我一個人坐喺一間以黑白色為主既Coffee裏面。

Coffee?我諗應該係Coffee。

佢呢道個店名係叫做“Whirling Coffee”。

而點解明明就已經寫到明係Coffee,我都仲要唔肯定係唔係Coffee?

因為呢間Coffee總係散發住濃烈既藝術氣息。





雖然我係做廣告設計,但只要係有關設計既野,總係特別敏感。

我坐喺張黑色梳化上,拎一拎起杯咖啡,望一望實間Coffee...

一張又一張,大大小小既黑白相...

有D掛喺牆上...有D放喺檯上...櫃上...

而且每張相都會散發出...點點哀愁...





雖然呢間Coffee同Zoe上次帶我去嗰間甜品屋都係一樣用上黑白配襯,但呢間Whirling Coffee”總係被陣陣點點哀愁所包圍住...

點點哀愁...

我記得有次同大老細食Lunch既時候,佢係有咁講過:「一個人內心係樂天既話,設計出黎既野都會為人帶黎歡欣。相反,如果一個人內心充滿住哀愁既話,設計出黎既野就好似哭喪咁~所以,有D好有特色既設計師就只可以設計出某有種有特色既設計。夾硬要佢設計出唔岩佢風格既野,出黎個效果都唔會理想。」

如果將大老細呢個理論...套落呢D相既攝影師身上既話...咁佢個人係唔係充滿哀愁?

或者係...





或者設計同攝影都係一樣,一樣係同個人既心境有關...

我繼續留意一下整間Coffee...

成間Coffee又唔可以話係好大。

坐位都係得六、七個。

整個空間都尚算寬敞。

可以讓客人放鬆心情,好好享受一下片刻寧靜。

之不過...俾散發出點點哀愁既相片包圍下,好難可以放鬆心情呢...

而且...呢道都幾旺場下...





而家除左我坐左喺道飲梗杯咖啡之外,在場都有四、五個女仔坐喺道飲梗咖啡,睇下書咁。

仲有幾個文青拎住部相機喺道睇梗D黑白相添。

男既又有...女既又有...

個個都好似好有研究咁,研究相中既構圖...

睇黎呢間Coffee都應該幾出名下...

但點解我又好似無睇過有網頁介紹...又或者聽人講過架呢?

或者係因為我呢期都太多野諗...





太多野諗...

我再望望四周...望望呢間Coffee唯一一個店員沖咖啡。

呢間Coffee就只有一個女店員打理。

雖然話呢間Coffee都唔係好大,但呢個年輕既女仔...睇起上黎都只係廿三、四咁上下...竟然可以打理得間Coffee井井有條...

沖咖啡又相當熟練...

整間Coffee又整整齊齊...

唔通佢就係呢間Coffee既Owner?

係唔係Owner我就真係唔知...





但我可以肯定既係,呢道既相一定唔係出自呢個女仔之手。

因為呢個女仔除左幾靚女之外,佢成身都散發住樂天既氣息。

就算係俾整個點點哀愁既環境包圍下,呢個女仔都總係會散發出歡欣既聖光。

嗱嗱嗱嗱嗱!我唔係對人地有意思呀!

雖然話個女仔真係好靚女...

條短裙仔又夠短...

對修長美腿又夠修長白滑...





但我絕對唔係用淫邪既目光去視姦人架!

我只係出於欣賞既角度!

我欣賞呢個女仔又靚又本事姐!

我已經夠晒煩架喇!唔會再搵多幾件煩野上身囉!

煩?

唉...

至於點解我會黎左呢間Coffee飲咖啡?

咪就係因為D煩野囉...

唉...

就喺琴日,我目送住架銀色既Lamborghini Centenario Roadster LP 770-4駛離停車場之後...
搵情聖…

真係要搵?

我一直帶住呢個疑問行返上公司...

行過Zoe個位...

Zoe好似好專心喺佢既工作上...完全留意唔到我有行過佢身邊...

直到行到返入我自己間房...

唔...搵下都無所謂既...

反正大老細叫到丫嘛…

一定要俾面既…

『好啦~搵就搵啦~』

我開一開著個Safari...打一打開Google...

『情聖…情聖…應該點搵呢?就咁打情聖落去...一定出好多九唔搭八既野架喎...』

唔打情聖入去又唔知應該打乜好...

