坐喺一間以黑色為主既咖啡店...飲一啖藍山咖啡...

咖啡店...

總係好似怪怪地咁...

話就話佢呢道個店名係叫做“Whirling Coffee”~

之但係...



佢呢道充滿住濃厚既藝術氣息...總係會令我覺得...佢呢道係似藝術館多過咖啡店...

我拎起杯藍山咖啡,細味一口...

喺充滿住濃厚既藝術氣息既咖啡店裏,嘆一口咖啡,真係生活態度~

我都好耐都未試過...

我好似根本就未試過,生活態度...



細細個唔懂得享受...

大個左就無時間享受...

難得今日可以忙裏偷閒一下~

真係好難得呢~

而點解我可以咁難得有個忙裏偷閒既機會?



講起上黎...就真係...奇妙~

是咁的~

就喺尋晚同完個每晚都黎買酒既嗰個男仔飲完酒之候...

『Zoe…做乜搞到手忙腳亂咁丫...』我冷眼望一望Zoe...

「多野做丫嘛~」Zoe好唔專心咁一邊執貨,一邊答我...

『係唔係成日諗住人丫?』我繼續冷眼望住Zoe...

「邊係姐~邊有姐~諗住邊個姐~」Zoe仲係好唔專心咁一邊執貨,一邊答我...

『嗰隻依唷丫...』我繼續Keep住冷眼望住Zoe...



「依唷都唔係人~」Zoe仲係Keep住好唔專心咁一邊執貨,一邊答我...

『你都話佢唔係人呢?』係你自己講架咋~

你自己都覺得佢唔係人啦~

咁仲黐埋去人地道…

女人真係咩年齡都係咁犯賤~

噢~突然之間,我發現我開始了解女人了~~~

「點丫你?咁多口水~係唔係幫手架?」



『好喇好喇好喇~~~幫喇幫喇幫喇~~~』都係幫下Zoe手好~

佢而家咁唔專心~

發晒姣咁~

成個腦都係嗰隻樣衰既依唷~

再唔幫佢手既話,真係成間舖都俾佢敗走都唔出奇~

我繼續留守喺舖面幫Zoe手執下貨~

又抹下D檯~抹下D櫃~

『多謝晒~杜蕾斯持久裝買一盒送一個喎~要唔要試下丫?』又喺Counter道收下錢~



一直做~一直專心過Zoe咁做~

做到Jerry同明仔黎接我地更~

「拜拜喇~」Jerry同明仔向我同Zoe揮揮手~

『拜託晒你地喇~拜拜~』我就同Zoe行出舖頭~

“呼~呼~”喺寒風吹送下...

“咯 咯 咯”我同Zoe就喺暗黃色既街燈照射下...行下行下...

天氣真係開始凍...



仲凍得好緊要下...

望一望住Zoe,攬住依唷行...

『喂…你可唔可以唔好攬住隻咁樣衰既依唷笑得咁姣?』我冷眼望住Zoe...

睇到佢攬住隻咁鬼樣衰既依唷都笑得咁甜...真係有D頂佢唔順...

「咩姐~咩樣衰姐~都不知幾可愛丫~仲有呢D唔係叫做姣~係叫做幸福~你呢D未試過幸福既,係唔會明架喇~」Zoe仲係笑到鬼咁姣...

『哦...』係丫係丫~我唔知咩叫幸福丫~

女人...總係由自己身上出發~

噢~突然之間,我又發現自己再了解女人多一點了~~~

「咁你呢~咪又係成日攬住本畫簿~」Zoe冷眼望一望住我...

『我...我係成日攬住本畫簿...但我無笑到含春咁既嘴囉~』我攬住本畫簿,係我重視佢!

係我好小心翼翼咁保護住佢!

我仲要將本畫簿,完好無缺咁還返俾Stella架嘛~

「喂~你本畫簿喺邊道得返黎架姐~」Zoe估估惑惑咁對住我笑...

『多事喇你~』我先唔會講你知~

「關心下你咋嘛~」Zoe用膊頭撞一撞我膊頭...

