第六十一集 ~ 雞︰佢唔知去咗邊?而我哋就去咗練習場!?
 
呢對痴男怨女真係…
 
(你講緊我哋啊?)
 
唔係,我講緊自己啫,你哋諗多咗喇,你睇吓呢邊把躊躇劍幾有型!
 
躊躇劍係一把啡啡黑黑嘅古劍,表面就好似生咗銹咁…



雖然劍身藏喺閃石堆,但係估計佢有我哋成個人咁長…

淨係手柄都有我半隻手臂長,而且好粗,睇落去…

就好似淨係成年男人嘅手先握得實咁,冇開鋒,但係…

可以想像得到當年嘅擁有者點樣用佢稱霸驅魔界…

咁嘅重鐵款,真係俾佢求其壓一壓都匾晒…
 


雖然我仲未見到佢個劍身,但係段估唔會唔成正比呱…
 
如果係,又真係好D滑稽。
 
「四劍平天下,四神劍之一,亦係雙古神劍之一,忐忑劍早就不知去向,而剩返喺人世間,喺我哋面前嘅,就係呢把 — 躊躇劍!」劉紫千講。


「一把鈍劍可以有幾勁啊?」靈兒出口問。
 
「你淨係睇佢咁大把就知佢勁啦,但係…咁重,咩人拎到嚟用呢?」醫神問。


 
「躊躇劍係一把古劍嚟,冇一千都有幾百年歷史,相傳曾經用過佢嘅劍手都可以憑住自己一己之力獨步武林,你話佢勁唔勁丫?我仲聽講,歷史上用過佢嘅人,亦只有三個。」
 
「咁係邊三個啊?」二哥問。
 
「頭兩個都只係傳說,所以我都唔知佢哋究竟係咩人,不過第三個人就係近代嘅人,好可惜,已經不知去向嚧。」
 
「咁佢係邊個?叫咩名啊?」我問。
 
「當年四劍平天下最後生嘅一個劍客,當時佢好似得十幾歲,各門各派得知有佢呢個少年奇才,都旨意佢領導群雄,平定人魔界,聽講佢三歲開始習武,七歲學道術,無師自通,十幾歲憑自己自創劍式斬妖除魔,仲憑住天生神力,成為當世唯一一個可以用得到躊躇劍嘅劍客,佢個名叫做…唔記得咗。」
 
「吳懻德左!?四個字嘅人名!?」我問。
 
「個名都成個古人咁嘅,唔怪得之佢配得起古神劍啦。」二哥。
 


「個名果然出類拔萃!」醫神。
 
「一聽就知係高人中嘅高人。」靈兒。
 
「汪汪!」師姐。
 
劉紫千之後好似好尷尬咁,搲吓搲吓個頭講︰
 
「哈哈哈,不過之後就冇人拎得起呢把重劍喇,估計要有另一個人再拎得起佢,最少都要多幾百年。」
 
(餐 ~!) 我哋身邊突然有一聲巨響傳嚟。
 
全場四個人一隻精靈一隻狗,六條生命隨住聲音望過去…
 
一望到個情況,當場六條友一齊眼都凸埋,連個下巴都跌咗落地下…


 
因為…
 
十九哥佢一手就將躊躇劍抆咗出嚟…
 
「細佬,唔知點解…我覺得我同呢把劍好似似曾相Friend咁啊!感覺好GOOD啊!」
 
「阿哥,你噏乜啊?」二哥。
 
「二哥,十九哥講嘢夾雜咗洋文啊!」我。
 
「但係…點解…」劉紫千錯愕到呆晒咁。
 
醫神望咗佢哋一望,之後問︰
 


「你講緊嘅「吳懻德左」,係咪就係講緊佢啊?」
 
「係…係啊,十九,佢叫林十九,孤高劍客林十九啊!」
 
(呼 ~!呼 ~!呼 ~!呼 ~!呼 ~!) 十九哥發把劍嘅聲音。
 
(哇 ~!哇 ~!哇 ~!哇 ~!哇 ~!) 我哋驚被發中嘅聲音。
 
「阿哥!唔好亂揈住,咁差大把嘢,揈親人就唔好啦!」
 
(攀 ~! 嘭 ~!)
 
林十九一「收制」,成把躊躇劍揈甩咗手,插咗入地下,仲攪到周圍灰塵滾滾。
 
「睇嚟而家周圍咁款,我哋都係離開呢度先啦!」


 

 
我哋之後一班人一齊返咗去子水樓偏廳大堂…
 
坐低咗再傾計…
 
「估唔到失蹤咗嘅林十九原來就喺度,呢次我哋想輸都難喇,哈哈哈。」劉紫千。
 
「我都聽講過我阿哥係好犀利,估唔到佢出名到咁,不過…」二哥。
 
「而家都傻咗啦,再勁都冇用。」靈兒講。
 
「吓!?傻咗!?咁…老鬼瞬,醫唔醫得返佢?」劉紫千問醫神。
 
「佢第一日嚟我度,我就睇過佢,佢唔似係身體出問題而變成傻嘅,我估佢係自己刻意咁做嘅。」
 
「咁…即係咩意思啊?」劉紫千再問。
 
「人有三魂七魄,詳細就唔解釋住喇,簡單D嚟講,你哋就當係人由十種元素配合而成啦,而而家嘅林十九身體裡面,大約只係得返一半嘅元素,我亦從來冇聽過有人或者有妖魔鬼怪可以咁樣攞走呢D元素法,所以,我估林十九係刻意將呢D嘢隱藏咗,至於點解,我就唔知喇。」醫神回應。
 
「咁冇辦法啦,我仲諗住有孤高劍客林十九,我哋呢次可以慳水慳力咁贏個七彩武林大會添。」劉紫千。
 
大家都一時間冇再談論D咩,直到劉紫千再出聲︰
 
「其實又唔使太擔心嘅,我哋呢班人本來就能力好強,贏唔係一個問題嚟,我亦唔係真係咁志在個勝負,只係…」
 
「只係咩啊?」醫神問。
 
「七派之中有唔少壞分子,我怕七重妖塔會落入壞人手中,呢個係我第一怕,而我第二怕,係我怕真正嘅壞分子坐收漁人之利,所以其實我唔想七派互鬥嫁,到時候真係妖魔鬼怪叢生就弊家伙。」
 
我都好明白劉紫千樓主所講嘅嘢。
 
「其實…到時係有冇咩規則嫁?」靈兒問。
 
「唔知,唔定,因為規則係由之前一場嘅勝利者提出。即係勝利者會有返一D公平優勢,始終打得耐都係會攰家嘛。」
 
「仲十幾日,我哋可以做D咩呢?」
 
「不如就用一個星期時間,同我切磋吓呢,我為咗練習,製造咗個練習場地。」
 
之後大家都表示讚同,因為仲夠時間休息,把握剩餘時間嚟練習係好事。
 
我哋一班人食過飯之後,就跟住劉紫千樓主入去佢所講嘅練習場地…
 
而呢度,係一個…
 
墳場!?
 
「放心,我同呢度D鬼都有同識,佢哋唔會殺我,我亦唔會殺佢哋,佢哋只係幫我練習,大家要記住,我哋只係切磋!」
 
 (待續)
 
下集預告︰
 
時空就好似一架火車咁,我由第一卡去咗第二卡,如果斷開咗兩卡…
 
已有 0 人追稿