鬼叫大老細1999咁咩...

好啦~就打個情聖落去睇下出D乜啦~

就喺我嘗試喺搜尋引擎入面輸入“心手一月 space”既時候...

搜尋器自動彈出既第一個聯想語句係...

『情性?!』

我望住情性呢兩個字...

情性…情聖…

點解我會覺得情性會係同情聖有關架呢?

我唔知道...

我只係知道我唔知道點解又會好自然咁撳左落去“情性”道...

視窗一轉...

第一個搜尋出黎既係條Facebook Link…

而下面又有幾條Link寫住...“老老柒柒,有無巴絲試過搵情性解開情困?(36) - 香港高登討論區”...“老老柒柒,有無巴絲試過搵情性解開情困?(35) - 香港高登討論區”...“老老柒柒,有無巴絲試過搵情性解開情困?(34) - 香港高登討論區”...

解開情困既…情性…

我好自然咁就撳一撳落Facebook條Link...

視窗一轉,就開左個Facebook出黎...

而喺個Facebook Page裏面...有個置頂Post就寫住“只要你不是戀兄、搶男友、師生戀、變心,所有情困我也可以為你一一解開。”...

我帶住一面困惑...望住呢個...呢個置頂Post...

情性...所有情困也可以一一解開既情性...

唔通...呢個情性...就係大老細口中既...情聖?

我再細心咁睇下佢D Posts…

有唔少都係有關兩性之道...

仲有一D生活...照?

我望清楚D相...

呢個男人...咁似...

『張申然?!』我忍唔住嗌左出口!

唔係唔係…唔係張申然...係古天樂!

呢個相中既男仔...著住套西裝...坐喺黑色既梳化上...拎住杯咖啡...生活態度梗...真係好似...好似古天樂!

乜古天樂撈埋愛情專家咩?

點解好似無聽D八卦新聞講過咁既?

我再留心D...仔細D...細心D咁睇清楚D呢個相中既古天樂...

呢個相中既古天樂...同我咁上下年齡...都係三十歲左右...

唔係真正既古天樂...

而下面D留言都話“真係好似古天樂喎!”...“真人仲似古天樂呀!”...“幾時同古天樂一齊拍返套尋春記?”...

再睇一睇個Like數...

『十五萬個Likes?!』我又忍唔住嗌左出口!

十五萬個Likes...一張生活態度相都有成十五萬個Likes?!

我再睇一睇佢個專頁Like數...

『都有十一萬個Likes架?!』我又忍唔住嗌左出口!

睇黎呢個情性...都真係有D名氣架喎...

咁有名氣既人...我諗都應該有D本事...

係唔係真係要搵佢幫幫手呢?

唔...都係嗰句...大老細叫到...點都要俾D面既...

好啦~好啦~就搵搵佢啦~

我就喺個Facebook Messenger上打左幾隻字:“我有情困”

唔駛幾秒就有回覆...

我睇一睇個Message Box...係一個日期、時間、地點...

咁...咁快既...

係唔係D自動回覆黎架?

唔…日子係…聽日...

聽日係星期六…又無約...我都OK既...

好啦~應承左佢先啦~

“OK”

“到時見。”

真係好爽快喎…

希望到幫我解決情困既時候,都係咁爽快就好喇...

於是,我就係今日呢一個時間,黎左呢間WhirlingCoffee,等一個自稱情性既情聖出現。

繼續一個人坐喺間Coffee裏面等下等...

飲一啖咖啡...諗下諗下...

「HI~黎在好耐?」突然有一把成熟沈實既聲音,喺我面前出現!

我回一回神,望一望返面前...

面前有一個著上西裝既男子坐低左...

而呢個男子既外貌...真係十足十古天樂咁既樣...

真人比起張相...更加似古天樂...

『唔係…唔係…我都唔係黎左好耐姐...』我擰一擰頭。

「嗯~你就係...France?」情性展露出古天樂式笑容打量一下我...

『嗯…嗯…我就係France...你就係...情性?』我都帶住微笑,打量一下面前既古天樂...

「嗯~我就係情性~」情性點一點頭,再一面疑惑咁望住我,「你都會有情困需要我幫你解開?」

『嗯?』我唔係好明情性既意思...

