第五十九集 ~ 鳳︰黑衣人啊!…我仲竟然見返佢,而且收到一封信。
 
又忐忑,又躊躇,用嚟形容我而家嘅心情真係一絕…
 
(龜︰方家呢度件事留返俾我講丫。)
 
既然係咁,咁…
 
我講咩好呢?方家呢邊個癲佬件事就由瑞基佢講,而我就不如講吓…
 


我走咗之後點啦,嗰邊就賣個關子先,我離開咗方家同瑞基,返咗去…
 
竹林深處人家。
 
「喂,我返嚟喇!」原來而家都好夜喇…
 
「妖!返咪返囉,嘈乜Q嘢啊!」回應我嘅係隻樹林精靈。
 
我都唔記得之前有冇提過喇,醫神呢度其實住咗好多呢類精靈…
 


不過就好愛和平同綠色環保咁,有時真係和平環保到有D乞人憎。
 
我當然冇理佢,直接返咗入醫神屋企內堂,發現咗一張字條…
 
字條上面叫我去「子水樓」,有大約點去嘅方法寫住…
 
而我一心諗住一睇完就去訓個覺聽朝再出發。
 
點知…
 


(嚓嚓 ~)
 
「邊個?」我大聲問。
 
「邊你老保咩!捨得訓未啊?」又係林精回應我。
 
但係我一樣冇理佢,反面我好在意頭先呢兩吓聲音…
 
因為呢兩聲肯定唔係隻死林精發出嚟嘅。
 
於是乎,我行返出去亭園,望上竹屋頂,竟然…
 
見到一個黑衣人!?
 
「你…你係邊個?」


 
佢冇回應我,佢係喺屋頂望落嚟面向住我,但係真係太黑喇…
 
除咗有少少月光造就我見到佢個人影之外,我咩都睇唔到…
 
不過我一於好少理,仲立即…
 
「小膠你!夜媽媽著成咁,嚇鬼呀?」我大嗌。
 
「你再嘈我就同你開年!」林精把死人聲。
 
而我終於忍唔住,衝咗出去,一手扯咗佢入嚟用拳頭「錫錫」佢。
 
「你老祖丫,俾黑衣人入咗嚟你隻死林精都唔知,守個屋企都做唔到,成九日掛住訓,信唔信我打到你煙消雲散丫嗱!」
 


「唔敢喇!唔敢喇!」
 
「呵!」我其實表面係打林精,實際係估計好黑衣人位置…
 
我估計佢來者不善,冇可能好人好姐會夜媽媽嚟嘅,所以我認定咗佢係壞人…
 
我就襯住扮打林精嘅呢個時間,突然一個轉身一吓將舊石頭掟埋去黑衣人度…
 
而當中我仲加入咗「鳳凰擺駕」嘅力量,我心諗…
 
即使打佢唔死,應該都夠力打中佢,令佢受傷,但係估唔到嘅係…
 
「哎也!」我係掟咗舊石頭上去屋頂黑衣人度,仲中正添,不過…
 
黑衣人迅間變成林精,我掟上去嘅石頭打中咗原本喺我手邊嘅林精,咁即係話…


 
我一另返過嚟,手上就係…
 
黑衣人!?呢招係…
 
佢之後一掌打埋嚟,好在我身手不凡,一個轉身,彈開幾米就避開咗。
 
黑衣人而家企咗喺我面前大約十米,及及吓頭咁…
 
但係唔夠兩秒,佢就突然向我衝過嚟,睇嚟佢想用腳踢我…
 
「鳳毛麟角!」我立即求其執起D樹葉就掟埋去佢度…
 
不過佢好輕鬆咁雙手向外一撥就破咗…
 


但係總算令佢唔可以及時用腳攻擊我…
 
佢衝到埋嚟,一個日字中拳,想打我心口…
 
我立即以指代劍…
「格擋式!」
 
總算抵擋咗黑衣人嘅攻擊,仲退開到一個防禦距離…
 
「你係邊個?點解會識呢D招式?你嚟呢度做乜?」我問。
 
不過佢冇答,仲好似學我出招添,呢招係…
 
「鳳毛麟角!?」好在我識避啫。
 
唔係咁吊詭呀?唔通係「慕容」家後人?
 
(你睇金庸睇到傻銀咗呀?)
 
妖,呢D時候唔好攪住晒啦,好認真嫁!
 
點解呢個黑衣人會識得複製我嘅招式嫁?
 
睇嚟我要立即完爆佢,唔係我就等自爆都得喇…
 
「直刺式加衝擊式!」
 
佢冇講嘢,但係就雙手喺胸前結成火球…
 
我咁衝埋去咪自殺!?點攪好呢?
 
