「一罐可樂...一杯烏龍茶...」女侍應放低D野之後...

『可樂~可樂~可樂~可樂~可樂~可樂~可樂~可樂~可樂~』我就已經眼定定望住罐可樂~

「嗱~一啖架咋...」飛揚BB插左支飲筒之後,放到埋我嘴邊~

『嗯嗯嗯嗯~』我就揸住支飲筒啜下啜下~啜下啜下~

「喂喂喂喂喂…一啖咋~唔可以咁貪心~」飛揚BB捉實我隻手~





『嘻嘻~』一大啖~一大啖~好滿足~好滿足~

當飛揚BB拎起罐可樂又啜一啖...

我見到飛揚BB眼定定望住我既小嘴~

我輕輕力咬一咬唇~

飛揚BB飲到我D口水~





唔知飛揚BB飲到我D口水係...咩味架呢?

唔知甜唔甜架呢?

「極上海貝丼...十勝帶廣名物豚丼...」女侍應放低D野之後...

『我要三文魚~三文魚~三文魚~三文魚~三文魚~三文魚~三文魚~』我已經眼定定望住塊三文魚~

「食左塊三文魚之後無得再要其他架喇~」飛揚BB又扮晒爸爸咁既口吻~





『嗯嗯嗯~呀~』我擘大個小嘴等飛揚BB餵~

飛揚BB將塊三文魚放到我口中後,我就啜住佢對筷子:『好味好味~』

勁好味~勁好味~

有飛揚BB餵就特別好味~

『嗯~我呢個豚肉都好好味架~你試下~』我又夾左舊豚肉放到飛揚BB嘴邊~

飛揚BB咬一咬~

喺嘴裏面慢慢咀嚼~

我見到...我見到飛揚BB雙眼...開始...開始紅紅地...





紅到好似...好似就快有淚水要流出黎...

『飛揚?』我將注意力集中喺飛揚BB對眼裏...

「我...有D感動...哈哈~」飛揚BB傻笑住咁擰下擰頭...

『感動?』我嘗試追問一下...

飛揚BB諗左一諗:「你有無聽過一個故事?」

『故事?咩故事?』我充滿好奇咁望實飛揚BB...

「是咁的...喺地獄裏面,所有鬼魂圍住大檯食飯。佢地手上都拎住長長既筷子,夾到食物但又唔可以放到自己嘴裏面,於是人人都要捱餓。喺天堂之中,所有天使亦都圍住大檯食飯。佢地手上拎住既筷子都係長長既,但係佢地夾到既食物就互相放到對方既嘴裏面,於是人人都食得飽,人人都好開心。呢個就係天堂與地獄既區別,亦都係幸福與不幸既差別...」飛揚點點頭...





原來...原來係咁...

原來幸福...就係...

我對住飛揚BB笑笑口:『咁你快D餵我食多件吞拿魚刺身啦~呀呀~』

原來幸福就係食人地既食物~~~

我又擘大個嘴仔等飛揚BB餵~~~

「唔得!咁樣就係貪婪架喇~」飛揚BB擰擰頭...

我扁晒嘴咁望住飛揚BB...

「好喇好喇...最後一件喇...呀~」飛揚BB將件吞拿魚刺身放到我個嘴仔裏~





我再次啜住飛揚BB對筷子:『好味好味~』

我都話飛揚BB好鬼易心軟架啦~

不過講開又講...同飛揚BB一齊既時候,我無時無刻都覺得自己係身處於天堂之中~幸福之中~

咁飛揚BB...又會有乜感覺呢?

唔知會唔會都係同我一樣...覺得同我一齊既時候係身處喺天堂之中~幸福之中架呢?

我當然就梗係希望飛揚BB都係咁諗啦~

而且...以後都係咁就最好~





只要可以同到飛揚BB一齊...我一定會一直都令佢咁幸幸福福~俾幸福包圍住~

呢D唔係應該係由男仔做架咩?

我就覺得唔係囉~

好多時D女仔都話要個男朋友對自己點千依百順無微不至聽聽話話俾手就俾手點頭就點頭點好點好咁先叫幸福~

但其實幸福...都可以係付出...

施比受更有福?

