《情困之時，我遇上了自稱情性的情聖》: [Case 02－痴情女子] PART 11

同Chris一邊行，一邊傾CLAMP野～

喺呢一刻既Chris，有D似小朋友～

一個天真得黎，又帶點活潑既小朋友～

係唔係每個男仔，就算外表幾成熟都好，骨子裡都藏有一個小朋友既心架呢？

小朋友既心...



傾下講下～又講下諗下～話咁快又黎到呢個充滿傳統中國宗教色彩既黃大仙廟呢～

好似好耐都...無黎過...

自從珮琳喺道發生意外之後...我就一直都...

自己一個又好...同Stella一齊又好...就算係珮琳好返之後都好...

一直都無黎過...



一直都...內心深處一直都...好似總係有一種...一種不安...

當我而家行過簷篷，我都總會抬高頭，眼定定咁望住上面...

總係有D驚...有D怯...

「嗯？你無事丫嘛？」Chris好似察覺到我有D不安...

『無…無…我無事...』只係...有D陰影姐...



有D陰影...可能真係會跟你一世...

喺你不知不覺之間...直至到再出現喺你面前之時...

喺格外留神既情況下，我同Chris走入赤松黃仙祠後，誠心求支靈簽～

唔知Chris求梗咩呢？

而我自己...都係想知同Chris有無新轉機～

我一心都係諗住：『黃大仙丫黃大仙～我同Chris有無新發展呢？』

“㗳 㗳 㗳 㗳 㗳 㗳 㗳 㗳 㗳”左好多好多下...

我個心裏面嗌左Chris個名都好幾百次...



“㗳 㗳 㗳 㗳 㗳 㗳 㗳 㗳 㗳 㗳！”終於聽到有支簽跌左出黎喇！

我執一執起，仔細咁睇一睇...

五號？

“㗳 㗳！”唔駛幾耐，Chris都求得簽來～

『求到喇？』我行到去Chris身邊。

「嗯～」Chris望住手中簽。

『咁我地去解簽咯～』我有D心急，又有D緊張...



因為今次係同心中所愛既人一齊黎求簽～

人地話，咁樣會準D～靈D喎～

唔知係唔係真架呢～

一路同Chris行過幾間解簽檔。

我都無停落黎既意思～

因為...我搵梗...搵梗上次嗰一位師傅...

「咦？小姐～好耐無見喎～今次帶埋男朋友黎丫？請坐～請坐～」行足成條巷，終於都搵返上次嗰個男師傅～

隔左差唔多有年幾兩年，估唔到師傅仲認得我！



之不過...

『唔係唔係...佢係我上司...』我怕怕羞羞咁坐低...

「哦？係丫？唔...咁今次想問乜呢？」師傅陰陰嘴咁笑一笑…

『我今次都係想問姻緣...』我尷尷尬尬咁遞左支簽俾師傅～

師傅接過我支簽之後，睇一睇：「第五簽...」

師傅轉身拎一拎張簽文紙...

「唔...第五簽...韓夫人惜花...東園昨夜狂風急。萬紫千紅亦盡傾。幸有惜花人早起。培回根本復栽生。中吉～論此簽。險中而有救。但須要自己立即修善。有以感動人心。他人方救于己。而化凶為吉也。凶中有吉之簽～論姻緣，有望守得雲開，見月明丫～」師傅既口吻依舊有D似蘇民峰...



守得雲開，見月明…咁即係話...

「好好把握時機丫～明白嘛？」師傅將簽文紙交俾我。

『嗯...明白...』我點一點頭，接過師傅張簽文紙...

嗯！我一定唔會錯失良機！

「咁你又想問D乜呢？」師傅接過Chris支簽。

「我都係想問姻緣...」Chris點一點頭。

師傅睇一睇Chris支簽：「第八十九簽...」

師傅轉身拎一拎張簽文紙...

