朝早起床,望一望街上...

返工既返工...

返學既返學...

每個人每一日既生活方式,都好似好死板...好沈悶...無乜點變...

變既就只有...天氣...





呢幾日,冬天唔似冬天...秋天唔似秋天...春天唔似春天咁...

時凍…時濕...時涼...時暖...

其實都唔係呢幾日...

呢幾年黎,香港既天氣都係咁~

廿幾度既聖誕又試過~





零度既一月又試過~

二月打風又試過~

五、六度既三月都試過~

而家D天氣真係好似人一樣,咁變幻莫測~

好似人一樣...





好似女人一樣...

好似Stella一樣...

呢幾日,我都會諗起Stella...

諗起佢既笑容~

諗起佢既冷漠...

諗起佢既笑聲~

諗起佢既聲線...

諗起佢講過既說話...





諗起佢嗰句“可樂可以令人開心。”...

諗起佢嗰句“我只會喺人前扮開心...先會用上可樂。”

諗起佢嗰句“我行既路,比正常人要用更多既時間先去到目的地。所以無咁既閒時回望身後。”

返舖頭又諗...

返屋企又諗…

沖涼又諗…

瞓覺都諗...





我都仲係諗唔明...諗唔明點解一個平時會同班朋友嘻嘻哈哈,好樂天既女仔,到左一個人既時候,總係變得...冷漠...

其實...係唔係只係因為我個人比較悶呢?

係唔係因為我講D野引唔起人地接落去呢?

係唔係人地根本就唔想同我傾計呢?

或者真係...

或者識女仔真係唔係咁易...

尤其係我呢D平平無奇既毒男...

唔似得D花花公子,一開口就氹到D女仔投懷送抱...





我地根本就唔識得點樣去識女仔...

有時上高登諗住取下經~

成日都只係睇到人地點FF~

再唔係就係得啖笑既潮文~

一D實際用途同參考價值都無~

唉~不過唔緊要啦~

識女仔係要俾D耐性架喇~





Yuki同Zoe都有講過,話女仔係比較慢熱架喎~

唔會咁容易同D陌生男仔熟絡~

起碼都要見多幾次面~傾多幾次計~慢慢先會放下戒心~先會多D野講~

仲話千萬唔好太過急進~

有時講錯一句野,個女仔係唔鍾意聽,或者覺得無興趣,又或者踩中個女仔既死穴,咁就可以鳴金收兵了~

所以話呢~都係慢慢黎~俾D耐性~繼續Keep住一有時間就去市鎮公園跑下步~

睇下有無機會巧遇Stella先~

不過講真嗰句丫...其實都真係幾攰架...

日日都要踩兩更...

返到屋企沖完涼都已經係凌晨...

瞓唔夠幾個鐘,就要起身落公園跑步...

呢種生活都唔可以話係健康...

仲有D似係燃燒梗生命添...

咁搞法...我會唔會未同到Stella熟絡,就已經不支倒地架喇?

所以話,識女仔真係一D都唔容易~

唉~都係唔好諗咁多~

快D換衫落去巧遇Stella...跑步好過~

我快快手手換好套運動裝~著返件風褸~

出發!

我一如既往咁,帶住期待既心情跑向市鎮公園~

今日既天氣都真係有D暖~

凍左幾日又暖返一兩日咁...真係好奇怪~

不過都無所謂啦~都可以叫做幾好跑既~

我就加快速度跑~

好似跑梗短跑咁衝住黎跑~

同幾個趕返工既西裝友擦身而過~

又同幾個已經遲大到既女學生擦身而過~

好快,我就跑到黎市鎮公園~

好快,我又跑到黎湖邊~

好快,我又見到Stella~

無錯喇~今日Stella都有黎到湖邊寫生~

前幾日都食白果...今日終於又遇到Stella~

真係好喇~

不過,我都唔可以太過興奮~

唔可以太過熱情~

又唔可以太過主動~

唔係既話,又會嚇親人~

呢D都係Yuki同Zoe教既~

我諗...識女仔呢家野都係聽下女仔既意見會好D~

『唔~~~呼~~~』我就深呼吸一口~

慢慢行過去...慢慢行過去湖邊...慢慢行過去Stella身後~

我望住Stella既背影...一步一步咁行過去...

