自從出院之後,呢幾日Patrick都會黎搵我食飯...

不論係放Lunch...定係夜晚食Dinner...

餐餐都有Patrick一齊食...

唔止係咁…

仲要成日都黐住喺身邊...





朝朝晨咁早就喺我樓下等我...同我一齊去搭地鐵...送我到公司樓下...

佢話喎:「要你一個女仔去咁遠返工都真係好唔放心!」

我就唔明有乜咁唔放心...

都唔係第一日架啦...

都返左差唔多有三年啦...





呢三年黎日日返工都係自己一個同人迫地鐵返工架啦...

乜都習慣晒啦...

都唔明Patrick仲有乜好唔放心...

真係當正我係小妹妹咩...

我都有同過Patrick講:『我大個人架喇...唔係小妹妹丫...自己識得照顧自己架喇...』





但Patrick就死唔斷氣咁講:「你係大個人~但都係好似小妹妹咁要人照顧~你睇食物敏感入院一事就知啦~完全唔識得照顧自己~極度需要人照顧~喂喂喂!杯茶岩岩斟仲出晒煙架!你仲想拎起黎飲!熱死你喇!嗱~又打乞嗤喇~我都話你呢個係風口位黎架啦~你又話無所謂~而家打乞嗤喇~又打喇~又打多幾個喇~辛苦死你丫~唔好話習唔習慣啦~有得避點解唔避下呢?同你換位啦~又話唔使...咁摟住我件外套喇~又話唔使...唔得丫!換位同外套是但揀一樣!咩無得揀姐?兩樣揀一樣咪叫做有得揀囉~」

咩叫無自由?咩叫獨裁?

唔好話唔關我事...

而家就真係身受其害喇...

之前就話Patrick最多都係日日Send幾萬個Whatsappssssssss黎轟炸我,我唔睇就當無件事啦...

但而家...佢成日都喺我身邊咿咿哦哦...咿咿哦哦...咿咿哦哦...咿咿哦哦...咿咿哦哦...煩鬼住晒!!!

我想唔理佢,佢就不停咁“點姐?”...“係唔係呢?都話左你架啦~”...“嗱嗱嗱~你又唔小心喇~”...“睇住丫~紅公仔就唔好過丫~馬路如虎口丫~交通規則要遵守~安全第一~呠呠~命長久~”...

我呠你個死人頭呀真係!





大街大巷喺SOGO對出條馬路旁邊捉住我隻手對住我大大聲聲唱兒歌係唔係傻的嗎架?!

俾成班路人當我係怪物咁睇真係...真係幾咁尷尬...

路人都算喇...一個唔好彩俾D識既人見到就真係唔知點算...

點算?仲可以點算?

俾個煩到出汁既痴線佬煩住仲可以點算?

無架喇…唯有乖乖地聽下佢講...佢想點就點...佢話乜就乜...跟住佢嗰一套去做囉...

我係無思想既公仔~我係被煮熟既蛙蛙~





就好似今晚咁,又同Patrick食晚飯...

「隻鴨呢~係燒架嘛?會唔會搽油上面架?會既話唔好用花生油喎~仲有條魚呢~唔好用黃豆既豉油喎~仲有仲有個生春卷呢~走薄荷葉喎~」Patrick又死唔斷氣咁同個侍應講...

個侍應就黑口黑面好唔耐煩咁問:「仲有乜野要求呢?」

Patrick仲要繼續講:「有無甜品送架?有既話呢~唔要杞子桂花糕得嘛?」

個侍應強顏歡笑咁問:「咁红枣糕得嘛?」

Patrick又諗左一諗:「红枣…红枣...红枣都係唔得~要菊花糕啦~」

個侍應咬牙切齒咁講:「菊花丫嘛?糕下話?仲有無其他要求呢?」

Patrick又諗左一諗:「唔...暫時係咁多先啦~唔該晒~」





「暫時係咁多先啦嘛?多~謝晒喎~」個侍應一轉身就口噏噏咁,「菊花糕...菊花糕...爆你菊花好唔好...」

『好心你就唔好咁麻煩啦..』我不禁要話一話Patrick...

