坐喺一間以白色為主...

四周都掛滿...放滿大大小小既黑白相...

就好似我地5cm一樣扮晒有格調既咖啡店裏面...

咖啡店?我諗係掛...

佢呢係寫住Whirling Coffee~





Whirling?

點解呢個名好似...咁熟咁架呢?

我係唔係又唔記得左D乜呢?

算啦~忘記左就忘記左架喇~

你永遠都不會記得你忘記了甚麼丫嘛~





之不過點解我而家會黎左呢一道,我就唔會忘記~

話晒都係尋日先發生咋嘛~

是咁的~

喺尋日,第一次同傳說中既珮琳食Lunch之時...

「係“情人”個“情”,“性愛”既“性”~情性!」Timothy同珮琳都好認真咁望住我~





『情性?哈哈哈~個名咁怪既?哈哈哈哈~』我忍唔住要大笑起黎~

情性喎~咩意思丫?有情有性丫?哈哈哈哈~

有情有性?

唔係喎…諗諗下又好似幾有意思咁喎...

而且仲好似...咁熟口熟面咁架呢?

喺邊道聽過...又喺邊道睇過呢?

算啦~忘記左就忘記左架喇~

你永遠都不會記得你忘記了甚麼丫嘛~





珮琳摸住手腕上既...Pandora手鏈諗左一諗:「呢個情性...又真係怪怪地既...」

Timothy就好肯定咁接住講:「唔怪怪地既話都唔會自稱情性既情聖啦~」

自稱情聖既情性?

定係自稱情性既情聖丫?

哎呀~你呢個情性搞到我好亂丫!

Timothy又繼續講:「不過...對愛情方面,咁佢又真係幾有計既~」

珮琳又接住講:「無計既話,我同你都唔可以咁恩愛啦~」





Timothy又接住講:「你都話恩愛呢~~~」

珮琳又接住講:「哎呀呀~得戚丫嘛而家?」

Timothy又接住講:「俾我得戚下得唔得姐~~~」

珮琳又接住講:「你而家得戚完,今晚唔駛旨意有得得得戚戚~~~」

聽住佢地呢對情侶喺道你一言,我一語,打晒情,罵晒俏咁...

真係凍到起晒雞皮...

所以話,做電燈膽都唔係話真係咁好受...

「罰你今晚自己一個沖涼~」





「唔好啦唔好啦~無你幫我擦背會痕死我架~」

「你係指邊道痕丫?」

「道道都咁痕~~~」

「剪左佢咪唔痕囉~」

「剪左咪幫唔到你止痕囉~」

『喂喂喂…我喺道架...』我都係忍唔住要阻止佢地兩個繼續講甜野...

等等又變左甜故就唔係咁好啦...





Timothy立即扮晒正經咁:「唔好意思~你既存在感實在太低~」

呀!你個死仔呀!唔好以為你女朋友喺道,我就唔敢郁你喎!

我就一拳收你皮都仲得架喎!

珮琳拍一拍Timothy隻手:「正經D啦!」

Timothy摸下摸下自己隻手,扮晒痛咁講:「我而家好唔正經咩?」

我真係好想講“你幾時有正經過丫?!”!

『咁你講下嗰個...情性係乜野人先啦~』講到都唔知去左邊喇!

「口講就唔夠實際既...」Timothy喺個褲袋道拎左部電話出黎...

我同珮琳都望實Timothy撳下撳下部電話...

「嗱~」Timothy隊左個芒埋我面前...

頂你個肺!隊到咁埋叫人點睇丫?!

我縮一縮後...拎一拎住部電話...仔細咁睇一睇...

我睇到個芒入面...係一個Facebook...專頁...

而個Facebook專頁裏面...有個...置頂既Post寫住...

“只要你不是戀兄、搶男友、師生戀、變心,所有情困我也可以為你一一解開。”

睇到呢句野,我就更加覺得熟口熟面...

但就硬係噏唔出幾時...又喺邊道睇過...

喺邊道睇過“情性”呢個名呢?

而更加奇怪既係,點解情困係唔可以因為戀兄、搶男友、師生戀同變心架呢?

「喂…喂…喂喂喂!」Timothy喺我面前揮下揮下隻手...

『下下下係係係!』諗到呆晒...呆到俾Timothy嚇左一嚇添!

「你發乜鬼野呆丫?」Timothy打量一下我...