微風輕輕吹一吹起Stella把長長秀髮...

身上仲散發出陣陣光芒...

真係好似仙女一樣咁吸引...

講真一句...好似Stella呢種咁有仙氣既女仔,我諗應該都會有好多人追...

好多人追?

係喎…諗到呢點就令我有D卻步...

Stella會唔會已經有男朋友架呢?

你知啦...Stella平時都有咁多朋友喺身邊...

男男女女既都有...

一個有咁多朋友既女仔,有男朋友都唔出奇丫...

如果真係有男朋友既話...我咁樣走去識人...人地又會唔會覺得我好壞架?

而人地既男朋友,又會唔會唔係咁Like呢?

我又會唔會影響到人地兩個之間既感情呢?

影響到佢地兩個之間既感情...

一諗到呢點,我心裏又有少少興奮...

興奮?!

點解會係興奮架?!

雖然話呢種感覺只係存在左0.5秒...

但只係呢0.5秒既興奮,都令我帶黎無限既罪惡感!

如果人地兩個既情感係好地地既話,因為我叉左隻腳埋去,影響到人...我咪成為千古罪人?!

我越諗就越唔對路...

越唔對路就越大罪惡感...

就喺呢個時候...

「曉揚?」Stella背住我問左一句...

『呃…係…係…早晨丫Stella~』Stella竟然察覺到我喺佢身後?

我都企得幾遠下...

都差唔多有半個羽毛球場咁遠架喎...

「你企喺道都有好一段時間。係道偷窺我?」Stella冷冷咁問一句。

『唔…唔係唔係!我...我咁岩諗起D野姐...』我立即行到Stella身邊,揮晒手,擰晒頭咁掩飾!

連我企左喺道有一段時間都知?!

Stella既感應都幾強架喎...

「嗯…」Stella冷冷放下一句。

我偷偷咁望一望Stella大脾上既畫簿:『好靚丫~你畫得好靚丫~』

今日Stella畫既,唔係黑白素描~

今日Stella係用木顏色黎畫畫~

充滿色彩既湖景~

當中散發住...點點哀愁?

點解又會係...點點哀愁架呢?

明明就已經係充滿色彩架喇~

點解又會...又會係...

而且就咁睇Stella幅畫,又唔係好似眼前呢個湖...

Stella畫中既湖...水好滿…樹好綠...草好長...仲有D鴨仔喺湖上游梗水添~

同而家眼前既...幾近乾涸既湖...落晒葉既樹...草都枯黃晒...截然不同...

「嗯...」Stella又冷冷放下一句...

『呃....呃...』

見Stella咁冷淡咁...

好似有幅厚厚既牆壁隔住咁...

搞到我都唔係咁好意思講野...

總係怕會...講多錯多…

所以...又再Dead air…

靜靜地企喺Stella身邊好一陣子...

我個心都係跳到“卜卜”聲...

唔係因為我跑得太急既關係...

而係喺Stella身邊,我總係好緊張...

可以企喺天使身邊,可以企得咁近,係人都會緊張架啦~

再加上Stella身上既氣味...

我輕輕索一索…再用力索一索…

原來Stella係咁香...

其實係唔係每個女仔都咁香架呢?

Yuki身上又係...

Zoe身上又係...

不過,每個女仔身上既香味都係獨特既...

都係獨一無二既!

就好似而家既Stella咁...

Stella身上既香味...總係好似...淡淡既清香...

就好似荷花一樣...

果然係“出淤泥而不染,濯清漣而不妖;中通外直,不蔓不枝;香遠益,清亭亭淨,可遠觀而不可褻玩焉。”!

