「喂!你今日有乜野做丫?」Kelly把聲由電話中傳到入我耳裏...

仲要係好大聲...

大聲到我拎開左部電話都聽得好清楚...

『我好忙架...』我一邊換衫...一邊回覆Kelly...

「你忙乜鬼丫?!」Kelly氣沖沖咁...





『我約左Friends...呀!』當我講到個“Friends”既時候,我俾條褲鍊夾一夾到...

痛撚死我!

「約乜鬼Friends姐?你有好多Friends咩?你咪就係得我一個Friend咁大把!」Kelly一輪嘴咁...

『唔通我約左成班女又同你講咩?』我按摩一下條JJ之後,再走去梳下個頭...

「約乜鬼成班女姐?你有好多女仔Friends咩?你咪就係得我一個女仔Friend囉!死毒毒!」Kelly好似有D葡萄咁...





『嗱...你可以話我係毒毒...但可唔可以唔好加個死字呢?』我扮晒正經咁。

「死毒毒死毒毒死毒毒死毒毒死毒毒死毒毒死毒毒死毒毒死毒毒...」Kelly用上佢把既嬌俏,又帶點潑辣既聲音狂講死毒毒...

『好喇好喇好喇好喇好喇...唔講喇...我趕住出去丫!』俾Kelly把聲煩到我整到個頭好似成舊屎咁...

「咁今晚餐飯唔駛預你架啦?!」Kelly仲係有D嬲嬲豬咁...

『緊係要預埋我啦!我一定好準時上黎食添!』食慣左Kelly屋企煮既飯餸,出面嗰D真係唔岩我口味!





「你唔係同你班女女女女女女女女女女女女女女女女一齊食咩?」Kelly好葡萄咁...

陣酸味大到隔住部電話都聞得到...

『行街還行街!食飯還食飯!我分得好開既!』講就係咁講姐...

「車!扮晒野咁...唔阻你去搵你班女女女女女女女女女女女女女女女女喇!今晚準時上黎呀!唔等你架!係咁啦!」Kelly一講完就Cut左我線...

我放低部電話...

話就話同班女出街...

實際上...我係一支公走去買定D野...準備D野...

買定D乜?又準備D乜?





我係想趁住放假...出去買定D禮物...買定D準備表白既物資...

無錯喇...我已經決定左要表白!

我已經諗得好清楚!

我要同Kelly表白!

點解我突然會有呢種諗法?

其實自上個星期病好開始,我就已經決定左要搵機會同Kelly表白。

喺我病到痴痴迷迷之時,雖然話我都唔知係唔係真係攬實Kelly...有無摸過佢對小饅頭...





但有一樣可以肯定既就係,Kelly一直都有喺我身邊照顧住我...

喺我病得最重既時候...喺我最需要人喺身邊照顧既時候...Kelly一直都對我不離不棄…為我蓋被...為我煲粥...餵我食粥...餵我食藥...

試問一個對自己如此無微不至既女仔,你又點忍得到手,唔將佢據為己有?

「係鍾意人就上啦仆街。」

情性講得岩…

係鍾意人就上啦!

我呢條仆街終於都決定左!

決定左要上喇!





咁幾時上好呢?

都要搵個日子先得架~

表白呢家野,都要擇返個良辰吉日先得架...

最好就係有意義D既...有意思D既...有代表性D既...

到第時Kelly問起D乜乜紀念日,我都唔會唔記得呀嘛…(都仲未成功...咁快就諗定紀念日...)

喺黎梗既日子裏面,究竟有D乜野日子比較有代表性架呢?

我睇過個日曆...呢個月黎...除左話聖誕同除夕呢兩個既有代表性,又極度行貨既節日之外...就係我同Kelly既生日...





Kelly既生日...Kelly既生日...

如果話喺Kelly既生日同佢表白既話,都叫夠晒有代表性啦~

一來又唔會唔記得~

二來又可以拍拖紀念日同Kelly生日一齊搞~(講到好似好市儈咁...)

三來喺Kelly同我生日之間加上拍拖紀念日,就好似為我地既生日添上一份甜蜜既禮物~

我諗對女仔黎講,深心裏一定會感受到無比既幸福暖意~

所以揀喺Kelly生日表白係最好不過~

之不過...又應該點樣表白好呢?

我都未試過向女仔表露心跡...完全無任何經驗...真係老鼠拉龜...無從入手喎...

