今朝一早,我就已經醒左。

仲要坐定定喺部電視機前面,望住屋企樓下個閉路電視...

十足十成個變態佬咁...

點解我要扮變態佬?

因為今日係Kelly既生日...





亦係Kelly父母飛既日子...

同時亦係我求愛大作戰既大日子!

為左我既行動萬無一失...我決定一早起身...坐定定喺部電視機前面...聚精會神咁監視住D閉路電視...

確保Kelly離開屋企...

確保我可以安全咁潛入Kelly間屋...





確保我可以順利咁喺Kelly間房裏面佈置!

精心既計劃...精心既部署...精心既安排...

我真心覺得呢一刻既自己好似蛇叔~

繼續望住部電視...

望到有幾對公公婆婆落樓下晨運...





望到有幾個中學生出門口返學...

又望到有幾條西裝友出門口返工...

話時話...我咁樣目不轉睛咁?實部電視都差唔多成個鐘...

真係?到對眼都有少少乾澀...

點解Kelly佢地都仲未出門口架呢?

唔係話朝早送機架咩?

朝早飛既話,照計都差唔多係呢個時候出門架喇喎...

點解我?左成個鐘都未見Kelly佢地一家既身影架呢?





點解呢?點解呢?

或者你會問:「點解你咁戇鳩唔問定人地幾點機架呢?」

如果真係問定既話,你就真係戇鳩鳩喇~

無啦啦問人地幾點機既話,咁咪好容易打草驚蛇囉!

我地而家係要鬼鬼祟祟偷偷地唔可以俾人知咁做衰野架嘛!

緊係越少馬腳就越安全架啦~

所以話平日得閒就唔好掛住打丁~打下Metal Gear好過啦~





就喺我?到對眼都紅埋...又喺道FF自己係蛇叔咁麻醉自己之時...

*噹*係Whatsapp喎...

邊鬼個咁鬼早Whatsapp我丫?

『係Kelly?』我撳一撳個電話,就已經見到係Kelly Message我...

我再解一解鎖一睇...

“Kelly:我而家同爸爸媽媽去機場喇!你記住記住記住十點半好去到迪士尼呀!記住記住記住記住唔好要我等你咁耐呀!記住記住記住記住記住記住記住唔好咁懶瞓喔!!!”

呢個Kelly丫...又駛唔駛咁多記住記住記住記住記住丫?

你慌我真係會唔記得咩?





你生日喎...咁重要既日子...我又點會要你等?我又點會懶瞓?

我又點會捨得要你傷心呢?

傻瓜...

我望一望返個閉路電視...Kelly仲有Auntie Uncle都入左?!

Kelly佢出門喇~終於等到Kelly出門喇!

頂!早知Kelly會Whatsapp我既話,我就唔駛喺部電視前面捕咁耐喇...

捕到對眼都紅晒喇...





不過算啦...人唔付出,係唔會得到收穫架嘛…

我懂的~

而家最重要都係確保Kelly出左門口...確保Kelly唔會返轉頭!

我都仲係眼定定咁,望住部電視...望住Kelly出左?...望住Kelly出左大門...望住Kelly既身影消失左...

消失左一分鐘...

消失左三分鐘...

消失左六分鐘...

消失左十五分鐘...

嗯...我諗都差唔多喇...

我諗差唔多可以肯定...Kelly唔會再返轉頭喇...

我諗係時候喇...係時候行動喇!!!

機會黎喇!Ivan!

我一個箭步就衝入父母間房!

喺個衣櫃裏面一次過拎晒D裝飾品丫~噴雪丫~鬼死咁大隻既生日熊丫~出黎!

當然就唔少得放左喺廳道抖梗氣既嗰束九十九支紅玫瑰,仲有用黎整心心既十二支紅玫瑰啦!

無錯喇!

其實D紅玫瑰早喺尋晚已經收到~

好彩天氣夠涼~而且D花都未開~

所以放左成晚都仲係咁新鮮~

老闆娘都話捱兩日絕對無問題既!

我信晒你架喇老闆娘~

都係唔好諗咁多…快快手手落去佈置好過!

我就一手攬齊晒D野,以忍步直衝上樓!

我好迅速咁就入到Kelly屋企...

一個轉身就閃到入去Kelly間房!

就喺我準備要開始佈置之時...我望一望Kelly張床...

Kelly張白床單人床上...放左D...放左D...

『內衣褲?!』我嚇左一嚇!

點解Kelly D內衣褲會喺張床上面架?

有Lace既…無Lace既…有白色...有黑色...有唔同顏色既Bra...底褲...

睇佢整整齊齊咁褶好晒...

