坐喺一間以黑色為主既...咖啡店?

唔...應該係...佢呢道個店名係叫做“Whirling Coffee”。

而呢間咖啡店就只有一個女仔打理。

估唔到一個靚靚女女既女仔,竟然可以為一間咖啡店打理得井井有條...

邊個話靚女無腦?!



其實喺香港,有好多又靚又後生既女仔都好本事呢~

拎起手上一杯Cappuccino,細味一口...

又諗返起尋晚同Stella、珮琳佢地食完晚飯返屋企上網搵有關情性既資料...真係俾佢地兩個激死喇!

尋晚食完晚餐,Stella打俾佢既模範男友~

唔駛兩分鐘,曉揚就出現!



真係唔講得笑~呢D咁貼心既男朋友真係喺邊道搵?

「咁下次再見啦~Bye~」Stella向我地揮揮手之後...

『小心D喇~Bye~Bye~』我同珮琳就目送曉揚推住Stella離開。

「嗯~終於見到Stella幸福~總係有一種...好似...見到個女出嫁咁~」珮琳眼裏充滿安慰。

『嗯~睇到Stella有個咁好既男朋友,真係放心晒~係呢~你又唔叫你個Timothy接你返去既?』我打量一下珮琳。



「嘩~唔好搞我~佢已經好黐身架喇!難得今晚俾我嗲到佢放我一馬,我緊係想呼吸一下自由既空氣啦~等等先...嗱!佢又Whatsapp我喇!」珮琳一邊行,一邊撳下撳下部手機。

雖然話珮琳滿口埋怨,但好明現又係嘴角含春咁既樣...

『你都係快D返去含啦!』望住珮琳個姣樣,我真係頂佢唔順!

「呵呵~你又唔駛為我擔心~Timothy好得架~嘻嘻~」珮琳意淫未盡咁淫笑起黎...

『去死啦你~』我受唔住呢D淫娃盪婦喇!

「你丫~快D搵返個人啦~你個男神丫~記唔記得我同Stella講過嗰個情聖丫~試下搵下佢啦~可能真係幫到你捉緊幸福呢~」珮琳搭一搭我肩膀,攬一攬我埋佢身邊。

『嗯...我會架喇...』我托一托副眼鏡...

捉緊幸福...



我既幸福...

一直以黎,幸福好似喺我眼前...

一直喺我面前徘徊...打轉...行來行去...

時近時遠...

但係我就好似...好似...從來都摸唔到...觸不到...

無論係幾時...有幾近...

或者我真係要好好咁請教一下高人,點樣可以捉緊自己既幸福...



返到屋企立即打開部電腦,搜尋有關“情聖”既資料。

但“情聖”呢個名實在太普遍...阿豬阿狗都話自己係情聖...叫人點搵丫?

喺我左搵右搵,上搵下搵,用盡晒我認既方法喺網上搜尋,都係搵唔到個似樣D既情聖...

就喺我無計可施,正想放棄之時...

「好似話咩咩...咩...所有情困都可以解開架嘛~」珮琳呢一番話,突然喺我既腦海中閃過!

可以解開情困既情聖...

『可以解開情困...』當我喺個Google打左呢六個字之時...

方格顯示出“只要你不是戀兄、搶男友、師生戀、變心,所有情困我也可以為你一一解開。”...



而當我一按下“return”之時,Google第一個搜尋到既係一個叫“情性”既Facebook專頁...

『情性…情聖?』

好奇心之下,我不自覺咁撳左入去個Facebook裏面...

視窗一打開,有個置頂Post就寫到明話“只要你不是戀兄、搶男友、師生戀、變心,所有情困我也可以為你一一解開。”...

睇黎我要搵既情聖...就係呢個情性...

情聖…情性…

你話係唔係俾佢兩個靚女激死丫?!



講野又唔講得清楚D!

人地係叫做情性!唔係情聖丫!

你一早講清楚係叫做情性既話,我就唔駛白白浪費左兩個幾鐘時間,成個癲婆咁坐喺部電腦面前搵啦!

真心俾佢兩個激死喇!

我再認真D咁睇...

“所有情困我也可以為你一一解開”?!

係唔係真架?

有無講得咁容易丫?

我深信,除左生老病死之外,愛情就係人世間最難解決既難題...

世上有幾多愛情故事,都係糾纏喺錯綜複雜既時空中...

但呢個情性...竟然可以大模廝樣咁標榜可以解開所有情困?!

唔...

我內心總有保留...

之不過...兩位好姊妹都推介呢個情性既話...

我又無理由唔試下...

