一大清早就醒左~

雖然話天氣都開始凍起黎...

但我都唔瞓咁耐~唔賴床~

起身梳洗一下,換返套運動服,出發!

咁早我去邊?



無丫~想落去市鎮公園跑返幾個圈咋嘛~

平日返去看舖,一看就看成十幾個鐘~

屈喺間舖頭咁耐,真係唔多健康~

所以一有時間,都係做返D運動好~

唔好以為我今日係放假丫~



我等陣都要返舖頭開工架~

我地呢D做老闆既,真係年中無休架~

唉~無計啦~

利潤唔高...收支叫做岩岩平衡到...想請多個人返黎幫下手都無...

係要親力親為架喇~



至於點解我會選擇落黎市鎮公園跑,唔去運動場跑?

因為空氣清新D囉~

晨早空氣清新開朗~

喺兩旁樹蔭下慢慢咁跑~

秋風推送,都真係有D凍~

開始凍喇~開始轉天氣喇~而呢種溫度同濕度係最適合跑步~

我跑下跑下,圍住個公園跑下跑下~

有唔少枯黃既樹葉由天上掉落~



掉到落地上...佈滿地上...

“卡 卡 卡 卡 卡”我踏過黃色既枯樹葉...

“卡 卡 卡 卡 卡 卡”跑下跑...

我跑下跑下,不知不覺咁就跑到黎湖邊...

一個已經變得無乜水既湖邊...

就喺我隨意咁望一望湖邊之時,有一道光芒吸引住我視線!

我放慢腳步...我停下腳步...



我企定定咁望向湖邊...

我望到湖邊有一個...有一個坐住輪椅既...女仔...

係尋日...喺我間舖頭外面嗰個...坐住輪椅既女仔...

竟然會俾我喺呢個時候...喺呢個地方...再遇見佢...

但係佢喺道...做梗D乜咩?

我一步一步咁行落石梯...

一步一步咁行近...

行近少少...再望望...再行近少少...



探頭左望望...探頭右望望...

雖然話我行近左幾步,但我都係離遠咁望一望...探頭咁望一望...

我都唔係好敢行咁近...我怕我會嚇親人...

望多兩望,終於都俾我望到個女仔喺到做梗乜~

個女仔坐喺輪椅上...望住個湖...拎住支筆...喺本...畫簿上畫下畫下...

哦~原來係寫生~

真係估唔到,而家呢個年代仲會有女仔鍾意寫生~



仲要係用紙筆,而唔係用iPad添~

真係難得~

我離遠咁坐喺個女仔既後面...後面既石凳上...

都真係有D遠...

我離遠咁望住個女仔...望住個女仔一路好專心咁畫下畫下...畫下畫下...

個女仔既視線從來都無離開過個湖同畫簿...從來都無望過背後一眼...

而我既視線就從來都無離開過個女仔...

唔知點解...我對眼好似好唔願離開個女仔咁...

好似總係俾個女仔吸引住咁...

點解會咁架呢?

除左話係因為個女仔身上總係散發住溫暖既光芒之外,我仲覺得...個女仔好靚...

呢個坐喺輪椅上既少女...真係好靚...

雖然話我而家坐得都真係幾遠下,但我都可以好清楚咁望到...

雪白既肌膚...

長長既透髮...

眼大大...鼻高高...嘴細細...面尖尖...五官端正...

真係好美…

好自然既美...

好似天使一樣咁美...

我就係俾呢個天使既美貌...一直咁...吸引住...

吸引住…吸引住…

我咁樣會唔會好壞呢?

會唔會玷污左呢個女仔呢?

莫講話“只可遠觀而不可褻玩焉”...

而家我就只係遠觀都好似褻瀆神明咁...

呢個女仔...實在太過聖潔!太過神聖喇!

我有點卑微...有點羞愧...

但又忍唔住要偷望一下呢朵神聖不可侵犯既荷花...

不過講開又講...而家眼前呢個喺湖邊寫生既女仔...同尋日喺舖頭外面既佢...好似...好似有D唔同...

總係好似...好似缺少左D...缺少左D乜呢?

我好細心咁觀察...好細心咁留意呢一個女仔...

觀察左好耐...留意左好耐...

我都差唔多呆坐左喺呢個女仔身後成個幾兩個鐘...

