“啪啪啪啪啪啪啪啪”雨水拍打玻璃窗。

我都已經梳洗好...

換上左輕便既服裝...

坐喺床邊...

拎住老婆張相...





拎住老婆隻戒指...

諗下諗下...諗下諗下...

我既心情有D忐忑...又有D困惑...

我困惑...我所做既決定...有無錯呢?

咩決定?





唔...

話說喺尋日見完情性之後,聽過嗰個叫阿月既女仔講左句“無開始,無終結。”,我就喺道諗...

係唔係真係為左唔要接受終結既來臨...所以就唔願意去嘗試開始呢?

我一直諗...直到返到屋企...坐喺床邊...拎住老婆張相...都喺道諗...

或者真係咁...





或者總有人會選擇呢個藉口去逃避...

逃避無法預測既未來...

逃避有可能發生悲劇既未來...

之不過...大老細都成日講一句:「唔試過又點知唔得呢?」

有時D野...又真係唔試過係唔會知...

縱使到最後都係失敗收場...至少都叫做可以俾自己死左條心...

至於...係唔係對老婆唔住...

或者就正如情性所講:「一個咁識得為人切想既女仔,應該會有講過類似“以後既日子,搵返個人一直生活”呢D說話~」





無錯呢...老婆都有講過,叫我搵返個人好好照顧自己...唔好要老婆為我操心...

『老婆...』

好啦!就咁決定啦!

我拎起部電話,打一打俾Zoe!

「嘟...嘟嘟...嘟嘟嘟...喂?」Zoe接一接聽。

『Zoe~呃...你聽日得唔得閒丫?』我好緊張咁直接問Zoe得唔得閒...

「聽日丫?得閒丫~做咩丫?想約我去街丫?」Zoe答得好自然...





『係丫係丫…我見好似好耐都無去過迪士尼...所以咪諗住約你去迪士尼行下囉...』我呢個藉口又會唔會太過牽強呢?

「哦?咁搞笑既你~又會耐無去過迪士尼就諗住我同一齊去既?」Zoe問一問...

『呃...係丫係丫~我身邊無乜朋友鍾意去迪士尼丫嘛…哈哈...』我真係唔係好識點樣約女仔去街...

「哈~係咩?見你咁慘...唔...好啦~反正我都好耐無去過迪士尼~張全年通好似好徙咁~就同你一齊去啦~」Zoe好自然咁答...

『嗯嗯~咁你想我幾點過黎接你丫?』成功左第一步!

「唔...」Zoe諗左一諗,「十點啦~」

『嗯~咁我十點喺你樓下等你~』十點鐘...有返少少時間準備...

「嗯~咁聽日十點見啦~」





『嗯~聽日十點見~』

「嗯~拜~」

『拜~』

同Zoe收左線之後,我繼續望住老婆張相...

『老婆...你會贊成我咁做嘛?』

“啪啪啪啪啪啪啪啪”雨已經落左一整晚...

凌晨既時候,仲掛上黑雨…





我繼續坐喺床邊...

拎住老婆隻戒指...望住老婆張相:『老婆...你贊唔贊成我嘗試同Zoe發展呢?不如...你俾D啟示我丫~』

“啪啪啪...啪啪...啪...”突然之間,拍打玻璃窗既雨聲開始減少...

“啪...啪...啪...啪...”雨聲完全停左落黎...

一道光線穿過玻璃窗...照射到老婆既笑面上...

我回頭一望,望出窗外...

『係…係耶穌光...』

我望住天空好一陣子...

雨停了...灰雲都開始散了...開始好天了...

呢個...就係老婆俾我既...啟示...

『老婆...多謝你...』我抹一抹老婆既笑面...

放一放返好張相...

再袋好老婆隻結婚戒指後...

係時候起行...

「凌生早晨~」

『早晨~』我帶住感恩既心情,同樓下既看更講聲早晨~

一路帶住感恩既心情行去停車場~

天色越黎越好~

仲可以睇得見彩虹~

就好似得到老婆既允許一樣~

行到黎停車場…

行到黎紅色既Ferrari 488 GTB旁...

“咇”解一解鎖…

“咔”上一上返車…

坐喺駕駛座上扣一扣好安全帶...

喺個軚盤上按下ENGINE START…

“吼!吼...”

『好~出發~』

“吼~~~吼~~~吼~吼~~吼~~~”

喺前往Zoe屋企既路途上,一路我都好小心~

而且一路上都好順暢~

無D搵食車喺身邊左穿右插~

無D飛車黨喺我後面閃我燈~

一路上都好似有老婆守護住我咁~

一路上都好順利~

一路都好順利~好順利~好順利~

“吼~~吼~吼!吼...好順利咁黎到Zoe屋企樓下~

藍天白雲~風和日麗~天朗氣清~

就連地上既水氹都開始乾~

我就企喺架Ferrari 488 GTB旁邊,等Zoe落黎~

等左一陣間,再等多一陣間...