應該係岩岩洗乾淨...晾乾左...收返入黎...褶好埋...

但點解要放喺床上呢?!

點解你唔收埋入櫃呢?!

咁你叫我點喺張白色床上用紅玫瑰花瓣整心心呀?!

冷靜D...冷靜D先...

唔緊要既...唔緊要既...

我幫Kelly將D內衣褲放返入櫃...咪可以開始佈置囉...

好喇...幫Kelly將D內衣褲放返入櫃裏面先啦...

我放低手上既物資...手震震咁...手震震咁向住五顏六色又唔同款式既少女內衣褲伸過去...

伸過去...一直手震震咁伸過去...

伸到去掂到...掂到條白色底褲...

好滑!

原來...原來少女既底褲係咁滑手...

同我著開既...真係...真係好唔同...

Kelly既底褲...Kelly平時著開既底褲...

唔知如果係Bra既話...又會係...又會係點架呢?

我再手震震咁...手震震咁伸過去D Bra嗰道...

伸過去...一直手震震咁伸過去...

伸到去掂到...掂到個白色...有Lace既...Bra...

原來...原來Bra係咁既質感!

有少少彈性...又軟軟地咁...

少女既Bra…Kelly戴開既Bra…

我諗一諗...我個腦海中又出現左Kelly既...只係著住白色Lace Bra...同白色Lace底褲既Kelly...

我條J又開始有反應...

好扯旗...

Kelly既...令我...好扯...好扯...

扯你老母咩?!

唔好咁變態得唔得呀?!

我今次落黎係為左向Kelly表白做準備架!

唔係要黎做變態野架!

我快快手手咁將Kelly既所有唔同顏色唔同款式既內衣褲都放返入個衣櫃裏面!

“啪”一聲果斷閂返埋個衣櫃後...

『係時候佈置!』

當我將今晚同Kelly返黎時整燭光晚餐既餸菜,都放晒入雪櫃之後...

我就喺Kelly間閨房對窗上噴下噴下....

噴下“I Love You”…又噴下心心圖案...

又喺白色既牆身,好用心咁黐D Label紙上去...

用上五顏六色...七彩繽紛既Label紙...砌D字出黎...

砌個“Ivan”出黎...又砌個心心出黎...又砌個“Kelly”出黎...又砌個“Forever”出黎...

當然仲要砌幾個“十九”出黎喇~

唔係話濕鳩丫嗱!

係代表住我同Kelly已經相識左十九年...共度左十九年...已經相處左足足十九年喇...

十九年喇...一段好漫長既光景喇...

呢十九年黎...一直都...一直都係以朋友...親人...冤家咁相處...

係時候...要改變一下...

係時候...要以另一種方式相處...

以情侶既方式相處...

希望可以...

應該可以...

一定可以!

一路黐...一路好俾心機去黐...

原來要用Label紙砌字都唔係一件易事...

自己落手落腳先知...原來係咁花功夫...

張申然...你真係好撚野!

難怪你最終可以喺方啟宏手中搶走程子欣!

『我願意為你~我願意為你~』我一路口噏噏咁,一路整丫整~砌丫砌~

噴好晒D白色噴雪~又黐到成牆都係七彩繽紛既Label紙~再拉多幾條彩帶之後...

係時候放好埋隻生日熊...

將隻生日熊放喺邊好呢?

唔...喺床角道就最好~

放喺床角道~對住個門口~

仲要攬住束九十九支紅玫瑰~

乖乖地~坐定定~等Kelly一入到黎就見到你望住佢傻笑~

夠晒有意思~夠晒有故事性~

等Kelly一呆左咁望住隻生日熊,我就喺生日熊手上拎起束九十九支紅玫瑰~送到Kelly手上~

嗯嗯~完美~

搞掂左隻生日熊同束花之後...

然後呢...當然就唔少得用花瓣整心心啦~

我喺Kelly張白色單人床既正中間位置...好細心咁將D紅玫瑰花瓣鋪下鋪下...鋪個心形出黎~

我好細心咁一路鋪...好細心咁執到靚一靚...

『搞掂!』我鋪上最後一塊紅玫瑰花瓣之後,拍一拍對手...打量一下...Kelly間經我悉心佈置後既閨房...

有冬日既白色噴雪~

有七彩繽紛既Label紙同彩帶裝飾~

有大大隻既生日熊攬住束九十九支紅玫瑰傻笑~

仲有一大個用紅玫瑰花瓣鋪成既大心心~

嗯~靚晒~夠晒有心思~

我諗Kelly見到既話,一定好感動架姐~

一定會成功既~

一定會順順利利求愛成功既!

