第六十七集 ~ 雞︰躊躇劍出鞘!
 
咪,就,係!
 
仲唔止成日想自己係地上最強,個「地上」個範圍仲要好窄…
 
眼光又窄,所謂「地上」就係自己生處既地方咁大把…
 
喺呢度,簡單嚟講咪就係中國國內最強囉!
 


真係聽到都起晒雞皮!
 
(嗱!仲唔認你係雞仔?雞皮都起喇!)
 
喺呢個時候我唔知做鬼嘢,竟然諗返起師父…
 
可能因為對手死窮鬼太勁啦一來…
 
二來就係因為周圍都係墓地,難勉唔會諗吓先人…
 


(大佬!而家夜媽媽周圍都係墓地你諗先人?我諗緊點走人啊!)
 
呢句係金玉麟講嘅,我估唔到佢個死人變態佬都會識驚鬼。
 
「而家舒服晒,接我招,越窮越見鬼!」死窮鬼突然大嗌。
 
上次講完佢肚屙,惡攪咗一輪,之後認真起嚟,仲一拳就打埋我度…
 
好在我身手敏捷,立即匿喺個墓碑隔離…
 


不過可惜咗個「先人」,成個墓碑俾佢一拳打到渣都冇剩…
 
「咩招數呀?」我大嗌。
 
「呢招叫處理老墓!蝦!」佢回應,再一拳打埋嚟。
 
我又用「先人」墓地頂住咗,不過成個墓碑爆開咗。
 
「呢招又咩名堂啊?」我再叫。
 
「呢招叫爆你老墓!」
 
「好喇喎!可唔可以唔好講呢兩個字啊?」
 
之後佢再一腳掃埋嚟…


 
「掃你…臭西!」呢腳異常強勁,一連幾個墓碑爆咗。
 
「可唔可以用其他名呀?點解要用個西字啊?」
 
「你有冇睇波嫁?識唔識英文啊?歐西,瞌西,西CAKE個西啊!」
 
佢講到呢度,竟然話我唔識英文,我立即火火地就…
 
「玉麟金劍,擎天式!」
 
玉麟金劍例不虛發,雖然唔係中正,但係都打傷咗死窮鬼。
 
一劍向上係拖中佢心口,佢彈開咗幾米。
 


「你老媽個BB丫!條友一拳一腳都打到D墓碑爆晒,你CALL我出嚟?」
 
「你唔覺得打爆呢D鬼特別有成功感咩?」我回應金玉麟。
 
「好!認真!我嘅認真係就要拮爆你下部!」金玉麟大叫。
 
之後佢好似脫韁野馬咁,亂衝埋去死窮鬼度…
 
玉麟金劍癲起嚟都唔係講笑,真係可以一吓就致命…
 
呢樣嘢就連死窮鬼都睇得到,所以佢…
 
「哇丫!我要發窮惡喇!」
 
佢好似想爆發晒一隻鬼一身可以用緊靈力出嚟咁款…


 
但係個死人樣都係冇變,只係眼紅到變青…
 
再雙手夾實玉麟金劍…
 
「哇!好很痛啊!」金玉麟當然大叫。
 
而我喺呢個時候先感覺到我之前嘅所學都實在太君子…
 
對住死窮鬼呢D野蠻人,似乎我呢D君子要起手真係有難度…
 
而家好似老鼠拉龜,買定離手添…
 
(冇訂埋手啊!而且唔係老鼠拉龜,而係肥龜壓老鼠啊!)
 


金玉麟口中嘅「肥龜」就係死窮鬼,佢一個二字鉗羊馬夾實咗金玉麟…
 
好!我唯有順勢嚟一招啦!
 
「旋風,擎天式!」
 
雖然我反應快,不過佢都唔慢…
 
佢只係一吓跳起就避過咗,而我亦只襯機窮追猛打,希望打到一條血路…
 
「直刺﹑衝擊﹑順劈﹑斜斬﹑橫削!」
 
我跳起凌空握實玉麟金劍,一連五劍攻向死窮鬼…
 
死窮鬼雖然手無寸鐵,但係佢大力到求其揸起都有兩個墓碑…
 
我見咁落去我一定會輸,所以只好咁啦!
 
「鳳凰嘅力量要放喺把劍度,力量,力量,力量!」
 
我谷盡靈力落把劍到,諗住同佢博到盡喇!
 