『我我我...無~我喺道諗梗點解唔可以係戀兄、搶男友、師生戀同變心咋嘛…』我仲係望住個芒,托一托副眼鏡...

「唔...」Timothy由我手中拎返部電話諗左一諗,「都真係幾奇怪...初初我都覺得奇...點解唔可以係戀兄、搶男友同師生戀...而家仲要加多個變心添...」

『加多個變心?』我一頭問號...

「嗯...」Timothy點點頭,「我記得當我第一次睇到佢個Page既時候,個置頂Post只係列明唔可以係戀兄、搶男友同師生戀架咋~而家又多左個變心...」

珮琳接住講:「可能人地突然覺得變心唔岩~所以唔想幫人解決呢個問題啦~」

Timothy接住講:「都有可能既...好似你地呢D作家,脾氣都係古古怪怪架啦~」

珮琳谷起塊面豬登對住Timothy:「咩古古怪怪呀?而家我好古怪咩?」

Timothy無奈咁既樣:「少少咁啦~」

珮琳谷到塊面都紅晒:「最古怪咪就係同左你一齊囉~都唔明點解當初會同你一齊架...」

「你唔記得喇?係你話鍾意我先架嘛~」

「你唔好蝦我失憶喎!明明就係你視姦我成三個幾月先!」

「嗱~仲試唔到你~都話你記得架啦~」

「你個衰人!」

「唔好打頭~唔好打頭~你打到到我昏迷左既話,邊個照顧你丫?」

「到我照顧返你囉~」

望住眼前呢對情侶又喺道打情罵俏咁...

『係呢...咁我點搵呢個情性幫手呢?』我都唔係好想打擾佢地...

之但係...都未講到重點...

「呃...」Timothy又扮晒認真咁,「係要約出黎既~」

『下?』我唔係好明Timothy既意思...

「係要你親自約情性出黎見面既~」Timothy點一點頭...

約出黎見面?

點解要咁麻煩架...

「你拎部電話出黎先~」Timothy指一指示我...

『哦哦...』我就喺個褲袋拎部電話出黎...

「用Facebook開情性個Page~」Timothy繼續指示我...

『哦哦...開Facebook...開情性個Page...』我就開一開個Facebook Apps…再搜尋情性個Page...

「再用你個Facebook Messenger Message佢“我有情困”~」Timothy繼續指示住我...

『我...有...情...困...』我就喺個Facebook Messenger撳下撳下...

唔駛過幾秒就有回覆!

我睇一睇個Message Box...係一個日期、時間、地點...

真係要約出黎架喎~

咁無計啦~約出黎就約出黎啦~

“OK”

“到時見。”

又會咁爽快既~

我再睇一睇真D個日期...

「點丫點丫?搞掂喇?」Timothy八八掛掛咁望一望我部手機...

『嘻嘻...你睇下...嘻嘻...』我就遞部電話俾Timothy睇...

「日期係...咩話?!係聽日?!仲OK左添?!喂!你聽日要返工架嘛!」Timothy眼都凸埋~

『係丫係丫~唔記得左添...你幫我調一調丫~」我有D唔係咁好意思...

「唔得呀!我聽日要陪珮琳呀!」Timothy堅決說不…

『最多呢餐我請啦~』我向珮琳打左個眼色~

「好丫~咁就多謝晒喇~」珮琳亦向我打左個眼色~

「喂!我無話好喎!」Timothy拉一拉珮琳隻手~

「咁係你既事~好野~我聽日可以陪Carol同Stella行街街~」

「點可以咁架?!」

「點解唔可以姐~」

「唔好掉低我啦...」

「你俾我抖下氣啦~~~」

就係咁...我就喺今日呢個時間...黎到呢間名為Whirling Coffee既咖啡店...等一個自稱情性既情聖出現!

坐喺被黑白相包圍住既咖啡店之中...

嘆一口咖啡...

望一望個女店員喺道打掃一下...

等下等...

講起上黎,好彩迦迦結婚咋~

唔係既話,我都搵唔到藉口同東日講...

你知架啦~住得埋一齊,唔係返工既話就形影不離架喇嘛~

你叫我可以用乜藉口自己走黎見情性呢?

好彩既係我做左迦迦既伴娘~

可以同東日講話要同迦迦黎港島搞D野~

等東日車左我過黎港島呢邊之後,自己就鬼鬼祟祟咁走上黎咖啡店等情性~

講大話呃自己深愛既人好似好衰咁丫呵?