我再用力索多兩索!

就喺呢個時候,Stella望一望上黎,望一望住我!

『呃...朝早既空氣真係清新喇~』我尷尷尬尬咁笑一笑…

「嗯...如果係早多十年前,會更好。」Stella再望一望返個湖。

呼...好彩無俾Stella察覺到我聞佢既體香姐...

你知啦~唔係個個女仔都鍾意俾人聞自己既體香架嘛~(我估...)

仲要俾一個唔係識左好耐,又唔係好了解既男仔聞喎~(我估...)

可能會令人地覺得好變態架嘛~(我估...)

所以都係講個美麗的謊言會比較好~(我估...)

『十年前?你十年前都有黎呢道?』我跟住Stella既視線,望向快要乾涸既湖面。

「嗯...我細細個既時候,經常會黎呢道...」Stella點一點頭。

『十年前…我有時都會路過呢道...呢道都...變左好多...』我都點一點頭...諗一諗...

十年之前,呢道無咁多大媽喺道賣藝...

呢道係比較清靜D...

有D父母會帶D小朋友呢黎道行下~玩下~

我地做學生既,又會黎呢道跑下跳下坐下吹下水~

係一個比較喜樂既地方~

係一個自然既地方~

但而家呢?

連公園都好似變得嘈吵...變得...烏煙瘴氣咁...

點解會變成咁架呢?

我地既家...

我地身處既環境...

我地身處既香港...

點解...又由幾時開始...變成咁架呢?

「聽父母講...喺我細個既時候,佢地有帶過我黎餵鴨仔...不過我太細個...無印象...」Stella望下湖邊...望下草叢...

『嗯...我都聽講過,之前呢道係有好多鴨仔~仲有好多人會帶D蝦條丫~麵包丫~黎餵佢地添~可惜丫~自從有H5N1之後,再見唔到有鴨仔LUU~』我都係聽返黎~

聽父母講~

「你都有聽過?咁你自己有無黎餵過?」Stella望一望我。

『呃...我...我都唔係好記得喇~』俾Stella望一望,我又有少少怕怕地羞...

Stella對眼...太迷人...

尤其係帶住笑意既時候...

尤其係無咁冰冷既時候...

兒時既回憶都比較模糊~

總係...回想不起~

就算回想起,又好似疑幻似真咁~

總係唔可以好肯定~

又會Miss左好多野~

或者回憶真係唔可以Keep一世~

「係丫…聽講再耐D之前,呢道係有艇仔租...仲係嗰D用腳踩既水上單車...」Stella望一望自己對腳...

『係丫~我聽父母講,佢地後生既時候,都會呢黎道拍下拖~又會黎租下水上單車~喺湖上追下鴨仔咁~好過癮架~佢地話黎呢到拍拖,算係最低消費喎~』其實我父母都唔係窮丫~

但就係鍾意計住計住咁~

或者越有錢既人,就越鍾意計住計住啦~

如果唔係,邊得黎咁有錢?

「唔知道...喺載滿水既湖上面,踩住水上單車,追住鴨仔,會係乜野感覺呢?」Stella望一望自己對腳,又望一望個幾近乾涸既湖面...

『唔...我諗...都應該幾過癮既...』我諗下諗下...又諗下諗下...

可能係我既幻想力不足...

我總係好難去幻想出一D情境...

要講到感覺既話,就更加難啦...

感覺喎~好虛無飄渺架嘛~

點可能用三言兩語~兩文三語講得清~講得楚呢~

只見Stella又諗下諗下...諗下諗下咁:「過癮...係過癮丫...」

Stella佢...諗梗D...乜呢?

我一直望住Stella...

一直打量住Stella...

Stella轉下轉下手上支筆...又諗下諗下...

又放空咁呆下呆下...

好似去左...另一個世界咁...

好似...唔喺我而家身處梗既世界咁...

究竟Stella諗梗D乜呢?