我就見到Zoe行出𨋢門~

Zoe今日著上一條淺紫色既連身短裙...再著上一對淺紫色既布鞋仔~

睇起上黎十分青春~

Zoe好輕鬆咁行出大門,行過黎我面前~

「Sorry~Sorry~遲左少少~遲左少少~」Zoe伸一伸條脷仔~

『唔緊要~唔緊要~上車先~』我就幫Zoe打一打開車門~

「唔該~」Zoe撳一撳住自己條裙仔,上一上車。

“啪”幫Zoe閂一閂埋車門之後,我都上一上車。

「你知唔知丫,尋晚同你收左線之後就落起大雨黎!到今朝起身都仲落梗!我幾驚今日去唔到迪士尼玩丫!好彩岩岩突然停左雨~仲要突然轉好天添~真係天公作美丫~」Zoe一邊扣上安全帶,一邊笑住咁講~

『哈~係丫係丫~或者係有人守護住我地呢~』我都扣一扣上安全帶~

「你呢個笑容,好似有D野咁喎~」Zoe打量一下我。

『我?無丫~無丫~邊道有野呢?』我扮一扮傻~

「無?真係無?我唔信~一定係有D野既~快D講!快D講!」Zoe指一指住我~

『無丫無丫~真係無呢~』

「有!一定有!快D講!快D講!」

『無呢無呢~真係無呢~』

喺個軚盤上按下ENGINE START…

“吼!吼...”

「出發!出發!」Zoe好似個小妹妹咁咁雀躍~

『出發!出發!』就連我都俾Zoe感染~變得雀躍起黎~

“吼~~~吼~~~吼~吼~~吼~~~”

「真係好耐都無去過迪士尼喇~自從返左呢份工之後,都未去過~」Zoe雙手拍下拍下對大髀。

“啪啪啪啪啪啪啪啪啪啪啪”

『咁你即係向我投訴工作太忙咁話喇喎?』我一邊聽住Zoe拍自己對大髀既“啪啪啪啪啪啪啪啪啪啪啪”,一邊問。

「都唔係既~只係...無機會去姐~」Zoe摸下摸下自己對大髀。

『嗯?無機會去?』我又專心一下喺路面上。

「嗯嗯~咁有陣時都要睇下心情既~」Zoe摸住自己對大髀諗下諗下。

『咁你今日既心情應該好好啦?』我偷偷望一望Zoe個樣。

「嗯~都真係幾好架~」Zoe甜絲絲咁笑笑口~

『你地D女人真係~好鬼奇怪~』我恥笑一下Zoe~

「你而家扮晒了解女人咁話喇喎?」

『乜我要扮架咩?』

「我就真係唔係好覺得你了解女人囉~」

『唔係丫化?我已經係全公司最了解女人既男人黎架喇喎~』

「唔覺囉~我覺得大老細比較了解女人~」

『你有接觸過大老細咩?』

「無丫~不過聽D同事講過唔少咁啦~」

『唉~嗰D都市傳說唔可信架~』

「唔係喎~99% Real~100% New~架喎~」

『佢地有幾可接觸到大老細~我就真係成日都同大老細一齊喇~信我好過啦~』

「佢地話你係最唔可信架喎...」

『下?!唔係丫化?!我咁可信都話最唔可信?!』

「係丫~佢地話你人太好~好到好假喎~」

『人太好都仲有得假?』

「係丫係丫~佢地係咁講架~」

『邊個佢地丫?』

「佢地囉~」

喺你一句又我一句之下,我地好快就黎到迪士尼~

“吼~~吼~吼!吼...”將架Ferrari 488 GTB泊好喺停車場。

“咇”鎖好車之後...

Zoe就彈下跳下咁~

我就跟住喺Zoe身後~

Zoe條裙仔飄下飄下...就好似蝴蝶咁翩翩起舞~

Zoe彈一彈,再轉一轉身:「喂~行快D啦~」

『哦哦...黎梗黎梗~』我就行快兩步...行到去Zoe身邊...