我就唔係話真係咁偉大~

我都唔係耶穌~

之但係...為愛人付出...都可以好幸福~

唔明?

你未試過就梗係唔明啦~

有機會就自己試下啦下~

『好滿足丫~』食飽之後,我就嘆住手中既熱烏龍茶~

「嗯~我都好滿足~」飛揚BB都啜緊佢罐可樂~

同飛揚BB對望一下~笑一下~真係好滿足~

雖然話我同飛揚BB“仲未”係情侶~但感覺上已經超越一般情侶~

真係好~一切都跟住劇本去發展~

到飛揚BB真係知道佢個女朋友Ashlynn背住佢出去偷食既話,一定會果斷同Ashlynn提出分手!

然後好順理成章咁同我一齊~

真係諗一諗都興奮~

『等我俾啦~』享受完一個幸福午餐之後,我就拎起張單~

「點可以要你俾呢?」飛揚BB唔好意思咁既樣~

『你已經請左我好多餐架喇~呢餐輪到我架喇~』再要你請我都唔好意思啦~

「有好多餐咩?咁唔差在請埋呢餐啦~」飛揚BB仲係勁唔好意思咁~

『你硬要請我既話,即係唔尊重我...睇我唔起...男女唔平等!』我咬一咬唇啤住飛揚BB!

係香港成日都講男女平等...

但唔知點解就硬係一D都唔平等!

返左黎香港都有一段時間,但睇香港既男女文化總係覺得好鬼奇怪!

攞著數既永遠都係女仔!

被搵笨既永遠都係男仔!

咁叫平等咩?

平等既係你幫下我~我幫下你~

你就下我~我就下你~

你一次~我一次~

又或者你兩三次~我又三四次~再到你四五次~又到我五六次~

咁先叫平等架嘛!

都唔明點解香港既平等係特別另類!

『無野講喇嘛~今餐我既~』我就帶住幸福既微笑埋左張單~

飛揚BB平時都真係好多道理~

講野又成個哲學家咁既口吻~

但有陣時呢...都係唔夠我講既~

都係要聽我話既~

因為我講既野有道理囉~

只要有道理,飛揚BB都會接受~

唔會搵野黎嗌~

咁先係兩個人相處之道嘛~

所以話,飛揚BB真係一個好男人~(都係我夠眼光~)

『好滿足~好幸福~』我好開心咁翹住飛揚BB行出丼丼屋~

「嗯~好多謝你請我食呢餐呢~」飛揚BB成個紳士咁~

『我多謝你先岩~』我就對住飛揚BB甜絲絲咁笑~

其實開心真係好簡單~

唔需要話做CEO~好有錢~著名牌~食好西~

只要經常有深愛既人喺身邊~做野做到悶又可以陪你傾下計~食飯既時候又互餵下~翹住黎行下街~都會好開心~

行下街...係喎~

『仲有時間喎~不如我地過定去尖沙咀行陣街先好唔好丫?』我搖一搖飛揚BB手臂~

都未同過飛揚BB行街街~趁而家有機會,一定要爭取下~

「嗯~都好丫~咁我地行嗰邊搭地鐵~」飛揚BB指一指地鐵站方向~

『揸車過去啦~走嗰時唔使又返番黎丫嘛~』我就拉住飛揚BB去停車場~

好野~成功爭取~

“吼~吼~吼!”

「Emma~你自己有幾多架車?」飛揚BB望住盞紅燈問一問我~

『嗯?你係問我會有幾多架車我係會揸?』我望一望飛揚BB~

「有乜分別?專心D專心D~轉燈喇~」飛揚BB指一指盞交通燈~

“吼~吼!”

『放心啦~對我有信心先得架嘛~梗係有分別啦~所有車都係由公司買既,基本上唔可以話係我地自己既~不過又當然只有我地先會揸啦~仲要泊喺我地自己屋企添~咁講你明唔明丫?』我向飛揚打左個眼色~