我都仲係...講唔出缺少左D乜...

突然,個女仔深呼吸一口...

再將手上既筆同畫簿放喺個袋裏面之後...

鬆一鬆雙手,擰一擰轉張輪椅...

碌下碌下...個女仔靠住自己雙手,坐喺輪椅上碌下碌下...碌下碌下...

碌下碌下...碌到去我面前...碌過左我面前...

我保持住姿勢坐定定...郁都唔郁下...

個女仔望都無望過我一眼...與我擦身而過後...碌到去我身後...越碌越遠...越碌越遠...

我一個人,繼續保持住姿勢...坐定定...

走左喇...個女仔走左喇...

連望都無望下我一眼,就頭也不回走左喇...

都係既~無啦啦又點會望我先得架?

我又唔係達哥~

無端端人地又點會望我丫~

係我咁變態,坐喺人地背後偷窺人地兩個幾鐘姐~

我變態...

唉~睇黎我都係同平時黎舖頭𥄫Yuki同Zoe既麻甩佬一樣,都係咁變態~

舖頭...

唉~都差唔多係時候要返去喇~

係時候返屋企沖個涼,換返件衫準備返舖頭開工~

慢慢咁跑返屋企~

沖返個涼~

換返套衫~

『好!返舖頭!』我就向舖頭方向出發~

喺行返舖頭既路上,我都會留意下...

留意下街上既人...

留意下…會唔會有閃光發出...

會唔會又遇到嗰位...坐輪椅既少女...

好奇怪呢~唔知點解,我個心總係凝住凝住會再俾我遇上佢...

可以再俾我見下佢...

我一直帶住呢種感覺行返舖頭...

但直到我行到返舖頭,都係無俾我遇到...

或者...其實...只係我太想見到佢姐...

一返到去舖頭,已經見到Yuki同Zoe都換好晒制服。

「乜你咁遲架!」Yuki谷一谷起塊面豬登...

「唉~做老闆係大晒架喇~」Zoe又勁無奈咁既樣...

一返到黎就俾兩個員工話...

『對唔住...對唔住...無下次...無下次...』我立即向佢地兩個鞠個躬道歉...

人地做老闆,我做老闆...

人地就可以名正言順咁例遲唔返~

我遲少少就俾員工話...

公平咩?!

唉...不過算啦~都係我唔好既...

我行返黎既時候,掛住望下望下...望下望唔望到嗰個坐輪椅既女仔...

搞到行得鬼咁慢...

搞到遲左返黎...

搞到要兩個女仔幫我頂左五分鐘...

係我衰~係我唔岩~俾佢地話我都係我抵死既~

「聽住先啦~」Yuki冷眼咁望一望我...

「仲唔快D入去換衫出黎幫手~」Zoe指住地下箱汽水...

『哦哦...遵命遵命...』我都係快快手手入去著返件制服出黎開工...

唔係既話,今日全日都唔會有運行...

我快快手手咁喺間房仔裏面著返件制服,出黎托返一箱又一箱汽水入倉。

同Yuki仲有Zoe一齊工作...

工作工作又工作...

執貨同補貨呢D粗重工夫,我多數都會爭住做~

而兩個女仔我都會叫佢地留喺Counter收下錢,或者喺房仔裏面抖下多既~

做男仔又好~做老闆都好~都總要有風度架嘛~

而喺我踎低執貨既期間,不時都會有D女仔企喺身邊揀下野...拎下野...企下咁...

有D女仔著熱褲黑絲...

有D女仔仲要係著短裙...

我踎喺側邊...可以好清楚咁睇到一對又一對雪白既美腿...

幼幼地既又有...

有少少肉地既又有...

修長既都有...

真係應有盡有...目不暇給...

之不過,我唔係話好色而走去𥄫!

講真嗰句,我又真係對色情野無話特別有興趣...

只係...我係好奇點解D女仔好似唔多避忌咁架呢?

話晒我都係一個男仔...

一個男仔踎左喺道...

你著住條短裙...就咁行到我身邊...蹬一蹬起對腳拎野...

我真係好容易就好清楚咁睇到...睇到你裙底...你條白色底褲...

而家我眼前,正正就係有一個女仔咁樣俾我睇晒佢裙底...

一對修長既美腿...雪白無暇...

裏面仲要著住條有Lace邊既白色底褲...

