喺一個平常既下午...

喺一間平常既七仔裏面...

『喂喂喂…你睇住...睇住...等我幫你啦!』我見到我既員工Yuki由個倉仔抬住一大箱朱古力出黎,準備放上架補貨。

「行開行開行開~哎呀~你唔好搞住我啦~」Yuki放一放低箱朱古力後,推一推開我...

『我邊有搞你姐...我係怕你整親咋...下次拎呢D重野既時候,都係叫我幫你好喇...』一陣整親既話,我都唔知喺邊道搵返個咁靚既女賠返俾人地父母...





「邊係重姐~好輕咋嘛~嗱嗱嗱~我知你架嗱~你唔好借睇借路借D意黎親近我,想搏我懵丫~尹曉揚!我嗌非禮架!」Yuki谷起塊面豬登,指住我...

『我邊係丫...你唔好亂講啦...唉...怕左你...你自己小心D喇...睇住丫...』我真係怕左Yuki...

我都係行返埋Counter裏面,同Yuki保持一定既距離...

我喺Counter入面,望住跪左喺地上,放梗一包包朱古力上架既Yuki...

唉~每次都係咁既...





每次見到細細粒粒既Yuki抬住D大件過佢既貨物,正當我想幫佢既時候,佢總係話唔駛~

總係話自己搞得掂~

總係話我想非禮佢既...

大姐丫...就算係想非禮丫,都唔會喺舖面明目張膽咁非禮你啦...

你估而家拍梗日本成人動作片咩?





你估真係又摷又摸,唔唔哦哦咁,D客人真係睇你唔到,聽你唔見架咩?

你估個個老闆都係咁鹹濕,總愛偷偷搞自己D員工架咩?

都話左唔好睇咁多A片架啦~

睇到個腦都壞埋~

個個老闆都係咁鹹濕?

嗯~我都未自我介紹添~

其實,我係呢間七仔既老闆~

我叫尹曉揚~





今年二十四歲~

二十四歲咁年輕就做到老闆?!

當然~係要靠D機緣啦...

呢間七仔其實喺道都已經開左好多年架喇~

我讀小學既時候都會經常黎偷朱古力~

係丫~細細個就緊係偷架啦~

個個小朋友都經歷過架啦~





到上到中學,又會日日Lunch黎七仔叮個杯麵或者叮個飯食~

慳錢丫嘛~做過學生既你都必定經歷過架啦~

而喺呢段成長既期間,我就識到呢間七仔既老闆~

呢間七仔原本既老闆係姓黃既~

佢都真係好勤力架~

差唔多日日都見到佢黎開工~

而且一做就係由朝到晚~做足兩更~

起初我都唔知佢係老闆黎架~





因為佢D員工都係叫佢個名~唔會叫佢做老闆~

後尾傾下傾下,講下講下先知原來間七仔係佢既~

講下講下,又吹下吹下,吹吹下就吹到好似朋友咁~

我久唔久都會入去佢間房仔...即係個倉入面,睇佢計數~

睇睇下就幫佢計埋一份~

計計下又黎做下Part Time~

做下做下Part Time,賺下賺下生活費,黃生就同我講:「我用左太多時間喺間舖裏面...都無時間去識下女仔...不過好彩~好彩上天都俾我一個機會~俾我一個...終於都遇到另一半既機會~」





聽起上黎好似好Gay丫呵~

不過放心~黃生講既另一半,絕對唔係我~

而係一個...女顧客~

仲記得第一次見到呢個女仔既時候...係我讀梗中學既時候~

呢個女都幾靚女架~

睇起上黎...嗰陣時個女仔應該都係二十歲左右啦~

頭髮長長~高高瘦瘦~笑起上黎仲好甜添~

有段時期我黎叮個杯麵當Lunch,就會見到呢個女仔黎買軟雪糕食~

我真係差唔多每次都係見到個女仔入黎買軟雪糕架喎~

仲要係食雲呢拿味~

而每次都總係黃生親自幫佢拉~

初初我都唔覺黃生對嗰個女仔有野架~

係到我留意到黃生拉親軟雪糕俾呢個女仔既時候,都特別多~特別高~

我先知原來黃生對個女仔有意思~

不過好景不常...

