14.西九龍紀律部隊宿舍

團隊:林志剛、李顯明、周偉峰、何明發、李佩欣、黎德文、伍少國、龍子維、余日明、沈多聞、張藍、陳明德、鄭麗嫻、王子計、唐蔭聰

眾人埋葬四條屍體後,去到會所活動室集合。
「我係高級警司鄧四海,呢度幾位都係警察同袍以及佢地嘅家屬。」一個五十多歲男人站在眾人之間道,「對於剛才發生嘅事件,我地深表遺憾,亦希望各位以後遇到同類事件,首先要於冷靜,胡亂開槍只會傷及無辜。」
鄧四海轉身問伍少國:「你地一班人由又一城過嚟,點解要走咁遠?」伍少國答:「我地原本係緊急派駐又一城疏導人潮,但無幾耐政府軍入嚟見人就殺,我地有軍裝同事表明身份都照殺,覺得好有問題,所以想去搵點解會咁。你地有無收到最新指示,或者政府有最新公告?」
鄧四海搖搖頭:「無,我地大部份都係中午以後休班,之後無收到上頭指示。大家有無睇到政府出公告?」
「只係重申之前講嘅鎮壓暴亂,叫市民留係屋企。」一個警員答。
「我想問你地,係確認軍方無差別殺人?」另一個高級警司田子龍問,「其他學生同市民,係咪見到咁嘅情形?」




黎德文道:「係,我地城大有個擺咗梳化嘅休息區,佈滿學生同市民嘅屍體。我當時都係現場,佢地從兩邊包圍再向人掃射。」
「另外,上咗樓上課室嘅軍人,仲強姦我地嘅同學。」林志剛此話一出,隨即引起哄動。
龍子維等眾人平靜後接着說:「我原本放假去行又一城,見混亂諗住走人,點知軍人一嚟到就趕人返入商場,無幾耐就向人群開槍。我好彩走得快,走上樓上咁啱有警察係度。之後佢地連警察都殺,於是兩邊駁火。」
「我就住又一村嘅,」余日明緩緩道,「當時阿女個同學打電話嚟,話有暴亂叫我地走。起初都唔想走架,心諗暴亂都唔會去九龍塘呀。後來見到軍車經過,隔離屋話軍人入屋殺人,於是就趁街上無人就走。行咗唔夠一條街,就畀軍人發現,拎住槍指住我地。我地成班一係老人,一係細路,邊似恐怖份子啫,唉......」
此時旁邊有警察叫:「呀頭,睇電視。」

電視畫面播放的是界限街與荔枝角道交界。
爆炸發生後,機槍堡向界限街方向開槍,警察與市民還擊駁火,一個人擲出爆炸物,炸了機槍堡。
但警察與市民再前進的時候,機槍堡內的軍人再開槍,有警察與市民倒下。
「畫面見到呢,係早前收到嘅影片,懷疑係軍人同警察駁火,片段可見係軍人先開槍架。軍人射擊嘅方向呢,明顯係由軍裝警員帶領嘅市民,至於點解要向佢地開槍呢,本台就正向有關方面了解,暫時呢係未有回應架。據了解呢,本港其他傳媒都收到呢段片段,由於向外聯繫嘅網絡出現故障,暫時唔知道呢段片有無流出海外架。係呢度嘅報道係咁多,有進一步嘅消息我地係會即刻同大家跟進架。」





「片入面嘅就係你地?」田子龍問。
「係。」
「照咁睇即係軍方先開槍,」鄧四海說,「之後發生咩事?」
「之後佢地就走入我地間學校,」沈多聞說,「我地早前都受到攻擊,不過好快就擊退,部份學生跟警察走,亦有部份人留低。」
「連學校都攻擊?」鄧四海皺眉,「但我地有手足收到嘅命令,係保護嘉諾撤聖瑪利喎。」
「九龍華仁、培正都有。」
沈多聞說:「分別在於,呢幾間都係Band1學校,而我地係Band2學校。唔知有無關係?」
「未查明之前唔可以咁估,」田子龍說,「要睇下其他地區情形點先。」
「一哥上電視呀。」警察叫道。