真係走晒光…蝕底晒架喇喎...

唉...我都係行去第二邊...做下其他野先...

始終...我都唔想佔人便宜...

同個女仔又三九唔識七...

無啦啦俾我𥄫到裙底...唔係咁好既...

咁如果話識架呢?又係唔係可以隨便𥄫呢?

識既話就更加唔應該佔人便宜啦!

咁有咩人係可以隨便𥄫,隨便佔便宜呢?

好明顯𥄫野同佔便宜呢種行為係唔正確既!

所以都係唔好諗咁多!

我都係避忌一點!專心做好自己既工作啦!

我一直避忌...一直專心做好自己既工作...

但有陣時,你越係想避忌...越係想專心工作...就越多引誘...

尤其係到左放Lunch既時間...

「𡃁仔哥哥~我地又黎喇~」一個著住藍色校服既女學生就跳下彈下咁走到埋我身邊,拍一拍我膊頭...

『你好你好...放Lunch喇?』我望一望身邊個女學生...再望一望佢身後班同學仔...

成班女學生陰陰嘴笑到衰衰咁...

「係丫~人地掛住你...一放Lunch就立即黎搵你喇~」個女學生向我打左一個眼色,再靠一一靠近...

我彈一彈開:『哦~係丫係丫...掛住我地D杯麵丫嘛~快D拎個去叮~快D拎個去叮~唔係一陣越黎越多人...』

「你都知你受歡迎呢~~~」個女學生仲係要黐埋黎...

『係D杯麵受歡迎...係D杯麵受歡迎姐...』我一個轉身諗住避開個女學生...

但就轉左入班女學生身邊...

成班女學生圍住我...笑得勁淫咁...

望住成班女學生淫笑...

又聞到佢地身上發出既體香...

搞到我...搞到我好似...好似抖唔到氣...好似就黎窒息咁...

好辛苦...好難頂...我就快...就快...

「你地唔好玩佢啦~」Yuki幫我解一解圍...

「我地邊有玩佢姐~Yuki師姐~」個女學生就擺下擺下條裙,行到埋Yuki身邊。

「你地丫~一陣搞到佢暈左就麻煩喇~」Yuki笑笑口咁擰擰頭。

「咁我咪幫佢做人工呼吸囉~~~」個女學生就𡁯一𡁯長個嘴仔...

「我都得架~我都得架~我都識人工呼吸架~」幾個女學生都𡁯一𡁯長個嘴仔...

望住成班女學生喺道扮可愛...

再望下門外又有班女學生入梗黎...

『Yuki...Zoe...我...我都係入去計計數先...呢道交俾你地喇...』我都係閃返入房仔道好D...

「佢真係好可愛丫~」

「我鍾意丫~」

「佢係我架!唔好同我爭呀!」

「你地唔好同我爭先岩呀!」

「好喇好喇~你地唔好咁狼死啦~一陣嚇到佢唔敢返工,就做死我地喇~」

入到房...

坐定定...

冷靜一下...

冷靜一下...冷靜一下...

都唔知而家係邊個唔冷靜...

而家D女仔...究竟諗梗乜架?

點解可以咁主動?

點解可以咁熱情?

明明就連名都唔知,就又挨又搭鬼死咁親密咁...

講D野又鬼死咁挑逗喎…

點解而家D女仔同以前嗰D,好似咁唔同咁架呢?

同以前嗰D咁唔同?

以前嗰D女仔係點架呢?

其實...我都唔清楚...

講起上黎...我好似...從來都唔了解女仔咁...

由細到大...都好似...無乜女仔Friends...

應該話...我成廿四歲仔...廿四年黎,就連一個女仔Friend都無...

除左讀幼稚園時,坐隔離既B女問我一加一等於幾之外,小學、中學到大學,都無女仔Friend...

更加唔好話拍拖...

點解會咁架呢?

係咯…點解好似咁難識到女仔架呢?

係唔係我太醜樣呢?

我拎起檯面上塊Hello Kitty鏡照一照...

都唔算啦...只係談不上靚仔姐...

我諗都唔會嚇到D女仔走晒去掛...

而事實上...我都覺得D女仔幾難接近...

我總係唔了解女仔心裏面諗梗乜...

總係覺得佢地好似...有道力場阻隔住咁...