『唔好對我有意思~我心有所屬架喇~』

「鬼對你有意思丫~員工關心老闆既狀況都好正常姐~」

『乜唔係老闆關心員工既狀況先係正常架咩?』

「緊係唔係啦~員工關心老闆既狀況,睇下會唔會無糧出~又會唔會好快執笠~要做好跳船既準備架嘛~」

『下?!乜係咁架咩?!』

「係丫係丫~快D講黎聽下啦~~~~」

『唔講~』

「講啦~」

『唔講~唔講~』

「講啦~講啦~」

就係咁你一句我一句咁,就送左Zoe返屋企~

我又一個人行返返屋企,沖返個涼,換返套衫...

睇住放喺床頭道既畫簿...Stella本畫簿...

「或者...你可以請教下情聖喎...」

情聖…

請教下情聖…

好啦~

我就坐喺床邊,打一打開部iPad...

『情…聖…』我喺個Google搜尋器上輸入“情聖”呢兩個字...

頁面一轉,就出現左周星馳套《情聖》…

情聖…情聖…

仲要好幾頁都係講佢呢套電影...

話就話Google乜都搵得到...

但好似“情聖”呢D咁普遍既名,真係好搵架喎...

點好呢?

我唔係真係走去逐頁睇,睇到有個似為止丫嘛?

咁睇法,真係到清明都未搵得到架喎...

點好呢?

應該點搵好呢?

「嗯...網上面有一個人話所有情困也可以一一解開~」

所有情困也可以一一解開...

係喎…嗰個男仔係有咁講過架喎...

我喺個Google搜尋器上輸入“所有情困也可以一一解開”...

Google第一個搜尋到既係一個叫“情性”既Facebook專頁...

『情性…情聖?』

呢個情性...會唔會就係...

我諗一諗之後,撳左入去個Facebook裏面...

視窗一打開,有個置頂Post就寫到明話“只要你不是戀兄、搶男友、師生戀,所有情困我也可以為你一一解開。”...

睇黎我要搵既情聖...就係呢個情性...

所有情困都可以一一解開...

係唔係真係咁容易丫?

要知道情困呢家野,同人蠢一樣,都係無得醫架喎...(Yuki成日都咁話我...)

係唔係真係解得開架?

又係唔係真係幫到我架?

幫唔幫到...解唔解得開...

問下咪知囉~

反正Try Try Not Die丫嘛~

好啦~就Inbox佢問問先啦~

我喺個Facebook Messenger快快手手打左幾隻字:“我有情困”

唔駛過幾秒就有回覆!

我睇一睇個Message Box...係一個日期、時間、地點...

嗯?要約出黎見架?

仲要係聽日添...

咁我咪返唔到去舖頭幫手囉?

返唔到去舖頭幫手...返唔到去舖頭幫手...

聽日又係同Yuki仲有Zoe同一更...

平時都俾佢地兩個話得多喇...

成日都無大無細丫喇...

等我今次...就做個無責任感既老闆先得!

“OK”

“到時見。”

做個無責任感既老闆!

我拎一拎起部電話,喺個“七仔之家”個Group道隨便咁打左句“聽日我有D事返唔到舖頭”~

嘿嘿~就俾D下馬威你兩個睇~

等你地兩個𡃁妹成日都咁得戚呀喇~

我再望一望本畫簿...

唔...

希望...希望真係可以...解開我既情困啦...

於是,我就喺今日呢一個時間,黎左呢間名為“Whirling Coffee”既咖啡店中,等一個自稱情性既情聖出現。

我拎一拎起杯藍山咖啡...向住店舖內既牆壁行下行下...

望住掛喺牆壁上既...黑白相...

一幅又一幅…大大小小既黑白相...

整間店舖都掛左...擺放左...唔少大大小小既黑白相...

一幅又一幅黑白相裏面,有花~有草~有太陽~有雲~有雪~有樓~有學校~有大動物~有小動物~有水果~有小昆蟲~

就係唔見有...人既出現...

點解呢?

點解樣樣都有,就係無人既出現架呢?

係唔係因為個攝影師唔鍾意影人呢?

