米米蓮妖怪作品 -《再遇見到你》(長篇) (暫停刊): 第四十七集 ~ 鳳︰呢集我想輕鬆吓，點知得「佢」鬆咗，唔係，係甩咗。
第四十七集 ~ 鳳︰呢集我想輕鬆吓，點知得「佢」鬆咗，唔係，係甩咗。
三個余二十！？
即係之前我見過嘅所有余二十都唔係同一個人！？
唔怪得之，佢哋三個俾我嘅感覺都有D唔同啦。
睇嚟事不宜遲喇，真係要快D返去「竹林深處人家」搵佢哋先得。
(你講返去都講咗幾集喇！)
係咩？真係架？咁…
講返我呢邊先…
金屬嘅第三層我哋輕鬆過咗…
(真係輕鬆咩？聽講唔係小雲，你凍死咗喇喎。)
係咩？咁…
講返木系第四層先…
呢度好奇怪，受重傷嘅妖怪就多，但係冇隻會上嚟攪我…
就連呢層隻王都唔見咗…
咁我咪同小雲好自然咁行去屬火嘅第五層囉。
我哋行到上去，見到一個巨型輪盤，有十二生肖嘅…
最後我哋揀咗猴子圖案嘅呢個入口…
入口石雕上面有條刀痕，睇嚟我哋前面嘅人都係入咗呢度。
我哋就諗住行入去啦，但係估唔到…
突然間，有一堆嘢喺我哋後面飄浮前嚟…
嗰吓真係嚇親我。
「觸鬚！？」小雲咁叫。
「觸咩鬚啊？呢D叫觸手啊！」我回應佢。
「有咩分別嫁？」
「Eee…觸鬚係鬚，觸手係手囉。」
「點解你識嘅？」
「睇戲學嫁囉。」
「咩戲嚟嫁？」
「Eee…卡通片囉。」
「咩卡通片有觸手嫁？」
「Eee…妖怪卡通囉。」
「乜原來你咁鍾意睇卡通片架？」
「Eee…係囉。」
其實我擺明口快快講錯嘢，觸手係咩啊？我諗係咩都唔緊要喇…
最緊要係一講起觸手，一定會諗到嘅係…
重口味鹹片。不過我發誓我冇睇過嫁，只係有時唔小心噤錯咗入去囉。
(又真係幾唔小心噃，先唔小心入錯鹹網，又唔小心入錯鹹網帳戶，再唔小心揀錯鹹片，繼而唔小心點擊埋個「PLAY」制。)
呢條木嘴好似串緊我噃，丫，講返後面飄前嚟嘅觸手先…
佢唔係一條半條，而係成千上萬喺我哋旁邊慢慢飄浮前嚟嗰隻…
我當然另轉頭睇吓咩事啦。
「攪乜啊？」
「唔好意思啊，頭先行開咗，麻煩你哋可唔可以落返一層同我打一打先啊？」
一把老人聲似乎係喺第四層傳嚟。
佢雖然係好有禮貌咁問，但係D觸手就好冇禮貌咁已經捉住咗我同小雲…
仲要包到我哋冚一冚，連個口都封埋，我哋仲點答佢啫？咦，好核突啊！
我哋就係咁，好無奈咁俾佢拉返落樓下，不過佢總算放返開D觸手…
我哋而家眼前係一隻巨樹妖靈。
「大叔，你想點啊？我哋明明過咗呢層，你又拉返我哋落嚟，矛唔矛D啊？」
「對唔住啊，不過我好似好唔盡責咁，又冇乜機會上鏡噃，就就一下我呢位老人家啦，好嗎？」
「咁啦，猜包剪揼算喇，我贏咗你就俾我上去喇喎。」
咦，PK喇！我似乎捉虫喇！講到自己好似猜包剪揼實贏咁添。
睇嚟，唯有…
「我贏咗你就俾我上去，你贏咗我就俾你上去，咁好唔好丫？」我再講。
「嘩，咁公平呀？」我好想呢句嘢係巨樹妖靈講，不過係小雲講嘅。
「唔公平，唔公平，我都唔係想上去。」巨樹妖靈咁講。
慘喇，唔通又要大戰一輪？
佢咁鬼大隻，妖氣又重，應該好煩嫁喎，點算好呢？唯有…
「你唔想上去丫嘛？咁我代你上…eee…或者你可以選擇落去第三層，點丫？」
我見佢老到懵懵地咁款，係要蝦吓佢都冇辦法喇。
「咦，第三層我好似真係冇去過噃，去吓都好。」佢竟然咁講。
之後我哋就開始猜包剪揼喇，左邊係我，右邊係佢。
「包！」「剪！」
「剪！」「揼！」
「揼！」「包！」
「包剪揼！」「剪揼包！」
「包包剪剪揼揼揼！」「剪剪揼揼包包包！」
我都唔知點解佢贏咗我都唔停手，仲傻戇戇咁跟住我猜…
我輸咗噃，我當然唔忿氣啦，咪死猜爛猜囉，點鬼知…
