《情困之時，我遇上了自稱情性的情聖》: [Case 14－我的米奇] PART 07
同飛揚BB上到車～又有位坐喎～我就照舊將飛揚BB件褸蓋喺大髀上～
喺車廂上既男人，好多都望住我～
不過我就唔理佢地咁多～我只係理我既飛揚BB一個～
不論在心裏...就算係眼裏都只有飛揚BB一個～
「不論在心裏...就算係眼裏都只有我既青鳥...」
『飛揚～你信唔信呢個世上有青鳥？』我突然諗起岳飛講過既青鳥～
「青鳥...」飛揚BB諗左一諗...
仲要諗到好似...好似喺回憶之中...
就好似每次當岳飛講起佢隻青鳥既時候...佢既眼神...
「嗯...我相信呢個世上有青鳥...不過唔係每個人都會遇得到...」飛揚BB一邊諗下諗下...一邊又諗下諗下咁講出口...
飛揚BB同岳飛都係一樣...一樣相信呢個世上係有青鳥...
『咁你遇到你隻青鳥未？』我一直都將注意力放喺飛揚BB身上...
飛揚BB再諗左一諗...望一望我：「或者遇到...不過已經飛走左...」
或者遇到...不過已經飛走左？
飛揚BB係指...曾經遇過青鳥...但已經失去...
呢個就係飛揚BB既過去？
「咁你呢？」飛揚BB突然開口問一問我...
『我...我諗我已經遇到...但可能唔係屬於我...』我將視線放到玻璃窗...玻璃窗之中既飛揚BB...
點先為之世界最遙遠既距離？
「世上最遙遠的距離，不是生與死的距離，不是天各一方，而是我就站在你面前，你卻不知道我愛你。」張小嫻喺《荷包裡的單人床》係有咁樣寫過...（唔好再誤以為係泰戈爾既作品喇～）
至於而家既我...我隻青鳥就喺我面前...但就唔係屬於我...
而家呢一刻唔係...之不過...將來既野就無人知～
我係一個相信未來係掌握喺自己手上既人～（或者你會話“緊係啦～你係人生勝利組！人地既未來都掌握喺你手上添啦！）
我相信...我既青鳥好快就會乖乖地咁飛埋黎我身邊～
好快～好快～
同飛揚BB一齊坐公共交通工具既時間都過得好快好快～
就同尋日我揸住架Lamborghini Aventador LP 700-4 Roadster送飛揚BB去目的地一樣咁快～
只要係同飛揚BB一齊，時間都總係過得特別快～
開心既時間過得特別快丫嘛～
好快我地就黎到到欣澳站～
我就已經急不可待咁拉住飛揚BB行去等車～
「睇黎你都好鍾意迪士尼喎～」飛揚BB企喺我身邊～同我一齊等車黎～
『有邊個女仔唔鍾意迪士尼架～』我就咬住唇咁樣答～
每個女仔都係咁鍾意迪士尼架啦～
不論幾歲既BB女～到幾十歲既中女～都係一樣咁鍾意迪士尼～
總有一隻卡通人物係佢地既男神～
由細細個第一眼見到就開始愛上～
就好似一見鍾情咁～
一直愛到大個～一直不離不棄～
每次見到佢，就算係幾咁唔開心都好，都會立即笑返晒～
由心裏面笑出黎～
因為你真係好鍾意佢～真心真意咁鍾意佢～
最原始～最純潔～最一塵不染既愛～
而我的最愛就緊係我的米奇啦～
『你女朋友唔鍾意迪士尼架咩？』我又探一探下飛揚BB口風～
「佢鍾意愛馬仕多D囉...」飛揚BB有D無奈咁答...
『第一樣竟然唔係諗鍾意你自己先？嘻～你真係好特別～』我笑一笑飛揚BB～
人係一種好主觀既動物～正常第一時間都應該係諗起自己先架啦～
而呢個飛揚BB真係丫～竟然諗到愛馬仕先囉～
不過講真...又好難怪既...嗰條港女八婆咁講求物質...
咁講法...其實飛揚BB都知嗰個Ashlynn係一個點既女仔...
咁點解仲繼續同佢一齊呢？
點解唔盡早離場呢？
分手都一定要讓人地講先？
你係唔係真係要好人到咁既地步丫...傻瓜...
