第六十六集 ~ 龜︰我都要準備去到另一個境界!
 
上一次講到我同我父母雙認返…
 
不過而家佢哋各自都冇獨立身體…
 
要喺「毛婆老妖」個身體佢裡面…
 
因為不時有D爭執,所以佢成日呆咗企喺度自己打自己…
 


呢,你睇佢哋又嚟喇!
 
我帶咗佢哋去白波姐姐屋企,諗住開始準備武林大會D嘢…
 
「你而家靈力我估係陳鳳初嘅十分之一左右,你只係識「美女四式」,肯定唔夠,不過我估佢真係對上你嘅話,肯定會讓你,所以…你應該到到佢兩三成功力就夠,咁啦,今日就開始練我嘅「淫娃蕩婦七十二式」啦。」
 
「吓!?練完會唔會變淫婦嫁?」
 
「放心,男人最鍾意女人淫嫁喇。」
 


「但係我唔明喇,點解之前你喺七重妖塔未用過嘅?」我問。
 
「傻妹,識淫梗係對住自己鍾意嘅男人先淫家嘛,喺嗰度,你想我淫邊個呀?兩個醜樣佬,兩個死老嘢,仲有個醜樣女人。」
 
「吓!?咁樣你意思係?」
 
「我呢招要對自己鍾意嘅人用,最啱你用嚟對你隻鳳凰。」
 
「姐姐啊!咁…點練嫁?」
 


「喺床上面練。」
 
「吓!?」
 
「唔使諗衰嘢,不過諗衰嘢都無妨,D招式的確係要喺床上面練。」
 
我望一望「毛婆老妖」,估計佢體內嘅爸爸仲博緊阿媽打…
 
所以我冇理佢,直接跟咗白波姐姐入房大床度練功…
 
… (過咗一段時間)
 
嗰段時間做咗D咩嘢我就賣個關子先,人哋雖然已經俾咗鳳初啫…
 
但係我仲好純情家嘛,床上面練功要赤裸裸,我真係…


 
丫!死喇!講咗D醜怪嘢出嚟,話咗俾大家聽我要除衫褲練添…
 
(唔止,你唔講我以為淨係除衫,原來有除褲。)
 
丫!死喇!咁會唔會俾人知道我連底褲都除埋嫁?
 
(我有理由相信你係刻意賣弄緊色情。)
 
Eee…我…嗰段時間D嘢我都係唔提住喇!
 