咁麻煩人...一陣都唔知會唔會加料添架...

「唔麻煩~邊係麻煩姐~咁你對花生油丫~黃豆丫~薄荷葉都有敏感架嘛~一陣食左敏感發起上黎又抖唔到氣...抖唔到氣又要入院...又要入院就又要瞓成日病床...你又瞓唔慣生埗床...又瞓唔著...又無精神...無精神又攰...攰又躁火...躁火又對身體唔好...對身體唔好又辛苦...喂!都話左你對花生敏感咯!仲食花生!唔准食!」當我正想夾粒花生放入口之時,Patrick就拍一拍我對快筷子...

『我對花生都係少少敏感姐...食一粒半粒最多都係咳兩聲...』聽住你喺耳邊咿咿哦哦...咿咿哦哦...咿咿哦哦咁已經夠晒煩...而家就連俾我食粒花生都唔得...

「一粒半粒就緊係無問題啦~但你又點止食一粒半粒呢?你一食完一粒,就會食第二粒!食完第二粒又會食第三粒!第四粒!五六七八九十粒!一食就停唔到口!停唔到口又繼續食!繼續食下食下又開始咳!咳都要繼續食!越食就越咳!但咳到死都要繼續食!因為你就係忍唔到口~你就係唔覺得辛苦~你就係覺得習慣就好了~你就係習慣到頂唔順要入醫院都唔覺得係D乜野~仲係覺得“係咁架啦~好平常姐~小事黎姐~”~唔好話你係唔見棺材唔流眼淚~就算俾你瞓埋落去都唔識得流眼淚!」Patrick一輪嘴咁講左一大段野...

又黎喇…又黎喋喋不休...喋喋不休...





食粒花生姐...都咁多道理要講...

佢唔悶架咩?

佢唔覺得自己好煩架咩?

唉...可能呢D就係叫做習慣啦...

習慣咁多道理...咁多理論...

習慣口水多過浪花...

習慣...習慣...

習慣到...我都好似有D...有D習慣...

「喂喂喂!杯茶岩岩斟仲出晒煙架!熱死你喇!攤下先啦~」當我想拎起杯茶飲之時,Patrick又阻止左我...

我望一望杯茶...都真係好多煙...應該都真係幾熱下...

之不過...

『唔係你咁多野講令我分晒心咁,我又點會咁大懵想拎起杯咁熱既茶黎飲呢?』成日都講到我好似咁大頭蝦...唔識得照顧自己咁...

事實上係因為成日都有Patrick喺身邊煩鬼住晒!

「係丫係丫係丫~我唔提你丫,你一早就拎起左隻杯啦~到時整到隻手指起水泡都唔知點算~你做時裝設計架嘛~靠對手搵食架嘛~整親隻手指拎唔到筆咁你話點算呢?」Patrick Keep住煩煩煩煩煩...

『哦...』我都真係無佢咁好氣...

「係呢~工作順利嘛?辛唔辛苦丫?多唔多野做丫?」Patrick就連問野都問得煩過人...

『近排丫...唔...都算OK既...前排因為要畫彩色設計,搞到一頭煙咁...』都真係煩左好耐...

「你畫彩色野丫?唔係丫嘛?要你畫黑白就話拿手姐~彩色都唔岩你Style~真係勁辛苦喎~」Patrick好似好明白咁點點頭。

『係丫…都真係勁辛苦...不過好彩前幾日有個朋友帶左我去佢個好姊妹既畫展攞靈感~』好彩多得Carol~

「係?你個朋友既好姊妹係畫家黎架?」Patrick好似好有興趣咁。

『嗯~都幾出名架~叫做Stella So~』Stella So~呢個名我一定唔會唔記得~

「哦哦哦哦哦!Stella So~坐輪椅既天使丫嘛~」Patrick雙眼發光咁~

『係丫~你都有留意丫?』又真係估唔到喎~

「有丫~緊係有啦~我平時都有留意下D文化野丫~藝術野丫咁架~」Patrick立即變到成個偽文青咁~

『係咩?定係因為你覺得人地靚女先去留意人咋嘛?』睇死你都係架啦~

「唔係丫唔係丫!我唔係覺得人地靚女先去留意架!我都唔覺得佢靚女!呢個世界上就係得你一個靚女架咋!!!」Patrick好緊張咁澄清~

『哦...』鬼信你丫...