「唔...我係覺得...你同我既年齡都差唔多大...都係三十歲咁上下...仲相當成熟...而通常搵得我既...都係D十幾至廿幾既年輕人多~所以...我有D好奇...好奇一個成熟既男人...仲會有乜野情困可以困擾住呢?唔會係...同師生戀有關掛?」情性繼續一面疑惑咁望住我...

『唔係唔係…』我都唔似做人老師...

「嗯~咁你既情困...都唔會係同戀兄、搶男友、變心有關架嘛?」情性又打量一下我...

『唔...唔關~唔關~』我諗我都唔算係變心掛...

「你要既Espresso~請慢用~」個女店員甜絲絲咁笑笑口,將杯咖啡放到去情性面前。

「唔該~」情性亦都帶住古天樂式既微笑點一點頭。

等到個女店員行開之後...

「咁你既情困係?同你老婆有關?」情性拎起杯咖啡,打量一下我無名指上隻結婚戒指。

『唔...點講好呢...』我諗下諗下...『講起上黎...有D長...』

「唔緊要~你慢慢講~」情性飲一口咖啡...

『嗯...我...我遇上左一個同我老婆好似樣既年輕女...』我都未將個“仔”字講出口...

「咁你仲話唔係變心?!」情性就邊噴咖啡邊截停我...

『唔係唔係…唔係咁簡單...』我解釋一下...

我都預左情性會有咁既反應架喇...

因為我自己都唔可以話好確定咁說服自己唔係變心...

打從喺情性個Facebook專頁道,見到個置頂Post寫住“變心”呢兩隻字之時,我就已經好困惑...

我咁樣又算唔算係...算唔算係變心呢?

「好丫好丫~你話唔係咁簡單丫嘛~咁你講丫~你講~我等你慢慢講清講楚~」情性放一放低杯咖啡,翹住對腳咁等我講...

『唔...就咁...』我吸一大啖氣,『我老婆喺三年前...已經過左身...』

「唔...」情性放一放鬆個人...諗左一諗...

『呢三年黎...我一直都有好好記住我老婆同我講過既每一句說話...每一句教誨...我都有好好咁聽我老婆話...做好自己...照顧自己...』我眼前一直都出現住老婆捉住我隻手,同我講每一句話時候既微笑樣...

「嗯...」情性好留心咁聽...

『三年...我由一個連自己都照顧唔好自己既港男...變成一個可以好好照顧身邊既人既男人...』我摸住無名指上隻結婚戒指...

「嗯...」情性點一點頭...

『可惜既係...就算我有幾暖都好...我老婆都已經...已經感受唔到...』有D野...就係咁...

總係趕不及...回不去...為時已晚...

人生總係要有一點點遺憾...

那怕那一點點遺憾足以抱憾終生...

「嗯...咁...嗰個女仔呢?嗰個...同你老婆好相似既年輕女仔呢?係點識架?」情性飲一啖咖啡...

『嗰個女仔...係我D同事黎既...』我又諗下諗下...

「嗯...繼續...」情性飲住咖啡等我講...

『大約喺兩個月之前...佢入黎我地公司做...初初我見到佢...我都嚇左一嚇...估唔到...喺呢個世界上...有一個人...會同我老婆咁似樣...似到十足十一樣...就好似...你同古天樂咁...』我打量一下眼前既情性...

「我?哈...OK咁啦~好多都話我同古天樂好似樣~之不過...我自己就唔係覺得真係咁似喇~」情性笑笑口,擰擰頭。

咁都話唔似?

就連笑容都十足十古天樂咁既樣...

「之後呢?」情性再問一問。

『之後...呢個女仔...唔單止係外貌同我老婆好相似...就連佢個英文名...一D習慣同喜好都係同我老婆一樣...』我又諗下諗下...

「嗯...咁你對佢有感覺都唔出奇既...」情性點一點頭...

『但我就係怕我會對佢有感覺...』我都拎起杯咖啡...飲一啖...

「嗯?你係怕你會將佢當成你老婆既代替品?」情性打量一下我...

『唔係唔係…』估唔到情性會同大老細一樣,都會覺得我會將Zoe當成我老婆既代替品...

「咁係?」情性繼續打量住我...