到左七仔要全線停售軟雪糕之時,個女仔就消失得無影無蹤...

嗰期黃生都真係好意志消沈下架~

成日都心事重重咁~

又成日企喺個Counter入面,呆下呆下咁望住個門口...

十足十舊望妻石咁架~

時間一日一日咁過...

個女仔都係無再出現過...

我都開始入黎做Part Time~

只見黃生都無再提過...亦無再留意其他女顧客...

只係專心咁喺自己既生意上...自己間店舖上...

每日都係由朝做到晚~

每日都係返足兩更~

而喺閒談之間,我聽得出黃生仲係對呢個女仔耿耿於懷...

不過耿耿於懷又點?

時間都係一日一日咁過~

人就一日一日咁長大...老邁...

一轉眼就過左七年,即係早兩年前左右~

喺一個平常既下午...

喺一間平常既七仔門外...

“咯 咯 咯”

『歡迎光...』我都未噏得出個臨字出黎,就嚇到我氣都抖唔過!

因為我一眼就認得出...入黎既女仔...就喺當年黎買軟雪糕食既女仔!

我就緊係第一時間衝入倉,同黃生講!

當時黃生一聽到,都呆左一呆~

然後保持冷靜咁行出去~

之後係點?

我就真係唔係好清楚啦~

只係知道原來個女仔當年都係對黃生有意思既~

之後點解會突然消失?

咁多年黎去左邊?

重要咩?

唔重要啦~

最重要既都係...

「我用左太多時間喺間舖裏面...都無時間去識下女仔...不過好彩~好彩上天都俾我一個機會~俾我一個...終於都遇到另一半既機會~我諗住黎梗既日子都陪老婆四周遊歷~食盡天下間既軟雪糕~所以我打算...將呢間舖轉手...唔知你...有無興趣呢?」黃生搭一搭我膊頭...

就係黃生呢一句,我就將我辛辛苦苦節衣縮食死慳死抵做Part Time儲返黎既八千蚊,再加埋老豆借俾我既四百四十九萬二千,頂左呢間舖返黎!

車~講到尾咪又係“成功需父幹”!

成功需父幹...

你都可以咁講既...

唔係老豆借俾我嗰四百四十九萬二千,我又邊有可能靠自己雙手,頂到間舖返黎?

要知道,而家一間只有三十呎既舖仔都賣梗二百萬一個!

仲要係舊波樓翻新再劏開黎賣!

走火通道都唔知有無!

都賣梗二百萬一個呀!

我而家呢道成三百幾呎連埋個經營權仲要係地舖,都只不過係講緊五百萬!

你話係唔係真係跳樓價?!

但係五百萬…對好多人黎講都係天文數字...

特別係初出茅廬既年輕人...

唔想打工受氣,又無錢做生意既我地,唔靠老豆唔通靠政府咩?

唉~

不過又唔好話丫,要經營一間七仔,都真係要自己落手落腳做架~

唔係都真係好難圍到皮架~

七仔食水深就係人都知~

唔知嗰D野就我地自己知~

要經營得成一間七仔,都真係唔係咁易~

不過,除左自己落手落腳做,都總係要請返幾個員工~

講到請員工,就緊係要請女仔啦~

點解要請女仔丫?性別歧視丫?有水抽丫?

緊係唔係啦~

要知道,七仔最多人買既係乜?

煙、酒、避孕套~

而買呢三樣野既人又係咩人?

十之八九係麻甩佬~

所以,請女店員去招呼呢班麻甩佬就係最適合~

仲會多多幫襯添~

你話我出陰招都係咁話架喇~

鬼叫而家生意難撈咩~

望住仲跪喺地上,將一包包朱古力放上架既Yuki...

