喺婚紗店既試身室入面...

我眼定定...呆下呆下咁望住塊全身鏡...

望住塊鏡入面...著上一套白色婚紗...一面困惑既自己...

『郭以迦丫…郭以迦…你係唔係真係已經...諗清楚架喇?』

我對住塊鏡...不斷問...不斷咁重複問自己...





問自己係唔係已經考慮清楚...

係唔係已經決定左...要嫁喇?

唉...

諗左好耐...問左好多次...都唔係今日既事...

但係時間唔會等人...唔會等我一直咁自問卻答唔出落去...





無錯...時間從來都唔等人...

我帶住困惑既心情...戴上困惑既面孔...拖住困惑既身軀...一步一步行返出去...

「迦迦…你真係...好靚...好靚...比起白雪公主...更靚...更靚...」當我一行到出去...我既未婚夫Chris就行到黎我面前...捉一捉住我對手...眼定定咁望實我...

『嗯...多謝...』我望住一面和藹既Chris...心裏總係有一點點...尷尬...

我總係唔係咁好意思面對...面對一直都對我咁好...對我咁溫柔...對我咁體貼既Chris...





「你對手有D凍...面色好似唔太好...係唔係呢道D冷氣太大?駛唔駛閂返細D D冷氣?」Chris見我對手有D凍,就好緊張咁捉實我對手...

Chris就係對我咁關懷備至...

『唔...唔駛...唔駛...都唔係好凍姐...』我就連正視Chris雙眼...都唔係咁敢...

只好低著頭…擰擰頭...

Chris就係對我咁無微不至...

一直都係...一直都係...

由相識...拍拖...到就黎結婚...從來都無變過...

由中學開始,Chris就一直喺我身邊...陪住我...伴著我...





事無大小,都有Chris為我打點...

無論發生乜野事,Chris都係第一個出現...第一個趕到黎我面前...

我開心,佢又會為我高興...

我傷心,佢又會陪住我喊...

我整親,佢仲心痛過我自己...

無人會好似Chris咁著緊我...

無人能及...無人能比...





我既所有所有,都喺佢既眼裏...喺佢既心裏...

應該話...我就係佢既世界...

整個世界...

雖然話我地已經識左十二年...而拍拖既日子都有五年...但有時候我都會諗...會諗如果有一日...我真係離開左佢...佢會點呢?

會唔會真係接受唔到呢?

會唔會真係受唔住打擊呢?

會唔會做傻事呢?

一諗到呢道,我就唔敢再諗落去...





我唔敢再諗一個對我如此關懷備至...無微不至既男人...由我親手刺佢心口一刀…

我唔敢再諗對住一個長久以黎,一直深愛著我...愛我多於自己既男人...狠狠咁刺一刀…

係何等殘忍...何等泯滅人性呢...

「你未婚夫對你真係好體貼呢~真係一個好男人~一個嫁得過既好老公~」就連店鋪老闆娘Lilian都覺得Chris係一個嫁得過既好老公...

「邊係呢邊係呢...能夠娶到迦迦...係我人生最大既福氣...」Chris尷尷尬尬咁摸摸頭...

有一個男人可以為你講出呢句說話...做女人既應該好感動...

感動...就只有感動...





點解我會話就只有感動?

點解我硬係覺得好似...好似缺少左D野咁...

缺少左D咩呢?

缺少左...

「但係迦迦丫...」Lilian打量我一眼,「你面色真係好似唔係幾好咁喎...係唔係真係覺得凍?我可以較細D個冷氣架喎~」

『唔係唔係…我真係唔係覺得凍...』我帶住絲絲微笑擰擰頭...

「定係…因為仲擔心梗搵唔到Whirling做攝影師?」Lilian再打量我一眼...

『嗯...嗯...』Whirling...講起上黎...如果可以搵到Whirling做我既攝影師...咁就好喇...

「但係...聽行內人講...Whirling佢唔幫人影人像...更加唔好話婚禮攝影...假如真係要搵Whirling做攝影師既話...怕且...怕且你地既婚禮要延期...」Lilian有D無奈...

聽到Lilian咁樣講...突然之間...

『我唔理!如果搵唔到Whirling做攝影師既話...我唔結喇!』我突然有一道氣...湧上心頭!

結唔成既話...或者仲好...

在場既Chris同Lilian聽到我呢一句咆哮之後,明顯顯得有D不知所措...

「放心放心~我應承你~我會盡全力幫你約Whirling~必定可以請到佢做你地既婚禮攝影師既~包喺我身上~唔駛擔心~唔駛擔心~」Lilian掃一掃我背脊...安慰一下我...

「係咯~你唔駛擔心咁多架迦迦~放鬆心情~唔駛咁緊張~所有野都由我地安排~你只要安心咁做個靚靚準新娘就得喇~」Chris溫柔咁摸一摸我雙手...

