《情困之時，我遇上了自稱情性的情聖》: [Case 07－求分作戰] PART 10

今日係星期六，我唔需要返學校當值。

本來Chris今日係返半日既～

仲打算放左工之後，同我行下街，睇下戲，食下飯咁～

「Sorry丫迦迦…公司突然有D野要做埋先...所以...要遲D先過到黎...」點知Chris打黎，話公司有D野要做喎～

『唔緊要啦～我坐下Starbucks等你啦～』反正時間尚早呢～



「嗯嗯...我盡快趕黎...好快...好快...」Chris仲係好唔放心咁～

『放心啦～放心啦～你慢慢啦～我會乖乖地坐定定等你架喇～你等陣小心揸車丫～唔好開咁快丫～』我最擔心既，就係Chris一心急就乜都唔理～

「嗯嗯～我一定會好小心架～」Chris就好似個小朋友應承媽咪咁既口吻～

『嗯～咁你快D去做野先啦～』我都變到好似個媽咪咁～

「嗯～咁我去做野先喇～」



『嗯～拜拜～』

「嗯嗯～拜拜～」

呢個Chris丫～要小朋友起上黎又真係好小朋友咁～

既然Chris有野要做，我又可以呼吸下自由既空氣～又可以享受一下自由既時間～

我點左杯栗香脆糖鮮奶咖啡～點左件藍莓Cheesecake～坐左喺落地大玻璃隔離，睇下手機～睇下Facebook～睇下Instagram～



雖然話今日係星期六，好彩都唔算話有好多人～

只係有幾個學生坐喺道溫書～有幾個偽文青坐喺道睇YouTube～

完全無令人討厭既行李箱～令人討厭既水貨客～

可能時間尚早掛～

可能驅蝗行動成功掛～

乜都好啦～最重要都係好好享受片刻寧靜～

望住部手機…嘆住咖啡...又碌下碌下...

其實...我都係睇梗高暉D野...



我係睇梗...高暉既Facebook...

我係想睇下...佢近況係點...

其實朱克伯格創造左Facebook出黎，係好事？定係壞事呢？

人類發明左互聯網之後，資訊變得唾手可得～

當朱克伯格創造左Facebook之後，直頭變得目不暇給...

我地每日都花上好多好多時間，去睇D我地想睇，又或者唔想睇又無意睇到既野...

一早起身食住早餐又睇～



坐車返工又睇～

扮梗工又睇～

食Lunch又睇～

去洗手間又睇～

沖梗涼都可以睇～

就連瞓前唔睇都瞓唔著～

但其實...又係唔係真係有咁多野需要睇呢？

究竟Facebook裏面，有幾多野係我地需要知架呢？



又有幾多野係我地想知架呢？

睇到D自己需要知或者想知既事都好～

最怕就係搵極都搵唔到...

就好似我而家咁...喺高暉既Facebook裏面睇下睇...搵下搵...

唔係話呢幾日去左邊道食野～買左D乜野～見到D乜野有趣事～就係去左邊個泳池游水...

凍冰冰游乜鬼野水丫...

所有文字又好，相片都好，就係無提過我...



一句說話都無提過...一隻字都無提過...一張相都無提過...

就算有...都係講有關我同Chris既婚禮...

又係講我同Chris既婚禮...我自己都已經唔想提...

唉...都係唔好睇高暉個Facebook...

睇下自己嗰個好過...

碌下碌下...有好多朋友都恭喜我...

有D話：「恭喜晒丫～咁快就搵到幸福呢～」

幸福？乜真係幸福咩？

有D又話：「可以同到最愛自己既男人結婚，係女人最大既福氣～」

但係喺呢個世界上，有幾多女人仲喺道盲目咁追求自己所愛，而忽視左深愛自己既男人？

喺呢個世界上實在太多太多喇...

太多太多女人因為一個唔愛自己既男人，傷害左深愛自己既男人...

到自己個心都傷透了，心碎了，就理直氣壯咁高舉受害者既旗幟大喊：「世上既好男人都死清光了！」

但又唔諗下自己喺呢個世界上，親手殺死左幾多個好男人...

女人丫嘛～女人就係咁不可理喻～

點解我會咁清楚？因為我都係女人囉～

再碌下碌下…又碌下碌...碌到去見到個叫做“你在Facebook上的動態回顧”...

我再睇一睇張相...係我同Chris...岩岩開始嗰一晚...手牽著手...

“我們終於一起了。”

我們終於都一起了呢...

五年前...我地終於都一起了...