「真係架!我講真架!我眼中就只有你一個架咋!」Patrick仲係好似好認真咁望住我講...

我就無佢咁好氣...唔鬼想理佢...

每次一講到呢D話題,我都唔想有乜回應...

唔係我想吊住佢...係我講過太多次...

講到口都臭...講到連自己都覺得討厭...

但就係Patrick唔覺得討厭...

俾我拒絕左咁多次...都仲係唔覺得我討厭...

仲係要咁死纏爛打...

有陣時…我都真係覺得...覺得Patrick真係幾…幾好野...

望住呢個細我兩年既男仔...一面稚氣咁既樣...真係估唔到...估唔到可以咁...咁有定力...

我係唔係應該用定力黎形容呢?

我都唔知...但我就唔想用專一同長情黎形容...

假如我用專一同長情黎形容Patrick既話...咁我就實在太絕情...

絕情...有時候...對人絕情...都係一種保護自己既方法...

「係呢係呢...咁你而家工作上應該無晒問題啦~」Patrick面懵懵咁問一問。

『都唔係架…算然話總算搞掂左黎梗春季既設計...之但係...老細咪又催我要快D趕起春夏季既設計...』又要諗諗...

「又係彩色既設計丫?」Patrick好奇咁問一問。

『係丫…又係彩色既設計...』今次喺邊道攞靈感好呢?

再繼續用Stella嗰種感覺好唔好呢?

會唔會無咁新鮮呢?

「之但係到左春夏季既時候,就未必興彩色架喇喎...」Patrick好似好有學問咁。

『我都係咁同老細講...之但係...佢話畫左先算喎...到第時真係唔興既話,就再畫過喎...』唉...佢就講得輕鬆...

「嘩…佢就講得輕鬆喇...又唔係佢畫...」Patrick嬲嬲豬咁既樣。

『咪係囉...又唔係佢畫...點人做野佢就最叻...』成日就係得把口...又唔見佢有落手落腳做...

「唉...D腦細係咁架啦~成日就係得把口!又唔見佢有落手落腳做!正廢柴!」Patrick一肚怨氣咁~

『咪就係...正廢柴黎架...』跟住呢D腦細做野真係命都短幾年...

「跟住呢D腦細做野真係連命仔都短幾年架~咁你有無諗過一句“我唔X撈啦!你挺執笠啦!”咁丫?」Patrick扮晒火爆咁問一問~

『無丫…話唔撈就唔撈咩...唔使交租咩...』聽業主既口吻...黎梗仲好似想加租添...

唉...人工都無乜點加過...仲要加租...

那有錢...

「我養你囉!」Patrick變到成個小朋友扮大人咁~

『聽講你好似岩岩先炒左腦細魷魚~而家仲未搵到工架喎~』我冷眼咁打量一下Patrick...

「我!我...寧欺白鬚公,莫欺少年窮呀!話唔定...語唔定我好快就可以出人頭地呢!」Patrick意氣風發咁既衰樣~

『係丫係丫~真係話咁易丫~野食都黎喇~食野啦~咁多野講~』我就拎一拎起對筷子~

「黎黎黎!等我幫你丫~D包皮好熱架~你對手又咁嫩~好易起水泡架~放心放心~我洗到對手乾乾淨淨架喇~幫你包到靚靚仔仔咁~我餵你~我餵你~」Patrick拎住包到靚靚仔仔既片皮鴨放到我嘴邊...

『得得得...等我自己黎...』

「都話左熱咯~等我餵你啦~」

『我唔係殘廢架~』

「我都無話你係殘廢~」

『咁就等我自己黎啦~』

「俾我照顧你啦~」

寧欺白鬚公,莫欺少年窮?