「專心D專心D!望返路面...」飛揚BB總係好似唔係咁放心咁~

總係好似覺得我唔識揸車咁~

『之前我就揸LP 700-4既~到ROADSTER出左我就揸ROADSTER喇~』我一俾油就超過架紅的~

「你對AVENTADOR都幾情有獨鍾架喎~」衝到去一下個燈位前面,飛揚BB又望實盞紅燈~

『我既最大缺點就係專一~』我對飛揚BB莞爾一笑~

「哈哈~專一都可以話係缺點丫?」飛揚BB恥笑一下我~

『人太執著,心盲無明丫嘛~人民特首劉華係咁講既~』我一俾油,Lamborghini Aventador LP 700-4 Roadster就好似盲牛咁衝住去~

「你執著?」飛揚BB打量一下我~

『我好執著...特別係愛情...我愛一個人,可以將佢愛既野變埋做自己愛既野...』我一路俾油~一路成支箭咁加速~

無錯...我就係咁執著...特別係愛情...

我愛一個人...可以將佢愛既野變埋做自己愛既野...

就好似呢架Metallic Blue既Lamborghini Aventador LP 700-4 Roadster…

飛揚BB曾經喺佢個Facebook道Post過Lamborghini官網Post出既Lamborghini Aventador LP 700-4 Roadster既照片~

仲要話係佢既Dream Car添~

就喺嗰時開始,我唔止愛上Lamborghini Aventador LP 700-4 Roadster…仲開始愛上Lamborghini~

除左車之外,其實都仲有好多好多~

好多好多唔同既事~唔同既物~唔同既人...

只要係飛揚BB鍾意...我都會愛上~

我總係覺得...愛一個人就要連佢所鍾意既野都要愛上~

我愛上你鍾意既野~你又愛上我鍾意既野~

咁先有共同既話題~咁先可以減少發生爭執既可能性~

相愛…其實都唔係好難姐~

泊好架車,飛揚BB幫我蓋返個車套~我就翹住飛揚BB去行街街~

「點解平日既尖沙咀都可以有咁多旅遊巴泊喺路邊?」飛揚BB望住好似城牆一樣既旅遊巴s~

『香港幾時都係咁多大陸遊客架啦~』我就無理咁多~翹實飛揚BB擺下擺下咁行~

「我真係好鬼憎D蝗!搞到香港唔似香港!」飛揚BB好似有D火火地咁~

『嘿嘿~但對D商家黎講,佢地簡直係發光既金豬~』我就雙眼發晒光咁望住一隻又一隻金豬~

飛揚BB好似一頭問號咁~

『而家既大陸人真係好有錢~而且佢地又好捨得使錢~對商家黎講,真係同隻大金豬無分別~』我又望住隻金豬~

最重要係佢地無腦~

以為自己真係大爺~

事實上,一直俾我地氹緊俾錢我地使都懵然不知~

你話係唔係好似豬一樣咁蠢~

「咁都唔可以因為商業發展已無視左廣大市民既利益架嘛!」飛揚BB雙眼充滿住怒火咁仇視住一隻金豬~

『咁邊個有權力D,有影響力D?』我眼定定望住飛揚BB~

飛揚BB答唔出口~

『唔使我講你都知~而且...當你去到嗰個位置既時候,你都會做同樣既決定~』我望返去大街~

飛揚BB咁聰明,又點會唔知丫~

只係...唔肯去面對...唔肯去承認姐~

而當飛揚BB去到嗰D位置既時候,又會唔會都會做同樣既決定?

我諗就算唔係100%,都總會要做出一D...無可奈何既決定~

有陣時身處於高位上,都係會身不由己~

當我翹住飛揚BB行到黎Salvatore Ferragamo之時...

『咦~咦~咦~返左新款喎~入去睇下咯~』我就捉左飛揚BB入去~

與其要飛揚BB繼續懊惱喺權力問題之中,不如入去睇下衫~分散下佢D注意力好過啦~

行街街係要開開心心~輕輕鬆鬆架嘛~

「李小姐你好~我地岩岩返左新貨喎~」一入到店裏面,一個女店員就立即招呼我地~

『嗯~』我帶住微笑點點頭之後,開始睇衫~

我拎起一件紅色長裙望一望...