回顧返呢張相...我當日所作既決定...究竟係岩？定係錯呢？

決定同一個好愛自己...但自己唔稱得上係愛既人一齊...

係唔係大錯特錯呢？

我地成日都話，唔好留戀喺一個唔愛你既人身上...

我地要多多珍惜愛自己既人...

但當你去接受你唔愛既人之時...有無諗過...其實同時間係傷害左三個人呢？

帶住一個人喺心裏面...同一個好愛你...但你唔愛佢既人一齊...到最後...可能只會三個人都受傷...

帶住一個人喺心裏面...同一個好愛你...但你唔愛佢既人一齊...

呢個情節...呢個處境...點解好似喺邊道睇過咁架呢？

係都唔出奇丫～

愛情故事，唔係你愛佢，佢唔愛你～就係佢愛你，你唔愛佢～再唔係就你唔愛佢，佢又唔愛你～就係你愛佢，佢又愛你但佢同佢都愛你同佢架啦～

死喇...點解我近排講野好似咁1999咁架呢？

鬼咩...肯定係仲成日收到D男同學寫既情信，搞到D思路都1999咁...

你知班中學雞架啦～寫D野鬼死咁高登～無文無路咁～

又要上網查下先知佢地噏梗乜～

唉～真係怕左佢地～

望下望個Facebook...總係睇到D唔想睇既野...

唉...所以話...究竟Facebook為人類帶來開心？定係不快呢？

正當我無晒Mood...Lock一Lock部電話...攤喺張梳化上之時...

「迦迦？」有把男仔聲喺我背後出現...

呢把聲...呢把直插心臟既聲音...

『高暉？！』

我回身一望...

一個身影...

一個高大既身影...

正正就喺我背後出現！

我再望清楚D...的確係...係高暉...係一直令我念念不忘既高暉...

「真係你丫？又會咁岩喺道遇到你既～」高暉手中拎住杯...栗香脆糖鮮奶咖啡，坐到我面前...

『係囉～又會咁岩既～』又會咁岩...我同高暉既口味都係一樣...

「係咯～我見今日有D涼爽，所以落黎行下囉～你呢？放假？」高暉一面輕鬆。

『係丫～今日唔駛返去當值，所以咪出下黎～』我就扮到一面輕鬆咁...

其實我個心早已經跳到“卜卜”聲...

「Chris呢？無理由唔見佢架喎～」高暉左望望，右望望...

『佢...佢公司有D事要做...做埋先過黎...』咩叫無理由唔見佢...

「哦～係囉～我就奇怪～有你出現既地方，自然會有佢既出現架嘛～」高暉笑一笑…

『咁總有我一個人既時候既...』我就唔覺得有乜咁好笑...

「其實你應該感到溫暖先係～一個男仔，一直都喺你身邊～」高暉飲一飲杯咖啡。

『點解一直喺身邊就覺得溫暖？』我唔係好明高暉既意思。

「你地D女仔唔係成日都話有個愛錫自己既男人喺身邊先係最幸福～最溫暖架咩？」高暉又笑一笑…

『咁都有想要自由既時候...』經常喺身邊既話，會抖唔到氣...

特別係…一個好愛你...但你唔愛佢既人...

「你地D女仔真係奇怪～好難捉摸丫～」高暉又笑一笑，飲一飲啖咖啡，擰一擰頭…

話我地D女仔好難捉摸？

又有幾難捉摸丫？

好多野都唔可以講出口架嘛…

好多時都已經暗示晒出黎架啦...

係你地D男仔蠢...自己Get唔到咋嘛…

講到難捉摸丫...夠你地D男仔難捉摸？

話晒我地曾經都有過難忘既經歷...

話晒我地曾經都有一齊過...開心過...幸福過...

話晒我地都係初戀丫！

初戀丫！唔係應該好刻骨銘心先係架咩？

點解到左而家，你個初戀情人快要結婚喇！仲要係嫁俾你個好兄弟喇！你都好似無動於衷咁架呢？！

「一直都無問過你添...你呢幾年過得好嘛？」高暉眼定定咁望住我...

『我...而家資訊咁發達...睇Facebook咪知囉...』我冷冷放下一句...

「我就係見你Facebook都唔多更新，所以先想親口問下你咋嘛…」高暉冷眼望住我...

講開又係喎...

我都好似...無乜更新過Facebook...

不論係文字，定係相片...

我都好少Upload上去...

或者係因為...我覺得無乜野好Up掛...

或者係因為...我既生活...我既時間...我既一切...都係同Chris一齊...