究竟喺Stella既腦海之中,又存在住D乜呢?

究竟喺Stella既眼裏,又出現左D乜呢?

係現實既回憶?

抑或係似是而非既幻想世界既?

我地人既腦真係好奇妙。

總係可以幻想出不曾存在...未來都未必有可能發生既景象。

係其他生物無既野。

或者呢樣就係點解人類會係萬物之靈既原因。

「係呢...你係唔係好鍾意跑步?」Stella突然開口問一問!

『呃…係丫~係丫~我都真係幾鍾意跑步架~跑步有助身體健康丫嘛~』突然俾Stella咁樣問一問,我都無心理準備諗點答添...

話就話我係幾鍾意跑步~

話就話跑步有助身體健康~

最初既時候,或者真係咁諗既~

但其實,我係醉翁之意不在酒...

我之所以一有時間,就喺呢個時候黎跑步,都係為左見多你幾面姐~

從古至今,好多男仔都係咁~

去人舖頭食麵,都係為左見個女仔多幾面~

唐伯虎為左老點秋香,都扮慘走入去華府做9527啦~

所以我咁做,都唔係好衰姐~

之不過,唔係好衰還唔係好衰,都唔可以話俾Stella聽架嘛…

呢D野...對女仔黎講...總係會覺得你好似好有機心咁...

呢D都係Yuki同Zoe教既~

係唔係真?又岩唔岩?

咁我就真係唔知咁多喇...

不過女仔都係了解女仔多D既~

我諗信下都無衰既~

「究竟...跑步係乜野感覺架呢?」Stella諗下諗下咁望住個湖...雙眼好似空洞一樣...

『係乜野感覺...唔...』我又諗下諗下,『個心越跳越快...越黎越多汗流出...對腳越黎越攰...越黎越重咁...』

講開又講,我又好似無乜留意跑步喺乜野感覺...

平時我都係帶住一份“Stella會唔會喺道?”既心情跑~

Stella喺道既話,我就坐喺Stella身後,望住佢寫生~畫畫~

Stella唔喺道既話,我就帶住既失望,又帶住一絲期待下個圈會見到既心情,圍繞住個公園跑~

我都真係唔係好...唔係好在意我自己跑成點...

又唔係好享受跑步既過程...

「係丫…」Stella摸下摸下自己對腳...

Stella對腳...

唔...

『係呢~你對腳點解會...』我一講到呢道,先發現自己講錯野!

我真係停都停唔切!

你知啦...崩口人忌崩口碗!傑青贈長鼻木偶...

總之就係講錯野啦!

「我對腳...」Stella摸下摸下對腳,「醫生話係一種先天性疾病...」

『先天性疾病?』病呢家野,我真係唔係好識...

乜有種病係會令對腳行唔到既咩?

而我睇Stella對腳....都好正常...

同一般少女既美腿都無乜分別...

都係咁修長…

但點解就...

「嗯...由細到大,我都行唔到...但對腳就會正常發育...醫生話呢種先天性疾病係會影響脊椎神經...令下半身失去知覺...」Stella抵一抵頭…

咁係唔係即係下半身癱瘓?

呢方面我真係唔識喎...我真係接唔到落去...

「醫生話呢種病好罕有...醫學界都唔清楚...只係知有少數個案...係可以完全康復...只要等...只好等...十年...廿年...總有機會...」Stella微微一笑…

Stella呢一下微笑...充滿住...萬千種感受...

並唔係一個普通人可以笑到出黎...

必定要經歷過...萬千種痛苦...萬千次期待...又萬千次失望先可以累積到出黎...

「我係時候要走喇...拜...」Stella輕輕放下一句...

碌下碌下...Stella雙手碌下碌下輪椅兩邊既輪子...

我望住Stella既背影...越黎越遠...越黎越遠...直到又再一次喺我眼前消失...

我突然覺得自己好渺小...

我覺得自己...好似乜都做唔到咁...

人類既力量太小喇...