紅色...呢隻紅色好似太過鮮豔...太過老...飛揚BB唔會鍾意~

都係睇下D新返既好D~

『麻煩你幫我拎晒新返既俾我試試~』我帶住微笑同身後既Sales講一講~

「係既李小姐,請黎呢邊等等~」個Sales點晒頭咁~

『飛揚~你唔會介意睇我試衫架呵~』我就向飛揚BB打左個眼色~

「唔...唔介意...」飛揚BB就怕怕地羞咁~

等到Sales將D新返既放晒入試身室入面~又等到飛揚BB坐喺張梳化上面~我就行入去試身室~

「李小姐~慢慢喇~有需要可以隨便吩咐我地架~」個Sales笑笑口咁點點頭~

『嗯~唔該晒~』我都帶住微笑咁向個Sales點點頭~

等到個Sales幫我閂返埋道門...

我望住試身室已經掛滿五顏六色唔同款式既衫...

都真係有幾多下喎~

試邊件先好呢?

唔...

我望到有件黑色既...斜膊短裙...

飛揚BB鍾意黑色...又成日望住我對腳咁...就試呢條先啦~

我就將身上條黑色V領連身短裙除落黎~再換上件黑色斜膊短裙上身~

喺塊全身鏡前托一托對豐乳~拉一拉好返D位~

照下前~照下後~再照多兩照~確保整整齊齊無穿無爛之後...

『我靚唔靚丫~』我就由試身室行左出去~行到去飛揚BB面前~轉左一圈~

條短裙飄一飄起~俾飛揚BB欣賞一下我對修長美腿~

「好靚…」飛揚BB望到流晒口水咁~

飛揚BB呢個樣傻下傻下咁~真係好鬼死得意~

我笑一笑~又返入去試身室~準備再用另一套靚衫去勾引我既飛揚BB~

我每換一套衫,都會行出去轉個圈~行兩步~行到飛揚BB面前~問一問佢意見~

而飛揚BB每次都會眼甘甘咁望住我話好靚~好靚~

真係咁靚?唔知呢~

我只係知我每次都喺飛揚BB面前擺動一下修長既美腿~

又挺起豐滿既酥胸~收一收肚仔~掃一掃條小蠻腰~

又會甜絲絲咁對住飛揚BB笑~

總之就喺飛揚BB面前盡顯我既美~

全力去勾引飛揚BB~

務求令到飛揚BB滿腦子都係我~

『全部幫我包起晒去,送去我屋企~』試完晒D衫之後,飛揚BB就同我一齊行去埋單~

「無問題丫李小姐~一日之內就會送到府上~多謝你八十八萬…」個Sales好有禮貌咁覆一覆我~

我就由銀包仔拎左張American Express Centurion Card~

「收你American Express~」Sales雙手接過我手上張American Express Centurion Card~

喺Sales碌緊我將卡之時,我見飛揚BB好似呆下呆下...又諗下諗下咁既樣...

『飛揚~試唔試下D衫丫?』我就托住個頭望住飛揚BB~

「唔使喇~我夠著架喇~」飛揚BB又呆下呆下咁擰擰頭~

『但係...我覺得呢條領帶幾岩你~』我拎一拎起條黑色領帶~放係飛揚BB條頸前~

黑色既領帶~係飛揚BB最鍾意既顏色同款式~

呢樣亦都係我其中一樣留意到既~

飛揚BB除左話鍾意黑色之外,亦都係比較鍾意淨色無花紋既款式~

而幼身更係飛揚BB既最愛~

就好似飛揚BB戴緊嗰條agnes b領帶咁~

『同我包起佢~』我就將條黑色領帶放到Sales手中~

行出Salvatore Ferragamo門口~

『嗱~送俾你~』我將盒包得靚靚地既領帶送俾飛揚BB~

「唔係咁好既…我俾返錢你啦~」飛揚BB想拎出銀包…

『你唔係要同我計丫嘛?』我扁扁地嘴…

呢個飛揚BB丫...女仔送野俾你係要大方咁收下架!