『車黎啦～車黎啦～』我一見到架迪士尼列車就十分雀躍咁彈下彈下～
一坐上米奇列車姐～我就又緊張、又興奮～
『我真係好耐都無黎過坐過呢架車啦～』我將飛揚BB件褸蓋到大髀上之後，拍晒手～
真係好興奮呢～
「對上嗰次係幾時？」飛揚BB問一問～
『嗯...』我諗左諗，『我諗都有四、五年前喇～好多時都係揸車黎～』
「咁又係既，有車既話揸過黎會好D既～有全年通既話泊車仲要唔駛錢～最重要唔駛同蝗迫車～今日係閒日先有得坐下～放假？企都無地方企～」飛揚BB好無奈咁笑笑口～擰擰頭～
『都係既...不過...我覺得最重要既係同邊個去～同自己鍾意既人去既話，再人迫D，排隊耐D都唔怕～』我望住飛揚BB笑笑口～
最重要都係可以同你一齊重遊舊地姐～
同你一齊重遊呢個對你一見鍾情既舊地～特別有意義呢～
落左車之後，同飛揚BB一步一步行入迪士尼～
『好野～終於黎到迪士尼喇～』我就舉晒手咁～
好耐都未黎過玩喇～
今次仲可以同最深愛既飛揚BB一齊黎～開心死～
「我地黎係傾野架...」飛揚BB提一提醒我～
『係喎係喎...嘻嘻～咁傾完野先玩喇～」我好自然咁轉左一下身～
差D都唔記得左今次黎呢迪士尼係有正經野要做添～
都係乖乖地～做完正經野先同飛揚BB開開心心幸幸福福盡情玩到夠～
入到去華特餐廳之後，我就將件西裝褸交返俾飛揚BB～
不過當飛揚BB將件褸著返上身之後，就呆下呆下咁...
呆下呆下...呆下呆下咁行...
飛揚BB做乜咁呆呆滯滯咁架呢？
塊面仲要紅紅地咁添～
覺得熱？係覺得熱就咪鬼著件西裝褸啦～傻瓜黎架～
「喂～陳生～」一把沉實既聲線喺面前出現...
我望一望返上前，就見到有個中年男人同一大一細女仔坐喺餐桌前...
細嗰個應該仲讀梗中學...大嗰個就同我咁上下大啦...
佢地係咩關係呢？父女？定係援助丫？
真係分唔到～而家呢個時代，真係好難分得清...
「老豆有野要傾，你兩個同媽咪去玩陣先～」個中年男人同一大一細講一講...
哦～真係父女關係～
飛揚BB就同兩個女仔點個頭後：「你好阿葉生，呢個係Emma，我同事。」
『你好丫葉生～』我就同葉生握握手～
「你好呀你好呀～叫我Henry得架喇...嘩...好滑...」葉生捉住我隻手，摸下摸下咁...
睇黎呢個枼生...都係好色之徒...
個女都同我差唔多大...都仲要走黎抽我水...
「阿葉生坐坐坐坐坐先～」飛揚BB拉一拉開葉生隻手～
都係飛揚BB好～
「點呀？我要你改D野改好晒未架？」葉生對眼一直望住我...手指就指住飛揚BB篤篤篤篤篤...
你望我都唔緊要！
但係可唔可以唔好篤飛揚BB呢？
尊重下人講野唔好手指指好喎！
「改好晒喇，你睇下個版得唔得？」飛揚BB由公事包拎左個版出黎～
「嗯嗯...嗯嗯...」葉生對眼仲未離開過我...
由我塊面，掃到落我個胸...
又由我個胸，掃返上我塊面...
好色大叔…
「你地都未食野架呵？不如食完先再傾啦～鍾意食乜隨便叫～我請～」葉生叫個Waiter過黎...
「唔駛喇唔駛喇～都係傾埋先啦～」飛揚BB好似想快D傾完佢～
「唔食野都飲返杯先啦～紅酒岩唔岩呀靚女？」葉生倒左D紅酒落個杯道，隊俾我...
葉生仲要捉住我隻手，搓下搓下...
「好滑...真係好滑...」葉生仲要一邊搓住我隻手喺道講...
有人喺道都咁大膽...呢D男人真係...真係好唔要面...
「葉生...」飛揚BB仲未將要講既野講完...
“啪”一聲...
葉生大大力拍完將檯後：「唔係唔俾面呀化？！」
就喺呢個時候...
“啪”一聲...
飛揚又一手拍落張檯道，仲要企埋起身！
雙眼充滿怒火咁啤住葉生！
「我...」我未等到飛揚BB將說話講完...
『我當然會俾面啦～』我就一啖飲晒成杯紅酒，『不過支酒就麻麻，都係留返俾你呢D孽畜飲啦～』
我一講完，起身就拖住飛揚BB～
「你個...」我無再聽隻孽畜講乜～
我一路拖住飛揚BB行～
呢個飛揚BB原來都有火架喎～
等我仲一直都以為你既氣量大到成個宇宙都吞得落～
不過呢～我就唔捨得要你為我動氣喇～
我都唔想你嬲親架嘛～
之但係...飛揚BB發起火上黎既樣又真係幾可愛既～
尤其係為我出頭既時候～
『好野～可以去玩啦～』出到酒店之後，我就好開心舉晒手話要去玩～
「我地仲返梗工架～」飛揚BB掃一掃我興...