細細粒粒...又靚又可愛...最容易引誘到麻甩佬~

亦都好彩有Yuki做生招牌,先可以Keep到收支平衡~仲有少少錢賺咁啦~

「喂~你𥄫完未姐?我跪喺道咁耐,你就喺我背後𥄫咁耐~著住套制服都咁好𥄫,萬一我著返平時著開既熱褲黑絲,咪噴晒出黎都似?!」Yuki跪喺地上,背住我擰個頭過黎,冷眼咁望一望我...

『我邊係𥄫你姐?我睇住你!怕你有乜野唔小心!整親就唔好啦!』又俾Yuki話...

「係咩係咩?你唔𥄫我我就會好專心咁做野~好專心咁做野就唔會唔小心~唔會整親啦~」Yuki一邊講,一邊拎一包包朱古力放上架...

『係喇係喇…』我有D無奈...

「唔好𥄫我咁多喇~知道嘛~」Yuki仲係要話我𥄫佢...

『係喇係喇…』其實我真係唔係想𥄫Yuki...

Yuki唔係話唔靚~

係好鬼死靚又好鬼死正!

但...我又真係無...無對Yuki有嗰種...嗰種...

「係丫係丫~哈哈哈哈~」正當我諗梗係邊種感覺之時...

「哈哈哈哈~傻既你都~」我聽到門外...

「邊係呢?你先係丫~哈哈哈~」有一班人喺道嘻嘻哈哈...

「哈哈哈~你直頭係隻豬添啦~」BiLiBaLah...

「我係豬?大家話喇~邊個先係豬?!」有男有女...

「Stella話你係就係啦~點丫?想食D乜丫~~~」呢班男女既聲音...

吸引到我既注意...

我不自覺咁...擰一擰個頭過去...

望一望門外…望一望門口出面...

我望到有一大班人…有男有女...

個個都同我差唔多咁上下年紀...

個個都係廿歲出頭...

個個都好似好開心...好歡欣...

而最令我好奇既係...佢地圍住一個女仔...

一個坐住輪椅既女仔...

一大班男男女女...有講有笑咁...圍住一個...坐住輪椅...笑得好燦爛既女仔...

「唔...等我睇睇先~」個坐住輪椅既女仔望下望下,望下貼喺廚窗上既Poster...

我眼定定咁望住呢個坐住喺輪椅上...身體好似識發光咁既女仔...

呢個女仔既笑容...真係好燦爛...

而且仲...好神聖...

此笑只應天上有,人間能得幾回聞...

就好似天使既笑容一樣...

點解可以笑得咁燦爛?

點解可以笑得咁神聖?

點解可以笑得咁歡欣?

係因為身邊既朋友笑得咁開心?

我就覺得係...因為個女仔笑得咁歡欣,先會令到身邊既人咁開心!

「唔...我要食魚蛋~~~」個女仔坐喺輪椅上指一指住張Poster。

「嗯~仲有無其他?」其中一個企喺個女仔身邊既男仔,拍一拍佢個膊頭...

「唔...燒賣~~~」個女仔再指一指住張Poster。

「嗯~咁好啦~等我幫你買啦~」個男仔就向個女仔點一點頭,行入黎...

魚蛋...燒賣...

正當我想為個女仔準備好魚蛋燒賣之時...

「曉揚~供應嗰邊既周生打黎搵你丫~」Zoe打開左間房仔道門,探頭嗌出黎...

『哦...哦...我入黎聽...你...你黎幫我睇住先...』我就走入房仔聽電話...

又會喺呢個時候打黎...

係唔係有D乜野問題呢?

我接一接起個電話:『喂~周生你好~』

同周生傾左一陣...

『嗯嗯...都可以既~』

傾埋D細節...