不過唔緊要啦~

就算再好感情既情侶,都有你瞞我瞞既時候架嘛~

一次半次~何足掛齒呢~

就喺我自己俾藉口自己去俾自己良心好過D之時...

「HI~好準時喎~」一把既成熟,又穩重既男仔聲出現!

我回一回神,望一望返正前方...

正正就有一個西裝筆挺既男仔...坐左喺我面前張梳化上...

頓時間...我好似當左機咁...

因為我俾呢名男子既外貌嚇左一嚇...

因為我眼前呢名西裝筆挺既男仔...好似一個人...好似一個明星...好似好似...好似好似...

『古天樂?!』我忍唔住衝口而出左!

我眼前呢名西裝筆挺既男仔真係十足十古天樂咁!

仲要係單身男女裏面既張申然咁既款!!!

「哈哈哈...哈哈哈哈...」古天樂笑左幾聲...

就連笑容同笑聲都十足十古天樂咁既樣!

古天樂幾時撈埋專欄作家同愛情專家架?!

「我唔係古天樂~」古天樂擰一擰頭,「雖然已經有好多人誤認我係古天樂...但事實上,我係情性~」

情...性?!

呢個不論係外貌、聲線、笑容、言行舉止都十足十古天樂咁既男人...就係...我要等既...情性?!

不過認真D打量一下眼前呢一個古天樂...睇起上黎又真係比起真正既古天樂...年輕好多...

我睇呢個古天樂...都只係...廿七、八歲左右...

都係同東日差唔多咁上下年紀~

可以話係年青版既古天樂~

鬼整咩?!

咁鬼似古天樂丫~Timothy又唔早D單聲喎~

等我有個心理準備都好丫嘛~

而家大出洋相喇...你話幾咁瘀皮先得架...

「你要既Espresso~請慢用~」喺我仲瘀皮梗之時,女店員帶住燦爛既笑容,放低左杯咖啡...

「唔該~」情性向女店員點一點頭後,女店員轉身離開...

雖然話女店員同情性既交流不到五秒...

但點解我硬係會覺得佢地好似好熟咁架呢?

「係呢~唔知你有乜野情困需要解開架呢?而你既情困...唔會係同戀兄、搶男友、師生戀、變心有關掛?」情性以古天樂式笑容打量一下我...

『無…無…無關無關...但點解唔可以係同戀兄、搶男友、師生戀、變心有掛呢?』我好自然咁將我既疑問問出口~

情性呆左一呆,好似估唔到我會咁問咁...

乜我問得好出奇咩?

定抑或問得太過唐突呢?

情性飲一啖Espresso:「唔...咁既...喺之前有幾個有情困既人搵過我...而佢地既情困分別係同戀兄、搶男友、師生戀、變心有關...而我...我總係覺得有D...唔係咁岩...」

『唔係咁岩?有乜唔岩丫?』我都仲係一頭問號咁...

「咁樣講啦...有好多人都認為幸福係要自己爭取...不論任何情況...但事實上,當你使用自由既權利之時,影響到他人既自由或不為世界所認同既話,咁就係自私既行為...」情性用上一對堅定既眼神望住我...

自由...自私?

我總係唔係好分得清...

情性所講既理論...有D似Timothy成日掛喺口邊...“基拉係專搶人地女朋友既仆街”一樣道理...

「好喇...講得有D遠啦...不如講返你有乜情困啦~」情性再飲一啖Espresso...

我既情困...

係喎~講下講下...差D都唔記得左今次黎搵情性既目的添~

『我呢...唔...點講好呢...我同我男朋友之間...好似有D問題咁...』我摸下摸下自己個冬菇頭,唔知應該由邊道講起好...

「有D問題?有咩問題?」情性好認真咁打量一下我...

『唔...點講好呢...我地之間...總係好似...好似唔係身處同一個空間咁...你明唔明丫?』我好似講到1999咁...

「唔係同一個空間?你男朋友係二次元人黎架?」情性帶住古天樂式既微笑,點一點頭...

『唔係唔係~佢丫…佢係一個作家黎既...』我有D尷尷尬尬咁...

「哦?作家黎架?咩名丫?」情性飲一啖Espresso...

『東…冬甩…』我面紅紅咁點點頭...

「咳…」情性嗆一嗆親,「係冬…東日呀?你係東日既女朋友丫?」

『嗯!你...你點會知...』點會知東日既真名架?!