打量完我既精心傑作後,再望一望隻手錶...

都差唔多係時候出發...

預早D...唔好要Kelly等丫嘛!

等我再Check多次無任何甩漏之後...我就係時候...出發!去搵我既女主角!我既Kelly!

離開Kelly閨房...離開Kelly屋企...離開我地住既屋苑...去搭港鐵...

其實我都有少少緊張...

我既內心總係...“卜卜 卜卜”聲咁跳...

雖然話我同Kelly已經相處過十九年...

應該可以好自然...

但今日始終唔同...

始終都有D分別...

始終都係一個重要既日子...重大既日子...

或者要將關係轉變既話...係會有D不安...

或者喺你無法預測既情況下...你會更加不安...

對於無法預測既將來...總係會心亂如麻...總係會心如鹿撞...

有D野真係…衰左無得返轉頭…

我地就係怕會衰...

就算你幾胸有成竹都好...都總係會怕衰既時候...

特別係面對愛情...

人喺面對愛情既時候,總係無法預計得到...

上網曾經睇過,話就算俾你又攬又錫又摷又扑埋野都好,一句“對唔住...我唔係想咁...”就當咩事都無...

唔係剩係男人會聖人上身...女人都係會一樣...

有時女人聖女起上黎,分分鐘仲震撼過男人...

或者你而家會覺得我又喺道拖文...

但係我而家既心情就真係咁忐忑...咁複雜...咁難平靜落黎...

你就俾我發下噏瘋...俾我搵D野講下...分散一下注意力啦...

不過就算你俾我發下噏瘋...俾我分散一下注意力...俾我拖耐D文...架港鐵都係會一路行...時間都係一路飛...

始終...都有到達目的地既時候...

仲要係話咁快就到...

話咁快...我就黎到迪士尼站~

我喺月台上左望望...右望望...望一望車站...

唔見Kelly既身影呢~

我再抬頭望一望車站上既大鐘...

十點十五分...早左十五分鐘呢~

都好~早過Kelly黎到~

Kelly今日係主角,點都無理由要佢等既~~~

我一個人行到去出口處,企埋一邊等下等~

成個車站都無乜人~

緊係啦~迪士尼都仲未開門~

不過今日係閒日,應該唔會好多人姐~

同Kelly玩足一日既話,應該玩得晒既~

話時話...今年係第一年單獨同Kelly慶祝生日...

咁岩我父母要出外公幹...

咁岩Kelly父母又要出外公幹...

又咁岩我就想喺今日同Kelly表白...

好巧合...一切都好巧合...

就好似係上天既刻意安排一樣...

上天既刻意安排...

希望今次唔係天意弄人...而係成人之美啦...

當我諗下諗下...又呆下呆下...企喺道等Kelly唔知等左幾耐...

「果然好準時喎~」我聽到一把熟悉既聲音,由我身後傳過黎...

我心跳左一大跳...再扮到氣定神閒咁...慢慢轉身:『黎左喇?今日既主角~』

Kelly帶住笑意,一步一步咁行過黎...

今日Kelly著左件有帽既白色大褸...頂帽仲要有毛毛嗰隻...

下身係一條白色熱褲再加條透透地既黑絲...

件白色大褸就岩岩好蓋到白色熱褲既褲邊...

鞋就係一對啡色雪靴...

睇起上黎...自然得黎又略帶點點優雅~

顯得Kelly又青春~又高貴~又大方~又Pare~又True~好靚~好靚~

應該話因為Kelly本身就好靚,所以顯得佢著得更靚~

「算你啦~唔駛要我一個人呆下呆下食住風等你~」Kelly行到我面前後,雙手放後,擺下擺下個身。

『我又點敢要你食住風等我呢~今日你係主角丫嘛~』正確黎講,我係唔捨得先岩~

我又點捨得要我最深愛既人,孤獨一人企喺道食住風等我呢~

「做乜今日你咁口花花?」Kelly打量我幾眼...

『都話左你今日係主角丫嘛~』乜我真係好口花咩?

「係唔係生日大晒既先?」Kelly又擺下擺下個身~

『不嬲都係生日大晒架啦~』有邊年唔係~

「係唔係生日既就話晒事先?」Kelly繼續擺下擺下個身~

『不嬲都係生日既話晒事架啦~』又有邊年唔係~

「係唔係生日既就想點就點先?」Kelly仲係繼續擺下擺下個身~

『不嬲都係生日既就想點就點架啦~』咁多年黎都係架啦~

「嘿嘿~咁好啦~我地行喇~」Kelly甜絲絲咁笑一笑後,翹一翹住我手臂~

『嗯~我地行喇~』我就同Kelly向住迪士尼公園漫步過去~

喺同Kelly漫步行去迪士尼公園入口之時,我地都真係幾似情侶~

之前都已經俾人覺得好似~

就算係識同唔識~熟同唔熟~

但而家...就連我自己都覺得似~

俾Kelly翹住手臂黎行...我地都會撞下撞下對方咁...