『嗯嗯~OK丫~就照你既意思做啦~』

好彩都唔係D乜野麻煩野~

好彩影響都唔係話好大~

好彩都影響唔到盤生意~

『咁麻煩晒喇~嗯嗯~再聯啦~拜拜~』

做生意...就係咁...

總係有好多顧慮...

總係成日都要計住計住...

睇住睇住...

蝕錢唔係問題丫...問題係仲有班員工要養架嘛…

我就真係做唔出好似D良心企業咁,拖人幾個月糧仲呃住D員工繼續做撐埋落去仲話會有糧出喎~

搵鬼信咩~

我一路諗,就一路行返出舖面...

望一望門口...

『走...』走左喇...

個天使走左喇...

歡天喜地既天使喔...你走得真係快呢...

唔知仲有無機會見面呢?

歡天喜地...

喺我呢種年紀...係唔係應該要歡天喜地D呢?

係唔係應該多D同朋友出去玩下行下走下呢?

係唔係應該...係唔係唔應該...

「同周生傾完喇?」Zoe行到埋我身邊...

『哦?丫!係丫係丫!傾完喇...』一時之間Load唔切添...

「嗯~咁我入返去做野喇~」Zoe指一指間房仔...

『嗯...好好~』我就行返埋個Counter...

望住Zoe入返房...

又望住Yuki將D薯片放上架...

係唔係唔應該...係唔係唔應該...

喺間七仔入面同Yuki仲有Zoe執下貨...

『八達通增值係唔係?』幫人增下值...

「多謝晒~杜蕾斯持久裝買一盒送一個喎~要唔要試下丫?」Yuki又收下錢咁...

同兩位靚女做下做下,又搞下搞下,都差唔多忙左成日。

差唔多又到左Yuki放工既時間。

「今日都算唔錯啦~」Zoe放鬆一下心情。

「都算唔錯丫~一個下午都賣左成廿幾盒Dom Dom喎~日光日白都有咁多人搞野,到左夜晚仲得了既?」Yuki古古惑惑咁笑笑口...

『係咯…D持久裝就賣到得返一盒...』我望一望住個架...

我記得倉都無晒貨...

唔知聽日返唔返得切添架...

「嘩!原來得返一盒咋?!唔得唔得~等我買左佢先~」Yuki快快手手咁拎起盒杜蕾斯持久裝埋去機前Do一Do...

「乜你男朋友要用持久裝架?」Zoe偷偷笑一笑。

「係因為我太有魅力囉好唔好~」Yuki谷一谷起塊面豬登...

「係丫係丫~係男人見到你都扯晒旗丫~」Zoe又偷偷笑一笑…

「呢層就當然啦~不過頭先有個麻甩佬黎買Dom Dom既時候,我見到佢偷影你囉~」Yuki意淫淫咁笑一笑…

「真係架?!你做乜唔幫我阻止佢丫?」Zoe好驚咁既樣...

「我點阻止喎~唔通同個麻甩佬講“先生,你唔好偷影我同事好喎!係都問聲先啦~”咁咩?」Yuki又意淫淫咁笑笑口...

「點都好啦...阻止左先丫嘛…都唔知個麻甩佬偷影我做乜既...」Zoe諗下諗下...

「咁就話唔埋喇~話唔定偷影完你,拎入廁所戴住Dom Dom黎...」Yuki成個樣都極淫賤咁...

「咦~~~好變態丫!」Zoe顯得超驚咁...

『喂喂喂…好喇好喇...夠喇夠喇...舖面唔好講埋D變態野丫...』我都係時候要阻止一下兩位唔怕羞既小妹妹...

而家D𡃁妹仔係唔係真係咁唔怕羞架?

公眾地方黎架...

會有人客入黎架...

俾D麻甩佬聽到既話,你話幾咁唔好意思先得架?

「車~怕咩姐~而家都無客人~真係有客人入黎,我地就唔講架啦~」Yuki扮金魚嘴…

「係咯係咯~我地又點會咁大膽,喺男仔面前講呢D野喎~女仔黎架嘛~」Zoe又扮金魚嘴…

『咁你地又喺我面前講埋呢D咁既野?』我冷眼望一望面前呢兩條金魚...

