「你最鍾意食既B餐加通粉~仲有你每朝都要飲既熱啡少奶半包糖~」

『唔該…』

每朝都有Chris過黎我呢邊,同我一齊喺大家樂食早餐...

「返到學校要小心D喎~上落樓梯唔好顧住諗野丫~仲有丫~天文台話今日中午會開始落雨~我車尾有多把遮丫~一陣你拎埋返學~」

『嗯...』





每朝都有Chris車我返學校...

「咁好喇~小心D喇~唔好咁操勞丫~出去食飯既話記得帶返把遮丫~放工我再黎接你啦~拜拜喇~」Chris送到我去校門,再三囑咐我...

『嗯~你揸車都要小心D喇~拜拜~』我喺校門前再同Chris揮手道別...

每朝都有Chris喺我身邊...

好多時都會有Chris陪住喺我身邊...





我地經常都係出雙入對...

好多人都覺得我地係天生一對...

不論係舊同學...我地既朋友...Chris既同事...我D同事...甚至乎係我D學生...

佢地都會覺得我同Chris好恩愛...好幸福...好美滿…

雖然我D學生,不論係男或女,都知道我有個好體貼既男朋友,不過年輕既男學生都係比較放膽...比較愛衝...比較敢愛敢恨...





我一行到埋個簿櫃,就望到一封二封情信...

D情信仲多過D簿...

唔駛講...肯定係班男學生俾我架啦...

唉...呢班小朋友真係...成日都係做野之前唔諗下後果...

已經唔係第一次架啦~

有時仲會喺小息既時候黎示愛...

有時又會喺Lunch跟住我地尾,扮晒巧遇咁同我地一齊食飯~

有D學生仲故意唔交功課,故意默書默得差,測驗測得差,俾我留堂想同我單獨相處多D...見得我耐D...





有陣時真係服左佢地架…

明知我已經有男朋友...而且我係佢地既Miss...年齡相差都差唔多七至十年...

佢地都覺得無問題,都要做D小動作,吸引我注意...

唉...或者呢D就叫青春啦~

不過有D男同學就有D過份!成日會偷偷影我相...

有時候偷影下背後...偷影下側面...偷影下我食野既樣...偷影下我發呆既樣都唔緊要...

最過份都係會試圖偷影我裙底...





遇到呢D情況,如果當場捉到,我當然要嚴懲啦!

但班死仔又真係好高招...我一次都捉唔到佢地...

我只係聽D女同學講返,話班男仔有個Whatsapp Group專係用黎開心Share我D相...

而有唔少既都係偷影我既裙底...

雖然話我有陣時著D裙都有D短...但我平日都已經好小心架啦...

上落樓梯又行近牆邊...平時又會將雙手撳住個屁股黎行...坐低又會撳對大脾...

就係唔知佢地係點樣偷影到既!

唉...平時默書測驗考試又唔見班死仔咁醒!做親衰野都精甩尾!





真係無晒佢地辦法~

算啦算啦~雖然話佢地既行為係唔岩,之但係只要佢地班死仔唔再做出D更過份行為...我都唔係太蝕底既...

裙底姐~始終都有條底褲喺裏面架嘛~

我都係將堆情信拎返入教員室...拎返埋自己個位道...

逐封逐封咁睇...

我之所以會逐封逐封咁睇學生俾我既情信,唔係因為我對佢地有興趣~

我唔會喺學生寫俾我既情信當中,得到任何滿足感~





應該話乜野感覺都唔會有~

我之所以會逐封逐封咁睇,係因為我又要分返好佢地...

分返唔同班...

有D有寫名既就容易D~

無寫名既話就...要用多D時間囉~

至於點解我要分返班?

因為...