總係好似...無乜野好講...

無乜野特別…

無乜野值得留住...值得留念...

『你咁問我...我都唔知點答...咪好似你咁講...做乜都有Chris喺身邊陪住...有Chris照顧...有Chris幫我分擔好多好多...咁囉...』或者就係咁啦...

或者就係咁...過得好唔好...就連我自己都唔知道...

我唔敢去衡量...唔敢去定斷...

「其實...點解你當初會...應承同Chris一齊？」高暉問得有點認真...

點解會應承同Chris一齊？

呢條問題...我更加唔想面對...

『正如你所講～Chris對我好丫嘛～佢一直都對我咁好～咁多年黎都不離不棄～女人要求D乜姐？咪就係一個永遠都會喺你身邊，俾到安全感你既男人囉～』我係講大話...

無錯～我係講大話丫～

女人丫嘛～口不對心丫嘛～

女人就係咁難以捉摸架啦～

「乜你真係咁諗咩？」高暉好認真咁望住我...

我望住高暉呢對認真既眼神...

呢對認真既眼神...

已經好耐無親眼見過既眼神...

就好似當年...高暉捉住我膊頭...好認真咁望住我...同我講：「我愛你。」

『我有得唔咁諗咩？』再次望住呢一對認真既眼神...我忍唔住...

我感覺得到...我個心鎖...快要被衝破...

『有一個人...由相識你開始...就一直深深咁深愛著你...就算你拒絕過佢幾多次都好...你對佢有幾冷淡都好...佢都依舊對你不離不棄…』我忍住淚水...

高暉無出到聲...只係坐定定望住我...

『當你喺最失意既時候...最傷心既時候...心如刀割...心都碎了既時候...最需要關心既時候...仍然默不作聲咁...喺你背後守護住你...喺你身邊陪伴住你...』我繼續忍住淚水...

高暉繼續無出到聲...繼續坐定定咁等我講埋落去...

『你喊...佢借個膊頭俾你喊...那怕喊到佢成件衫都係鼻涕...你想搵人咬...佢諗都唔諗就伸隻手出黎俾你咬...那怕咬到流晒血...你要溫暖...佢第一時間攬實你...那怕你係一隻長滿刺既刺蝟！』我開始忍唔住淚水...

但高暉都係無出到聲...繼續坐定定咁望住我D淚水開始由眼裏流出...

『試問一個對你咁死心塌地至死方休既男人...你仲忍心將佢拒於千里之外嘛？』我D淚水越湧越多…

湧到眼前既高暉都模糊不清...

「係咁…我只可以祝你地...白頭到老...永結同心...」高暉講完之後，起身離開...

我望住眼前一片模糊...望住模糊既背影轉身離開...越行越遠...越行越遠...

被淚水遮蓋下...眼前就只有紅紅綠綠...啡啡黃黃...黑黑白白...

『愚蠢！』我就話...我就話你根本...根本就唔明女人心！

我一個人，坐喺Starbucks道飲泣...

我唔敢喊出聲...

因為我害怕...

我害怕周圍客人既閒言...

我害怕街上路人既目光...

一個女仔喺街上面喊，總係會令人產生奇怪既聯想...

總係會覺得...你唔係受情傷...就係發花癲...

我唔想俾人覺得我係受情傷...更加唔想俾人誤會我係發花癲...

所以...我只好強忍哭泣聲...任眼淚由雙眼中流出...

源源不絕咁流出...

我心傷...我心痛...我心碎...

我心傷，係因為我一直深愛既人，竟然會問我點解會咁揀...

我心痛，係因為我一直深愛既人，竟然唔明白我既心意...

我心碎，係因為我一直深愛既人，竟然祝福我同另一個人白頭到老...永結同心...

我真係覺得好難受...

我真係接受唔到...

我接受唔到你點解可以咁愚蠢！

你真係好愚蠢呀高卓暉！！！

我帶住呢種又傷心...又痛恨既心情...一直坐喺道...坐喺道...

坐左好一陣子...

喊左好一陣子...

再過多一陣子，係時候要平伏一下心情...

唔可以再喊...

唔可以再喊到雙眼通紅...

唔可以再喊到上氣唔接下氣...

係時候...係時候要平伏...

因為Chris好快就會黎到...

如果俾Chris見到我喊...佢一定會好緊張...

佢一定會追問發生咩事...

佢一定要知道我為乜會咁傷心...

佢一定會好緊張...又好心急咁...氹返我...

我由手袋仔拎出紙巾...

印一印眼角既淚水...印一印面上既淚痕...