之但係影人又有乜唔好呢?

影人幾好丫~

可以將最美麗~最動人~最青春既時刻留住~

第時老左再睇返,都會會心微笑~

而最令我留意既係,喺每幅相之中,都散發住點點哀愁...

點點哀愁...點點哀愁...

就同Stella所畫既畫一樣...總係散發住點點哀愁...

Stella…我又諗起你喇...

就喺我成個腦海都係Stella既笑臉...冰冷既面孔之時...

「你好~」有把成熟穩重既男仔聲喺我背後出現...

我回頭望一望,就望到古天樂企左喺我背後!

古...天...樂...?!

我再定一定神,望清楚D眼前呢個拎住杯...Espresso喺手既古天樂...

眼前呢個古天樂...著上一身西裝...

但就算著上一身西裝,睇起上黎都只不過係廿六、七歲咁上下...

唔係真係古天樂...

只係好似...勁似...激似~

常言道“人有相似”...

估唔到真係可以咁似...

而呢個激似古天樂既男仔,點解會黎同我Say Hi架呢?

咦...喂…唔通...眼前呢個古天樂...就係我今日要等既...

「我就係情性~」古天樂...唔係!情性自我介紹!

果然!果然眼前呢個激似古天樂既男仔,就係我今日要等既...自稱可以為我解開情困既...情性既情聖!

「你就係...曉揚?」情性打量一下我...

『係…係丫…我就係曉揚...』俾情性既懾人魅力所吸引下,都俾唔到反應添...

真係極危險...

身為一個男仔,竟然會俾另一個男仔吸引住...

我會唔會望多兩望,變埋HEHE架?

都係小心D...小心D好...

「係呢...關於你既情困...唔係同戀兄、搶男友或者係師生戀有關架嘛?」情性拎住杯Espresso飲一口,然後行到去牆邊既梳化...坐一坐低...

『唔...唔關唔關...』我都跟住情性,坐到去佢對面張梳化上...

唔...其實我就有D奇怪...

奇怪在點解情性會列出唔可以係同戀兄、搶男友或者係師生戀有關架呢?

呢個疑問,早就喺尋晚喺網頁見到之時,就已經萌生~

只係...我又唔係咁好意思問...

反正自己唔係,就無謂知咁多~

「咁你有乜野情困?」情性翹一翹腳,雙手合十,望住我...

『我既情困...我鍾意左一個女仔...』我直接咁同情性講...

「鍾意人咪追人囉~」情性輕輕鬆鬆咁講。

『呃...但人地好似唔係好Show我囉...』真係話咁易咩?

「嗯?你得罪左人丫?」情性疑惑咁問。

『唔…又無乜野得罪到佢喎…』我諗無掛...

「咁...你講錯野?」情性繼續帶住疑惑咁問。

『呃...我諗...我無掛...』我都真係唔知自己有無講錯野...

就算有講錯,都唔知自己講錯左D乜野...

「唔...」情性諗左一諗,「咁你同佢係乜野關係?」

『乜野關係...』俾情性咁樣問一問,我又唔係好知點答好...

我同Stella係乜野關係...

『乜野關係都唔係喎...』我諗咁答就最貼切...

「下?」情性一頭問號咁,好似唔係好明我講乜咁。

『即係...我同佢...久唔久會見到面...又講過下兩句野咁...』我諗就係咁啦...

「即係話...」情性諗左一諗,「你未算係識到人...我咁講岩唔岩丫?」

『嗯嗯...都可以咁講...』我諗係掛...

「咁你問左人地叫咩名未先?」情性飲一口咖啡。

『佢有同我講,都有問過我叫咩名...』仲要係Stella佢主動同我講架~

「講得個名俾你聽...又問得你叫咩名...都算叫做唔係抗拒你丫...」情性諗下諗下...

『唔抗拒我?咁即係點丫?』係唔係即係有機丫?

「即係佢都應該唔會介意同你做Friend~你係唔係太主動,嚇親人丫?」情性奸奸地咁笑笑口...