『Miss Kwok我呢~就就黎結婚架喇~』我一入到班房,就將堆情信放喺教師檯上~

「下...Miss Kwok要結婚喇?!」

「噢!愛人結婚了!」

「噢!新郎不是我!」

「不甘心!尤其這新婚!就像玩犧牲!想過搶新娘!我差點講真!」

「不甘心!人人不開心!尤其這新婚!失去我身份!」

「不甘心!明明不開心!就是不甘心!不過我肯等!等一生都等!」

「我褲都除埋!你同我唱呢D?!」

成班男同學聽到我話要結婚姐,就好似發晒癲咁...

唉~都怪我平日教得唔好...

教到佢地成班都好似智障咁...

『係架喇~我好快就成為人地既老婆架喇~你地班男仔呢~就死左條心去罷啦~而家我檯面上既情信,你地好自己出黎拎返走~』我叉一叉住條腰~

「送左出去既信,我係唔會收返架!」

「重讀著你的告別信...抑壓了暗湧...」

「難平衡自己...忐忑的起伏...難原諒我心...反覆的變動...」

「仍多麼需要你...仍多麼需要你....如今天失去了...怎麼退怎麼進...」

「如果可不要信...寧死都不要信...但看我手...再激動仍只得傷信...」

『夠喇夠喇~咁唱得就參加今個月尾學生會搞既歌唱比賽先唱到夠啦~嗱~而家我俾十秒你地出黎拎返走~十秒過後,仲喺檯上既信,我會一一讀出~你地自己諗喇~』我一個轉身,望住塊黑板後...

『十...九...八...七…』當我開始倒數...數到七既時候...

“踏 踏 踏 踏 踏 踏 踏 踏 踏”我聽到有好多腳步聲跑梗出黎~

『六…五…』

「喂!呢封我架!」

「喂!我嗰封呢?我嗰封粉紅色架!有無人拎左呀?」

「邊鬼個畫左兩個心心喺個信封上面呀?!」

「我架!拎返黎啦!」

『三…二…』

「拎完好走啦契弟!」

「契弟走得摩~」

『一…零...』我一個轉身,望返住班學生~

成班男同學就扮晒乜事都無咁~

而班女同學就喺道恥笑梗佢地~

『好喇~拎晒喇嘛~咁就...』我再望一望張教師檯...『仲有一封...』

我望住教師檯上...一封淺藍色既信...

竟然...

仲有…

一封無人拎返走?!

『係邊個架?邊個咁勇唔拎返走丫?今日有人無返咩?唔係丫~齊人架~呢封信既主人~你真係唔怕我對住全班大聲讀出你對我既愛的宣言丫?』我一隻手叉住自己條腰,另一隻手就拎起封淺藍色情信搖下搖下~

在場成班學生都你眼望我眼~

有D男同學就偷偷地拆開自己手上封信,睇下係唔係真係自己嗰封~

『真係無人出黎拎返走喇嘛?咁我拆開黎讀架喇~』我再觀察一下班學生~

睇黎真係無人願意行出黎拎返走...

『好~』我就拆開封情信,拎張信紙出黎...

我深呼吸一口~

『咳咳~美麗動人的Miss Kwok~由我第一眼看見你的時候,我就已經被你的美貌迷倒了~那時候的我,只是一個初上中學的中一雞~你來到我們班裏作實習老師~我是不會忘記~你的甜美笑容,把我深心溶化了~你是多麼的清純~多麼的脫俗~你有一種好特別的氣質,是外邊的女生沒有的~沒錯!就是仙氣!!!假如要把你和金庸筆下的兩位女主角:神仙姐姐王語嫣與不食人間煙火的小龍女相比...實在貶低了你!你根本就是雅典娜轉世~你就是我的城戶沙織~而我就是你的聖鬥士星矢!我一定會保護你!守護你!愛護你!就算要我付出生命,我也要將你在邪惡的魔掌之中拯救出來!你最忠心的聖鬥士星矢字。』我一口氣將整篇情信朗讀出黎~