我總係唔敢行近佢地...唔敢走近佢地...唔敢接近佢地...

我總係覺得...我一走近,佢地就會彈開咁...

一直我都係有咁既感覺...

直至到唔知幾時,突然之間D女仔變得好熱情...好奔放...

一時之間,我真係好唔適應...

我真係接受唔到囉...

唉...

我再坐多一陣...避多一陣...再喺個單面反光鏡偷偷望一望出去...

望到D女學生都好似已經走晒...

我打一打開隻門,探一探頭出去問一問:『D學生...走晒喇?』

Zoe笑笑口咁答:「嘻~走晒啦~」

『呼...終於都可以出返黎喇...』我呼一口氣,放一放鬆心情...

Yuki挨一挨喺個Counter道,古古惑惑咁望住我:「你都幾厲害架喎~吸引到咁多妹妹仔黎搵你~可以做我地既生招牌啦~曉揚哥~」

『咪玩啦...佢地都係貪喺七仔叮杯麵平,可以慳錢咋嘛…你地做中學生既時候未試過咩?』我睇Yuki同Zoe呢種女仔,喺中學既時候咪又係同嗰D女學生一樣咁既心態~

Zoe又笑笑口咁講:「點同呢~佢地一入黎唔見你,就問“個靚仔哥哥喺邊丫~~~”咁喇~仲話唔係專登黎搵你?」

『多口問句姐...』而家D𡃁妹係咁多口架啦...

而且仲好口不擇言嗰隻添...

「你都幾奇怪架喎~」Yuki打量一下我,「又無女朋友~俾女仔聊你又避開~其實你係唔係HEHE黎架~」

『痴線啦!我緊係唔係HEHE啦!只係未遇到岩架姐...』我都不知幾正常呀!

Zoe又打量一下我:「咁你鍾意邊類型既女仔丫~我可以介紹下架喎~」

『唔駛喇~』我擰擰頭...

「真係唔駛?我地都有唔少女仔Friends架喎~好多都仲係單身添架喎~好多都仲好恨拍拖添架喎~真係唔駛丫?真係唔駛丫丫丫?」Yuki又古古惑惑咁望住我黎追問...

『真係唔駛喇...』好似你地呢D岩岩先十八歲既女仔...介紹得D乜類型丫~

我諗咪又係同嗰D熱情既女學生差唔多咁上下...

唉...

我繼續喺舖面工作...

而Yuki同Zoe都會輪流入去房仔休息下~

佢地兩個始終都係女仔,我都唔忍心要佢地咁操勞既~

而我不論企喺Counter裏面又好,定抑或執下貨上架都好,都會留意下出面...

特別係當聽到有一大班人喺出面經過,我都會望一望出去...

望一望...睇下會唔會係嗰個輪椅少女...

睇下會唔會有機會再見下嗰個輪椅少女...

我留意左好耐...

聽到唔少次出面傳黎一班人既歡樂聲...

望過出去好多次...

「咁我走先喇~聽日見啦~拜拜~」直至到Zoe放工...

「我男朋友黎接我喇~聽日見啦~拜拜~」直至到望住Yuki上左架灰色Honda後離開...

我都係見唔到輪椅少女既蹤影...

夜喇...已經到左夜晚喇...睇黎今日都唔會見到佢架喇...

而到左夜晚呢個時候,都總會見到一個人...

一個男人...

每晚差唔多呢個鐘數,只要我係喺舖面,我都總會見到呢個男顧客...

呢個男顧客總會帶住一絲絲苦澀味,行到去雪櫃面前...

總會喺雪櫃拎起支生力...

俾完錢之後,又總會一個人坐喺出面張石凳...拎出部手機...撳下撳下...

呆呆滯滯咁望住部手機好一陣子後,收返埋部手機,再一個人喺道飲悶酒...

飲完支酒後…又會一個人低住頭咁行...行下行下...我諗應該係行返屋企掛~

望住呢個頹廢既背影越行越遠...越行越遠...

唔知呢個男仔背後有D乜野故事呢?

會唔會好似D網絡故事咁,咁驚天地,泣鬼神架呢?

我不知道...

或者真係啦...

或者每個人都會有佢自己既故事...

動唔動聽,都係自己知...

認真講句,其實我真係好想幫下呢個男仔...

之不過...我又可以幫到D乜呢?