好彩喺而家呢個資訊核爆既年代,求其喺網上一搵,都搵到幾百萬個有關教人點溝女既Posts~

當然,有好多都係叫你中出即飛既鳩吹Posts啦~

之不過好彩既係,這個世界有情性~

打開情性個Page,喺D Posts入面,除左一D叫春文之外,都有好多教你點樣去追女仔既~

好似話要投其所好啦~

要知道個女仔鍾意D乜野公仔啦~

要知道個女仔鍾意咩花啦~

對D乜野特別反感啦~

要有驚喜啦~

要夠浪漫啦~

好彩既係對於Kelly既所好,我無一不知~

而就算係佢唔鍾意D乜、怕D乜、驚D乜、最討厭D乜,我都瞭如指掌~

呢樣就係青梅竹馬既好處喇~

而最傷腦筋既係...驚喜...

點先可以俾到驚喜呢?

講真一句,一對出雙入對既男女...好難再有乜野驚喜...

就係因為太了解對方...又成日一齊...咩驚喜都無晒...又好難搵到機會搞驚喜...

所以我為左驚喜呢樣野...都真係諗左好耐...諗左成個星期...

最後,我竟然喺情性某個Post搵到D頭緒!

個Post係講一套電影...

一套都幾年前既電影...《單身男女》…

情性講起《單身男女》入面一段情節...一段關於入去女主角屋裏面佈置既情節...

佈置...佈置...

係喇!

我有Kelly屋企既鎖匙架嘛!

要入去Kelly間房佈置一下,其實唔難!

絕對唔駛爬上幾層樓,偷偷地擒窗入去咁辛苦啦!

呢個就係我既優勢~

我應該要好好利用呢個優勢!

講到呢道,一切都好似好順利~又好完美~又好似天助我也咁既款~

之不過...其實係有一個難題...

點樣可以喺Kelly唔喺屋企既情況下...入去佢間房佈置呢?

一諗到要點樣先可以入到Kelly間房佈置,就真係有D頭痛...

係~話就話我有Kelly既屋企鎖匙...之但係我都講過好多次,我地成日都出雙入對咁,成對孖公仔咁...

返學又一齊返~

行街又一齊行~

食飯又一齊食~

Kelly唔喺屋企,就係同我一齊~

唔係同我一齊,就係佢自己一個喺屋企...

咁搞法...我又邊有機會偷偷地上佢道呢?

唉...所以話,所有野都有正反兩面...呢D就叫做平衡喇...

喺煩惱梗點樣可以偷偷入Kelly間房佈置既同時,我一直都有諗點樣安排同Kelly慶祝生日之餘,又可以順利進行我既表白大計~

以往Kelly生日,都係我一家人同佢一家人一齊同佢慶祝~一齊過生日~

不過今年我既父母就要出外公幹,陪唔到我地...

咁Kelly既父母呢?

如果有埋Kelly既父母在場,又會唔會好尷尬呢?

唔...

其實都唔係D乜野問題既...

反正我地既父母都認定我地會喺埋一齊...只係差在邊個開口先...同幾時先開口姐...

如果話同定Auntie Uncle講定先...夾定先...話唔定會更好喎...

係咯…好唔好搵Auntie Uncle駛開Kelly...等我可以喺佢間房佈置下呢?

唔...

都係諗定點樣同Kelly慶祝先~

我知道Kelly好鍾意生日熊~

仲要係大到兩隻手都攬唔晒既生日熊~

Kelly話如果可以攬住生日熊黎瞓,一定好溫暖喎~

我就知道生日熊岩岩出左真係有半個人咁高既Size~

咁就合晒Kelly心意啦~

而我都好記得,Kelly話每年生日都要去迪士尼玩返日~

呢點都真係幾得意~

每年去迪士尼過生日唔會悶架咩?

但Kelly就話咁樣先開心~咁樣先幸福~咁樣先美滿喎~

既然Kelly鍾意,我地當然會順佢意啦~

所以我地年年都會同Kelly去迪士尼過生日~

而今年都唔會例外架喇~

我亦都打算喺我地去完迪士尼之後,返黎Kelly既屋企,俾佢見到我為佢佈置完既房間...同佢表白...再食燭光晚餐~

咁就夠晒驚喜~又夠晒浪漫啦~

Kelly生日表白大作戰就大約係咁...

照咁睇...

即係話...

最關鍵既...去Kelly間房佈置既時機...就只有...朝早...或者係去完迪士尼返黎之間...

去完迪士尼返黎嗰短短既時間就應該無乜機會...

就算嗰陣時請Auntie Uncle帶Kelly走返轉先...都太短時間...

而且仲有可能會令Kelly覺得有D怪怪地...分分鐘仲會俾佢察覺到...

所以...機會就只剩返朝早...

朝早...要喺朝早上Kelly屋企佈置...

就一定要搵Auntie Uncle幫幫手,駛開Kelly...

Auntie Uncle…

但係點樣同Auntie Uncle講呢?

