【高登英雄世紀】Golden Heroes Universe : 第八話 (六)
第八話（六）
角色：Secret Operation Society - Faker、
https://www.youtube.com/watch?v=UqLRqzTp6Rk
Faker 嘴裏叼着香煙，手裏拿起火機。
「 我吸既唔係煙，我吸既係寂寞，噴出嚟既 － 係快樂 」
五年前，我仲係一個無人尊重既古惑仔，無人睇得起我，見到警察要調頭走，比對家字頭尋仇。但當時我無對生命失望，而係對我既命運更加認識，我知道 －
「我條命就係自己既手上，如果我自己唔做到萬人敬仰，無人有責任幫我。」
更卑劣既工作我都做過，我試過每日靠係尖沙嘴偷大陸人銀包維生，我試過做扯皮條，我試過做可樂拆家，賣四仔光碟。你諗得，我都做得到。
出嚟搵食，識做人好緊要，呢樣野係好多古惑仔都做唔到。個個諗住疊馬囉，巴閉囉，英雄主義囉。但我諗，佢地睇得陳浩南太多喇。出嚟撈，最緊要係關係，其次就係食腦，適當時出賣一下身邊既人，最後當有人睇起你，無論要交人定下三流工作都永遠無你份。你可以同特首食飯，你可以帶議員到澳門賭錢，你可以偷拍富豪去滾既短片，叫佢地比錢贖返之後再將片放上高登Share。
但係你咁做，最多都只係能夠做到以前只局限於香港既黑社會大佬。時代唔同喇，如果你要真正成功，你要做到一個跨國集團既高層，控制大部份國家既總理，靠既係恐懼，少少咁多既運氣，同埋
「 超能力 」
我一句話都無講，就將英國一位議員助理用刀割喉殺死，佢旁邊既議員驚到只可以用打開口嚟回應我呢個割喉動作。係社會，你要做壞人就要壞得徹底，如果唔係，你只會豬狗不如。議員跪咗係我面前，佢好快就答應咗我地既要求，全個政黨一齊支持興建發電站。要議員跪低，唔使阿爺吹雞。
做事乾手淨腳，快嚟快去先可以有效率去比自己娛樂時間。我去英國三小時就完成手上既工作，即日返回澳門去輕鬆一下。係澳門，大部份賭場及娛樂事業都同浩賢金融集團有合作關係，名義上係，實際上佢地同議員一樣，全部跪低係我地面前。呢位表演緊變ＡＶ女優魔術既人都幾有趣，但係女人我已經玩到好厭倦。
我見到既女人佢地要既無非都係虛榮，權力，所以玩得乾乾淨淨，徹徹底底就好即飛，專心返自己既工作。
作為一個跨國組織既高層，同輩間既競爭當然相當激烈，我同你地唔同既係，我既同輩有大天使，有人造人，仲有個賣淫既少女。要係呢班同級數既人身上脫穎而出，係需要啲實力。
自從我五年前認識陳猶長，我就知道我需要用好多心機去上位，邊個阻我就殺邊個，天使都無面比。
「 俙源，上次走甩咗既韓成恩佢同一隻惡魔私底下有來往，你點可以唔知道，你咁樣做事我好難放心，我地藍寶石教最後會被你一個人拖累，你知道嘛？」
無錯，韓成恩係我放走既，女惡魔亞雷斯塔都係我指引佢搵隻可憐豹。目的只有一個，消滅呢隻無腦既大天使。
唔知點解工作總係做唔完，旺角警署班手足同我講，佢地捉到個異能人，仲有一個信徒暴走咗。焦土計劃仍然進行緊，時機未成熟，我唔可以因為一兩個信徒暴走而影響計劃。
因為異能人既能力相當強悍，我地長期用麻醉藥同佢靜止。呢個異能人我有印象，佢就係係俄羅斯幫我地執手尾既傻仔，根據我地之前查到佢既資料，佢唔係呢個世界既人，係美國游水，去到歐洲，經過俄羅斯，而家嚟到香港。中途佢仲偷咗我地一個傳教士既衫。
不過而家都算唔錯，起碼我既團隊係ＳＯＳ將會多一個異能人。
我望住瞓係隔離，暴走咗既教徒屍體。唯一令我開心既就係次寶石化既效果相當唔錯，呢批藍寶石將會有好大既功用。
「 呢個教徒佢應該係黃警司既人，呢個教徒仲有啲朋友仔，麻煩你幫我約佢出嚟，我想見下佢。」
「 無問題，狄先生既吩呼我會做好」一名警員在Faker身邊點頭示意。
我去到陳猶長既屋企，匯報係英國既工作，同今日發生既暴走事件。
「 英國嗰邊做得唔錯，Ｌｕｃｙ去咗曾生嗰度，佢最近行為上有啲唔妥，我希望佢嗰邊應該可以搞掂，而且俙源今日無嚟見我，係咪中間有啲我唔知道既事發生咗？」
猶長一面說話一面望着窗。
「 陳猶長，一切如常，請放心。」
但係我心知一切將會變到好瘋狂。
突然間，一個爆炸聲係遠處傳嚟，我知道，呢個係俙源即將有麻煩既警號，
聽過電話後，浩賢神情形重：
「 Ｆａｋｅｒ，Ｌｕｃｙ 最後都選擇咗背叛藍寶石，藍寶石教義絕對唔會容許不忠誠既行為。猶長需要你動員以最殘忍方式去清除不信者， 要以警效尤 」
成功之道，在於你夠殘忍
最後大天使都返嚟到接受懲罰，連大天使最後都敵唔過我，我知道成功將離我唔遠。
「 狄先生，我地搵到你要搵既嗰位教徒口中既朋友，但有啲事出現咗，佢話同校既仲有一個用黑影既異能人，有無需要我地搵埋佢返嚟見你？」
我知，當時我被驕傲既情況迷惑，我以為難得事事順利，剩返呢個小朋友，我想都係時侯要同我既ＳＯＳ團員鬆下骨。但原來我估計錯誤，嗰位身後寫住Ａｓｈ Ｃｕｄｇｅｌ既小朋友似乎想出嚟做英雄，而且仲有另一個異能人幫佢手。我最後都比佢走甩咗。
網絡上面又有另一位小朋友想扮英雄係國金飛嚟飛去，我唔會比呢班小朋友組織到啲咩英雄聯盟出嚟。藍詩儀，我好似係靈修室聽過呢個名。
「 鍵盤戰士，我幫我帶呢位 Ｄｅｖｉｌ ＩＮＤＩＧＯ 去見一見佢既屋企人 」
我唔會再比我既工作有咩差池。
電話又再響起，
「 對唔住，狄先生，請你原諒我，有一批靈修完，等待完全淨化既教徒唔見咗，佢地走既時侯淨係着住麻布衫，而家搵返佢地應該仲趕得切架，真係對唔住，請你原該我。」電話傳來抖震的聲線。
你一定要死，但我暫時唔得閒理會，因為等待淨化既信徒走失咗係件非常壞既事，我個頭終於痛起上嚟。
第八話（六）完