珮琳出事已經有一個月,但係情況並無好轉...

每日放工,我都會去醫院,探望一下珮琳。

而到左假日,我都會同Stella一齊去醫院陪伴珮琳...

一陪就陪足一整日...

起初,大家都天真咁希望,只要過幾日,珮琳就會醒返。





三日...四日...六日...一個星期...兩個星期...三個星期...珮琳都仲係好似睡公主咁,瞓喺白色既病床上...

珮琳丫珮琳...我既好姊妹...究竟你仲要瞓到幾時丫?

唔好再瞓喇好唔好?

我地個個都好想可以再次同你一齊跑跑跳跳...

縱使這樣,世界仍然轉動...





喺一個好似香港咁急速既社會,唔容許天跌落黎...

就算係天跌落黎,你都要繼續拼命工作...

直至到你落葉歸根處...油盡燈枯時...

「喂!你地點搞架?!」坐喺會客室裏面,我地既客人梁先生已經極度唔好老脾咁向我發砲...

「其實梁先生...你係想...點架呢?我地都可以盡量配合架喎~」坐喺我身邊既Chris幫我發聲。





「我想點?!上次我咪喺個E-Mail道講得好清楚架囉!我要呢道睇起上黎現代D!嗰道光猛D!」梁先生指住幅圖大吵大鬧...

『唔係喎…你個E-Mail係話嗰道現代D...呢道光猛D架喎...』我一定唔會記錯,呢個梁先生咁麻煩,我又點敢記錯?!

而且個E-Mail仲有留喺道,而家開返俾佢睇都仲得!

「哎呀呀!我講過既野我自己會唔記得?!會記錯?!你而家質疑我呀?!我話係就係啦!」梁先生一D道理都唔講...就係識得聲大夾惡...

「唔係唔係~我地絕對無咁既意思~只係想梁先生可以更清楚明白咁話俾我地知,你想點樣設計姐~」Chris一面仁慈...

我就真係唔明,點解Chris對住呢D又唔講道理又唔認衰又五時花六時變又得把聲又惡又無準既客,都可以保持親切既笑容!

明明就係佢唔岩,我一D錯都無!

「我咪講得好清楚囉!呢道咁咁咁...嗰道咁咁咁...」成間會客室,就係得梁先生把聲...





得佢講,無我地講...

雖然梁先生把聲非常難聽,極度吵耳,但我都好專心咁聽佢講每一句廢話。

不過,專心咁又點?

做足佢既要求又點?

到佢第時要改、要轉、要換,我都無佢辦法...

或者呢個就係全世界都盲目咁跟從梗既歪理...“顧客永遠是對的!”

喺會客室俾梁先生連珠砲發咁砲轟左成個鐘...





Chris仍然保持笑面迎人...

我就真係笑唔出...

我真係唔明白,點解D廢人特別多口水!

而更悲慘既係,越廢既人就越有權力!

就好似面前呢個仲喺到發梗噏瘋既梁先生咁!

唔係因為你老豆搵到?我睇你都只不過係街邊上一堆爛屎!

「就咁啦下!唔好再麻煩到我呀!係咁喇!」梁先生口黑面黑咁行出會客室...

「嗯~一定一定~慢行慢行...」Chris送到梁先生出去...





唉...真係唔明,點解呢D人仲未死...

我指既係梁先生呢種人...

而我就更加唔明,點解到左今時今日呢個發達文明既香港,仲要拜服於“顧客永遠是對的”既旗幟之下...

唉...出黎工作都只不過差唔多三個月...我就已經體會到做奴隸既痛苦...

初初仲諗住喺大公司做無咁折墮,睇黎...我錯喇...

Chris送完梁先生出門之後,行到我面前:「Carol~我明唔係你既問題~你俾心機D,盡自己所能去做~唔會影響到我對你既表現既~」

『嗯...』我點一點頭...





但內心仲係有D唔順氣...