「唔...第八十九簽...吳季子掛劍...他鄉遠歷佩魚腸。誰料徐君意欲將。既返願為相贈答。且懸樹下表情長。係下下簽黎架喎...」師傅皺一皺眉...

下下簽...

求得下下簽...都唔會係好野黎架喎...

上次珮琳佢...

「嗯...問姻緣既話...婚有變...會有變數喎...」師傅再眉頭一皺...

婚有變...會有變數？！

的確...Chris岩岩先承受悔婚之痛...

「嗯...不過唔緊要既...照睇情況...已經過左去喇～只要將昔日之情放下～唔好再留戀喺逝去既感情之中～未來可能會有新轉機既～知道嘛？」師傅將簽文紙交俾Chris。

「嗯～明白～」Chris接過師傅張簽文紙...

聽過師傅指點迷津後，望住Chris既親切笑容...好似乜事都無...

係唔係…真係可以...無事架？

『呢個師傅真係好準架～』而且仲準到有D嚇人...

「嗯...佢講得出婚有變...真係好準呢...」Chris有D若有所思咁...

話佢無野…都唔可以話真係無野...

一試之下，就已經表露左少少出黎...

喺Chris既心底裏…仲係好掛住嗰個人嘛？

經過好幾檔擺賣吉祥飾品既攤檔之時...

『丫～你喺道等我一等～』黎到呢道，點可以唔買埋嗰樣野呢～

「哦哦...」

我喺攤檔前睇下睇～搵下搵～揀下揀～

呢個又唔好...

嗰個又好似太大個咁...

唔...

揀左好一陣子，終於揀到個合眼緣既～

『好～行得～』買完之後，我快快步行到Chris身邊～

「嗯～你買左D乜野丫？」Chris好似對我手上包野有D興趣～

『唔話俾你知住～遲D你就會知～』我故作神秘～

「哦～」

呢個遲D，都可以話遲左幾耐下～

到我地行左一陣街～行到我地都有D餓～坐左喺間台式餐室裏面，我都仲未話俾Chris聽～

而Chris亦都好似無再為意～

「想食D咩？」Chris帶住親切既笑容，遞左張Order紙俾我。

『嗯...』我望左一望張Order紙，好快就見到我既最愛～『牛肉麵！』

「哦？你鍾意食牛肉麵架？」Chris驚奇咁問左一問。

『嗯～台式麵既話，我最鍾意食既就係牛肉麵～』而且夠晒穩陣～

就算間野既水準有幾差，段估整一個簡單既牛肉麵都唔會太過難食～

「係丫…咁想飲D乜野？珍珠奶茶？」Chris睇一睇張Order紙。

『嗯嗯～識得飲，食台式野梗係飲珍珠奶茶架啦～』別無他選～

「但係...」Chris諗左一諗，「珍珠唔健康架喎...」

『唔緊要啦～一次半次～我平日都唔會飲既～』以前就話成日行街都會喺貢茶買珍珠奶茶～而家知原來有咁多問題出現，都唔敢再飲～

問題食品充斥住全世界，睇黎地球好快就無野適合人類食架喇～

「嗯...咁好啦～」Chris喺張Order紙上畫下畫...寫下寫...

「仲有無野想加？」Chris再望一望張Order紙後，再問一問我。

『唔～無喇～』我擰一擰頭。

「唔該～」Chris好有禮咁帶住笑容，遞左張Order紙俾個女侍應～

就連本來做到口黑面黑既女侍應，一見到Chris既親切笑容之後，都被Chris溶化了～笑起上黎～

Chris真係幾時都係咁有禮貌～又咁親切～

一個好似Chris咁完美既男神，究竟係點樣鍊成架呢？

「食咁少野夠唔夠飽架？」Chris打量左我一眼。

『嗯～OK架喇～我平時夜晚都唔會食得多既～』要Keep住～要Keep住～

「你唔單止夜晚啦～平日見你食Lunch都食好少～唔怪得你咁瘦～」Chris拎左將紙巾，抹梗D筷子同匙羹。

『乜我真係好瘦咩？』我望一望落胸前...雖然唔係大...但都叫做有D肉丫...