『嗯...嗯...』望住Chris一對柔情似水既眼神...我更加唔放心...

我唔放心...我好唔放心將自己嫁俾Chris...

我唔係擔心嫁左俾Chris之後,佢就唔會再對我咁好...

我反而係想佢唔好對我咁好...

唔好對我咁好...由一開始就唔好對我咁好...

唔好對我好到令我唔忍心去傷害你...

唔忍心拒絕你既愛意...

唔忍心拒絕你既追求...

唔忍心喺你向我求婚既時候,向你Say No…

就算唔係要Say No,至少都可以再俾多D時間我地...俾多D時間我...

當我同Chris都揀好晒D款...

不論係姊妹衫...

兄弟衫...

我既婚紗...

Chris既禮服...

「D婚紗同禮服都無問題~咁至於攝影師方面...」當Lilian送我地兩個到門口之時,Chris再三叮囑...

「嗯~放心交俾我啦~我一定會幫你地搵到Whirling做攝影師既~放心放心~唔駛擔心~」Lilian帶住甜美既笑容點點頭...

「嗯...咁就拜託晒你喇~」Chris向Lilian鞠一鞠躬...

「嗯嗯~拜拜~」

『拜拜...』

同Lilian揮個手...道過別...我都喺心裏盤算梗...

其實搵唔到...會唔會更好...

假如真係無辦法請到Whirling做我地既攝影師...係唔係真係可以唔駛結?

咁我就唔駛再煩應唔應該嫁俾Chris...

我又唔駛擔心真係嫁左俾Chris之後...會後悔...

從來...我都唔會做後悔既事...

最多就只有遺憾...

遺憾...到左而家...我就好似只得一次...遺憾...

而呢次遺憾...足以致命...

「迦迦…迦迦?」Chris捉一捉實我隻手...呼一呼喚我...

『嗯...嗯?』我回一回神...先發現原來已經黎到Chris架紅色Mini Cooper前...

Chris仲已經為我打開車門...

「你無事丫嘛?係唔係見邊道唔舒服?定係舟車勞頓...太過操勞?」Chris用上一對充滿關懷既眼神望住我...

『唔…唔係丫…我諗梗頭先嗰幾條婚紗都好靚咋嘛…』我定一定神,盡量唔好俾Chris察覺到我有異樣...

「我既未婚妻咁靚~著乜都係咁靚~」Chris仔細咁打量一下我,溫柔咁撫摸一下我把長長秀髮...

『傻瓜...』我拍一拍Chris胸口後,坐上Chris架紅色Mini Cooper上...

講真嗰句...就算真係請唔到Whirling做我地既攝影師...我又真係可以唔嫁咩?

唉...算罷啦...

都係收拾心情...待嫁...

唔係…

應該係...都係求神拜佛...希望Lilian真係有辦法請到Whirling幫我地啦...

“吼...”當Chris開一開車...

『丫!等等先~』差D唔記得添!

「嗯?做咩?」Chris傻頭傻腦咁望一望住我~

『等等~等等~』我就喺個手袋道搵下搵...

平日都帶太多野出街喇...成個手袋都係野...好難搵添...

定係我無帶到出黎呢?

唔係丫…上次去求...我都係用呢個手袋...

而且我就係怕我唔記得,所以都無拎到出黎...

係咯…我都無拎過出黎...一直都喺個手袋入面架...

我搵下搵下搵...Chris就好耐心咁等下等下等...

Chris一直都係注視住我...留意住我...

雙眼從來無離過我半秒...

而且亦唔會催我...唔會顯得唔耐煩咁...

Chris只會靜靜地...守候住...喺我身邊...一直守候住...守護住我...

『搵到喇!』我拎一拎起手!

“叮叮噹噹 叮叮噹噹”

「呢個係...」Chris呆下呆下咁望住我手上既...

『平安符黎架~』我喺Chris眼前搖多兩搖~

“叮叮噹噹 叮叮噹噹”

『你手車咁差~我專登幫你去求返黎架~』我就喺個倒後鏡道綁下綁下...綁個平安符上去...『搞掂~』

Chris眼定定咁望住個平安符...摸一摸...

“叮叮噹噹 叮叮噹噹”

「好多謝你呢~你對我真係好好~」Chris好欣慰咁笑一笑…

『邊係呢...邊係呢...』相比起你...你對我...我又算係D乜...

你對我實在太好...

一直以黎...

好到令我覺得...我做乜都好似好微不足道...

我根本就無辦法報答到你...償還給你...

就算要我成為你既女人...

就算要我嫁俾你...

我都無辦法...無辦法...

就算要花上我今生...我都無辦法...無辦法...還得清...還得晒...你對我既恩惠...

「我諗你都肚餓架喇~我地去食野先咯~好嘛?」Chris充滿愛惜咁望住我...