少年...眼前呢個少年,同時下既少年...真係好似...有D...有D唔同...

一路俾Patrick當小妹妹咁照顧住咁食完成餐晚飯...

「等我俾啦~」Patrick仲要爭住俾錢...

『你都無工開...都係等我俾啦...』我又真係唔想要Patrick請食飯...

「咁我平時都有儲開錢架嘛~放心喎~無問題架~唔使為我擔心~」Patrick仲係要堅持...

『有儲開錢都留返個錢旁下身啦...』有乜頭暈身㷫都有個錢睇下醫生丫嘛…

「得架喇~得架喇~放心啦~乖啦~真係唔係問題架~聽話俾我俾好唔好~」Patrick成個男人仔咁~

男人仔~

有時候都真係覺得Patrick幾似個小朋友扮大人~

仲要係扮個大男人~

一個有一點點稚氣既大男人~

睇起上黎...柔中帶剛咁...都幾可愛丫~

起碼唔係覺得太霸道~

都幾好笑既~

到最後,我都係唔同Patrick繼續爭落去~就俾佢請我食一餐~

食完飯,Patrick就好似平時一樣咁送我返屋企。

喺暗黃色既街燈照射下,我同Patrick就喺漆黑既街道上行下行下...

「呢道大風丫~摟住佢啦~」Patrick除一除自己身上件褸,披到落我身上。

『嗯...唔該…』係Patrick身上既氣味...

Patrick件褸...有佢身上既氣味...

其實初初係有D唔慣...

唔慣俾Patrick既氣味包圍住自己...

初初我都“唔使唔使”咁拒絕Patrick...

但時間耐左...習慣左...慢慢變得無咁抗拒...慢慢變得接受...

「係呢...今個聖誕呢...你有乜野搞丫?」Patrick怕怕羞羞咁問一問...

『我?無丫...』節日既野...我不嬲都唔在意...

更唔好話有乜野搞...

「咁不如同我一齊過丫~」Patrick好雀躍咁既樣~

『我同你...兩個人?』我疑惑咁望住Patrick...

「嗯嗯...我地兩個...一齊過聖誕...好嘛?」Patrick又怕怕羞羞咁問一問...

『唔...考慮下...考慮下...』只係得我同Patrick兩個...

雖然話我地都成日單獨相處...之但係...聖誕節...

「嗯嗯...考慮下...考慮下...咁我等你既答覆架喇~我會一直等...等一生都等~」Patrick意志堅定咁點點頭。

『嗯...嗯...』咁又唔使等一生咁嚴重...

「到喇...你...返上去都早D沖涼...早D休息喇...」Patrick企一企定...

『哦...』原來喺不知不覺之間...已經行到返黎屋企樓下...

「咁...咁我走先喇...」Patrick好似依依不捨咁...

Patrick每次送到我返黎...都總係依依不捨咁...

『喂!唔...不如上黎...坐坐...』咁依依不捨就上黎坐下先啦...

自己又唔開聲...係都要我開...

「上...上去你道...坐...坐下...」Patrick好似唔係好相信我講既野咁...

『唔想就算...』我先無你咁好氣...

「想!想...緊係想啦...」Patrick怕怕羞羞又尷尷尬尬咁...

都唔知Patrick怕乜羞又尷乜尬...

自自然然咁帶Patrick上到黎我屋企...

「喵~」燈都未開姐...阿Knight就主動行過黎Patrick腳邊係咁轉...

「你隻貓好有型喎~叫咩名丫?」Patrick踎一踎低摸下摸下阿Knight...

『阿Knight...』呢隻衰仔丫...做乜連仔都咁嗲架...

「阿Knight丫?連個名都好有型喎~」Patrick再摸下摸下阿Knight個頭...

阿Knight仲要好似好冧咁任摸唔嬲...

你隻衰仔丫...平時摸多你兩下都嫌我手臭咁...

今日你就任摸唔嬲咁...

公平咩?!