你都明唔係我既問題,但點解仲要對住嗰個咁既梁先生咁寬容喎...

點解就唔可以反咬佢一口?!

「不過呢...你再係咁精神恍惚...做錯野既話...我就好難可以俾你過到試用喇...你今朝俾嗰三張圖我,有兩張都搞錯左D野...」Chris慈祥咁望住我...

『下下?係咩?對唔住...對唔住...我立即改返岩佢!』死喇...原來自己真係有做錯野都唔知添...

「唔緊要啦~唔緊要啦~俾D心機改返好佢~你得既~改好再交俾我啦~」Chris俾左個Like我之後,行返入房。

唔…俾D心機…俾D心機…

我好努力咁俾心機工作...工作...又工作...

但就算我點俾心機工作...工作...再工作都好,都係做唔好...

身邊既同事,無一個會關心我...

無一個會著緊我...

有D仲認定我過唔到試用...

個個都好似要睇死我咁...個個都好似想我死咁...

除左阿Ling...

成間公司,好似就只有Chris同阿Ling會關心我...會照顧我...

「Carol~我幫你畫起左一幅架喇~其他既就要靠你自己架喇~你都唔好做到咁夜喇~走先喇~聽日見啦~拜拜~」阿Ling Send左幅本來應該係我自己畫既圖俾我。

『嗯~多謝你丫阿Ling~我地聽日見啦~拜拜~』向阿Ling揮揮,目送阿Ling離開後...

喺我失意之時,有阿Ling雪中送炭...

阿Ling真係一個好姊妹~

好姊妹…

一諗到好姊妹...我又諗起珮琳...仲瞓喺醫院裏面既珮琳...

珮琳喔...珮琳...我滿腦子都係你喺我地面前跳跳扎既樣子呢...

我真係好想...好想你可以...可以快D醒丫...

都係我唔好...係我衰...如果唔係我話要去黃大仙求簽,你就唔會...你就出事喇...

喺寂靜既Office裏,我既眼淚開始湧出...

眼淚源源不絕咁...由眼裏...失控咁湧出黎...

『嗚...嗚...嗚嗚...』正當我就快要哭崩之時...

「Carol?你仲未走丫?」一把溫柔既聲音喺我面前出現。

呢把聲...呢把溫柔既聲線...

係Chris…我唔會認錯...一定係Chris!

「Carol…你...」Chris用上一雙柔情帶點錯愕既眼神望住我...

我諗...Chris一定係俾滿面淚痕既我嚇親...

我眼定定咁望住Chris,良久都俾唔到反應...

你眼望我眼,我眼望你眼...四目交投之下...

「你...你無事丫嘛?」再次聽到Chris既溫柔聲線,我再忍唔住...

我再忍唔住心中既傷痛...

我再忍唔住內心既渴求...

一份得到心靈上既慰藉...

我想...我想得到一個擁抱...

被所愛既人…一個親密既擁抱...緊緊包著...將我全個肉身連同心靈緊緊包著...

我企起身,一步一步行近Chris...帶住抽泣行近Chris...

正當我行到要攬住Chris之時...

「Chris?」一把可人而陌生既女仔聲,由Office入口出現...

我被呢把可人而陌生既女仔聲打斷了思維...

一兩秒後,我偷偷望向Chris背後...

喺幾條光管照射下...有一個著住珍珠白色碎花長裙既女仔,正向住我地既方向行梗過黎...

我打量一下呢個五官精緻、高貴典雅、好似雅典娜一樣咁既陌生女子...

佢係…

「黎左喇?迦迦~ER…」Chris轉身捉一捉住呢個名叫迦迦既女仔隻手,「等我介紹一下~呢個係我既女朋友~郭以迦~迦迦~呢個係我既同事~傅愷盈~Carol~」

聽到Chris話眼前呢個接近完美既女仔,就係佢既女朋友之後...

『HI~你好丫~幸會~幸會~』我立即將傷心之情,埋藏到內心最深處!

同時裝作甚麼都沒有!