『嗯...好丫~』任何時候,你都係以我為先呢...

“叮叮噹噹 叮叮噹噹”

雖然話Chris手車就真係麻麻~

但Chris一直都好小心咁揸~好專心咁揸~好注意安全咁揸~

行高速又行慢線~

行得又夠慢~

差唔多都只係得時速40公里左右...

真係連巴士都會扒佢頭~

不過都好既~

就係因為Chris揸得咁慢咁定,我先坐得咁舒服~

其實我都幾怕坐車~

以前一坐巴士就會暈車浪~

Chris就係因為知我唔坐得巴士...所以一到十八歲,就去左考車牌~

初初佢都係夠錢買架三手日本車~車我一齊返學放學~(鬼叫我地兩個讀大學既時候都攞唔到宿舍咩~)

到出黎做野,開始搵到個錢,Chris就話想買架好D既~

Chris知我鍾意車仔細細又安全既Mini Cooper,再加上我最鍾意既顏色係紅色~

所以Chris就決定買呢架紅色既Mini Cooper喇~

講起上黎...Chris買呢架Mini Cooper…都係為左我...

而且款式同顏色...都係我既喜好...

Chris真係…

係唔係所有野…都一定係以我為中心...

係唔係一切一切…都係將我放喺第一位...

就連一架車...都係揀我鍾意既...我喜愛既...

Chris係唔係真係只有我...無左自己呢?

萬一假如如果有一日...我真係會離開Chris既話...佢既生活...會變成點呢?

我係唔係仲要問呢?

唉...

呢D問題...我一日都會問幾十次...幾百次...

但事實上...我心裏有數啦...

我當然清楚明白...我係唔可以離開Chris...

除左話要用我一生...償還俾Chris之外...

Chris亦都唔可以無左我呢...

企喺一邊,望住Chris泊車...

因為Chris話唔知自己要泊幾多次先泊得成,怕我坐喺架車道前前後後咁會暈會辛苦,所以叫我企喺一個安全既地方等佢喎~

我又真係睇住架Mini Cooper前前後後咁...前前後後咁泊左好幾十次...

呢個未婚夫,樣樣都咁好,就係手車最差~

哈哈~不過都幾好笑既~

「搞掂搞掂~唔好意思…我泊左咁耐車...要你企喺道等我咁耐...」Chris一泊好架車,路都唔睇就第一時間衝過黎我面前...

『唔緊要唔緊要~都唔係好耐姐~你丫~下次睇清楚有無車先好行過黎丫!』我用指尖篤一篤Chris個鼻尖~

「嗯嗯~聽晒老婆話~」Chris捉一捉住我隻手,拖一拖住我。

『嗯...』我點一點頭,就拖住Chris隻手行...

老婆...

每次一聽到Chris嗌我做老婆...我都硬係覺得好似...好似有D唔自然咁...

硬係好似…唔係咁接受...

岩岩同Chris一齊既時候,佢都有試過叫我做老婆...

嗰陣時就話因為岩岩先開始拍拖...可以拒絕佢叫我做老婆...叫返我做女朋友...叫返我做迦迦...

但而家...

我都已經係Chris既未婚妻...我已經再無藉阻止佢叫我做老婆...

至於我...我仲未試過叫Chris一聲老公...

一次都未試過...

始終...我都仲係未接受到...仲未肯去接受...

「我知你鍾意食台式野~而呢間台式野都好出名架~所以我專登車你黎試下~」一入到去間台式食店,Chris就幫我抹乾淨張凳,幫我拉一拉張凳。

『唔該~呢道既環境都唔錯~』我望一望四周,望一望周圍~

「嗯嗯~我知你鍾意乾淨丫嘛~呢間台式食店都好光鮮架~仲好整潔添~」Chris一坐低,就眼定定咁望實我。

『嗯...』無錯呢...我都係比較鍾意喺D乾淨D...整潔D既地方食野...

我仲記得喺我同Chris正式開始交往...正式拍拖...正式單獨出街既早期...Chris帶左我去屯門一個食大排檔既地方...

我聽Chris講,嗰道好出名~

好多人都會喺隔離買D海鮮走過去俾人煮黎食~

而嗰晚,Chris都買左好多又新鮮,又貴價既海鮮...話要同我食好D...唔可以難為我喎~

真係傻瓜黎架...

但當我地去到大排檔既時候,我就覺得...嗰道唔係咁乾淨...

成地都係水就不在話下...

仲有D骨丫…殻丫…罐頭丫都唔止…

仲有D曱甴行過...仲要係成隻手掌咁大隻!

我都不知幾驚會有隻米奇撲出黎!

嗰晚成餐我都真係食得好唔安樂...

分分秒秒都提心吊膽咁...

而Chris都察覺得到我食得好唔自在...仲問我係唔係覺得個環境好差...