『其實喺呢段日子裏面...我同佢都有好多相處既時間...我發現...其實佢同我老婆喺性格上...都有好多地方係唔同...我老婆係一個好識照顧自己...好識照顧別人既女仔...而我個同事...雖然話都係一個好有主見既人...之但係...就總要有人喺佢身邊幫下佢...扶下佢...引導下佢...所以...我係分得好清楚...佢還佢...我老婆還我老婆...』呢一點...我一早就已經好清楚...

「既然你都分得咁清楚,咁你仲有乜野諗唔通呢?」情性困惑咁望住我...

『我唔可以對我老婆唔住架!』我有D大反應!因為呢個就係一直埋藏喺我深心處既心聲!

「唔可以對你老婆唔住...我諗...呢個都真係你一廂情願既想法姐...」情性諗下諗下,點一點頭...

『下?』我唔係好明情性既意思...

點解會係我一廂情願既想法呢?

「你頭先講過...你老婆係一個好識照顧自己,好識照顧別人既女仔~咁就一定好識得為人切想~」情性諗下諗下,點一點頭...

『嗯...』的確...老婆真係一個好會為人切想既女仔...

「一個咁識得為人切想既女仔,應該會有講過類似“以後既日子,搵返個人一齊生活”呢D說話~」情性諗下諗下,飲一啖咖啡...

『嗯...』的確...老婆最後同我講既一番話...就係“搵返個人好好照顧你...唔好要我為你操心喇...”...

「所以呢...你想你老婆安心既話,就應該同個女仔發展下~」情性諗下諗下,再飲一大啖咖啡...

『之但係...我...』我都仲未將我要講既野講出口...

「難得再有一次機會...過去既就由佢過去...唔係既話,所有野都會變成過去。」情性行到埋我身邊,拍一拍我膊頭後,就向住門口方向行左出去...

我望住隻已經再無咖啡喺裏面既咖啡杯...

難得再有一次機會...過去既就由佢過去...唔係既話...所有野都會變成過去...

難得再有一次機會...真係咁?

真係一次…難得再有一次既機會?

我一直都坐喺道...呆下呆下咁諗...諗同一個問題...問自己同一個問題...

呢一次...係唔係真難得再有一次既機會...

諗下諗下...

“叮叮噹 叮叮噹”門上既鈴鐺響起...

「老闆娘~又幫老闆拎相黎丫?」我聽到個女店員把聲...

我望一望過去...望到有一個女仔...拎住幅...用白色牛皮紙包住既大相架...

個相架大到仲大過個女仔咁制...

個女仔將幅大相架放一放喺Counter後:「嗄...嗄...都話左我仲未答應你老闆做你既老闆娘咯~叫返我做阿月啦~」

我望一望呢個叫阿月既女仔...

笑面裏總係帶住點點哀愁咁...

同呢間Coffee既格調相當之Match...

唔係聽佢頭先話仲未答應做老闆娘既話,我都真係會以為佢就係呢道既老闆娘...

「而家唔係,將來都一定係~」個女店員拆一拆開白色牛皮紙,再同嗰個叫阿月既女仔拎幅相掛上牆上...

係一張...喺海面上倒影住天空上一輪明月既黑白相...

「將來既事,將來先算啦~你老闆佢可唔可以唔好成日影D咁Q大張既相架?!想搬死人咩~」阿月拍一拍雙手。

「咁就要你同佢講先得喇~你知架啦~佢就只會聽你既說話~」女店員恥一恥笑阿月。

「我先唔會理佢咁多~我地呢D都唔鍾意控制人既~」阿月行一行入Counter,坐一坐低。

「你地兩個都係火星人黎架~點丫~諗住幾時一齊姐?都三年啦~三年都仲未諗住一齊丫?」女店員又行到去Counter前,打量一下阿月。

「哈~無開始,無終結丫~」阿月帶住點點哀愁咁笑一笑…

「唉~所以話~你地兩個都係火星人黎架~」

「係丫~我地兩個都係火星人黎架~所以你地D藍星人,千萬唔好學我地丫~」

「學你地就死得啦~哈哈哈~」

「係丫~死硬架~哈哈哈~」

無開始…無終結…

或者...真係...

或者真係火星人先會諗得出呢種理論...

為左唔要接受終結既來臨...所以就唔願意去嘗試開始...

唔願意去嘗試開始...

而我...又係唔係一個...火星人呢?