「各位市民,相信大家睇到一段片段,懷疑係軍方同警方駁火。經過我地調查,證實呢段片呢係偽造,我地科技部嘅同事發現當中有幾個技術破綻。我地會全力追查發放假消息嘅人,市民毋須恐慌。」
「即係話無發生過軍方同警方駁火嘅事?」
「無咁嘅事。我地無收到前線人員嘅報告。事實上,我地軍方正配合軍方,係搜查罪犯上給予充份配合,行動正係進行中,無出現咩合作上嘅困難。」
「搜查罪犯呢件事已經發生咗大半日,據知範圍包括全港,各處都有傳出槍聲嘅報告。請問呢個行動仲要維持幾耐呢?」
「呢方面無可奉告。」
「因為呢件事,港交所宣佈無限期停止交易,貨運以及港陸空各關口都受影響,再擴大落去,有咩損失邊個負責?」
「呢次係軍方嘅行動,我地警方以及海關甚至係港交所,都會積極配合。因為匪徒眾多而且分散,影響係難免嘅,不過我希望大家保持忍耐,須知道今次做得唔徹底,就等同姑息罪犯,會影響本港嘅形象。」
「對外網絡終斷咗幾小時,究竟發生咩事?」
「我地正聯絡有關方面,亦有派人去調查,暫時無可奉告。」

「佢講大話。」林志剛說。
「嗯,」周偉峰說,「段片影住我地,無修改。問題係,佢點解要講大話?」
伍少國說:「我地係又一城報告咗好多次,對面講過話會向上級報告,但上頭無支援。」
「大佬,好明顯啦,」李佩欣道,「一哥一定知道D野,甚至政府指揮軍方殺人囉。」




田子龍說:「的確存在呢種可能性,但係點解警察呢面收唔到同樣嘅命令?」
「叫你去殺市民,你去唔去?」林志剛道,「講到服從性同紀律性,政府軍一定高過警察。如果上頭落咗咁唔合理嘅指令,全港幾萬個警察唔跟兼作反,到時點算?」
「你嘅意思係,政府為咗瞞住我地警方去殺人,安排我地去維持秩序,到我地發覺時已經米已成炊?」鄧四海說。
黎德文答:「係,但另一個問題係,花咁多心機去搞場大龍鳳,為嘅係咩野?殺人只係手段,背後有咩野推動佢地殺人?」
「既然佢地有心瞞我嘅,我地都無辦法知更加多內情。」鄧四海停了一停,「出面打到嘭嘭聲,但呢度相對平靜。」
沈多聞問:「西九龍走廊天橋底加咗兩道石屎牆,可以話完全隔開兩邊。會唔會係佢地先處理牆嘅另一邊?」
「有咁嘅可能,軍人始終有限,無辦法一次過殺晒全香港人,所以分隔開係一個辦法,等未殺區域知得少,唔會作反。」李佩欣道。
「即係話,被殺係遲早嘅事。」唐蔭聰說,「問題係,我地要認命,定係反抗?」
「梗係反抗啦!會死人喎!」一直坐在後面的鄭麗嫻站起來說,「不過有無地方走?避唔避到佢地?」
龍子維道:「避到一時避唔到一世。要係國際社會知情之前達到目的,佢地做嘅野一定好精密,而且會快狠準!」
「政府軍有幾萬人,18區都搜查一次,睇怕都要兩三日。」田子龍說,「外界一定會有好大壓力,軍方應該會24小時行動。」
鄭麗嫻大叫:「即係等又死唔等又死啦!咁做咩啫,走唔走、走去邊都畀個答案啦!」
......

沒人理她。




林志剛問:「警察呢邊想點做?」
鄧四海望一望旁邊警察:「我地原本都係要維持治安,帶咗足夠裝備子彈。走定係留都無問題,但要同班手足商量先。」
伍少國說:「好嘅,我地同市民先休息,你地商量下先。」