我立即使出「擎天式」衝咗上天,再用「回旋式」返埋原位。
 
點知佢「龐」一聲掟咗個火球埋嚟…
 
好在我都係玩火嫁啫…
 
「有少少時間我做準備就夠喇!以火還火,鳳鳴朝陽!」
 
我指尖控住火球,利用引力,旋轉帶動火球反擊…
 
加上自己嘅靈力,將光球變成火光柱射向黑衣人…
 
呢招衰就衰在前期功夫較多,出手之前俾咗好多空間對手準備去閃…
 
結果佢真係好簡單一吓跳返上屋頂就算。
 
雖然只係簡單幾招對壘,但係我已經感受到…
 
即使我用全力同佢打,再打落去,我亦都只有輸…
 
好在,佢跳上屋頂之後,選擇咗逃走…
 
佢仲一個轉身過嚟,掟咗個飛鏢埋我度…
 
不過已經唔算係咩攻擊,可能只係刻意留低一D線索俾我。
 
究竟呢個識複製招數嘅黑衣人係邊個呢?
 
我望一望個飛咗入地下嘅飛鏢,完全冇頭緒,不過…
 
我一返入內堂,就再攞起醫神將字條,下面寫住…
 
「有危險,萬事小心。」
 
估唔到醫神真係高人中嘅高人,點解會知道嘅?
 
唔通佢都係因為估計到有人會嚟傷害佢哋,先帶大家離開先?
 
聽朝搵到佢哋之後再問吓先。
 
呢一晚,我當然要小心黑衣人返轉頭啦,所以…
 
我走咗去同班樹林精靈訓,我理得佢嬲我丫,起碼唔會殺咗我。
 
點知我捉蟲,條死人林精好小氣…
 
到我第二朝訓醒,我真係小佢鹵味,我D衫褲俾佢攞走晒。
 
俾我捉到佢,我肯定閹咗佢…
 
而家我都唔知點出發好。
 
冇辦法啦,唯有又搵佢…
 
「小雲!喺唔喺度啊?我要衫褲啊!」
 
點知佢冇回應,我估佢忙緊工作,我都係自己攪掂算喇…
 
我衝返入去醫神屋企…
 
第一時間係諗到醫神都係男人,應該有D衫褲可以借吓嚟著呱。
 
「吓!?」點知我一打開佢個櫃筒…
 
又唔係咩恐怖或者新奇嘢嘅,只係…
 
佢全部衫褲都係白色,仲要白埋一樣色…
 
我有少少無奈咁囉。
 
雖然話係無奈,但係唔知點解…
 
咁樣嘅情景,另我諗返起佢…
 
我養父Father Thomas。
 
仲記得我細個嗰陣又係會摷吓Father櫃筒,而佢個櫃筒裡面都係咁樣…
 
全部白色衣物,唔知係咪神級嘅人就係鍾意咁嘅呢?
 
我望一望出面個天空,諗一諗個時間,諗諗D嘢︰
 
「而家咁早,不如返吓去教會以前個地址睇睇囉。」
 
結果我就係咁,著住一身白色素衣出發,先去去Father Thomas個教會度睇吓。
 

 
去到之後,我企咗喺大閘出面…
 
正當我諗住行入去嗰陣,有一個似曾相識嘅身影走過…
 
而我竟然自然地大嗌出嚟︰
 
「大BEN哥!?」
 
個男仔另返轉頭望一望我,佢眼神話俾我聽佢覺得好奇怪…
 
呢個我明點解,因為叫佢大BEN哥嘅人,就只有後生時候嘅我…
 
而而家喺佢面前嘅,係一個已經四十歲人,比佢年紀仲要大嘅人…
 
所以我對佢嚟講,根本係個陌生人。
 
我諗到咁之後,都冇強行要佢知道我就係未來嘅雞仔,只係講︰
 
「請問Father Thomas個墓碑喺邊?我想去拜一拜佢。」
 
佢對我笑咗一笑,指咗個方向俾我…
 
之後我就沿住方向去搵Father個墓碑,而且最終我係搵到嘅。
 
我企咗喺墓碑前面,一時之間根本百感交集,就連喊都唔識喇…
 
就只係好簡單咁,對住Father張相鞠咗個躬。
 
「喂,雞仔!」
 
我一聽到立即另返轉頭。
 
「Father封信,俾你嫁!」
 
「大…BEN哥,你認得我?」
 
「雖然外表同身型變化唔少,係幾難以置信,但係我信感覺嘅,我感覺話俾我知,你就係我認識嘅雞仔。雖然我唔知點解,你亦唔需要解釋俾我聽,就同我信有神一樣,唔係樣樣嘢都要解釋嘅,只要信,佢就會存在嫁喇,不如你睇吓Father留俾你嘅呢一封信有咩先丫。」
 
我微笑咗一吓,之後打開封信,係封英文信,不過翻譯如下︰
 
「鳳凰,我是你的父親,還記得你承諾過我什麼嗎?沒錯,就是要學好英語,這封信是刻意用英文寫的,意思就是要你學好英語回來才看得懂…(仲有好多內文,不過費事太長,刪咗去)…我留給你的玉豬,其實是一件寶物,是一條鑰匙,可以啟動我所遺留下來的靈力的,人世間一直存在著妖邪魔道,但我相信,只要人世間還有好像你一樣善良的人,便有救了。你要好好利用我留給你的這一切,努力加油。等到你百年歸老之後,我們再在天堂相見吧。永遠愛護你的父親上。」
 
(待續)
 
下集預告︰
 
佢左一吓「癲佬豺狼咬」,右一吓「癲佬黑熊爪」…
已有 0 人追稿