直接講?

直接講應該都無問題既...

但幾時講好呢?

太早我又怕佢地忍唔住口,爆左俾Kelly聽...(我唔單止了解Kelly...我仲好了解佢家人...佢地一家人把口都係唔收...)

你知架啦,萬一俾Kelly察覺到,就乜驚喜都無架喇嘛…

所以...都係遲D先同Auntie Uncle商量啦...

而家先要準備既,係花、生日熊同佈置既飾品~

花呢~我就喺網上搵到間花店,睇中左一束九十九支紅玫瑰款式~仲落埋訂添~

因為我知道Kelly鍾意紅玫瑰~

仲話紅玫瑰好浪漫~

只可惜由細到大都未收過,好希望第一次收紅玫瑰係由佢最愛既人送俾佢~

除左九十九支紅玫瑰,我仲另外訂左十二支紅玫瑰,用黎佈置之用~

我諗住用呢十二支紅玫瑰既花瓣,喺Kelly張白色床上舖個心心出黎~

我諗Kelly一定會覺得好甜架姐~

我諗仲要買D噴雪啦~買D氣球啦~買D Label紙啦~

學張申然咁喺D牆上貼下Label紙丫嘛~

為左可以買齊晒D野,我就決定左喺今日同Kelly講左個大話...

話今日約左人...唔得閒陪佢...

實際上就係要偷偷地去買禮物同物資~

不過就係因為我隨便講一句“唔通我約左成班女又同你講咩?”,就俾Kelly誤以為我真係同女仔出街...

唉~不過算啦~

可能咁樣就更加唔會惹起Kelly既懷疑呢~

好啦~換好晒衫,梳好晒頭,係時候去買野喇~

帶住興奮既心情出發~一切都好似好順利咁~

好順利咁一去到巴士站就有車~

好順利咁交通無阻~(你要知道,要屯門公路唔塞車真係難過叫政府派錢...)

好順利咁去到旺角~

旺角今日又唔算多人~

又好順利咁買到隻半個我咁高既生日熊~(當然就買岩月份啦!)

又好順利咁買到白色既噴雪啦~(係用黎噴窗既~)

又好順利咁買到氣球同Label紙~

一切都好順利~

好似話俾我聽,Kelly生日當日,我同Kelly表白當日,都一定會好順利~

買齊晒D野,左手一又袋,右手又一袋,仲攬住隻生日熊,街上好多情侶都望住我~

女既好似好羨慕~

有D女仔仲同佢身邊既男朋友講:「你睇下人丫~咁大隻生日熊丫~你呢?我幾時生日你都唔記得呀!」

男既就好似有D仇視咁...

仲有D男仔口噏噏咁講:「攬住咁大隻熊喺街道行真係霸氣盡失...」

有無霸氣我就一於好少理~

我而家只係諗...要喺向Kelly表白之時...令佢覺得浪漫...溫馨...幸福...夠晒難忘!

好順利咁買齊晒所有要買既野之後,我就左手一大袋,右手一大袋,仲要攬實隻生日熊返屋企。

雖然話全程都俾D男仔仇視,又俾D女仔羨慕,超級異相咁款...

不過都係值得既~

只要係為左深愛既人,做每一件事都係值得既~

深愛既人…

諗下諗下真係幾奇怪~

一直都唔願正視呢個問題...

一直都唔肯喺人前承認我係最鍾意Kelly...

就算明知只有Kelly最適合做自己既女朋友,都要話俾自己聽唔可以做得太過出面...

甚至乎...好多時都係口不對心...

明明係關心佢...又要講到好似咒梗佢咁...

明明係著緊佢...又要講到好似懶懶閒咁...

明明係心痛佢...又要扮到好似抵佢死咁...

佢攞獎,我心裏面好為佢高興...

甚至乎...我夠膽講我係全宇宙最為佢高興嗰一個~

但我就偏偏唔走埋去恭喜佢~唔俾掌聲佢~唔俾個Like佢~

好奇怪呢~真係好奇怪呢~

唔係話越親密既,就應該越真情流露,表現出最真實既自己架嘛?

點解咁多年黎,我對住Kelly都仲係咁收收埋埋架呢?

好奇怪呢~真係好奇怪~

我諗都無乜人可以解釋得到~

亦都無乜人會理解得到~

不過唔緊要啦~

我地都唔可以話浪費左太多時間~

都只不過係十八年既光陰~

只要黎梗既日子唔好再浪費...

只要黎梗既日子要好好珍惜...

一切都唔會係太遲~

希望真係...真係可以...

返到黎屯門,我都已經提高警覺~鬼鬼祟祟咁~十足十做左衰野咁~

真係俾慈母見到,分分鐘都要拉我入暗角~

點解要咁?