一連十三盤，全部輸晒嫁啫！
「你要帶我落第三層！」死喇！條樹記得添！我仲好似…
真係捉虫喇！佢要我落返第三層啊！玩康樂棋咩？
但係…
PK嘅男人背後，總係有個仙女一樣嘅賢內助嘅。
「我未猜噃，巨樹爺爺你侵唔侵我玩啊？」小雲佢出口。
而巨樹妖靈微微笑咗吓就做定猜拳嘅手勢，之後…
「包剪揼揼剪包包包揼揼揼剪剪剪！」
「揼包剪剪包揼揼揼剪剪剪包包包！」
前者係小雲，佢竟然仲要贏突一盤啊！精彩！
「厲害！呢位姑娘仔真係厲害，我猜包剪揼從來未輸過嫁，竟然…」樹講。
「咁你而家要俾我哋上去喇喎。」我講。
「關你咩事啊？贏我嘅係佢，又唔係你，你要帶我落第三屠，佢就可以上去。」
金翅仆佳鳥！？
「除非你哋係兩公婆啦…」棵樹仲有呢句。
我當時即刻望住小雲，而小雲佢…
「佢…佢係我老公啊，不過我哋未結婚，eee…又不過我哋定咗婚。」
小雲佢面紅紅咁講，我真係好多謝佢囉。
「咁算啦，你哋上去啦，我出夠鏡喇。」棵樹再講。
之後我哋就冇再理棵樹，行返上第五層…
「係呢，小雲呀，點解你咁勁嘅？我講猜包剪揼啊，真係好勁。」我咁講。
「其實巨樹爺爺佢出手好慢啫，我係睇到佢出咩我先應對出咩嘅。」
「原來係咁呀？哈哈哈。」
(有人又俾人串出手仲慢過個出手好慢嘅老人家囉。)
你老爺丫，你估我唔知俾人串緊咩？我咪不是味兒咁款傻笑遮緊醜囉。
唉 ~ 點都好啦，我哋總算…
咦，咪住先，跌落地拿返乍沙先。
「小雲呀，頭先你好似話係我老婆嫁可，呵，呵，呵。」睇吓佢尷尬吓都好。
「咁你係咪想我返落去同巨樹爺爺講你唔係我老公丫？」小雲佢…
佢竟然…
(算吧啦你，入去猴子個入口啦，柒到冇朋友。)
唉 ~ 我又瘀咗。
我就係咁樣，情緒好低落咁行咗入去猴子入口，但係…
(听听灘灘 ~ 听听灘灘 ~)
前面，我未見到嘅前面度傳嚟一D打鬥聲…
所以我即刻PAY ATTENTION！
即係「注意」！好小心咁匿埋一邊，慢慢行前去睇吓發生咩事…
點知…
我見到幾個人，係六個人…
似乎係四男兩女…
一個皮膚怪異，肯定係個妖人﹔
一個一身古裝，肯定係個傻佬﹔
一個白面裂口，肯定係個小丑﹔
一個奇形怪狀，直頭係隻怪物﹔
一個…
似曾相識，佢…
好似叫周白波，係個會強姦男人嘅女人，要小心！
一個…
佢…
佢…
佢…
瑞基！？
佢點解會喺度嫁？仲同班怪人喺一齊？
當我仲諗緊嘢嗰陣，突然間，我見到…
瑞基有危險啊！
「救命啊！」
所以我乜都冇理，即刻成個人認真晒…
我「哈」一聲大嗌就衝咗出去，仲…
你老爹丫！認真緊嫁，又攪埋晒呢D蝦碌嘢！
(咁大鑊，你仲只係覺得蝦碌啊？)
我呢次PK喇！唔記得咗自己冇武器喺身，衝動咗添。
我赤手走咗去擋人哋把妖刀，呢次大鑊喇！
我成隻手俾人斬甩咗，跌咗落地下，D血流到啤啤聲。
(待續)
下集預告︰
歐陽巨右手手臂突然走咗把刀出嚟，仲輕力一揮就將姐姐嘅招數撥開…
註解︰
(1) 重口味鹹片 — 唔係人人啱嘅色情片。
(2) 鹹網 — 色情網站。
(3) 木嘴 — 眨低人哋嘅稱呼。
(4) 冚一冚 — 實一實囉。
(5) PK — 仆街嘅英文版。
(6) 捉虫 — 好有意景，可以想像一下。意思係自己攞嚟衰。
(7) 蝦吓佢 — 欺負。
(8) 康樂棋 — 兒時玩意，有個棋盤，或者棋紙，向住目標出發，擲骰進行嘅，不過衰就衰在會有D位逼你返轉頭，就好似而家陳鳳初嘅情況咁。
(9) 包剪揼 — 猜拳。
(10) 侵唔侵 — 願唔願意給我這個機會，好似係咁。
(11) 柒 — 純粹粗口，小朋友唔好學。
(12) 蝦碌 — 尷尬情況。