『好啦～俾我任性一次咁多～一次咁多啦～』我扁晒嘴扮小朋友嗲下飛揚BB...
難得可以同飛揚BB重遊舊地...
「ER…」飛揚BB心軟～
『ER則係得啦～』我就拉住飛揚BB行～
我地行到去灰熊山谷，我就話要去玩水～
「著到咁玩水？」飛揚BB好驚訝咁打量一下我全身～
『天氣咁熱有咩所謂～』我就一邊拉住飛揚BB入噴泉山谷一邊講～
有飛揚BB陪我玩，真係玩得好開心～就算射到成身濕晒都嘻嘻哈哈～
我係咁射飛揚BB～飛揚BB又係咁射我～仲射到我髮尾滴下滴下水咁～
我件V領連身短裙已經濕到透透地～
就連個粉紅色Bra都透晒出黎～
「Emma...」飛揚BB拎件褸俾我遮遮～
『唔駛啦～好快會乾～』我就向飛揚BB打左個眼色～
雖然話身邊已經有一隻二隻灰熊𥄫住我，但有飛揚BB喺身邊，仲有乜好驚喎～
『我地去玩灰熊山極速礦車～會快D乾架～』我又拉住飛揚BB衝過去極速礦車嗰邊～
「喂喂喂...」飛揚BB好似好驚驚咁既樣～
驚？有乜咁驚驚呢？
飛揚BB企喺我身後排隊～
好彩今日唔係太多人，排左一陣就入到去玩～
同飛揚BB一齊放好安全閘...
「嘩...呀...呀！！！」飛揚BB坐喺我身邊嗌到鬼咁大聲～～～
『哈哈哈～』我就一手撳住條短裙仔～一手捉住個安全閘～
「心呀呀呀！！！！！」飛揚BB仲係放聲慘叫～～～
乜原來飛揚BB唔坐得過山車架咩？
我都唔知添～
不過見佢慘叫得咁厲害，又真係幾可愛喎～
唔得唔得～下次都要捉飛揚BB黎玩灰熊山極速礦車...次次都要捉飛揚BB黎玩灰熊山極速礦車先岩～
同飛揚BB玩完灰熊山極速礦車後...
『係唔係丫～都話好快乾架啦～』我喺飛揚BB面前轉左一圈～
條短裙連底裙一齊輕輕飄起～
飛揚BB就睇到眼甘甘咁～
又係望我對腳～
呢個飛揚BB，真係好鍾意腳架囉～
我轉完一圈之後企定定，帶住微笑望住飛揚BB～
我慢慢行埋飛揚BB身邊：『飛揚...你肚餓未丫～』
「餓...餓...呀你肚餓喇？」飛揚BB傻下傻下咁既樣～
『嗯～有D喇～』我咬住唇咁點點頭～
「咁你想食D乜？」飛揚BB又諗下諗下咁～
『我想食漢堡包～薯條～飲可樂～』我咬住手指望住飛揚BB～
好耐都未食過喇～
好耐都無任性咁食D唔健康但好好味既野食喇～
飛揚BB諗左一陣，就帶住我行去明日世界嗰邊～
一直跟住飛揚BB身邊行～行到黎間類似麥記既快餐店～揀左個露天位之後，飛揚BB就去買野食～
我就乖乖地坐定定等飛揚BB買野食返黎～
我既視線從來都無離開過飛揚BB～一直都望住飛揚BB既背影～
因為喺呢個世界上，再無任何野可以吸引到我～
吸引到我既，就只有飛揚BB一個～
我一直望住飛揚BB拎住D野食返黎～
『好野～有野食～』當飛揚BB買左兩個漢堡包餐返黎之後，我就更加高興喇～
真係超級耐無食過漢堡包～
因為始終都要Keep...
成日話天生麗質難自棄～但其實都只係懶得話俾人地聽自己平日係Keep得幾咁辛苦姐...
女仔丫...唔Keep就係會走樣架喇...
『幾多錢丫？我俾返你先啦～』差D唔記得要俾返錢添～
「唔使啦～尋日嗰餐我都未多謝你～」飛揚BB客客氣氣咁～
『咁多謝晒喇～』咁我就唔同你客氣，開始享用我既漢堡包喇～
我咬下咬下個漢堡包～好幸福既味道喔～
「你真係好鍾意迪士尼喎～」飛揚BB帶住微笑打量住我～
『我細細個就好鍾意迪士尼架喇～嘻～』我左手一啖漢堡包～右手一啖可樂～
「咁你最鍾意邊隻人物？」飛揚BB再追問一下～
『米奇～我最鍾意米奇～』尤其係而家喺我眼前你呢一隻米奇～
「米奇？咁行架？」飛揚BB恥笑我囉...
