第六十二集 ~ 鳳︰個練習場有隻惡鬼嫁!我要快D嚟救你哋先得!
 
雞仔佢哋就開始練習,而我就繼續我嘅遊手好閒。
 
講吓咋,我點會遊手好閒丫,我不知幾忙…
 
其實我係想打探多D嘢,了解多D嘢就真。
 
我喺我養父Father Thomas教堂度撞返大Ben哥…
 


一個同我唔同時空嘅大Ben哥…
 
不過佢一於好少理,仲認定咗我就係「雞仔」…
 
將Father留低嘅最後一封信俾咗我…
 
信裡面提到當年Father留俾我嘅嗰粒玉豬其實係一件寶物…
 
話可以啟動Father佢遺留落嚟的靈力喎。
 


Father佢有幾多料我唔知,但係我就冇見過佢捉邪捉妖…
 
所以我對佢嘅靈力都冇咩特別期望,加上…
 
而家粒玉豬喺瑞基手度,我都唔知攞唔攞得返。
 
喺呢個時候,我唔知做乜,呆呆滯滯咁…
 
左手揸住Father封信,右手揸住瑞基當日俾我封「信」…
 


我仲突然傻笑咗一聲…
 
恥笑自己戇居嘅同時,唔知點解…
 
唔知從幾時開始,發覺瑞基好似喺我心裡面都有咗一個位置咁…
 
我一諗返起佢就…
 
好似有D慶幸我呢個傻佬曾經有一個幾好嘅女仔欣賞過一陣咁。
 
我帶住Father封信,行過教堂,聽到「曾經認識」嘅教友們喺度唱聖詩…
 
我同佢哋點咗吓頭,之後就一支公悄悄咁離開咗呢度。
 
我打算都係時候要搵返雞仔同忠義…


 
所以出發去子水樓搵佢哋。
 

 
途中我嚟咗一間快餐店「麥當記」…
 
我諗住咁耐冇食過呢D「垃圾食物」,咪試吓D薯條囉,點知…
 
「我吊你個…」
 
「鵝刁梨個HI丫!咁卵考WEI嘅?」(「粗口」,之後講「咁好味嘅?」)
 
隔離枱有個麻甩佬用D半鹹淡嘅廣東話咁講嘢。
 


而我之前都想講粗口,係因為D薯條好味到太唔正常…
 
我理智話俾我聽,呢D薯條,食不得,肯定落咗D唔知乜嘢…
 
但係而家見到有條友好似好鍾意食噃,梗係要「欣賞」吓佢食晒啦。
 
頭先條友原來同佢一班朋友一齊,大概係十個人左右…
 
又食薯條,又食漢堡,仲飲埋D咩「可愛可樂」,食得不知幾開心…
 
「禮弟豬豬到花美能…」
 
算啦,我都係直接翻譯啦,唔係真係睇死人…
 
嗰條友原來都係我嘅同行,都知道咩係七彩八扇…


 
佢唔怕大大聲講,因為一來佢講咩都冇人在乎,二來佢講D咁嘅嘢…
 
其他人唔係當佢黐線就係以為佢哋呢十個人講緊唔邊邊套武俠片…
 
呢個時候,最出名可能係「如來神掌」。
 
佢哋班人喺度一邊食,一邊討論緊七彩武林大會D嘢…
 
仲講到蘭花山莊莊主花米蘭嘅九曲追魂劍同劍譜都俾人偷咗…
 
佢哋講到呢度…
 
我都忍唔住諗返轉頭,估計就係當日余二十偷咗…
 


我之前聽過雞仔同忠義返嚟之後講過話佢哋都撞過另外兩個余二十…
 
仲俾咗唔少資訊我,我再細心D諗諗…
 
如果我冇估錯,喺而家呢個時空應該有三個余二十…
 
本來喺呢個時空,真正嘅余二十已經改邪歸正,做咗我二弟,即係忠義佢。
 
而當日喺瑞基把口度講過嘅,應該係同我一齊嚟呢度嘅…
 
分開咗出嚟嘅正義余二十,俾人通緝嘅都應該係佢…
 
甚至之後去借九曲追魂劍都係佢,不過佢而家應該已經凶多吉少。
 
最後一個就係分開咗出嚟嘅壞人余二十,有一點我諗得唔係好明…
 
點解佢當時唔係同我一齊,或者叫做同正義余二十一齊嘅呢?
 