成班聽完我朗讀整篇情信之後,男既又好~女既都好~無一唔笑到肚痛~

我就真係唔知好嬲定好笑~

我一隻手撳住張教師檯,另一隻手就拎起張信紙搖下搖下:『你以為用電腦打出黎我就認唔到係你喇咩?我同你講左幾多次,“深心融化”個“融”字係金融市場個“融”,唔係三點水個“溶”呀~陳世民同學~』

我望住挨喺張凳上面,雙手放喺頭後,坐到成個大爺咁既陳世民同學~

佢個死人樣又真係幾摟打架喎~

只見陳世民同學搖下搖下張凳:「美麗動人的Miss Kwok喔~我就係想你喺全班面前,親口朗讀出我對你既愛的宣言~所以先專登寫錯隻“融”字~藉此證明...你平日係有留意我既~」

『你係我既學生~你既學業我緊係會留意啦~除左你既學業,我仲會留意你既品行添~不過就無其他喇~』仲喺道扮晒情聖咁款...真係俾呢個死仔激死~

「係咩係咩~咁朗讀完我對你既情深愛意之後,係唔係好感動呢?」陳世民同學一D都唔面懵...

『一D感動到無~仲有~你聽清楚~你Miss我就快結婚架喇~好快就成為人地既妻子~你都係快D死左條心去~專心你既學業罷啦~』而家D死仔真係唔兜口兜面講清講楚都唔肯死心~

「噢~Miss Kwok~就算你就快要結婚~就算你好快就成為人地既妻子~甚至乎生兒育女都好,我都係一樣咁愛你~」陳世民同學企一企起身...

呢個死仔係唔係受唔住打擊傻左喇...

「你要知道~中一既時候我已經好想同你表白~但我無去珍惜...等到你離開喇才後悔莫及,塵世間最痛苦既事莫過於此...但好彩既係上天肯俾我一個再黎一次既機會!你再次返黎做我既Miss!所以我今次一定要同你講三個字“我愛你”!如果非要喺呢份愛上加一個期限既話...我希望係...一萬年。」陳世民同學情深深咁望住我...

點丫...玩夠未丫...

「你要知道~愛一個人~就算佢變成點樣~會老變醜~你都會係咁愛佢~」陳世民同學仲係情深深咁望住我...

愛一個人...就算佢變成點樣...會老變醜...你都會係咁愛佢...

「就算佢俾他人佔有,你都係無辦法唔去愛佢~」陳世民同學仲係繼續情深深咁望住我...

就算佢俾他人佔有...你都係無辦法唔去愛佢...

「你有權唔愛我~但你無權唔俾我去愛你!」陳世民同學仲係要繼續情深深咁望住我...

你有權唔愛我...但你無權唔俾我去愛你...

「呢D就係叫做真愛~真愛永遠不死!」陳世民同學仲係要繼續好堅定咁情深深望住我...

真愛...永遠不死…

『咁你安心去死啦~』我喺全班同學面前,撕爛封情信,掉埋落垃圾桶~

「死心啦陳細蚊~」

「收皮啦陳細蚊~」

「Everybody BiLiBaLah 蝦毛話扮龍蝦~」

「死毒撚想食天鵝肉~」

「嗱嗱嗱~可唔可以唔好加個“死”字呢?」

「死毒撚~死毒撚~死毒撚~死毒撚~死毒撚~死毒撚~死毒撚~死毒撚~死毒撚~死毒撚~死毒撚~」

『好喇好喇~玩夠喇~上堂喇~上堂講到...』

帶住忐忑不安既心情...上左好幾堂…

我既忐忑唔係因為陳世民同學...

都同佢有少少關係既~

我唔係因為佢對我既愛意,令我忐忑不安...

我係因為佢對愛既執著,令我忐忑不安...

『真愛永遠不死…』坐喺教員室裏面...坐喺自己個位道...望一望出窗外...

“沙沙沙...沙沙沙...”開始落起雨黎喇...