雖然我為左唔想破壞氣氛...辜負左Chris既一番心意...同佢講OK既...

但自嗰次之後,Chris都無再帶我去食大排檔...

其實我係知道Chris好鍾意食大排檔...但就因為我...搞到佢自己都無機會再食...

我都真係有D內疚架...

之不過...我知道就算要勉強...迫自己同Chris去污糟既大排檔食野都無用...

因為我知道...Chris一定唔會要我難受...

「點野食先~牛肉麵係唔係?你最鍾意就係食牛肉麵架喇~至於野飲方面...」Chris喺張Order紙上畫下畫...寫下寫...

『珍珠奶茶~』識得飲,食台式野梗係飲珍珠奶茶架啦~

「但係珍珠唔健康架喎...」Chris望住張Order紙擰擰頭...

『唔緊要啦~一次半次咋嘛~』我帶點嬌嗲既聲線嗲下Chris~

「嗯...咁好啦~一次架咋~無下次架~」Chris喺張Order紙上畫下畫...寫下寫...

『嗯~』Chris真係好易心軟~

只要我嗲一嗲~Chris都會聽晒我話~

你話丫...你係唔係已經寵到我壞晒呢?

「仲有無野想加?」Chris再望一望張Order紙後,再問一問我~

『唔~無喇~』我擰一擰頭~

「真係夠飽?」Chris再打量一下我~

『嗯~唔夠咪喺你道夾D牛肉食囉~』反正你都係叫牛肉麵架咋嘛~~~

「嗯~咁好啦~唔該~」Chris好有禮咁帶住笑容,遞左張Order紙俾個女侍應~

就連本來做到口黑面黑既女侍應,一見到Chris既親切笑容之後,都被Chris溶化了~笑起上黎~

Chris呢個男人...其實都真係好受女仔歡迎~

因為Chris喺任何時候,都係咁有禮貌~又咁親切~

「丫~係丫~只要等埋高暉返黎~咁我地D兄弟姊妹就齊晒喇~」Chris遞左張Order紙俾個女侍應之後,突然提起高暉...

高暉...高卓暉...

點解你會...喺呢個時候返黎...

點解你會為左我同Chris既婚禮而返黎...

點解你會為左做Chris既伴郎...特意由英國飛返黎...

點解呢...

點解會係咁呢?

點解要係咁呢?

點解當初你決定要飛去英國讀書...就頭也不回咁飛左去...

而家...就係因為我同Chris要結婚喇...我要成為別人既妻子喇...你就...你就...

「迦迦…迦迦?迦迦?」高暉…唔係…Chris捉一捉住我隻手...搖一搖...

『下...下?』我定一定神...回一回神...

無錯...而家面前既唔係高暉...

而家伴在我身邊既係Chris...係我未婚夫Chris...

「你真係無事丫嘛?你...今日好似好無精神咁喎...」Chris再打量住我...

『我...無事...我無事...我只係諗梗...我地結婚既事姐...』無事...無事...咩事都無...

「你放心交俾我~唔駛諗咁多架知嘛?我一定會搞得我地既婚禮好好睇睇~」Chris溫柔咁望住我...捉一捉實我對手...

『嗯...嗯...有你喺我身邊...我好放心...』真係...好放心...

「嗯~」

真係可以好放心?

我都唔知...

而家既我...都仲係咁心神不寧...

到真係結婚當日...唔駛...

就係高暉返黎之時...我都唔可以好肯定咁答到自己,可唔可以冷靜面對...

我唔知...我真係唔知...

我只係知...只可以見步行步...

帶住忐忑既心情,同Chris食完餐Lunch...

「等我送你返屋企,然後我先再返公司啦~」Chris拖一拖住我...

『唔...唔駛喇~我想行陣先~你直接返公司啦~』我搖一搖Chris隻手...

「但係...你好似好攰咁喎...」Chris一面擔心樣...

『我就係想行下~行下我就精神架喇~』我對住Chris笑一笑…

「但係...」Chris仲係好唔放心咁...

『放心啦~我行一陣就會返去架喇~你返到公司就打個電話俾我啦~好唔好?』我再搖多兩搖Chris隻手...

「唔...咁好啦...你行多陣就好返去喇喎...」Chris心軟了~

『OK~OK~你小心D揸車喇~』我摸一摸Chris塊面頰...

「嗯...咁你都小心D喇...」Chris都摸一摸我把秀髮...

『嗯嗯~拜拜~』我錫一錫Chris個嘴...

「嗯~拜~」Chris就依依不捨咁轉身離開...

我一直望住Chris既背影...望住不時都會回頭同我揮揮手既背影...

我亦都同Chris揮揮手...揮揮手...

直至到Chris轉左彎...直至到消失喺我眼前...

你就俾我一個人...好好咁...諗下啦...