『無丫無丫!我都唔係好主動咋嘛!』我邊算係叫做主動姐...

「哦?咁對人做過D乜丫?」情性古古惑惑咁打量住我。

『無丫…我都係讚下佢畫畫靚...讚下佢著衫好睇...咁咋嘛…』如果咁都叫主動,呢個世界個個都係狗公啦...

「咁又真係無乜特別咋喎...」情性諗左一諗,「咁佢既性格係點架?」

『佢既性格丫…有時笑得好燦爛...好似天使一樣咁燦爛!』天使一樣既Stella~

「你見過天使喇咩?」情性冷眼望一望我。

『未...』有邊個真係見過天使丫?!

「咁你又知佢有時笑得好燦爛好似天使一樣咁燦爛?」情性繼續Keep住冷眼望住我...

『呃...』形容係咁形容架啦...

「咁幾時先會笑得好似天使一樣咁燦爛?」情性繼續問。

『佢同一大班Friends一齊既時候...』你自己咪又係咁樣形容...

「咁佢唔笑得好似天使一樣咁燦爛既話,又會係點?」情性拎一拎起杯咖啡。

『會好似好冷漠咁...就算係笑面裏都會帶住點點哀愁...又好似好多野諗咁...好難觸摸...』點解我會覺得情性問到好似醫生睇症咁架呢?

「好似好冷漠...又好似好多野諗...好難觸摸...就算係笑面裏都會帶住點點哀愁...笑面裏帶住點點哀愁...」情性拎住杯咖啡...諗下諗下...

諗下諗下...諗下諗下...

好似好多野諗咁...

好似眼前出現左好多野咁...

好似唔屬於呢個空間咁...

好似...迷失喺幻想之中...回憶之中...

過左好一陣子...

沈寂左好一陣子...

『喂…喂…情性?』我叫一叫仲發梗呆既情性...

「呃呃...嗯嗯...唔好意思...」情性飲一啖咖啡,定一定神...

呢個情性...無啦啦喺道發咩野呆呢?

或者情聖都係多野諗D既~

「唔...」情性飲完一啖咖啡之後,諗左一諗,「咁佢仲有乜野特徵?」

有咩特徵...

『唔...』我又諗左一諗,『佢係一個...坐輪椅既少女...』

我諗呢個都係Stella最大特徵...

「嗯...原來係一個輪椅少女...」情性諗下諗下,又點下點下頭,又飲下飲下杯Espresso。

『唔...佢話過...佢一出世就已經與輪椅結伴...醫生話呢種先天性疾病係會影響脊椎神經...而且呢種病好罕有...只係知有少數個案...係可以完全康復...』我好記得Stella係有咁講過...

Stella講過既每一個句,我都記得好清楚。

「原來世上有D咁既疾病...我地人類真係好渺小呢...」情性諗一諗,點一點頭。

『嗯...』我都覺得,我地人類真係太過渺小...

好多野都做唔到...

亦有好多野都改變唔到...

就算係維持現狀,都可能要花上好大既氣力...竭盡所能...

可能咁先可以勉強維持...

可能咁先叫唔死得...

可能咁已經叫做好好...

因為有好多人拼埋條命,都未必生存到...

我地人類就係一種咁既生物...

一種自以為係萬物之靈,但實際上係無能為力既生物...

「嗯...要知道,佢同你係好唔同~所以要走入佢既世界,係一D都唔容易呢~」情性飲一啖咖啡,點一點頭。

Stella同我係好唔同?

有咩唔同呢?

大家都係一個...無能為力既人咋嘛…

「要走入佢既世界,可能要花上更多既心機~」情性又點一點頭。

『要我花上幾多心機都無問題架!』只要可以走入Stella既世界!

「可能要花上更多既時間~」情性又再點一點頭。

『要我花上幾多時間都無問題架!』只要可以俾我走入Stella既世界!

「可能...你要有一份...」情性諗一諗,點一點頭,「同理心~」

『要我...』同理心?

「嗯~最重要既到係...要有一份同理心~」情性用上真誠既眼神望住我。

要有一份同理心?

