仲睇到…
…
(傻妹，你嚇到呆咗呀？)
鳳…鳳…鳳初佢…
(放心啦，佢冇事嫁，你講返之前D嘢，一陣講講吓佢就冇事嫁喇。)
你點知啊？
(希望在明天丫嘛。)
希…希望啦。咁我講返之前D嘢先喇…
我哋一行五個人，除咗我，仲有白波姐姐﹑阿土﹑易面容，仲有諸葛象…
我哋一齊嚟到呢度，仲見到另一個高人，佢叫做歐陽巨。
佢唔知喺度做緊乜，原本係背住我哋嘅，直到我哋嘅出現，佢先望過嚟…
「阿妹，又帶你識多個人喇，呢個人係同我哋幾個齊名，亦係八扇之一，係一個身體裡面有十六把刀嘅妖人…」白波姐姐咁講。
歐陽巨雖然已經望到我哋，但係佢冇出聲，更加冇對我哋做任何嘢…
「喂，歐陽巨！你喺度做咩啊？」係易面容出聲問。
不過歐陽巨冇回應。
「喂，唔好惹佢啦…」諸葛象輕輕力篤易面容膊頭講。
「我哋五個人，佢得一個，唔怕問吓佢嘢噃。」但係白波姐姐就認為咁樣。
「係囉，喂，歐陽巨！你攪掂咗呢度隻馬騮火妖啊？」阿土都出聲問。
我哋而家同歐陽巨都總算有D距離嘅，所以勉強都可以放心，不過…
呢個人真係邪氣好勁，正確D嚟講，應該係殺氣好強先啱。
「妹，你都感覺到呀？」
白波姐姐咁樣問我，應該係睇到我有D驚青。
我及咗一吓頭回應佢。
「睇嚟你成長咗，冇錯，呢個人係殺氣好大，因為…佢真係一個殺手。」
「殺手！？」
「冇錯，我哋都係人嚟，要賺錢，要食飯，衣食住行，樣樣都係錢，我哋呢D人要搵錢就唔難，但係方法都有好多，個個唔同，有D人會用自己嘅仙術妖術邪術嚟搵錢，就好似諸葛象最鍾意搖控屍體犯案，易面容本來係做舞台戲嘅，有時都會易容犯事，阿土就唔知係正直定蠢，佢係環保先鋒，一貧如洗…」
「係直正！」阿土回應。
「你估個個好似你咁，本來就有家底咩？」易面容咁同白波姐姐講。
至於諸葛象就默認咗。
我心諗，原來佢哋都會犯吓事嘅，唔怪得之俾人當係壞人啦。
「你哋班人咪炸亂哥柄啦，我講緊歐陽巨嫁，至於佢，就係一個職業殺手。」
原來係咁，唔怪得之呢個妖人咁大殺氣啦。
「咪係囉，呢個人真係殺手嚟，我哋點比啊，不如走啦。」諸葛象講。
「其實都係，妹，教多你一D嘢，人魔妖靈精屍神鬼呢D嘢，有D相剋，有D相輔相成，靈力妖力神力人力邪力都係。論靈力，我哋呢邊呢四個都未必差得過歐陽巨，但係論人嘅力量，武力，我哋四個唯一有能力應對佢嘅就只有阿土，再加上歐陽巨真係殺手，有訓練過身體，阿土都應該應付唔到佢，我哋即使用仙術妖術去對付佢都唔係咁通，因為佢嗰十六把妖刀唔係講笑，係可以淨化或者免疫大部份妖術嘅利刀，佢身體質素越高，嗰十六把刀就越鋒利…」
「咁我哋走得未啊？」諸葛象再講。
「走咩丫走？聽咁耐都唔知周白波佢講緊咩咩？」易面容講。
我都唔明，所以繼續聽姐姐講。
「對付到佢嘅，就只有我嘅火術。」姐姐講埋最後呢句。
「佢喺度讚緊自己啊！」易面容再講。
原來係咁，唔怪得之姐姐唔怕啦，但係我有一個疑問︰
「但係…呢個妖人嘅十六把刀放喺邊嫁？」
「身體裡面。」阿土回應我。
「手刀﹑臂刀﹑膊刀﹑腳刀﹑滕刀﹑胸刀﹑腹刀﹑背刀，各兩把刀，一共十六把刀。」易面容再講。
「即係…」
「即係佢D刀都係喺身體裡面，需要用嘅時候就會破血肉而出，佢係名副其實嘅妖人，唔係正常人類。」白波姐姐再解釋。