而且仲好脆弱...

好多野都好似...有心無力...無能為力...

究竟我仲可以...做到D乜呢?

我帶住呢種無助又無奈既心情行返屋企...

沖個涼...

換套衫...

行返舖頭...

「尹曉揚!明知今日就係得我一個返!你都咁遲先返黎!係唔係想做死我呀?!」一入到舖頭,今次就俾Yuki叉住條纖腰,企喺門前,向我咆哮...

『對唔住...對唔住...』我就垂頭喪氣咁同Yuki Say Sorry…

其實呢幾日都係咁...

唔係俾Zoe話...就係俾Yuki話...

我呢排真係...失晒魂呢...

「仲唔快D入去換衫出黎幫手?!」Yuki谷到塊面豬登都脹晒...

『知道...知道...』我繼續死下死下咁...入去著返件制服...

死下死下咁執貨...

死下死下咁點貨...

至於收錢喇喎,Yuki就唔肯俾我做喇...

佢話怕我收錯錢就麻煩喇...

我就只好繼續死下死下咁補貨上架啦...

但當然,喺我咁唔專心下工作,自然又會經常做錯野...

「哎呀!尹爺呀尹爺!你再將D避孕套放喺香口膠個架道既話,好快就俾D家長投訴架喇!哎呀!你都係唔好執喇!你返入房自閉啦!!!」Yuki一手拎走晒我手上D避孕套,推一推走我...

『哦...哦...對唔住...對唔住...』唉...我都係返入房道自閉好了...

正當我死下死下咁返入房之時...

「哈哈哈~你未瞓醒呀~?」我聽到門外...

「邊個話架?你先未瞓醒丫~」有一班人喺道嘻嘻哈哈...

「哈哈哈~你隻賴瞓豬~我頭先叫左你幾耐先起身丫~~~」BiLiBaLah...

「哈哈哈~你先似豬丫~肥到呢~」有男有女...

「哈哈哈~你先肥呀~~~」呢班男女既聲音...

「哈哈哈~講開又講~點解Stella唔肥既?」Stella...

「哈哈哈~因為天生麗質難自棄囉~」係Stella把聲!

我立即回頭一望,望出門外!

我就望到坐喺輪椅上既Stella!

無錯,我已經無視晒Stella身邊既男男女女!

我既眼中,就只有Stella!

而Stella正正就望左入黎!

望住左我!

望住我微微一笑!

呢種笑容...充滿幸福溫暖既笑容...

同喺公園裏…湖邊既時候...好唔同...完全唔同...

點解會...點解會...

「買左今期既100毛喇~Stella~俾你睇左先~」有個肥肥地既...男仔身影擋一擋住我視線...

「唔該晒~」Stella就俾一大班男男女女推住行...圍住行...護住黎行...

Stella佢...對住我笑...對住我笑...

Stella佢對住我笑...

呢種笑容...

代表左D乜呢?

「仲唔快D入去?!又喺道發咩呆喔?!」就喺呢個時候,我又俾Yuki話...

『哦哦...』我諗下諗下咁行入房仔...

我喺房仔入面諗下諗下...

諗左好耐...

諗到去夜晚...

我都係諗唔明...諗唔明Stella既微微一笑,係乜野意思...

「Zoe~你唔好俾尹曉揚佢收錢丫~佢呢期都失魂落魄咁架~」直至到Zoe黎接Yuki更...

「嗯嗯~我知架喇~條友都唔知做乜架~成日都呆下呆下咁~」Zoe打量我幾眼...

「嗯~咁我走先喇~拜拜~」睇住Yuki離開...

「嗯~拜拜~」睇住Yuki坐上灰色既Honda...

再喺舖面道做紙牌公仔...

再次見到嗰個每晚都黎獨自一個喺出面賣醉既男仔...

我開始覺得...自己同佢都無乜分別...

總係有無數咁多…問題喺心中...

都係一樣...咁慘...

慘?