「唔係唔係…我唔係話你無胸...我...咁講好似唔係幾岩...」Chris有D尷尬咁摸摸頭。

『唔緊要唔緊要～我都...唔介意...』我擰一擰頭。

「ER…女仔唔係都會介意...俾人望...架咩？」Chris都仲係有D尷尬咁問。

『唔...一DD啦～睇情況架咋～如果話俾D鹹濕佬用D色迷迷既目光望住，咁就梗係唔鍾意啦～但如果話平平常常咁既話，都OK既～』特別係俾自己鍾意既人望，就更加唔係問題～

始終自己有地方吸引到自己鍾意既人注視，係一種滿足既事～

「我...我唔係D鹹濕佬丫...我唔係架...唔係架...」Chris揮晒手咁說不～

望住Chris呢個緊張樣，又真係有D可愛～

『我緊係知啦～所以我咪...唔介意囉...』最重要都係因為我鍾意你嘛～

「嗯嗯...」Chris傻下傻下咁笑笑口，點點頭，將抹到乾乾淨淨既用具放到我面前。

『唔該～』Chris真係好細心呢～

「哦？哦！唔駛客氣～」

Chris既好，真係由外到內，又由內到返外咁散發出黎！

我不得不再問多一句，凡塵裏，如此一個好似Chris咁完美既男神，究竟係點樣鍊成架呢？

而更加不得不再問多一句既係，一個如此完美既男神，竟然遭一凡間女子嫌棄...

這女子...何許人也喔？！

『係丫係丫？你都鍾意架？』

「係丫係丫～我都好鍾意架～」

『哈哈哈～睇唔出喎～』

「哈哈哈～好多人都咁講～」

『係唔係真係架？平時都睇唔出既？』

「聽就係咁聽返黎啦～但我自己就唔多深究喇～」

『嗯～D八婆野都係唔好聽咁多～』

「都係既～無法證實既野，都係唔好猜測咁多～」

『但公司班女仔就好鍾意猜測呢～』

「唉～算啦～人地把口，我地控制唔到～」

『但如果有人講你呢？』

「我？我有咩好講呢？我又唔係特別過人～又無乜野值得人留意～」

『哦？真係咁架咩？』

「哦？唔係咁架咩？」

喺呢餐晚飯之中，我同Chris都傾左好多好多野～

上至天文，下至八婆新聞，無一不談～

而言談之間，Chris總係帶住正氣、正面、正義既氣息～

以我所見，比起神之馬壯，Chris係更接近神既男人～

“咔”打開車門，坐上Chris架紅色Mini Cooper之後...

「好喇～係時候送你返去喇～」Chris扣好安全帶～

『嗯～呀！等等先！』差D連我自己都唔記...

我喺個袋仔道搵一搵...

「嗯？」Chris望一望住我。

『係道～』我拎出一件紅紅地色既物體～

喺個倒後鏡道拆左個會發出“叮叮噹...叮叮噹...”聲響既平安符落黎之後...

將自己手中既紅紅地色物體掛上去！

『搞掂！』我拍一拍雙手～

「哦？係...係平安符？你頭先買既係...係送俾我既平安符？」Chris摸一摸掛住左喺倒後鏡上既平安符...

『嗯～你呢個平安符丫～都唔知咩鬼野平安符黎架！邊有平安符會發出叮叮噹聲架？！咁咪仲分神！換左佢罷啦～』我故意將舊既平安符放到落Chris手中...

「嗯...多謝你呢～」Chris送返個感激既笑容俾我。

『唔多謝啦～』

我可以為你做既，我都會做...

只要喺我能力範圍之內，而又唔會令你討厭...

有時候，付出既不求回報...

可能真係好傻...

但所謂既愛...就係一件咁傻都願意去做既事...

為左你愛既人...你仲可以傻到去邊個地步？