「好好地諗下...如果你真係真心愛佢既話,你應該會知道...你應該要點做~加油喇~」情性行到去我身邊,拍一拍我膊頭之後,離開咖啡店...

情性離開後,咖啡店又剩返我同個女店員...

我就一個人坐喺張梳化道,諗下諗下...

同理心?

何謂同理心呢?

我立即拎部手機出黎,上網Check Check先~

而家呢個年代真係好方便~

有咩唔明都可以立即拎部手機出黎上網Check~

所有既資訊想知道就立即可以知道~

唔似得十年前咁,又要周街搵電腦~又或者返到屋企先有電腦上網搵得到~

所以我成日都覺得,D專家話科技令人類倒退係錯誤既說法~

我開一開個Safari~喺個Google道打個“同理心”~

頁面一轉,就見到萬能既維基百科~

撳入去睇睇先~

我一撳入去...

『同理心...Empathy,又叫做換位思考、神入、共情,指站在對方立場設身處地思考的一種方式,即於人際交往過程中,能夠體會他人的情緒和想法、理解他人的立場和感受,並站在他人的角度思考和處理問題。主要體現在情緒自控、換位思考、傾聽能力以及表達尊重等與情商相關的方面。』咁深奧既?

咁即係點呢?

再睇埋落去先...

『在既定的已發生的事件上,讓自己進入他人角色,體會他人因環境背景、自身生理、心理狀態,更接近「他人」在本位上的感受與邏輯。因為自己已體會「同樣」的經驗,所以也就更容易理解了當事人所處狀態下的反應,以致理解這種行為和事件的發生。就算是自己的看法與人不同時,也能夠理解對方在心理、情緒或行為上的反應,但能夠理解並感同身受對方的反應並不代表是認同對方的行為。』呃...即係...

Cosplay?!

唔...

乜Cosplay即係同理心嘛?

點解好似怪怪地咁?

點解兩樣野好似...格格不入咁架呢?

Cosplay…

我望一望四周...望一望個女店員...

女店員帶住微笑打掃梗...

好用心咁...又好小心咁...

可能係因為著住條短裙既關係,總係要好小心...好小心...

唔係既話...就會好易走光...

走光...

有時真係唔明,女仔點解咁鍾意著短裙。

仲要係短到大風D都吹起條裙,走晒光嗰隻。

D女仔唔怕走光架咩?

D女仔唔怕俾人睇蝕架咩?

話佢地唔怕,我又唔覺~

但就係唔知女仔又要怕走光,又要著短裙有乜野感覺~

就係唔知女仔...有乜野...感覺?

唔係要走去扮女仔丫?!

扮女仔?

偽娘?!

唉...越諗就越唔對路...

我都係飲埋杯咖啡,離開間咖啡店,出去行下好過~

我離開左間咖啡店後,喺街上行下行下。

街上既人都比較多。

港島區既人都比屯門多。

喺人群之中穿梭...總係...覺得...有D奇怪...

奇怪在每個人都好似各有各自己在忙...

唔係低住頭咁行,就係低住頭望住手機咁行...

每個人都無留意過身邊既人...身邊既事...

只係自己顧自己...

自己做自己想做既事...要做既事...

點解會咁架呢?

點解好似咁...冷漠架呢?

點解好似咁...孤獨咁架呢?

就算身邊充滿人...都係好似自己一個咁...好孤獨...

我唔想繼續咁孤獨...

我想快D離開呢個冷漠既城市...

我趕快咁跑...

逃離呢個地方...

逃離呢個冷漠而孤獨既港島!

我跑到黎巴士站!

咁岩就有架巴士埋站!

我等上車,排住隊咁等上車。

我見到前面正正就有個坐住輪椅既老婆婆...

有兩、三個人幫梗佢...

巴士司機都出黎幫佢手...

老婆婆帶住燦爛既微笑點點頭:「唔該晒~唔該晒你地~你地真係好人~」

望住呢個老婆婆...

究竟坐輪椅既感覺係點架呢?

坐輪椅既感覺...坐輪椅既感覺...

係喇!坐輪椅既感覺!同理心!