「係啫，但係…諸葛象唔使咁驚啫，係咪佢仲有咩犀利嘅地方嫁？」我再問。
「驚咩丫驚，佢條友係驚歐陽巨D妖刀整爛佢心愛嘅傀儡咋，你估佢係驚死咩？」易面容講。
「佢當佢D傀儡係模型咁收藏嫁。」阿土都出口講。
原來佢哋四個都唔驚歐陽巨喎，頭先仲嚇得我丫。
之後，歐陽巨佢仲無端端向住我行過嚟…
我當時真係驚到傻咗啊，好在…
「喂，你做咩啊？」
白波姐姐﹑易面容﹑阿土同大嗌，仲做好準備保護我一樣。
但係歐陽巨就好似著咗魔咁，完全冇理佢哋，仲一路向我行埋嚟…
咁我咪一路向後退囉。
「火舌焦油！」白波姐姐都唔再等喇，立即向佢攻擊。
易面容就保護我，阿土就隔住中間。
不過歐陽巨右手手臂突然走咗把刀出嚟，仲輕力一揮就將姐姐嘅招數撥開…
佢把刀應該係有輕微受傷嘅，但係歐陽巨佢就冇理，好似想殺咗我一樣…
繼續直衝埋嚟。
「土壁壘！」阿土嘅招數，佢變咗道土牆擋咗喺我哋前面，但係…
(嘭 ~！) 歐陽巨佢赤手打爆咗道牆，而家佢淨係右手邊…
包括埋胸肌前面同背脊，都已經出現咗五把刀喇，凶狠到想殺人咁款。
「鬼影手刀！四葉鬼靈精！」係易面容佢出招。
佢先向歐陽巨掟出兩把飛刀，再召喚小鬼想阻礙歐陽巨衝前嚟…
飛刀完完全全飛中歐陽巨，但係佢就好似當冇嘢咁…
用一用力，肌肉爆一爆，飛刀就喺佢身上跌落地下…
四葉鬼靈精向佢放出樹藤，諗住阻佢來勢，點知佢妖刀破肉而出…
一下子就就將樹藤斬爛晒。
「我對佢真係唔易啊！周白波快D放大招啦！佢癲嫁！」易面容大嗌。
阿土亦都轉個身就再抓向歐陽巨，歐陽巨背脊噴刀，將阿土隻手斬斷…
不過阿土似乎知道有此一著，一早就用咗「土化假手」去做呢個動作…
姐姐亦都喺呢個時候，從後攻擊歐陽巨…
「風火輪間！」
姐姐之後有解釋過佢呢招個名，「輪間」意思就係「輪姦」…
係將「風」同「火」不斷咁釋開出去攻擊對手嘅強勁攻擊招式。
呢招仲似乎有番D效果，歐陽巨佢終於要閃避一吓…
之後，佢哋四個高手就繼續打起嚟，諸葛象就只係喺旁邊睇戲…
而我就呆咗咁，唔知郁唔郁好…
大家就係咁，僵持咗。
幾百個回合之後，雖然大家互有損傷，但係…
死喇！歐陽巨好似贏咗半招，佢喺三個高手圍困中走咗出嚟…
仲好似想對我不利啊！
「救命啊！」我自然咁大嗌起嚟。
但係…
喺呢一刻…
竟然…
竟然有佢…
係鳳初啊！
不過…
(嚓 ~) 呢一刻…
我完全傻咗，因為…
我睇住鳳初佢為我擋咗歐陽巨嘅一刀，仲成隻手斷咗落地。
「鳳…鳳初~~~！」
我立即跪低抱住鳳初，眼淚就好似同佢D血流得鬥快一樣…
佢奄奄一息咁樣，但係竟然仲同我講︰
「只…只要有我喺度，你呢世都唔使再驚…再怕，我一定會保護你…」
佢好似未講完就…
就暈咗。
而我向上一望，歐陽巨依然喺我面前，不過…
估唔到嘅係…
周圍變得…
變得突然好熱，仲越嚟越熱，我唔知發生咩事…
全場嘅人都同我一樣，因為環境轉變而嚇呆咗，都周圍望緊…
但係，喺呢個時候…
我睇到…我睇到鳳初D血…
好似流埋一齊咁，仲…
向上飛起？
「鳳…火鳳…火鳳凰！？」諸葛象望住個天上面講。
而我都跟住D血嘅流向，望到…
天上面有隻火焰鳳凰啊。
(待續)
下集預告︰
壞事要做得夠盡，當然唔可以咁早死啦，所以我請求咗地魔大人賜我力量…