「佢係愛情小說家~我就係專欄作家~雖然話我就無佢咁出名~但話晒都係同行丫~認識都唔出奇丫~」情性帶住古天樂式微笑,點點頭...

係喎!

東日同情性都係靠支筆搵食…可以話係行家黎架嘛!

認識都唔出奇丫...

認識...

無錯喇!我諗返起喇!

我諗返起“情性”呢個名,喺邊道見過喇!

情性...

我喺東日個專頁裏面...“這個專頁讚好”嗰一欄裏面...係有見過“情性”呢個名架!

唔怪之得...唔怪之得熟口熟面架啦!

原來...原來東日同情性...係一早就認識既...

「喂喂…做乜突然面有難色咁既樣?」情性喺我面前揮揮手...

『呃...你千萬唔好同東日講我搵過你呀!佢唔知我今日黎搵你架!』我好緊張!

「哦~你放心~我好專業既~絕對唔會將當事人既資料外洩既~放心放心~」情性飲一啖Espresso,點一點頭...

真...真係可以放心?

「咁你而家可以講下...你同東日既情困係點架?由開始...到現在...」情性眼定定咁望住我...

我望住一對空洞無物既雙眼...

我同東日既情困…由開始…到現在...

講到我同東日既情困...就要講返一班兄弟姊妹出黎,同一對準新人傾野嗰一晚...

『可以同到深愛既人結婚...真係好幸福囉...』我已經飲到面紅紅...

傾下傾下…變左狂飲狂飲...

「首先要有男朋友...」

『我都好想可以有個男朋友喔...』我...我都好想有個深愛既人做我男朋友...

「呢道大把兄弟任你揀~」阿風...定阿嵐...我都唔係好記得呢班舊同學兼兄弟叫乜名喇...

無記性嘛…我無記性...

『你地呀?算罷啦~~~個個都三尖八角...成個毒男咁...』我係唔會睇得上你地~

「嘩~你咁講野既你~你個宅宅好我地班毒男好多丫又?!」

『算罷啦...算罷啦...我鍾意既人...我鍾意既人係好有才華...好好男仔黎架..』我鍾意既人...我深愛既冬甩...

「阿儀~你係唔係想同你既男神一齊呢?」神鳯搭住我個膊頭問一問我...

『係丫係丫~我真係好想丫~』我真係好想同冬甩一齊...

「教你一個方法啦~嗱~首先要斟滿杯紅酒~」神鳯幫我斟一斟酒...

『哦哦...跟住呢?』我痴痴迷迷咁望住神鳯...

「跟住就望住杯紅酒...許一個一直埋藏喺你心裏既願望~要望到實一實架喎~」神鳯指一指住杯紅酒...

『哦哦...嗯...』我就將視線轉到去杯紅酒中...一心諗住要同冬甩一齊...同冬甩一齊...『許左喇~咁跟住呢?』

「跟住就一啖飲晒成杯紅酒~」

『嗯!唔...唔...唔...嗄...』我一啖飲晒成杯紅酒之後,『好暈喔...』

天旋地轉咁...天旋地轉咁...

「你地唔好隊佢啦~」我好似聽到迦迦把聲...

「係咯係咯~等陣隊冧左佢,邊個送佢返去丫?」我又好似聽到有把女仔聲...

「嗱嗱嗱嗱嗱!我唔會送架~」我又好似聽到有把男仔聲...

「都唔駛預我~免得話我侵犯佢~」我又好似聽到有另一把男仔聲...

「都係由你地班女仔送啦~」我又好似聽到又有另一把男仔聲...

「嘩~你地班男仔咁無風度架~」我又好似聽到有把女仔聲...

「係囉係囉~」我又好似聽到有另一把女仔聲...

我都唔知...

我都唔知自己聽到D乜...

只係好似全身都好熱...又好暈咁...

直至到好似有人抬住我出去...

「好暈喔...好暈喔...頭上有好多星星丫~哈哈哈~」一路行...一路滿天星星咁...

「小心丫~阿儀~」迦迦扶一扶住我...擺左兩擺...

『我無事~我無事~迦迦...你真係...好幸福呢...』我攬一攬住迦迦...幸福既女人...

「你真係好醉喇...」迦迦再攬一攬實我...

之後...之後...之後我就好似斷斷地片...

好似聽到好幾個女仔既嘻嘻哈哈聲...

笑得有D衰格...又有D淫賤...