我同Zoe就貼住咁...又碰下手臂咁...行到黎迪士尼門口~

「今日真係好好天丫~~~」Zoe舉一舉起雙手,轉左一個圈~

『嗯~』我望一望Zoe...再望一望Zoe身後,望到一個著住白色恤衫,啡色西褲,成手都係氣球既工作人員企喺路中心,『你等等我先~』

「嗯?」Zoe好似好好奇咁~

我就行到個工作人員道:『唔該~我想問下有無咿唷架?』

「我記得...好似...」個工作人員抬頭望下望下...搵下搵下...「你真係好彩喇~真係有一個~」

個工作人員將個有隻咿唷喺入面既氣球交俾我~

『唔該晒~唔該晒~』俾完錢之後,我都喺道諗...又真係幾好彩~

睇黎今日真係可以好順利~

我就拎住個有隻咿唷喺入面既氣球,行過去Zoe面前~

Zoe離遠見到我手上有個咿唷氣球,已經甜絲絲咁笑笑口~

『送俾你既~』我將個氣球交一交俾Zoe~

「多謝~之不過...你點知我鍾意咿唷架?」Zoe拎住個氣球,擺下擺個身咁望住隻咿唷~

『我上次上你屋企既時間,望到你房入面張床放左唔少隻咿唷喺道~我咪估你會鍾意咿唷~』一定唔會有錯既~

女仔有咁多公仔陪住瞓,一定係好鍾意嗰隻公仔~

「哦!你偷窺我既睡房!你知唔知一個男人偷窺女仔既閨房係好無禮貌架?」Zoe谷一谷起塊面豬登。

『我唔係有心架!我唔係有心偷窺架!我只係咁岩見到架咋!』我見到Zoe好似咁嬲既樣,立即慌忙解釋!

「都話D都市傳說係真架啦~你係一個危險既男人~」Zoe打量一下我...

『唔係丫!唔係丫!我邊道係危險呢?』邊個講架...

「你係~你係~對女仔黎講,你係一個好危險既男人~」Zoe繼續古古惑惑咁打量住我...

『唔係呢...唔係呢...我一D危險性都無架...』我對女仔不知幾咁規規矩矩...

「你係~你係~佢地話你好識對女仔耍手段係真架~」Zoe拎住個氣球行下行下...

『邊係呢...我一D手段都唔識耍...我對女仔又好...男仔都好...都係好真誠架...』我一直對人處事都係咁真架啦...

「你睇下你~把口幾咁甜丫~」

『我把口邊道甜呢...』

「你把口咁甜都叫唔甜丫?甜到D蝴蝶都飛晒過黎喇~」

『邊道有蝴蝶飛過黎姐...』

同Zoe你一句又我一句咁行,一路行就行左過黎幻想世界~

「上次黎呢~仲做梗定期檢查同保養~所以暫停開放~今次終於都可以入去玩喇~」Zoe企喺小熊維尼歷險之旅門口前~

『嗯嗯~咁我地快D入去咯~』我望住Zoe個開心樣,都好想快D走入去玩下~

「嗯嗯~行咯~」Zoe拉一拉住我...

我地就走入去小熊維尼歷險之旅~

我同Zoe入去排住隊等~

「好彩今日都唔係好多人~」Zoe望一望條隊~望一望前面~

『嗯嗯~假日都無乜強國人~真係好~不過自從上海迪士尼開左之後,都真係少左好多強國人黎~』我都望下望下條隊~大約等多兩轉就到我地~

「嗯~終於似返個香港~」Zoe帶住微笑咁點點頭~

『嗯~一個似返人住既香港~』我都帶住微笑點點頭~

「政府成日都話旅遊業倒退~經濟倒退~但我又唔覺喎~我覺得我地而家既生活好過之前蝗蟲入侵既時候~」Zoe擺下擺下個身咁等~

『政府講既野都好信既?佢除左識嚇人,就係識得氹人架咋嘛~』我隻手臂就同Zoe隻臂撞下撞下。

「係丫係丫~好似你咁識得氹人丫~」Zoe古古惑惑咁打量住我。

『我邊係識得氹人呢?』從來都無氹過人...

「最識得氹女仔丫~」Zoe繼續古古惑惑咁打量住我。

『邊道係呢...』我最唔識得氹女仔...

「扮晒野~扮晒野~」Zoe繼續古古惑惑咁打量住我。

『呃...』點解Zoe好似咁唔信我咁架呢?

我又做左D乜野令Zoe咁唔信任我呢?

「呃乜鬼丫仲~入得去喇~」Zoe就彈下彈下咁行前~

『哦哦...』我都跟住Zoe行...

究竟...我做錯左...D乜野...令到Zoe對我...有咁大誤會呢?