「嘻~我地都唔記得左有你喺道添~」Yuki同Zoe異口同聲咁講...

呃...唔記得左有我喺道?

即係當我無到?

天丫~~~點解我會請呢兩個𡃁妹返黎做野架?!

我點會咁有眼無珠架~~~

公平咩?!

「好~夠鐘收工~」Yuki一邊除件制服,一邊行入間房仔道。

「係喎~呢更得返我同你咋呵?」Zoe諗下諗下...

『係丫…Jerry唔得閒返丫嘛…得返我同你咋...』兩個人做應該都唔係問題既...

「嗯~咁好啦~」Zoe Fing下Fing下對手,行入Counter裏面執下野。

Yuki喺間房仔拎埋件外套,再拎埋個手袋仔之後:「咁我走先啦~拜拜~」

「嗯~拜拜喇Yuki~」我同Zoe向Yuki揮手道別...

我就望住Yuki既背影,行過去架灰色Honda道...

望住Yuki上左車,灰色Honda都駛離喇...

真係…咁好生意咩?

唔...

記得做仔既時候,我地晚晚都會落七仔買野食,買野飲。

一大班人四圍遊,無乜要求~

買完野食,買完野飲就會上大會堂坐下,吹下水,咁就一晚~

天氣凍既時候,又會買支熱維他奶...

“你 你的真摯使我沒疲累”

仲會走去叮下杯麵食...

出面又會有D𡃁妹仔企喺道等人交換迪士尼公仔~

好熱鬧架~

但係而家...

唔好話𡃁妹仔,夜青好似少見左...

板仔直頭唔見晒...

就只有D毒撚黎買點數...買月卡...

就只有D麻甩佬入黎買煙買酒買Dom Dom…

就只得返D夜麻麻岩岩OT完放工返黎死下死下叮叮杯麵食既打工仔...

其實...生意越黎越難做...

生意難做...

望一望住仲喺Counter入面執梗野既Zoe...

幾難做都要撐落去~

我唔食丫,D員工都要食架嘛~

同Zoe兩個人繼續喺七仔裏面做野...

「歡迎光臨~」

久唔久都會有客人入黎...

「杜蕾斯持久裝賣晒喇~」

久唔久都有麻甩佬入黎買Dom...

「覺得邊隻會舒服D?你都係問返你女朋友啦~」

不時都有D麻甩佬聊下Zoe咁...

見到咁既情況,我都唔係咁好意思...

『Zoe,都係等我企Counter得喇~你入去執下貨~』始終...我都覺得...自己好似推梗個無知少女落火坑咁...

「嗯?D貨執好晒啦~做咩丫?擔心我丫?」Zoe打量我一眼...

『唔...要你一個女仔俾D麻甩佬聊...唔係咁好既...』雖然話咁樣會好生意D...

但都無理由要難為個小妹妹...

「哈哈~OK喎~我應付得到架喎~」Zoe笑一笑,拍一拍我膊頭...

『Er…』真係應付到?!

「唉~D男人都係得把口架姐~做得出D乜丫~你估佢地真係夠膽等我放工然後拖我入後巷咩?」Zoe古古惑惑咁笑一笑…

『Er…』好難講架喎...

屯門出名咩丫?色魔囉...

真係好難唔驚架喎...

「唔好Er喇~係咁唔放心既話,今晚收工送我返屋企啦~」Zoe向我打左個眼色...

『嗯...咁好啦...』反正我都係一支公...無乜野搞...送Zoe返屋企都應該既...

「嗯~就咁決定啦~有客人~有客人~歡迎光臨~」

有陣時都真係覺得,而家既女仔都幾硬淨...

硬淨...

突然間...我諗起今日嗰個坐輪椅既女仔...

一個會發光既天使...

點解我會無啦啦諗起佢架呢?