點知…
 
「你知道我最勁係咩嗎?窮在路邊冇人問,窮在山邊有親朋!我就係力量夠多!」
 
正當佢想發我窮惡果陣…
 
突然有一舊物體從我後面掟埋去死窮鬼度…
 
「鹵水雞腳!」
 
係大哥呀!佢一腳飛踩埋去死窮鬼度,再一吓…
 
「黃焰!」係師父嘅「鳳凰七重天」。
 
大哥佢就可以要兩三吓之內致窮鬼於死地咁。
 
不過咁樣亦令到死窮鬼冇辦法唔再用盡力量…
 
佢立即借埋其他墓穴嘅靈力…
 
「哈!窮人發窮惡,窮鬼發窮癲,墓穴之靈,借我力量!」佢大嗌。
 
佢力量係大,大到我已經覺得我再冇辦法打贏…
 
不過大哥就唔同喇,佢好有信心,只係問我借咗玉麟金劍就再出擊…
 
「雞仔,順便教吓你嘢,你知唔知死窮鬼勁咩丫?」

「窮在路邊冇人問。」我回應,因為死窮鬼啱啱先講完。

「咦,點解你識嫁?」

「我同佢頭先打咗一段時間,係佢自己講。」

「冇錯,佢下一句就係窮到山墳有遠朋…」
 
咩唔係窮在山邊有親朋咩?不過我冇出聲,費事好似串佢咁。
 
「係啊,佢的確係打極都有力咁,其實我同佢都打咗幾耐吓。咁…鳳光大哥,對付呢類妖魔鬼怪要點打呢?」我唔想串佢,唯有搵廢話打完場。

「GOOD!虛心學習,學嘢啦!死窮鬼,發盡你嘅窮惡啦!」我講。

佢講到呢度我都有D驚,點知隻死窮鬼仲有咩料嫁。
 
好在,最後結果…

死窮鬼既能力都係唔及我大哥,大哥贏左。

而且…
 
佢仲將一個有關七彩武林大會當日嘅秘密話咗俾我哋知。
 
… (講秘密時間)

講完秘密之後我哋去匯合返大家。
 
仲見到二哥佢同隻石化惡妖打緊,不過…
 
「哈哈哈,西斜余二十果然名不虛傳。」
 
「我已經唔係當日嘅余二十,我而家叫余忠義。」
 
睇嚟佢哋係真正嘅對打練習,而且二哥一身汗話俾我聽…
 
佢今日練習進度唔錯…
 
「之後幾日都會喺呢D區練習,我之前都唔記得帶你哋同D鬼打下招呼添,好在你哋都打得吓。」講嘢嘅係劉紫千,佢喺另一邊行出嚟。
 
佢身邊仲有醫神﹑靈兒﹑十九哥同師姐…
 
師姐一見到我就行埋嚟黐我。
 
之後幾日我哋都冇理太多,真係專心練習,不過會轉吓對手…
 
原來惡鬼墓最犀利嗰隻就係死窮鬼,我仲分別打過…
 
石化惡妖﹑藤蔓人﹑掘墓者羅漢﹑墓穴人王﹑白鬼﹑食靈犬﹑墓園鬼婦等等
 
經過幾日嘅練習之後,我由唔夠死窮鬼打,到而家已經可以同佢打成平手。
 
我靈力係突飛猛進,不過都係唔夠佢咁犀利…
 
「御氣術!」
 
用呢招嘅係二哥,二哥進步神速,可能同佢天生嘅資質有關…
 
得到十九哥甩甩咳咳嘅講解同大哥嘅幫忙,二哥學識咗十九哥嘅「御氣術」
 
雖然我都有練習,但係效果同二哥就差得遠喇,因為…
 
「御氣術!」二哥再次大嗌。
 
因為二哥而家試緊用「御氣術」提起就只有十九哥一人提得起嘅…
 
躊,躇,劍!
 
而家大家都專心睇住二哥…
 
「似乎差少少。」鳳光大哥講。
 
「真係好犀利!雖然未得,但係而家把劍已經震晒,我估唔到竟然御氣都可以御到呢個境界,冇枉我話過,只要有人用氣提得起呢把劍,呢把劍就屬於呢個…」劉紫千講。
 
點知佢就連個「人」字都未講,二哥就…
 
(餐 ~~~!)

(待續)
 
下集預告︰
 
(未有)
已有 0 人追稿