「阿妹,你做乜嘢自言自語咁呀?」白波姐姐斟咗杯水飲,之後望住我講。
 
「冇呀,我見都練得差唔多喇,想著返D衫褲囉。」
 


「嗱,招式同技巧都教咗你喇,可以練到咩程度就靠你自己,呢七十二式易學難精,更加好嘅地方係佢可以憑空想像練習,有時間就諗多D練習就得。」
 
「但係…淨返十幾日,我仲可以練D咩令到自己突飛猛進呢?」我問。
 
「衰妹,你都幾貪心噃,不過我鍾意,似我,你記唔記得你阿爺啊?」
 
「吓!?你講到好似問候我咁嘅?」
 
「我講陸羽石啊!」
 
「我知啊?玩你喳嘛。」
 
「衰妹!玩我丫嗱?玩我丫嗱?」
 
「哈哈哈…」


 
我就係咁,同白波姐姐一邊玩一邊學嘢,之後仲決定去搵陸羽石。
 
我行返出白波姐姐房門,見到「毛婆老妖」塊面由獅子頭變咗火車頭…
 
腫晒咁款,都唔知想點。
 
「媽!我同白波姐姐商量好,想去一去搵陸羽石。」我講。
 
「陸羽石?」媽把聲。
 
「阿爸?哼,我點解要搵佢啊?我唔去!」爸把聲。
 
「阿囡幾時話帶你去啫,好心你自量D啦!」媽把聲。
 


「車!我返去療傷!」爸把聲。
 
「囡,唔使理佢,你帶我去就得,都過咗咁耐,見返你之後,我淨係想一世陪你。」
 
「媽!」
 
我知道除咗佢講嘅原因之外,媽其實係想阿爸見返阿爺。
 
「咁好啦,我會帶埋幾個僕人同你哋一齊去。」白波姐姐講。
 
講完之後,大家就準備第二日出發…
 
頭先姐姐教我嘅七十二式,我只係大約半日時間就學好要訣…
 
呢一晚,我仲發夢都諗住呢七十二式,一定要打敗鳳初…
 
贏到佢返嚟。
 

 
唔經唔覺,我用腦練習嘅七十二式產生出第七十三式…
 
就係訓著咗,當我訓醒就已經到咗第二日。
 
我一訓醒,大家就起行出發…
 

 
「主人,稟報,未發現附近有任何異樣!」
「主人,稟報,未發現其他六派有任何異樣!」
「主人,稟報,未發現其他門派有任何異樣!」
 
「嘩,姐姐你真係好有掌門氣派,不過…」我想講嘢,不過俾姐姐阻止咗。
 
佢先向三個僕人及咗吓頭,再帶我行前咗一段路,細細聲同我講︰
 
「你係咪覺得好奇怪點解咩異樣都冇呢?」
 
「吓!?係啊。」
 
「其實點會冇異樣丫,只係佢哋三個揸流攤,次次都答呢D,求其敷衍我啫。」
 
「吓!?咁你都唔話吓佢哋。」
 
「算啦,佢哋能力有限,如果佢哋真查,我驚佢哋返唔到嚟,搵食啫,使死呀?我成日都係咁提自己,如果我成日鬧人,我怕我皺紋都多兩條。」
 
「雖然鹹濕D,但係姐姐你真係一個好人。」
 

 
講講吓廢話,原來我哋已經到咗陸羽石屋企門口…
 
「瑞基!我等咗你好耐喇!」係陸羽石。
 
「吓!?你點解知道我會嚟?」
 
「哈哈哈,一陣入到去解你聽。」
 
「哼,不過我估你唔知我帶咗邊個嚟搵你。」我講。
 
「吓!?你講周白波?同埋…」佢望一望我身邊隻「毛婆老妖」。
 
「冇錯,就係你個仔同新袍,雖然而家佢哋都喺呢隻妖怪身體裡面,但係佢哋仲在生。」我回應。
 
「謓…謓棷…?」佢一見到「毛婆老妖」立即滿腔熱淚咁款…
 
真係我睇到都想喊…
 
直至佢講以下呢句我先笑返…
 
「做乜嘢你而家成個火車頭咁?」
 
我真係忍唔住笑咗出口,不過大家都行到入大廳嚧…
 
所以大家準備傾計都未理我呢吓笑聲。
 
「哈哈哈,近嚟我真係行運喇!我真係好高興!真係死死而無憾!」陸羽石講。
 
「你傻咗咩?我火車頭咁嘅款加上要同個衰婆同體都未想死啦。」
 
之後佢係點,讀者們應該可以想像,當然係又呆咗,估計係俾阿媽打緊。
 
「你個衰仔仲好講,當年係你自己揀你老婆,我叫你唔好你都要同人哋私奔嫁!」
 
「當年佢好靚家嘛!」之後理所當然地又一輪「發呆」。
 
「所以話呢,女人後生點靚到老都係差唔多,揀老婆唔一定要靚,其實順眼就夠,最緊要係大家都喺成長度有個共識,就係相敬相愛,而家我睇到你哋幾好丫,不過就少D家庭暴力啦唔該。」
 
「係嘅,老爺!」
 
「哈哈哈,真係行運!真係行運!咁大個人聽到第一聲老爺!」
 
「車,你D僕人唔係咁叫你咩?」白波姐姐插口。
 
「面前都係嘅,背後就唔知喇,哈哈哈。」
 
「老嘢,哈哈,死老嘢!」姐姐回應。
 
「姐姐啊!」我嗌。
 
「咦,聽嚟你都接受返呢個爺爺喇喎,陸羽石!我敬重你,容許我叫你一聲哥哥嘛?」姐姐講。
 
「哈哈哈,唔得!你係我個孫嘅姐姐,係叫就要跟佢叫我爺爺!」
 
「哈哈哈,好,爺爺,哈哈哈!」
 
我見到大家咁開心我都好開心,不過…
 
「爺爺,頭先會講返點解知道我哋會嚟我聽嫁,另外…我想知你點解…你話裡面點解好似有種準備去死嘅感覺。」
 
「睇嚟我個孫女除咗姿色唔錯,就連資質都唔錯,我先講返我點解會知你哋嚟先丫,我哋呢D江湖術士,有好多唔同流派,係都要分類嘅話,可以簡單分為三類,一類係戰鬥嘅,戰鬥類仲有好多細分,另一類係醫療醫術類,而仲有一類,就係我哋陸家出名嘅技能,係資訊類嘅,請鬼,請神,問卜,用術問路,問吉凶,問情報都係我哋門嘅得意技,所以附近一百公里嘅嘢,我瞭如指掌。」
 