『咩行丫？你知唔知點先為之係一個成功既Logo？』我瞪大對大眼睛問問飛揚BB！
「下？成功既Logo...」
『就係就算你將佢裏面所有野都拎走晒，你都認得出佢係咩牌子咁就係最成功～』我就用隻指手畫下畫下...
喺飛揚BB塊面上畫下畫下個米奇頭～
『就好似Apple咁啦～只係睇Outline你都知係蘋果公司～米奇亦都一樣～只係得返三個圓，你都知係迪士尼～』我戚下戚下眼眉～
「你...真係好特別...」飛揚BB眼定定咁望住我...
飛揚BB覺得我特別？
咁係唔係即係話我喺飛揚BB心裏面開始有D份量呢？
又或者...可能係飛揚BB開始用心去留意我...開始對我產生好奇...
『咁你呢～鍾唔鍾意迪士尼呢？』我就咬住個漢堡包問一問飛揚BB～
不過個漢堡包有D大...要夾硬擘大個嘴仔先咬到囉～
「我丫...無話特別鍾唔鍾意既～不過...」飛揚BB諗左一諗...
『不過咩？』我就繼續追問～
「我諗返起我以前喺道做過兼職...係扮米奇...」飛揚BB邊諗邊講～
『跟住呢～跟住呢～』飛揚BB諗返起喇～飛揚BB諗返起喇～
「我記得係迪士尼起好無幾耐...扮米奇其實都真係幾熱架～我久唔久都會閃埋一二角除左個頭抖下涼～」
『跟住呢～跟住呢～』唔知會唔會諗返起我呢？
「我記得嗰年係我岩岩考完A-Level，因為家境貧窮所以黎呢到做兼職幫補家計...」飛揚BB諗下諗下...
諗下諗下...
諗下諗下諗到呆下呆下...
呆下呆下咁呆左好耐下...
『喂喂～跟住呢～跟住呢～』我搖一搖飛揚BB隻手～
「唔記得喇～咁耐既野有邊個會記得...」飛揚BB帶住傻笑擰下擰下頭...
『你咁無記性架！』我谷起塊面豬登！
最重要嗰樣都唔記得...
「人既記憶好有限架咋～要記就記住D重要野好過啦～」
『嗯～所以我會好好記住你保護我...你教識我既野囉～』我咬住支飲管...
或者...喺嗰陣時對你黎講真係唔重要...
或者...嗰陣時既我對你黎講只係生命中一個過客...
之但係...打後既日子...我要成為你最重要既人...
一直都係...永遠都係...
“And you don't seem to understand”
係飛揚BB既電話鈴聲？
「老闆打黎！」飛揚BB望住部電話表現出驚訝既表情！
“A shame you seemed an honest man”
電話既鈴聲一直響...
“And all the fears you hold so dear”
飛揚BB就一直望住部電話...
“Will turn to whisper in your ear”
飛揚BB拎住個電話...手都震埋咁...但就係唔接聽...
我見飛揚BB咁耐都唔接，就由佢手上搶部電話過黎～
我一接聽個電話：『我同飛揚做緊正經事...』
「哦哦...係Emma丫？係丫係丫...同飛揚做緊正經野丫？聽講你地見完葉總喇喎...」姑丈客客氣氣咁～
『嗯...嗯...』有事快講無事收線啦...
「聽講你地好似...唔係咁...咁傾得埋喎...」姑丈小心翼翼咁講～
『OK啦，你唔使擔心咁多。』唔好阻住我同飛揚BB二人世界呀！
「哦....哦...咁...咁我就唔擔心咁多架喇...我都唔阻你地喇...Bye...」姑丈好似好懊惱咁～
『嗯...嗯...Bye。』我就真係唔想理你咁多～
今日黎迪士尼係要開開心心咁同飛揚BB玩架嘛～
公事呢D無聊野就咪鬼提啦！
打擾晒我D雅興！
都係唔好諗咁多～繼續理下我既飛揚BB好過～
我望一望飛揚BB...
『飛揚～你無事嘛？成頭大汗既？』我一邊遞返部電話俾飛揚BB～一邊打量一下佢～
「無無...好熱姐...係呢...老闆佢講D乜？」飛揚BB就一邊抹汗一邊口震震～
『無丫～佢叫我地玩得開心D喎～』我向飛揚BB打左個眼色～
傻瓜黎架～熱都唔會熱到連口都震埋嘛～
『食飽我地要出發～』我就唔理咁多～拉住飛揚BB先～
「行...行去邊丫？」
『去霸返個靚位睇巡遊丫～』
差唔多喇～差唔多喇～差唔多到巡遊時間喇～