甚麼都沒有...

迦迦好似俾我面上既淚痕同自然既回應嚇左一嚇:「HI...你...你好丫~」

「黎接男朋友放工呢?」我繼續面帶笑容,注視住迦迦...

「嗯~係丫~岩岩放工就趕過黎~諗住同佢一齊食飯咋嘛~」迦迦拖一拖住Chris,再翹一翹實Chris...

望見佢地如此恩愛,我都仲可以保持笑意...

「嗯~咁...咁我地走先喇~你...都唔好咁夜喇~」Chris拖一拖實迦迦,向我揮揮手...

『嗯~我搞埋少少野都走架喇~係咯~你地...慢行喇~』我都向Chris仲有迦迦揮揮手...

「嗯~咁好啦...拜~」Chris同迦迦一齊向我揮過手後...

『拜~』佢地兩個恩恩愛愛咁轉身離開...

我一直目送...一直呆呆咁企喺道...目送我既男神...同佢既女朋友...離開Office...

我一個人...我一個人...

原來一直以黎...我都係一個人...

就只有我一個人...

只有我一個人在一廂情願...

Chris有女朋友了...Chris有女朋友了...

他們恩恩愛愛著...甜甜蜜蜜著...

我?我甚麼都沒有了...

就只有眼淚…

源源不絕既眼淚...再次隨著淚痕...流出...湧出...

就好似缺堤既水壩一樣...一發不可收拾...

沒有了...甚麼都沒有了...就只有眼淚…

就只有我獨自一人,在寂寞既Office裏痛哭...

獨自一人喺寂寞既Office裏喊左好耐好耐...

喊到失晒聲...喊到眼痛...喊到再無淚水流出...

我既心血都流乾了...

抹一抹淚痕...拎起手袋...熄燈...閂門...拖住殘破既身軀...逃離呢個心碎既Office...

行屍走肉咁喺街上面行...我唔係漫無目的...

雖然我已經失去靈魂...但我知自己要行去邊...我知道目的地喺邊...

我係知道...我係清楚...縱使只剩下我一個...

我一個人...

我一個人,喺熱鬧既街道上行...

我好似...並唔屬於呢道...

我好似...被隔離...被排擠...

路人既喧鬧...孩子們既歡笑...表演者既噪音都好似與我無關痛癢...

我根本就...唔屬於呢道...唔屬於呢個世界...

一個唔需要我既世界...

我繼續行...一個人被黑暗吞噬下一直行...

拖住疲憊既身軀...好不容易先黎到我既目的地...珮琳身處既醫院...

走到入病房,望住好似睡公主一樣,瞓喺病床上既珮琳...

只有抽泣聲既我...已經再喊唔出眼淚喇...

萬箭穿心下,心血都流乾喇...

我已經很累喇...

背後全沒有支柱...我已經無辦法再支持落去喇...

珮琳丫...你幾時先醒丫?

你唔好瞓啦...你唔好唔理我啦...

以前一有咩事,你總會喺我身邊鼓勵我...開解我...鬧醒我!

每次都係你,將軟弱無力倒在地上既我拉返起身...

而家我又再次崩潰喇...但你都躺在病床上喇...

我要點做...究竟我要點做...我可以點做...

點樣先可以令你再次醒來...

我...我...對了...

我拍一拍自己塊面...

我唔可以再咁無用...

我唔可以再依賴別人...

我要...我要堅強...我要企起身!

我要成為別人既支柱!

我要一直喺珮琳身邊,照顧佢!守護佢!愛護佢!

我要一直...一直喺珮琳身邊...直至珮琳醒返!

再一次企喺我地身邊,再一次企喺我地面前!

我地既大小姐...珮琳!

至於Chris...我無時間再理會佢...

我再無精神放喺佢身上...

算了吧...放棄吧...

對了...這是我可以做的...而且是唯一可以做到的...為了心中所愛的人...

離開...不應再打擾愛人...對不對?