唔係既話...會令到個女仔好尷尬架嘛…

「但係...」我無等到飛揚BB講落去~

『你尋日送左套我好鍾意既裙俾我,我而家送返條領帶俾你,當係禮尚往來啦~』我向飛揚BB打左個眼色~

呢個飛揚BB~有時都真係幾…港男架~

就係識得要面~又唔識社交禮儀~

你地D男仔丫~真係要好好咁學下丫~

唔係一味盲目Gentleman就岩架~

你地呢D唔係叫Gentleman~係叫大男人呀~

『黎黎黎~我仲有野想買架~』我就翹住飛揚BB行去1881~

我一直翹住飛揚BB行~行到去Vacheron Constantin~

一入到去,我就坐低同飛揚BB講:『我想買隻錶俾我爺爺~你可唔可以幫我揀丫~』

好耐都無買過野送俾爺爺喇~

而爺爺除左最鍾意我之外,第二樣鍾意既就係手錶~

「我?」飛揚BB好似好驚訝咁~

『我知你眼光好~你一定可以幫我揀到隻我爺爺鍾意既~』你鍾意既即係我鍾意~我鍾意既我爺爺都一定會好鍾意~

「嗯...」飛揚BB點點頭~開始繼隻繼隻揀~

喺一隻又一隻手錶上望下望下...望下望下...飛揚BB眼定定咁...眼定定咁望住...望住一隻...

『唔該我想睇睇呢隻~』我指一指飛揚BB望緊嗰隻Malte Tourbillon Collection Excellence Platine~

「無問題,李小姐~」女店長戴起手套由陳列櫃拎隻錶出黎~

我拎上手~左望望~右望望~上望望~下望望~

「你男朋友真係好有眼光~呢隻MALTE陀飛輪限量鉑金珍藏系列全球限量五十隻~我地舖都只可以拎到一隻返黎~仲要係岩岩先放出黎~」女店長呢一句說話令我心都甜埋~

『OK~就呢隻~幫我包起佢~』我甜絲絲咁拎張American Express Centurion Card出黎~

「多謝李小姐~」女店長雙手接過我手中既黑卡~

飛揚BB又望下其他錶~

我又留意一下飛揚BB對眼~留意一下飛揚BB對邊隻手錶有興趣~

飛揚BB望下望下~望住一隻...呢隻咪係...

PATRIMONY TRADITIONNELLE 計時萬年曆?!

『我想睇埋黎隻~』我指一指飛揚BB仲眼定定咁望緊嗰隻手錶~

「好既李小姐~」女店長就將飛揚BB眼裏面隻手錶拎左出黎~

我拎一拎上手~左望望~右望望~上望望~下望望~

呢隻錶咪係...飛揚BB Post過上Facebook既...PATRIMONY TRADITIONNELLE 計時萬年曆?

我仲記得...飛揚BB喺註明之中仲寫住“如果我有一日發左達,一定要買返隻”~

『飛揚~伸隻手出黎~』

飛揚BB呆下呆下咁伸左隻手出黎~

我將隻PATRIMONY TRADITIONNELLE 計時萬年曆套到飛揚BB手腕上~

我捉住飛揚BB隻手望多兩望~

又將飛揚BB隻手放到佢自己個心口前望多兩望~

『果然好襯你~年青才俊~』我向飛揚BB打左個眼色~

「OK丫...OK丫...」飛揚BB快快手手小小心心咁除返隻錶俾女店長~

『幫我包埋呢隻唔該~』我就望住隻PATRIMONY TRADITIONNELLE 計時萬年曆指左一指~

「Emma…」飛揚BB捉一捉住我隻手~好認真咁望住我~

『嗯?』我帶住微笑望住飛揚BB~

做乜咁認真架既樣既~

「你唔係諗住送俾我丫嘛?」飛揚BB又好認真好認真咁望住我~

『係丫~我知你鍾意呢隻錶~所以想送俾你囉~』我點點頭~

「我唔收得架...」飛揚BB望住我擰擰頭~

『點解丫~』送野俾你又點解唔收得架~

「太貴重喇…」飛揚BB勁沈重咁~

『都唔係好貴重姐~』百零萬咋嘛~都唔算係貴重野丫~

「我真係唔收得架...」飛揚BB囧晒樣咁~

望住飛揚BB呢個樣...有D好笑~

佢呢個神情...我總係覺得佢好似一個人...

好似...謝繼聰...唔係唔係!係張繼聰先岩~

唔...或者...我明白...

我笑瞇瞇望住飛揚BB:『你而家唔收唔緊要~到左合適既時候...我先將佢送俾你~』

或者我明白...男人都真係要有返D尊嚴~

或者而家仲未係時候~

或者唔使幾耐...就會到合適既時候~