嗰一覺...真係瞓得好冧...

冧到都唔知自己瞓左幾耐...

我只係知我一起身,就發現自己D衫褲俾人除晒!

D衫褲就掉晒落地!

我就赤裸裸咁瞓左喺床上!

好似俾人女女女完咁!

真係嚇到我差D就報警架喇!

好彩既係當我一打開部電話,就見到神鳯Send左段成班姊妹瘋狂除我衫既片俾我姐!

呢班姊妹真係...嚇鬼死我呀!

而喺嗰晚既三日之後,我就去到東日既新書簽名會~

嗰次...我好大膽咁同東日講:『其實...我係第一個Like你個Page既...阿儀...』

而東日亦竟然話:「原來你就係阿儀!我終於都可以見到你!好多謝你一直以黎既支持!真係好謝你!你所留既每一個言,我都有好好咁記喺心裏!」

竟然係咁!

我都真係估唔到東日都有留意我~

仲有將我既留言記喺心裏~

我真係好感動呢~

而我地都有交換電話~

東日約過我出幾次街之後,佢就主動拖住我隻手...我地就開始了~

「嗯嗯...可以話係兩情相悅~之但係...你地之間有乜問題呢?」情性飲一啖Espresso,諗左一諗...

『有陣時…我總係覺得佢眼中無我...』我係唔係應該咁講呢...

「有陣時…佢眼中無你?」情性疑惑咁問一問...

『嗯...尤其喺佢寫梗野既時候...我總係覺得佢...好似喺另一個世界咁...一個無我既世界...』我諗我咁講...係形容得最貼切...

「哦~原來係咁...」情性帶住微笑咁諗左一諗,「你仲記唔記得劉青雲奪影帝之時,佢講左D咩黎感謝佢老婆?」

『劉青雲?』係兩年前...喺香港電影金像獎之上?

「佢話...“每次當我駕着太空船,飛到宇宙不知哪裏的時候,你總是有辦法令我安全返地球。”其實我地寫野既,同佢地演戲既都係差唔多…或者比起佢地...更加會...唔知飛左去邊...」情性諗下諗下...諗到對眼又好似...空洞無物一樣...

呢種眼神...同東日寫梗野既時候...係...

「所以呢...你應該好似郭藹明咁~令東日安全返返黎地球~仲有丫~你都唔好咁無自信喇~」情性飲埋最後一口Espresso後,起一起身,拍一拍我膊頭,行出咖啡店...

我一個人坐喺張梳化上面...眼定定咁望住再無Espresso喺裏面既咖啡杯...

乜我好無自信咩?

都唔係姐...

點解情性會咁話我架呢?

真係奇怪...

最大問題既係...咁即係點?

又話可以將情困一一解開既?

點解好似乜都無解開過咁架呢?

唉~~~早知就唔鬼信Timothy個死仔啦!浪費我D時間!

唉~~~

都係打個電話俾東日,叫佢黎接我先~

簡單咁打左個電話俾東日叫佢喺前兩個街口等我之後,我就帶住一份無奈,諗下諗下又呆下呆下咁離開間咖啡店...

“你都唔好咁無自信喇”...“你都唔好咁無自信喇”...

情性既呢句話不斷咁喺我腦海中打轉...

一直都係...一直都係...

直到我黎到馬路邊...直到我黎到東日架車前面...

「阿儀~搞掂喇?」東日幫我打一打開道車門...

『下下?』一時之間我都黎唔切反應...

「你同你個準新娘搞掂晒D野喇?」東日帶住微笑問一問...

『丫丫...係丫~搞掂晒喇~嘻嘻...』差D都唔記得左我同東日講過話係同迦迦搞D野添...

「嗯嗯~上車先~」

『嗯~』

我上一上車,東日又上一上車之後...

「你睇下後面個盒~」東日指一指住後坐~

我見到有盒用白色膠袋入住...

『咩黎架?』我拎一拎起盒...好大盒既...『係PG版獨角獸!!!!!!!』

「鍾意唔鍾意丫?」東日摸下摸下我個冬菇頭~

『鍾意丫~好鍾意丫~』我攬實東日錫一錫~~~

「嗯~咁我地返屋企一齊砌囉~」東日又錫一錫我~~~

『嗯嗯~~~返屋企一齊砌~返屋企一齊砌~』

好野~今晚又可以同深愛既東日開開心心一齊砌模型~~~