緊係要咁啦~

因為我唔可以俾Kelly見到架嘛~

呢個時候先黎俾Kelly見到既話,真係咩計劃都唔需要了~

而我個心又硬係覺得會喺呢道撞到Kelly喎...

呢D可能就係由細到大一齊成長既感應啦...

你都唔好話唔信丫...有陣時邪起上黎真係好靈架...

所以我就好小心翼翼,東張西望咁上返屋企...

我避開晒D閉路電視...連?都唔搭...左手一大袋,右手一大袋,仲要攬實隻生日熊徒步行上六層樓!

真係同考消防有乜分別?!

辛苦死我喇...死喇死喇...

不過都值得既...值得既!

點都唔可以俾Kelly發現架嘛!

幾經辛苦終於都俾我返到上屋企...

我就緊係極速開門閃入去啦!

快快手手入屋之後,就係諗收埋D野喺邊好~

Kelly平日無所事事都會走落黎幫我執房...

自己間房就梗係唔可以放啦...

咁收埋喺邊好呢?

其實呢一點我早就諗好啦~

最好既地方就緊係父母間房~

反正父母都已經飛左去公幹~

就算係Kelly上黎幫我執屋,都唔會執到我父母間房既~

所以將D唔見得光既野,收埋喺父母間房就最安全~

我把把聲將一袋二袋同埋隻鬼成咁大隻既生日熊都收埋喺父母個大衣櫃入面...

拍拍雙手之後,搞掂晒~保證夠晒安全~

再望一望個鐘...

都差唔多開飯架喇喎…

點解Kelly仲未打黎叫我上去架呢?

我就拎出部電話,打一打俾Kelly...

“嘟...嘟嘟...嘟嘟嘟...”

「喂…」Kelly把聲好似唔多高興咁...

『喂~開飯未丫?』又邊個激嬲左我地個大小姐丫...

「開架喇…」Kelly把聲仲係冷冷淡淡咁...

『下?開架喇?咁你又唔打黎叫我上黎?』平時都係Kelly打俾我,叫我上去架...

「我點知會唔會阻住你同其他女仔開心丫...」Kelly發晒晦氣咁...

『我邊有同...』差D唔記得左同Kelly講話我今日係同班女仔出去添...

「唔知你...你鍾意既就上黎喇...」Kelly一講完,就Cut鳩左我線...

駛唔駛咁丫...

唉...算...都係快D上去食飯先~

我衝住上去~

“叮噹”撳一撳鐘~

「自己無鎖匙咩?」Kelly就冷冷淡淡咁幫我開門,又望都唔望下我咁轉身行左去...

『咁有禮貌D丫嘛…』不嬲都係咁撳鐘架啦...

「上黎喇~岩岩好開飯~」Auntie就好親切咁對住我笑~

「岩岩好丫~」Uncle亦都好親切咁對住我笑~

『Auntie~Uncle~又要打搞你地喇~』Kelly既父母已經放好D飯餸喺檯面~

「唔打搞~洗個手就食得喇~」Auntie就推一推我同Kelly入手洗間~

不過Kelly塊面就黑過炭屎...

一直都唔望我一眼咁...

做乜姐...我又得罪左你D乜姐...

唉...女人...心情如同天氣般...變幻莫測...

『Auntie~Uncle~食飯~』洗好手就開餐~

而Kelly都係板起塊面食飯...

「係丫…Ivan丫...Kelly生日嗰日呢...咁岩我同Uncle都要出外公幹...仲要搭早機...嗰日就要...你幫我地照顧Kelly喇...」Auntie好似勁唔好意思咁...

「人地都未必得閒理我啦...」Kelly黑起塊面食白飯...

『點會唔得閒呢?我嗰日緊係會陪你啦!』有邊一年你既生日,我係唔喺你身邊架?

「係咩…」Kelly仲係唔多高興咁...

「嗯...Kelly會喺朝早送我地機...到左下晏...就拜託你...同Kelly慶祝喇...」Uncle都係超唔好意思咁...

『嗯嗯~放心交俾我啦!』又會咁岩既...

原來Kelly生日當日,Auntie同Uncle都要飛...

Kelly係唔係因為咁,所以咁唔開心呢?

係都唔出奇既…

年年都兩家人同Kelly慶祝...今年就只得我一個...

只得我一個...

不過咁樣對我就更加有利...

唔單止可以同到Kelly單獨約會...單獨慶祝...

Kelly仲要喺朝早送Auntie Uncle機...

朝早...喺朝早...

我就可以...趁住朝早Kelly送Auntie Uncle機既時...上佢屋企...入去佢間房...佈置...