好啦!反正過左兩年有多,又撞正男神受到極嚴重既情傷...Inbox左佢先啦~

我喺個Facebook Messenger快快手手打左幾隻字:“我有情困”

唔駛幾秒就有回覆!

我睇一睇個Message Box...係一個日期、時間、地點...

古古怪怪咁既...會唔會係D層壓式推銷...又或者係保險嗰D衰野黎架...

唔緊要!反正喺呢個爾愚我詐既社會打滾左好幾年,應該呃我唔到既~就應承左佢先啦!

“OK”

“到時見。”

係唔係真係幫到我架?

唔...希望啦...

於是,我就係今日呢一個時間,黎左情性相約見面既咖啡店中等佢。

坐喺呢間白色為主,被黑白相包圍既咖啡店中,總係感到有一種...品味~

白色既牆身、白色既檯凳、白色既櫃,配上黑白相形成強烈對比。

但由於白色既比重比起黑色既色調多,所以令人感到放鬆多於緊張~

或者係因為同我既職業有關~對室內設計總係特別敏感~

整體黎講都係完美既配合,之但係...有一樣...我就覺得美中不足喇...

美中不足既地方就係D黑白相!

雖然大大小小既黑白相張張都影得好有感覺!

就如出自大師一樣既傑作!

可惜既係,每張相都標明價錢...

咁樣搞法...好似搞到D藝術品染上幾分俗氣...

如果唔係D價錢牌既話,我諗會好好多囉~

不過講開又講...黑白相...Whirling...好似...喺邊道聽過呢?

「Sorry我遲左。」一把成熟既聲音出現!

我望一望返前面,見到有一個貌似古天樂咁既人坐喺面前!

呢一個既成熟,又穩重既型男...就係...情性?!

「喂~小姐~做乜眼甘甘咁望住我?」古天樂坐低左之後,向我揮揮手...

『呀!係係...無無...』我認,當我望到眼前既古天樂,我有俾佢懾人魅力震懾左幾秒!

仲搞到我有D...濕濕地...

痴線架~只係望住古天樂對迷人雙眼,都已經俾佢電到失晒暈!

你叫我仲點同佢講野喎?

「你就係Carol?你好~我就係情性。唔知你有乜野情困需要解開架呢?」古天樂帶住微笑望住我...

古咩天樂姐?情性丫!

『你好你好...情...情性...ER…我...我鍾意左一個...男仔...』我吞吞吐吐咁口噏噏...

「呢個男仔唔會係你哥哥...唔會係有女朋友...你亦都唔係變心嗰個?」情性打量一下我...

『唔係唔係…』我有D好奇,點解情性會咁樣問...

「嗯~希望你唔好見怪。我只係想喺開始之前,確保你既問題唔會涉及我既禁域。咁你鍾意左一個...點既男仔?」情性既視線一直放喺我雙眼...

『我...我鍾意左...我既上司...』我托一托副眼鏡...

「嗯~你鍾意左你既上司...咁你既感情問題呢?一直困擾住你既感情問題,係點樣架呢?由開始...到現在...」

我眼定定咁望住情性雙眼...

『我既...我既...感情問題...』

要講到我既感情問題,就要講返起大約喺兩年前,我岩岩大學畢業出黎搵工做...

嗰陣時一直都喺道諗,喺呢個知識爆炸既香港社會裏,一個岩岩大學畢業既大學生,可以搵到咩工呢?

上網睇D招聘廣告,中小企公司人工平平,要求高高...

我仲聽唔少師兄師姐講,話喺呢D公司裏面工作簡直就係做奴隸...

但你唔喺呢D勞役公司拎經驗,大公司係唔會睇你...

你就連入場券都無...

好多人都係咁,就算有大學學位,出到黎社會,就同人地D High Diploma或者ASSO無分別...

我唔係歧視Diploma或者ASSO出黎既朋友。

鍾意歧視別人嗰個,係D老闆...

D老闆同我地傾就會話人地High Diploma同ASSO都同大學生差唔多,人工仲可以平D...

到同D High Diploma或者ASSO傾既時候,就話大學生都係咁上下價錢...

喺呢一個扭曲既社會裏,我地總係會被上層欺壓...

但我就係唔想...我就係唔甘心!

我唔甘心一直做下等人!

一直被上等人欺壓既下等人!

所以,我明知機會渺茫...甚至乎係無機會,我都要入大公司!

之不過...喺香港又有幾多間稱得上大既室內設計公司?!

唉...香港咁鬼細...邊行都係咁窄架喇...

但又唔明,點解每日由大陸來港既單程證配額,可以有成一百五十個咁多...

照咁睇,日本未陸沉之前,香港就首先被大陸人踩沉...