照一照塊鏡仔...

『無事喇…無事喇郭以迦…都過左咁多年喇...仲可以有D乜事呢？』我對住塊鏡仔...苦笑一下...

都過左咁耐喇...乜都習慣啦...

要喊既...早就已經喊過...喊夠...喊晒啦...

係時候冷靜一下...

係時候返返黎現實世界...

係時候由過去既傷痛...跳返出黎幸福既現實...

幸福？幸福...

我飲一口栗香脆糖鮮奶咖啡後，嘆一口氣，攤喺張梳化上...

時間從來都無因為你既傷感而停落黎...亦都無因為你既懷念而倒退呢...

我再攤多一陣...放空多一陣...

「迦迦～Sorry丫～要你等我咁耐～」一個和藹既面孔就出現喺我眼前...

『唔緊要～我都唔係等左好耐咋嘛～』我微微一笑…

黎到喇...Chris黎到喇...

要黎既始終都會黎到...

要走既...留都留唔住...

「你好似...眼紅紅咁既？」Chris細心咁打量一下我...

『哦？我...我岩岩打左個喊露咋嘛～嗚呀～』咁都俾Chris發現到？

我已經閉目養神左好一陣子...

應該已經無咁紅...好好多架喇喎...

「係唔係因為我訓覺既時候整到你，搞到你瞓得唔好？如果係，我再瞓開D～」Chris好緊張咁...

『唔係唔係～你都已經瞓得好開架喇～如果再瞓開D，你真係會碌落床架喇～傻瓜～』雖然話我地係同床共枕...但就瞓得好開...

真係十足十梁山伯與祝英台...只係差幾碟水放喺我同Chris中間咋...

有時候...都真係不得不敬佩Chris～

話晒Chris都係一個男人，但點解可以君子成咁架呢？

瞓埋同一張床...唔會有想要既時候架嘛？

點解一直都可以唔提出？

又唔會借頭借路借D意掂下我...摸下我...

一直都係咁規規矩矩...

Chris對我一直都係咁規規矩矩...

或者呢D就係愛既極致...

或者呢D就係柏拉圖式戀愛...

「我已經買左飛架喇～食埋野過去睇就岩岩好～駛唔駛坐多陣先去食野？」Chris摸住我把秀髮。

『唔～』我擰一擰頭，『我夠精神架喇～』

「真係夠？」Chris溫柔咁摸一摸我面頰。

『嗯～真係夠～』我就起一起身，拖一拖住Chris。

Chris對手真係...好溫暖...

溫暖既大手...總係充滿住無限既安全感...

每個女人都經常掛喺嘴邊既安全感...

我可以經常，亦都好容易咁，喺Chris身上感受得到...

我係唔係要好好享受？

我係唔係要好好珍惜？

我係唔係要好好珍惜呢種對於人地黎講係難能可貴，但對我黎講就唾手可得既安全感呢？

一鳥在手，勝過百鳥在林…

那怕呢隻手中鳥，唔係我心中既青鳥呢...

同Chris食飯，我又主動黐住喺佢身邊～

又主動餵佢食野～

你一啖～我一啖咁～

睇戲既時候，我又主動拉起個手把～

翹實Chris～

又主動餵佢食爆谷～飲可樂～

你一啖～我一啖～一杯可樂兩份飲～

同Chris睇完戲，我又主動拖住Chris隻手行街街～

幫佢揀下衫～襯下衫～

總係要揀到最靚～總係要襯到最絕～

行完街～睇完戲～食完飯～當我拖住Chris隻手，又翹到佢手臂實一實，踏入家門之時...

「你今日做咩丫～你今日總係好似...總係好似...貓喵咁嗲咁既？」Chris摸一摸我把秀髮～

『你唔知咩～女人一個月總係有幾日會嗲D架嘛～』我用塊面貼喺Chris既膊頭道～

「真係架嘛？我以為女人只會一個月總有幾日會發脾氣添～」Chris傻笑咁摸摸頭～

『咁你係唔係想我只係識得發脾氣丫？』我古古惑惑咁望一望Chris～

「唔係唔係！不過...就算你只係識得發脾氣...我都係會咁愛你～」Chris再柔情蜜意咁望住我，摸一摸我面頰～

Chris…你對我咁好...一直都係對我咁好...

我諗...係時候要做返D野...係時候到我對返你好...

係時候要做返個稱職既女朋友...稱職既未婚妻...

我知我點做...都唔夠你對我既百分之一…

但我總要努力...我總要盡力...