我怕…佢可能比我哋仲要早嚟到呢個時空,準備嘅都比我哋更多…
 
壞人去到邊到都依然係壞人,所以佢有幾壞,我唔係最在乎,反而…
 
我而家最在乎嘅係…
 
當日究竟邊個將我哋帶嚟呢度嘅呢?似乎係另有其人。
 
我更加擔心嘅係一樣嘢…
 
就係時空嘅設定問題…
 
如果我冇估錯,或者講真係如我所諗嘅話…
 
時空就好似一架火車咁,我由第一卡去咗第二卡,如果斷開咗兩卡…
 
第一卡依然會正常運作,問題係我冇可能返去第一卡…
 
而且第二卡仲會慢慢冇咗動力而難以繼續運行…
 
最後我會喺呢「卡車」度消失。
 
我之所以覺得而家已經係「斷卡」嘅原因係…
 
假設我係雞仔,一路成長終有一日會變成而家嘅我…
 
即係返番嚟過去嘅呢個時宣,而喺我記憶裡面冇呢段時間嘅片段,所以…
 
我估計,而家已經「斷咗卡」,亦即係…
 
我已經冇辦法返到去「未來」,我而家唯一可以做嘅嘢…
 
就係活在當下,努力去繼續行落去。
 
我諗到呢度,突然又唔小心隊咗條「好味薯條」入口…
 
「喂!仲食!?D嘢食有問題嫁!」
 
我呆咗咁望住呢個阻止我食嘢嘅人,佢係…
 
「小雲!?你…你話我諗得啱唔啱啊?」
 
小雲佢面都紅晒,回應我︰
 
「吓!?我都唔知你諗過乜,點知你啱唔啱啊?」
 
「你唔係神仙嚟嫁咩?」
 
「你估神仙就萬能咩?」
 
「咁…你覺得我哋可唔可以返到去未來啊?」
 
「返去!?我嚟咗之後就冇諗過嚧,所以都喺呢個時空申請咗個神仙職位,我暫時負責睇住呢個地區嘅地政。」
 
「咁又係,你係神仙,去邊都冇所謂啦。」
 
「Eee…車,懶巴閉,其實…你去邊夠冇所謂啦,呢度咪仲好啦,有咁多女仔鍾意你。」
 
「吓!?」我有D尷尬。
 
「你偷聽嗰班外省佬走喇,你仲聽唔聽啊?」佢再講。
 
「唔聽喇,佢哋咁講嘢法,真係聽死人,耳屎都多D啊。」
 
「咁你一陣去邊?」
 
「去搵返雞仔同忠義佢哋。」
 
「咁你直接去惡鬼墓啦。」
 
「惡鬼墓!?」
 
「係啊,佢哋去咗惡鬼墓練習。」
 
「惡鬼…惡鬼墓D鬼好似…好似黐線嫁喎,亂嚟嫁,咁佢哋會唔會有危險?」
 
「劉紫千話同D鬼有協議,唔會傷佢囉。」
 
「唔會傷佢!?咁有冇講過唔會傷其他人啊?死喇!睇嚟我哋要快D出發!」
 

 
之後我就拖住小雲,一支箭咁衝去子水樓…
 
「其實你驚咩啫?佢哋幾個高手喺度,根本冇鬼可以贏佢哋啦。」
 
「鬼在暗,我哋在明,始終係有危險,我哋可以強,唔通鬼怪就唔可以咩?以我人生經驗話我知,君子不立危牆下,小心使得萬年船,一定要小心D,況且…」
 
「況且咩啊?」
 
「我有記憶,惡鬼墓有隻妖怪好犀利。」
 
「咩妖怪咁犀利啊?」
 
「好似叫…死窮鬼。」
 
(待續)
 
下集預告︰
 
哼,我已經唔係以前嘅我,我殺過農夫妖王,你最好唔好惹我。
 
已有 0 人追稿