「即係我哋入到呢度一百公里範圍開始你就感應到我哋?」我問。
 
「冇錯,我答埋你令一樣嘢,就係點解我講嘢都有種死人感覺…」
 
「咪住!你…唔好嚇我啊?我唔想我啱啱先認返你…你就…」
 
「傻妹,唔使喊住,我未死,只係…我有死嘅準備,頭先都講咗啦,我資訊情報都攞得比人多比人快,我知道呢次七彩武林大會有人已經準備好攪事,但係我冇辦法唔繼續行落去,所以只好一戰。係!我見返你之後都係有份私心,呢個我真係要講聲對唔住,我想利用孫女你身邊幾位高手幫忙,因為我一個人肯定係唔夠力。」
 
「難得爺爺你咁坦白,你講埋去,你想我哋點幫?」白波姐姐講。
 
「你比較冷靜,而家更好嘅係你同瑞基先嚟呢度,我想咁,我想你唔好出手,我自己亦唔會出手,因為去到最後,我肯定有人會出嚟攪事,到時候先係我哋出手嘅時候。」
 
「咁我呢?」我問。
 
「瑞基你唔使急,你可以上台同人對戰,你正常咁同人打就得,包括錢阿土同易面容佢哋都可以上台,我只係要我自己加一個幫手就夠,我唔係要贏,只係想有足夠力量令大家安全撤退。」
 
「撤退!?點解唔打贏埋佢?」姐姐問。
 
「贏唔到!」
 
「贏唔到?」
 
「冇錯,係贏唔到!如果七派高手合力可以贏,但係明顯七派唔可能同心協力,所以根本贏唔到。」
 
「恕我直言,雖然喺七重妖塔見過頂層嗰七隻極品,但係我唔認為有咩好爭。」
 
「你有所不知,其實錄欽城好多寶物,道術流派尤其鍾意,因為除咗妖塔,仲有幾樣嘢,我淨係講一樣,我估你已經知道厲害。」
 
「係咩呀?」我問。
 
「你哋知道當日個擂台係咩樣嗎?」
 
大家都另頭。
 
「個擂台就係七重妖塔出面個鏡湖,各派會圍住個湖,湖中心會浮出一個好大嘅圓形平石,高手們就係要喺嗰個位對打。」
 
「咁又有咩特別啊?最多只係環境美觀D。」姐姐問。
 
「非也,寶物沉歸底,你知道個湖裡面有咩嘛?我講埋啦,美人魚你認唔認識?美人魚其實係妖怪嚟,係海洋系妖物,世界美人魚可以分為四類,海牛之所以叫做美人魚,係因為有個類別嘅美人魚係叫做海牛,另一個類別就係你哋都見過,喺七重妖塔嘅蛇屍鰻,佢係真係美人嘅美人魚派裡面隻妖王,原名姓佘,好似余字嗰個佘。至於鏡湖底,就係另一個美人魚怪類別,屍面美人魚嘅居所。」
 
「吓!?咁恐怖?」我講。
 
「恐唔恐佈就見仁見智啦,不過任何嘢都有利有弊,雖然湖底住住D妖物,但係亦係佢哋嘅打理,個湖先靚到好似塊鏡咁,相信係所有異物都俾佢哋食晒。」
 
「好似有D嘢唔啱,有屍面美人魚居住又點?七派唔會係想要屍面美人魚呱?」白波姐姐再問。
 
「兩個原因,一,屍面美人魚嘅肉有醫藥用途,二,係另一樣嘢,就係相傳可以喺屍面美人魚世界都可以自由自在生活嘅龜仙人!」
 
「龜仙人?識唔識龜波氣功呀?」阿爸問。
 
「相傳冇講,不過相傳佢識兩大內功之一。」
 
「邊兩大呀?」連姐姐都忍唔住問。
 
「正,龜,功!冇,陰,功!」
 
「名嚟架?咁難聽嘅?」我講。
 
「難唔難聽就見仁見智啦,不過龜仙人就係有正龜功呢招,所以好多人想要。」
 
「我哋真係唔想要呀!」我同姐姐一齊講。
 
「呢個就係男人同女人分別,你哋有冇留意,七派都係七吓七吓,七咗咁多代都係傳男不傳女,男人就係咁無聊,成日想自己係地上最強。」
 
 (待續)

下集預告︰
 
鳳凰嘅力量要放喺把劍度,力量,力量,力量!
 
已有 0 人追稿