呢種輕微既碰撞...總係好似傳遞梗訊息咁...

總係好似...傳遞梗愛意咁...

係我諗得多左?

係我對號入座?

係因為要趁住今日可以同Kelly獨處過生日,借機同Kelly表露心跡既關係?

唔知呢...真係唔知呢...

感情呢家野,可以話係相比起浩瀚既宇宙更難以理解...

特別係愛情...

特別係對我地呢D無任何愛情經驗既初哥...就更加難以理解...

「睇黎我地係今日最早嗰批黎到既客人呢~」當我同Kelly入左閘之後,Kelly好高興咁彈下彈下~

『緊係啦~差唔多係迪士尼一開門姐,我地就入黎喇~』真係夠晒早丫~

「嗯嗯~咁一定可以玩晒所有野~行晒成個迪士尼喇~好野好野~」Kelly對眼好似發光咁拍一拍對手仔~

都好正常既~

女仔係特別鍾意主題公園架嘛~

如果香港有地方俾Hello Kitty起返個Hello Kitty Land既話,一定賺死佢~

當Kelly仲係好開心咁彈下彈下之時,我就四周望下望下...

望下嗰個賣氣球既工作人員喺邊呢...

我望多兩望,就望到一個著住白色恤衫,啡色西褲,成手都係氣球既工作人員企喺路中心!

又真係幾好彩喎~唔駛行好遠就見到~

我立即跑到去個工作人員面前:『我想要個有飛...有史迪仔喺入面既唔該~』

差D講左飛斯出黎...

俾完錢,拎住隻史迪仔氣球,跑返黎Kelly身邊:『嗱~送俾你既~』

「嗯~多謝~」Kelly好開心咁接過我手上既氣球~

『等我幫你綁住佢~』我就幫Kelly綁個氣球喺手腕上~

每年生日,一黎到迪士尼,Kelly都要買個史迪仔氣球綁喺手腕上~

差唔多唔同款式既史迪仔氣球都買過~都綁過喺Kelly隻手腕上~

Kelly真係好鍾意史迪仔~

係囉...喺咁多隻迪士尼人物之中,Kelly最鍾意就係史迪仔~

但點解...

『話時話...點解你咁鍾意史迪仔架呢?』我一直都無問過Kelly呢個問題...

而點解我會想問...係因為我覺得...史迪仔真係好樣衰...

你睇佢呢隻藍色既生物...

究然係乜野黎?

喺地球上,你會搵到一隻頭大、耳大、眼大、鼻大、D牙全部都係尖既生物架咩?

阿凡達黎架嘛?!

其實我真係唔係咁鍾意史迪仔...

尤其你係打開中路...用開法師型既英雄...

「因為佢似你囉~」Kelly抬頭望住個史迪仔氣球...

『邊忽似呀?佢咁樣衰!』我點會似飛斯呀?

「唔係丫~幾似你丫~都係頭大大~耳大大~眼大大~鼻大大~只係你D皮膚唔係藍色咋嘛~」Kelly搖下搖下隻手...

個史迪仔氣球就飄下飄下...彈下彈下咁...

『唔係丫化?我靚仔好多囉!』竟然話隻怪物似我...

「你靚仔?哈哈哈哈~~~」Kelly笑到攬住個肚...

望住Kelly笑到標晒水...眼水咁...算係點?

「你最多都係可愛~~~同史迪仔一樣咁可愛~~~哈哈哈哈~~~」Kelly一手搭一搭住我膊頭,另一隻手又攬住個肚黎笑...

可愛...

史迪仔係可愛...

我唔覺囉...

「做乜咁既眼神望住我姐?史迪仔唔可愛咩?」Kelly望一望我,再望一望個氣球...

『唔可愛...』我唔會覺得隻怪物係可愛架...

「唔係丫~我覺得好可愛喎~」Kelly對眼發晒光咁望住個氣球...

『一D都唔可愛...』

「唔係呢~真係好可愛呢~」

『唔可愛唔可愛唔可愛唔可愛唔可愛唔可愛唔可愛唔可愛唔可愛唔可愛唔可愛...』

「好可愛好可愛好可愛好可愛好可愛好可愛好可愛好可愛好可愛好可愛好可愛好可愛~~~」