以前冼Sir又會唔會好似我而家咁,不時都會望下窗外雨景呢?

冼Sir以前坐開既位...就係我而家坐梗既呢一個位...

冼Sir...

『假如佢都係愛你...你地係真心相愛既話...唔好理會凡塵俗世既眼光...認認真真...勇勇敢敢去愛一次!』

三年前...我識得同冼Sir講呢句...

三年後...我自己就做唔到...

我...真係連陳世民個死仔都不如呢~~~

同其他老師一齊出去食完Lunch...

返到黎上兩堂…

望住出面既雨景改下簿...

又準備一下聽日既課堂...

“叮叮叮噹 叮叮叮噹”話咁快就到左放學時間...

準備一下...再備一下課...等到D課外活動都差唔多完晒...

不知不覺又過左一日...

時間真係過得好快呢~

“願意為你 我願意為你 我願意為你 忘記我姓名”電話響?

望一望檯面上既電話...

係Chris打黎?

我輕輕滑動解鎖:『喂~Chris?』

「迦迦~你嗰邊仲有無落雨丫?」Chris帶住親切既聲線關懷我。

『嗯~仲落梗丫~』我一邊喺本英文課本上圈圈畫畫,一邊答Chris。

「係丫…」Chris有D擔心咁既樣...

『嗯?做咩丫?』我繼續喺本英文課本上Mark低D重點。

「唔...我今日要開OT...要開到好夜...未必黎到接你...」Chris把聲變得好擔心咁...

『哦~唔緊要啦~我自己返去都得既~』我再Mark多兩Mark之後,轉下轉下支筆。

「之但係...你嗰邊仲落梗雨喎...」我無等到Chris繼續講落去...

『唔駛擔心喎~我有你把遮丫嘛~』就打斷左Chris~

「咁...」我都係無等到Chris繼續講落去...

『放心啦放心啦~我再做多一陣野~就會自己返去架喇~』我再輕輕鬆鬆咁打斷左Chris~

「嗯...咁好啦...咁你要小心D喎...」Chris仲係好似唔放心咁...

『嗯~你都要小心D喇~放工打俾我啦~拜拜~』

「嗯...拜拜...」

呼~

呢個Chris丫~成日都係咁唔放心我既~

真係當正我係細路女咁~

十足十成個爸爸咁~

點都好啦~難得今日Chris接唔到我放工~課又備晒~又無會要開~都係早D執定野~早D走~

難得...點解我會用“難得”黎形容架呢?!

唔...

我都係快快手手執好晒檯面上既書簿~放返好晒D文具~拎起個手袋~仲有拎返把遮~閃人~

“沙沙沙...沙沙沙...”一行到出校門口,都真係好大雨呢~

我打開把遮,一個人喺雨中行...

行下行下...行下行下...

好似好耐都未試過一個人擔住把遮喺雨中慢步~

通常我身邊都會Chris喺道...

通常都有Chris為我遮風擋雨…

就算係佢自己成個身淋濕晒...都唔會俾雨水掂到我一分...

Chris佢...就係...

“咇咇”當我仲喺道諗梗Chris之時,我聽有兩下響按由我右邊傳黎...

我擰個頭過去望一望...係一架...灰色Honda...

從水撥之間...我見到入面有個男人...向我揮揮手...

我再睇清楚D...呢個男人係...

『冼Sir?!』

冼Sir落一落車,打一打開把遮走到埋黎我面前:「Miss Kwok~真係你丫?真係咁岩丫~」

『嗯~冼Sir~又會真係咁岩既~』我打量一下冼Sir,佢好似無乜點變~

「嗯~係呢...你去邊丫?我車埋你啦~」冼Sir好有禮貌咁問。

『我無邊道去丫~』我帶住微笑擰擰頭~

「咁丫...不如食返餐飯~當聚下舊丫~」冼Sir好有誠意咁邀請~

『嗯~好丫好丫~恭敬不如從命~』

「嗯~咁上車先~」

冼Sir幫我打開車門...

