米米蓮妖怪作品 -《再遇見到你》(長篇) (暫停刊): 第五十集 ~ 鳳︰師姐！
第五十集 ~ 鳳︰師姐！
(你嘅命運喺嗰度！)
(我救你返嚟嫁，你係咪應該多謝我先啊？)
(好，以後你就叫我龜匙啦。)
(鄉下仔，你呢度係咪有個咩咩咩鳳派道士啊？)
(多謝你啊，雞仔。)
(汪~ 汪~)
「咦，點解…點解會有隻狗喺度嘅？」我好疑問。
頭先有幾把聲音，就好似係想嗌醒我一樣，點知我一開眼就…
就見到面前呢隻狗。
我好好奇，咪諗住行埋隻狗度囉。
正當我想咁做嘅時候，突然…
有個蒙查查，睇唔清楚樣嘅男仔衝咗出嚟…
佢衝咗埋隻狗度，好用力咁攬住咗隻狗，而且仲大聲嗌起嚟…
「師姐！師姐！師姐！」
點解佢會叫隻狗做師姐嘅呢？
究竟呢度係咩地方啊？
我望望四周圍，淨係白蒙蒙一片咁，感覺好奇怪…
我嘗試行近D去睇呢吓個男仔個樣…
點知…
正當我好似見到個男仔嘅呢一刻…
「哇丫！」
隻狗突然大嗌，仲要…
原來佢係一隻妖怪黎，佢一口將呢個男仔食咗…
我急起嚟立即就一個手刀劈埋去…
點知佢好化學，一吓就俾我打死咗，好可惜…
個男仔已經俾佢吞咗…
而喺呢一刻，我見到…
隻狗訓咗喺地下，仲慢慢慢慢…
變成咗…
「師…師姐？師姐。師…師姐~！」變成咗我師姐個樣。
我見到師姐身上D血不斷咁流出嚟，仲越流越快，越流越快…
場面太恐怖喇，令我連氣都抖唔到…
終於，我砸醒咗，仲有少少失去平衡，跌咗埋一邊…
但係點都好，總算係訓醒咗，原來頭先只係一場發夢。
而家我滿頭大汗，而且聽到D咁嘅聲音…
(沙…沙…沙…)
外面原來落緊好大雨，而我就坐咗喺石面嘅地下，似一條石橋底…
我望住D雨，去諗返頭先發生過D咩事，我依稀記得…
我訓之前應該係衝咗去救瑞基，但係點解…
我會嚟咗呢度呢？
我仲有印象，好似臨暈之前，講咗句好有型嘅說話…
之後就熱熱地，然後好嘈，好似有人鬧交或者打交咁…
再之後就搖吓搖吓，揈吓揈吓咁，然後又熱熱地…
之後發生咩事就冇晒印象嚧。
我左手斷咗，呢樣嘢我記得，我望一望自己隻手…
佢就好似話俾我聽…
我去救瑞基件事係真嘅一樣。
不過一時間，冇咗隻手，又真係有D唔慣，仲有少少無名嘅失落感…
「喂，你醒喇？」
我聽到呢把聲音之後，立即轉個頭去望吓…
原來係小雲，佢喺另一邊返咗嚟。
「小雲，頭先發生咗D咩事啊？你去咗邊啊？」
「啱啱係去咗買D嘢俾你食。你暈之前係斷咗隻手，之後我咪帶走你囉，原本諗住帶你返去醫神度嫁，點知遇上大雨嫁啫，仲一落就落咁耐，所以被逼留喺呢度囉。」
「咁…瑞基佢呢？」
「哼…」佢一聽到我咁問，立即就另轉頭行埋咗一邊。
「你做咩啊？佢唔係有事丫嘛？」
「你仲問！？你淨係記得你個瑞基咋咩？你唔記得你師姐喇？」
佢一另返過嚟就好惡咁鬧我。
我諗咗一諗，心情由錯愕，慢慢變得哀愁，仲認真起嚟，好真誠咁回應佢︰
「點會唔記得，呢廿年嚟，我差唔多每日都會諗到佢。佢係我初戀，亦係我一生中最愛嘅女人。我好憎我自己，點解唔可以好似其他人咁，好輕易咁忘記自己鍾意嘅人，從新開始過，從新去接受或者尋覓另一份愛，但係…我…我真係做唔到…不過其實，我已經好攰…好攰，師姐佢一早就被打到煙消雲散，係我親眼見到，只要佢仲生存，佢就算係鬼又好，係貓，係狗，係妖怪都好，係乜我都唔介意，但係…佢已經煙消雲散喇，乜都唔係，我…我仲可以寄望D咩？究竟我仲等緊D咩？」
男兒有淚不輕彈，我都唔想再講…