同Zoe一齊坐上巨型蜜糖罌~

「係咿唷丫~係咿唷丫~」當每次有咿唷出現之時,Zoe都好興奮咁拉住我隻手,搖下搖下咁~

『係喎~佢條尾就快甩咁丫~』我又指一指住隻咿唷條尾~

「就係咁先可愛嘛~」Zoe笑得好燦爛~

望到Zoe笑得咁燦爛,我都會覺得好開心~

仲有一種...幸福既感覺~

「又有咿唷丫~又有咿唷丫~」

『係喎~係喎~佢條尾真係好似就快甩咁丫~』

呢種幸福既感覺...總係好似...好似情侶咁...

好似熱戀期既情侶咁...

任何時候...任何地方...做任何事...都係咁甜蜜...咁幸福...

「勁開心丫~見到勁多隻咿唷丫~」當我同Zoe遊晒成個小熊維尼歷險之旅之後,Zoe好開心咁彈下跳下行出門口~

『係咯~好似多左幾隻咁~』望到Zoe咁雀躍,我都覺得好輕鬆~

「你都覺得係丫?我都有留意到好似多左兩三個地方出現~或者係知道都有唔少人鍾意咿唷,所以加多幾隻落去呢~」Zoe笑住口咁拍拍手~

『主要係因為知你鍾意~所以先會加多幾隻落去丫~』我打量住Zoe~再笑一笑~

「實係咁啦~你把口真係無時真架喎~」Zoe又打量一下我,笑一笑~

『邊係呢又...』又話我喇...

「佢地真係講得岩~真係要小心D你先得~」Zoe再打量一下我之後,笑笑口咁行左去...

『你咪聽人亂講啦...』我又跟住Zoe行...

呢個Zoe丫...係唔係真係咁易受人唆擺架...

同Zoe行多兩行...

『你肚唔肚餓架?駛唔駛食D野丫?』我又好自然咁關心一下Zoe。

「都有少少架~」Zoe摸住個肚仔點點頭。

『咁不如搵間餐廳食D野啦~』我記得隔離區有間餐廳D野食幾好味...

「唔好唔好~我地邊行邊食D小食啦~咁可以玩多D野丫嘛~」Zoe咬一咬唇~

『哦~都好丫~』Zoe既提議都唔錯喎~

「嗯嗯~~~咁行去買雪糕先~~~」Zoe就一個箭步跑去買雪糕~

我同Zoe買完雪糕之後,就一邊食,一邊行~

「棉花糖~棉花糖~」Zoe一見到有棉花糖賣,又衝過去買棉花糖~

我地又邊食雪糕~邊食棉花糖~又一邊行去玩~

食完雪糕同棉花糖後...

「你企喺道~你企喺道唔好郁丫~」Zoe拉一拉住我,叫我企定定~

『哦哦~』我又真係傻下傻下咁企定定~

Zoe就走去用水槍射我!

『嘩嘩嘩!!!咁奸既你!!!』我仲要俾Zoe射到成身濕晒!

「哈哈哈~乜你咁傻架~嘩嘩嘩!唔好射...唔好射面丫~」Zoe又俾我用水槍射返轉頭~

『射你~射你~喂喂喂!唔好射頭!我個頭Set左好耐架!』

「哈哈哈~你個頭Set唔Set都係咁核突架啦~喂喂喂!濕晒喇!」

我同Zoe就你射下我~我射下你咁~射到成身都濕晒~

Zoe仲俾我射到條淺紫色既連身短裙有D透透地...

隱約好似透出個淺紫色Lace Bra…

「你射到人地濕晒喇~要快D去吹返乾先得喇~」Zoe雙手打交叉咁撳住自己個胸...

『哦哦...咁我地去玩灰熊山極速礦車吹返乾佢啦~』我就拉住Zoe去玩灰熊山極速礦車~

我地一走入灰熊山極速礦車,又係無乜人~仲可以坐車頭~

「哈哈哈~~~」

『嘩嘩嘩!!!』

同Zoe轉左幾個圈出返黎~

「真係乾返唔少喇喎~」Zoe望一望自己條連身短裙~

『緊係~最Work就係咁~』我又望一望Zoe胸前...