Patrick摸多兩摸,阿Knight就好似好知情識趣咁行返去佢張貓床上。

知情識趣?點解我會話係知情識趣?

「阿Knight真係好似你呢~」Patrick打量一下我。

『邊忽似...』我邊有佢咁有性格...

「哈哈~可能你自己唔覺姐~」Patrick恥笑一下。

『哈...』我唔覺得好笑...

「嘩~你間屋都真係好有你既風格丫~黑白黑白~全是黑白~」Patrick走一走入我間屋既中間...轉左一圈...

『嗯...都係既...』黑白...黑白...就係我既風格...

「好~等我睇下你個雪櫃有無D過期野或者係你會敏感既野先~」Patrick走一走埋去我個雪櫃道。

『其實我雪櫃裏面無乜野架咋...』我都好少會買野返黎煮...

「嗯?有兩罐啤酒喎...」Patrick拎住兩罐啤酒望下望下...

『係喎…之前有個朋友上黎飲...飲剩兩罐都唔記得添...』都好耐之前既事...

嗰時阿Kay個男朋友出面有第二個...

阿Kay就喊到成隻豬頭咁話要飲酒...咪帶左佢上黎飲囉...

飲剩兩罐又無機會再飲又無左件事...

「仲要就快過期添...」Patrick繼續拎住兩罐啤酒望下望下...

『係丫?咁飲埋佢囉~』反正我地有兩個人喺道~

「嗯~」Patrick拎住兩罐啤酒過黎,幫我開一開。

『唔該。』我接過Patrick手上罐啤酒之後...

「飲杯~」

『飲杯~』

就一齊坐喺地上飲啤酒。

「你呢道真係好整齊呢~」

飲下傾下…

『唔...OK咁啦~』

傾下飲下…

「女仔既屋企好少好似你呢道咁簡潔~」

又飲下傾下...

『你成日都參觀女仔既屋企架咩?』

又傾下飲下...

「唔係丫!唔係丫!我無上過其他女仔屋企架!我第一次上女仔既屋企架咋!我只係自己喺腦裏面幻想女仔既屋企會係點架咋!真架!真架!我無呃你架!」

又飲又傾...

『緊張得你個樣丫...』

又傾又飲...

「緊係緊張啦!我唔可以俾你誤會架嘛…」

飲下飲下…

『點解唔可以俾我誤會丫?』飲下飲下...突然覺得...覺得...

其實我唔係好飲得...

「我...」

其實我飲少少就好易醉...

其實我...

我靠一靠近Patrick...越靠越近...越靠越近...

我輕輕咁攬一攬住Patrick...攬實Patrick...

感受住佢身上發出既體溫...

好暖...好暖...原來Patrick身上係咁暖...

好似好耐都無感受過...感受過別人既體溫...別人既溫暖...

好耐...好耐...

Patrick攬一攬實我...令我更感到溫暖...

被Patrick緊緊咁攬住...全身都感覺到佢既溫暖...

好安全...好安心...呢種感覺...呢種好耐都無感受過既感覺...係...係...

我同Patrick擁抱左好一陣子...默不作聲好一陣子...

感受住呢種久違既感覺好一陣子...

Patrick隻手...好似有D...有D舉動...

Patrick隻右手...由我既背脊...慢慢...慢慢...伸向我...胸...我胸...

我眼前突然閃出Alex既面孔!

『唔好!』我推一推開Alex!

唔係!係Patrick...

「對唔住丫!對唔住丫雅暖!我唔係...我唔係...」Patrick好緊張咁Say Sorry…

『無野…無野…唔關你事...唔關你事...』係我既問題...

「我...我...」Patrick不知所措咁...

『都夜喇...』而我都唔敢再正視Patrick...

「嗯...都夜喇...我...我唔阻你休息喇...」Patrick尷尷尬尬咁行去門口...

『嗯...你返去都小心D...』

「嗯...我會...拜...」

『拜...』

Patrick離開左我間屋之後...我一個人望住兩罐啤酒...

『係我...係我既問題...』