但係小雲佢的確俾到我一份好親切嘅感覺…
就好似我知己一樣，所以我先講咗咁多嘢。
「對唔住。」小雲佢好認真同我講。
我望咗佢一吓，之後再講︰
「唉~ 呢場雨都唔知要落到幾時添。個肚都有D餓喇。」
我嘗試差開話題，等場面冇咁哀傷。
「我買咗D包，你食丫，食完仲有水。」
我執起個包就食，仲好好奇咁望住小雲…
「唔好望我喇，我講啦。你斷咗隻手之後，原本個姓陸嘅女仔攬到你實一實，但係我唔俾喳嘛，咪搶返你囉。點知佢哋竟然想五個打我一個喎，我咪乜都講晒出嚟，之後佢哋就知難而退喇，我係見到嗰個女人唔捨得你啊，但係我係都要帶你走，你係屬於…屬於你師姐嘅，起碼我認定咗係咁，所以咪帶你走囉，仲喺度整咗個火俾你取暖，你隻手我都保護得好好，你睇吓。」
佢將我隻斷手俾返我。
我試咗一吓，小雲佢真係對我好好…
隻手可以完整咁砌返落手腕度，不過係唔識郁啫。
我睇完隻手，就諗返起頭先佢講D嘢，所以咁問︰
「其實…你…你係咪我師姐嘅邊個屋企人或者朋友啊？點解你好似淨係想我鍾意佢咁嘅？」
「如果唔係你師姐，我都唔會鍾意你啦…」呢句我聽唔清楚，不過佢似乎係自言自語。
之後佢再望返住我講︰
「雨停咗我哋就返去搵醫神醫返你隻手啦，你食埋D嘢先啦。其實…我又會係你師姐邊個丫，你都知我係神仙啦，我只係…都係算喇，唔講喇，總知我同你師姐冇關係啦…」小雲佢好似有好多嘢瞞住我咁。
(沙…沙…沙…)
「D雨真係好大，睇嚟真係冇咁快走得。」
我望住D雨，諗返起好多嘢…
唔知點解，喺呢一刻…
我好想做呢一套動作…
我企咗起身，慢慢行咗出去出面…
我就好似傻咗咁，由得D雨淋濕自己…
我仲…
我都唔知做乜，將隻斷咗嘅手拋咗出去…
「喂！你傻咗呀？快D返入嚟啦！」
「就俾我淋吓雨啦！」
我攤開雙手，面向上天，感受一吓雨灑到身上嘅感覺…
「哈哈哈哈哈哈哈！」仲向天傻笑。
「黐線架？你又冷病就弊喇！我唔得閒救你啊！」
我冇理小雲佢，繼續感受雨水…
(踏踏~ 踏踏~)
「你黐線還黐線丫，唔好虐待隻手丫，我保護得佢好辛苦嫁！」
佢衝咗出嚟，喺我前面，踎低執返隻手…
仲用身體擋雨，用件衫嚟抹隻手，佢背住我…
喺呢一刻…
我望到佢嘅背影…
跪低咗，抱住佢，好用力咁抱緊佢…
仲嗌錯咗︰
「師姐…」
小雲佢嘗試過推開我，但係…
「小雲，我知你唔係我師姐，但係請你唔好推開我丫，我只係想感受吓，一陣都好丫，俾個機會我，俾個希望我丫，我真係好掛住師姐佢…我真係好掛住我師姐…呢二十年嚟，我每晚都發夢見到佢，我每日都希望有奇蹟出現，可以俾我見返佢，雖然我知咁係冇可能，但係我就係咁，自己呃自己呃咗成廿年，我只係想…想同你講，我真係好鍾意你嫁，我真係好鍾意你嫁，我真係好鍾意你嫁…」
小雲佢呆咗…
(誰願意講出一些自欺的說話 ~)
(你叫我以後忘掉你 ~)
「有好多人覺得有三個字好難講…」
(誰令我今天開始不喜歡講話 ~)
(暗裏我繼續在想你 ~)
「但係呢三個字，我真係好希望同你講…」
(怎可掩飾心中的哀傷 ~)
(手裏感覺到你雙臂的冰凍 ~)
「希望你可以…」
(看冷雨在臉上的亂爬 ~)
(心中忐忑伸出一雙手 ~)
「可以接受我嘅愛…」
(只要只要不顧一切的擁抱 ~)
(你叫我的心~ 倒掛 ~)
「我愛你。」
(待續)
下集預告︰
你試吓再放劉禪呢D廢物出嚟，我就燒死你，唔燒你D傀儡！
註解︰
好化學 — 好簡單容易被整爛。
首歌係呂方嘅《聽不到的說話》