唉~畢業後嗰兩個月,我都好努力咁Send E-mail。

總之一見到有返咁上下規模既室內設計公司,我都立即Send份履歷同求職信過去!

大大話話都Send左三十幾封(有返咁上下規模既室內設計公司真係少之又少),但就連俾我上去面下試既機會都無...

『唔通理想只係一個你想?!』

唉~就喺我心灰意冷、心感絕望、諗住要向現實低頭之時...

我喺個收件匣道見到一封E-mail...

E-mail既內容係叫我喺指定既日子...指定既時間...去佢地既公司面試...

面試…有幾會面試...Send左咁多封E-mail,終於都有機會面試喇!

再睇一睇間公司名...

係…係室內設計界,數一數二既大公司!

我終於都...我終於都!

唔得!我要做好準備先得!

喺面試之前嗰晚,我準備好晒所有要準備既文件、證書、作品!

仲要對住塊鏡預演左好幾百次!

因為我心感明白,此機會係可一不可再!

而喺面試當日,我亦都早到左十五分鐘,仲要精精神神,生生猛猛!

可以話係我人生之中,最有信心既一次面試!

不過...入到去見個HR既時候...我就覺得佢Hea我囉...

個女人隨便咁睇左一睇我既履歷,講左一句:「你岩岩畢業出黎咋喎...」

之後再Hea多我兩句:「返去等消息啦。」

唉...返去等消息喎...

呢個最遙遠既消息,你等一世都唔會等得到架啦...

好啦~我明架喇~

喺呢個既現實又殘酷既香港社會裏,係唔容許人民發夢架喇~

我都係乖乖地做奴隸啦~

一個星期內,見左好多好多份八千蚊請神人...

見左好多好多份OT無補水...

見左好多好多份當正自己係皇帝既腦細...

究竟係有“有人唔做走去做奴隸”既奴隸先?定係有“泯滅人性既無良腦細”先?

我都唔知...

但我真心感受到咩叫做香港已死...

我頂唔順...真係頂唔順...

我唔想喺呢D唔重視員工...唔尊重員工既公司工作...

我想有得揀...我好想有得揀而唔係袋住先呀!

就喺我心灰意冷、心感絕望、無計可施、不知點算好之時...

我喺個收件匣道又見到一封E-mail...

而呢封E-mail...就係之前嗰間大公司發出!

E-mail既內容係...叫我去Second Interview!

Second Interview…我竟然有Second Interview既機會!

太好喇...對一個已經跌左落泥沼裏面掙扎梗既人黎講,簡直係一條救命繩!

有Second Interview既機會,我當然唔會錯過!

因為...呢個真係好有可能係我最好既起點!

喺面試之前嗰晚,我再一次準備好晒所有要準備既文件、證書、作品!

亦都有對住塊鏡預演左好幾百次!

因為我心感明白,此機會係最後機會!

當我第二日帶住神采奕奕,再一次上到呢間大公司,我要見既人係...

「你好~你叫...傅愷盈係咪?我叫歐陽皓,喺呢個部門既主管。」我眼前係一個...面帶親切笑容,態度和藹可親既年輕才俊...

『係…係…我係傅愷盈...你好...』我確實係有D緊張...

緊張唔係因為個Interview...係眼前呢位親切又和藹既男子...

我總係覺得...呢個叫歐陽皓既男子...好溫暖...散發住一股溫暖既氣息...

而且佢睇起上黎,好似都唔過廿六、七…

咁年輕就做到大公司既主管?!

「你好你好~」歐陽皓笑左一笑,「其實今次個Interview我就無乜野要問~只有一條...你幾時可以返工?」

幾時可以...返工?!

『你...你係指...已經請我?』我有D驚訝...點解好似咁突然咁架呢?

「嗯~我地決定邀請你加入我地公司~只要你決定好幾時可以返工,我地就可以出埋份約俾你簽~咁你就正式成為我地既一份子~」歐陽皓保持微笑點點頭。

『我...我隨時都可以返工!』雖然我仲呆呆地,但我都唔會錯失呢個良機!

「嗯~咁好啦...」歐陽皓諗左一諗,「下個星期一準時九點返黎搵左我先~我會幫你安排埋簽約既程序~有無問題想問?」

『我...我想問下點解會請我既?』當我講左出口之後,先發現自己問得有點唐突...

歐陽皓聽到我既問題後,都有D愕然:「唔...因為我地想有D新血...去幫公司帶黎一D新既...氣象~但對一間傳統既室內設計公司黎講...又怕會係一個衝擊...而你...我覺得係一個適合既人選。」

想有新血...帶黎新既氣象...但對傳統黎講...又怕係一個衝擊...

而我...就喺咁矛盾既處境之下...係一個適合既...人選?!