「扮晒醒丫你~」Zoe古古惑惑咁打量我一眼,「我地再去買D野食~之後去睇巡遊咯~」

『好丫~去買野食~去買野食~』我就同Zoe撞下撞下膊頭咁去買野食~

同Zoe買下爆谷~買下金黃色炸雞薯條同炸魚薯條後,我地又行到去睇巡遊~

早五、六年前睇巡遊都多人到只可以睇到人頭~

不過而家就唔同~我同Zoe都可以企正喺路邊睇~

「太好喇~太好喇~唔係太多人,可以睇得好清楚丫~」Zoe撞下撞下我~

『嗯嗯~開始喇開始喇~』我又撞下撞下Zoe~

「嗯嗯~~~咿唷丫~咿唷丫~」Zoe離遠已經見到隻條尾就快甩既咿唷~

『係丫係丫~好想拉甩佢條尾丫~』

「乜你咁衰架~」

『拉甩佢黎送俾你唔好咩?』

「送條尾俾我丫?咁仲衰~都話你係衰人黎架啦~」

『我咁都叫衰?』

「你咁都叫唔衰丫?丫~咿唷丫~咿唷丫~Hello咿唷~」

同Zoe睇下完巡𨘋~又邊玩邊買下野食~

玩左成日~咩都俾我地玩晒~~~

玩得好開心~玩得好盡興~好耐都未試過玩得咁開心同咁盡興~

同Zoe玩到天都黑~玩到到左夜晚...

「我地...係唔係食埋野先返去?」Zoe諗下諗下咁問一問。

『不如...睇埋煙花先去食野好嘛?』我又疑疑惑惑咁問一問...

唔知Zoe會唔會肯同我睇煙花呢...

睇煙花呢Part其實係今日既主菜...

因為...因為我早就打算喺睇完煙花之後...就同Zoe表白...

如果...如果Zoe唔肯同我睇...係唔係即係話...

「唔...」Zoe諗左一諗,「都...好丫...好耐都無睇過煙花...就睇埋先去食野啦...」

『嗯~睇埋先去食野~』仲有機會~仲有機會~

我就同Zoe行去霸返個靚位睇煙花~

“啪 啪 啪 啪 啪 啪 啪 啪”

五光十色既煙花就喺我地眼前閃亮~

「好靚呢~」Zoe對眼閃閃發光咁~

『真係好靚呢~』其實煙花靚唔靚,都好睇係同邊個一齊睇...

“啪 啪 啪 啪 啪 啪 啪 啪”

五光十色既煙花繼續喺我地眼前閃閃發亮~

我好享受同Zoe一齊睇煙花既時刻~

直到煙花都放完~

「今次既煙花,好似特別燦爛呢~」Zoe咬住唇諗下諗下。

『嗯...Zoe...』就喺呢個時候,我膽粗粗咁捉一捉住Zoe隻手!

「嗯?」Zoe好似俾我嚇左一嚇...

『Zoe…我唔知道...你對我有無感覺...但我想同你講...我對你...』我仲未將說話講完...

Zoe推一推開我隻手,快步咁行左去...

『Zoe…Zoe!等等!』我再行前兩步,捉一捉住Zoe隻手...

Zoe隻手有D震...震下震下...

『Zoe…』

「我...我一直都好怕...我一直都好怕會...我唔想再做人小三喇...嗚嗚...」Zoe震住咁喊起上黎...

原來...原來Zoe係怕...

『你...你望一望...望一望過黎先...』我就喺褲袋裏拎出老婆隻結婚戒指...

Zoe回頭望一望...望一望我手上隻結婚戒指...面容變得困惑...

『呢隻戒指...係我過左身既老婆留低...』我好凝重咁望住Zoe...

Zoe睜一睜大對大眼睛...

『我老婆已經過左身都有三年喇...呢三年黎...我一直都無再諗要同其他女仔一齊...直到你既出現...』我繼續好凝重咁望住Zoe...

「但點解...點解係我?」Zoe困惑咁問一問...

『或者...或者係命中注定既緣份...』命中注定要我遇上你...

Zoe諗左一諗...

『咁你...你願唔願意...俾個機會我...同我試下開始...』我口震震咁問一問...

Zoe再諗左一諗,點一點頭:「嗯~可以係可以~之不過...俾你一個月試用期先啦~」

『下?一個月試用期?』

「打工都有一個月試用啦~拍拖都要有一個月試用架嘛~唔試過又點知你係唔係人地口中嗰D衰人?」Zoe谷一谷起塊面豬登。

『我...我緊係唔係人地口中嗰D衰人啦!』我點睇都係個超級好男人啦!

「咁就要試過先知~仲有!」Zoe拎一拎走我手中隻結婚戒指,「呢隻戒指對你黎講一定係好最要~而家就由我黎幫你保管~」

『哦哦...』我望住Zoe除一除條頸鍊出黎...再將結婚戒指穿落去...帶返上頸...

「咁好啦~一個月試用正式開始~」Zoe拖一拖住我~

『嗯嗯...我會好好做個稱職既男朋友架~』我又拖一拖住Zoe~

“難得再有一次機會,過去既就由佢過去,唔係既話,所有野都會變成過去。”

我會好好珍惜呢一次難得再有一次既機會!

我同Zoe...開始...試用了。

Case 12 | Close File