坐上冼Sir架車之後...

“沙沙沙...沙沙沙...”我地就喺風雨之中,向住市中心出發。

好快就黎到市中心~

好快就黎到間酒樓~

好快就有位~(可能時間尚早啦~)

「其實我之前喺Lunch都好似見過你幾次~但又唔肯定係唔係你~原來你真係入左去做~點丫~工作OK嘛?」冼Sir幫我洗好埋D餐具後,幫我斟茶。

『唔該唔該~都OK既...』一問起工作...我就有D唔係咁好意思...

「班學生唔難教丫嘛?」冼Sir關心咁問一問...

『唔難唔難...』始終都...

「同D同事相處得黎架?」冼Sir親切咁問一問...

『都OK...都OK...』始終都係我...

「你係唔係想問...點解我會離開左呢間學校...傳聞又係唔係真呢?」冼Sir打量一下我...

『唔...』我唔係好敢講出口...

「係…係真既…校方知道左我同Yuki拍拖之後,決定開除我~不過...話我同Yuki喺學校裏面搞埋晒D唔見得光既衰野既傳聞就係假既~」冼Sir輕描淡寫咁講出口...

『對唔住呢...都係我唔好...唔係我嗰陣時...』我仲未將要講既說話講完...

「唔係唔係~我要多謝你先岩~多謝你喺嗰陣時點醒左我~令我有勇氣面對自己~面對Yuki~先可以同Yuki喺埋一齊~」冼Sir一面幸福...

『之但係...都係我害到你無左份工...』都係我唔好...

「唔緊要喎~咁岩喺嗰陣時,隔離間學校有個Miss嫁去大馬做拿督夫人~佢地又唔介意我同左個學生一齊~仲話咁仲好~唔怕又會喺佢地間學校同學生太親近喎~咁就請左我過去喇~」冼Sir笑笑口咁講~

『咁你間學校都幾Open喎~』真係估唔到~

「係丫~我都估唔到~而且...我下個月就同Yuki結婚喇~」冼Sir怕怕羞羞咁講~

『真係架?恭喜晒你丫~』我立即捉住冼Sir隻手,恭喜佢有情人終成眷屬~

「多謝多謝~係呢~你有無興趣黎飲丫~」冼Sir怕怕羞羞咁~

『緊係有啦~』我最鍾意就係出席D甜蜜既場合~

「嗯~咁我過兩日黎俾帖你丫~」冼Sir仲係面紅紅咁~

『好丫好丫~講開又講...其實我...我都就快結婚...』係囉...我都就快結婚...

「係丫?恭喜晒丫~大約幾時丫~」冼Sir好有興趣咁問~

『唔...如無意外...應該會係今年年尾...』我諗下諗下...

「咁都好快喎~到時我同Yuki都要一齊黎飲你嗰餐~」冼Sir同我握一握手...

『嗯嗯...好丫好丫...』真係好快呢...

好快就結婚...

好快就要嫁俾Chris...

如無意外...如無意外...

「一講到結婚...你好似心事重重咁既?緊張梗?擔心梗?」冼Sir打量一下我...

『呃...唔...』竟然俾冼Sir睇穿左添...

「結婚前既女仔,可能都會有少少婚前恐懼...Yuki前排都係咁...有時仲會發下脾氣添...有無野幫到你?講出黎可能可以分擔下架~」冼Sir開解一下我...

『唔...』我擰一擰頭,『無...無野既...』

就連我自己都唔敢面對...我又點敢去同人講丫...

「唔...咁...或者我未必幫到你...或者如果係同感情有關既話,可以...試下搵一個叫情聖既人幫下你...」冼Sir諗下諗下...

『情聖?!』我一頭問號...

「係感情個“情”...性格個“性”...情性!」