《情困之時，我遇上了自稱情性的情聖》: [Case 10－完美男友] PART 08
一早起身，同東日食埋個早餐...
『今日呢...我又要去幫迦迦搞D野丫...所以我今日陪唔到你喇～』又要同東日講大話...
「係丫...又會咁岩既...我呢...今日都要同電影公司嗰邊D人傾野...所以我都陪唔到你...」東日勁唔好意思咁。
『唔緊要啦～唔緊要啦～大家都有野忙姐～』好彩東日佢都有野忙～
咁既話，我都無咁內疚～
「咁你今日要去邊？等我車埋你過去先～」東日望一望個鐘。
『唔駛喇～唔駛喇～我自己去得架喇～你都唔好咁趕喇～預鬆少少揸車小心D～安全D丫嘛～』都係唔好節外生枝好～
「嗯...」東日無奈咁點點頭，又諗一諗，「咁...咁你搞掂打俾我～等我黎接你啦～」
『唔駛啦～唔駛啦～我都唔知要搞到幾時既～你專心做你既野啦～我搞掂會自己返黎架喇～』送黎送去，咪仲易露出馬腳...
「嗯...咁好啦...」東日好似唔多放心咁...
其實又駛乜咁唔放心丫～我又唔係話要去邊～
我只係約左珮琳，上佢屋企學織頸巾咋嘛～
咁突然既？係幾時約既？
其實都唔突然架喇～
我都跟住珮琳學左好幾堂～
你知我架啦～笨手笨腳咁...係要用多D時間去學既～
所以喺上兩個禮拜，我都請左好幾日假～
同東日講話就話係迦迦就快出嫁，係多D野搞～
實質就係偷偷地上珮琳屋企，學織頸巾～
返工既時候，又偷偷地織下～
有時放工放得早，又會偷偷祟上珮琳屋企搵佢指點下我，修補一下...
為左織好呢條頸巾，我都真係花左唔少時間、心機同精神架～
而且仲講左唔少大話...
同東日講左唔少大話…
我都真係幾內疚架...
不過Timothy話喎：「俾佢知道就話內疚姐～佢唔知咪當無件事囉～」
好彩既係東日都好信我～無懷疑我有野瞞住佢...呃住佢...
咁我就當無件事啦下～
或者...情侶之間既瞞騙...就係咁樣開始...
『揸車小心D丫～專心D丫～慢慢黎唔好急丫～』我送到東日去停車場。
「嗯嗯～你都係丫～小心D丫～」東日上車之前都要摸摸我個冬菇頭～
『嗯嗯～放心放心～今晚見啦～』我錫一錫東日個嘴～
「嗯～拜拜～」東日再攬一攬實我之後～
『嗯～拜拜～』
“吼”東日揮住手咁開車離開～
我望住東日架Mini Cooper揮揮手～
駛唔駛咁唔捨得丫～又唔係去公幹成個月都見唔到一面嗰隻～
不過無計啦～熱戀中既情侶丫嘛～
係咁黐纏架啦～
都係唔好諗咁多，爭取時間仲好過～
如果唔係既話，真係過埋聖誕都未織好條頸巾～
我都係快快手手向珮琳屋企出發！
珮琳住既地方，話遠就唔係遠既～
只係都要搭車先去到～
我就不敢怠慢，立即動身～
等左五分鐘巴士左右，坐左大約十五分鐘車程，我就黎到珮琳既屋企～
「黎左喇～」珮琳一開門，就帶住親切既笑容請我入屋～
『又要打搞你喇～仲要咁早添～真係唔好意思～』我勁唔好意思咁望住著住白色大Tee，下面好似乜都無著咁既珮琳點點頭～
本來要打搞珮琳就已經唔係咁好意思...
而珮琳咁靚女～仲要著得咁清爽～
唔好話男仔見到...女仔見到都會有D怕怕地羞...
「唔打搞～唔打搞～隨便坐丫～我斟杯橙汁俾你先啦～」珮琳行一行去開放式廚房～
『唔該晒～』我就行到去落地大玻璃嗰邊，睇一睇外面既風景～
呢道既風景真係好靚～
可以望到個沙灘～又可以望到個海～
打開窗既話，仲可以感受到海風添～
我都好想可以住喺呢D咁浪漫既環境下生活丫～
「黎～飲杯橙汁先～」珮琳將杯橙汁送到我手上～
『唔該晒～你呢道真係好好環境呢～我都好想可以同到深愛既人喺呢種環境下生活呢～』如果可以同到東日住喺呢道，一定更加幸福～
「唉～呢道好就係好丫～之不過租金真係好貴呢～」珮琳無奈咁笑笑口～
『好貴架？』我都無諗過呢個問題添...
「貴架～聽業主既口吻，好似話黎梗仲想加我租添...」珮琳繼續無奈咁笑笑口，擰擰頭～
『咁叫埋Timothy搬過黎同你一齊住～兩份租咪得囉～』嗱～唔好話我唔幫你喇～
做左咁耐老死，我都算唔話得架喇～
「叫佢搬埋黎一齊住丫？唔好喇～如非必要，都係唔好一齊住好D～」珮琳灑手兼擰頭咁～
『點解丫？』一對情侶搬埋一齊住唔係更好咩？
「我都係鍾意有返少少自由會好D～而且...廢事成日俾佢搞丫～」珮琳陰陰嘴咁笑一笑～
『下？乜Timothy佢成日搞你架咩？』我都覺得條死仔係幾鹹濕下架喇～
唔係上次又點會同個妹妹仔...
都係唔好諗呢樣！
唔係！係要小心D！唔好唔小心咁將呢件事爆出黎...
「唔...佢丫...嘿嘿...」珮琳怕怕羞羞笑到衰衰咁～
珮琳笑到衰衰咁...咁即係...
「一時時啦～不過佢每次上黎都係想咩架啦～」珮琳面紅紅咁～
『我都話佢係鹹濕仔黎架啦～』上次同個妹妹仔喺Fitting裏面搞到“嗄嗄”聲～
死...又諗起呢件事添...
要小心...要小心...
唔可以俾珮琳察覺到...
唔係既話...Timothy實殺左我都似...
「佢有鹹濕你丫？」珮琳搭一搭住我膊頭～
『咁又無～只係成日𥄫女姐～』Timothy條死仔，開梗工都顧住𥄫D客～
𥄫入黎睇衫既女顧客～
仲要專𥄫著黑絲既～
高高瘦瘦又𥄫～
細細粒粒既又𥄫～
著熱褲既又𥄫～
著短裙仔既又𥄫～
薄身既又𥄫～
絕對領域既又𥄫～
總之係著黑絲既，都會眼甘甘咁望住人地對腳！
Timothy對死人鹹濕眼仲要係極度猥瑣！
就喺早兩日咋嘛～有兩個十五、六歲著住透透地薄身黑絲既妹妹仔入左黎睇衫～
Timothy一見到姐，就由前面𥄫到去後面～
仲要流晒口水咁～
都算喇～
最慘係俾嗰兩個妹妹仔發現丫嘛～
嗰兩個妹妹仔見到Timothy望自己對黑絲望到流晒口水咁，就陰陰嘴笑笑口～
又故意喺Timothy玩下隻鞋仔～玩下對腳仔～挑逗一下Timothy～
之但係Timothy條死仔又怕羞喎～
一知到俾兩個妹妹仔故意挑逗，就立即面紅紅勁尷尬咁話要閃入倉執貨喎～
搞到舖面就得返我一個去服侍嗰兩個妹妹仔～幾咁尷尬～
而嗰兩個妹妹仔就一路揀衫，一路恥笑Timothy～
仲話佢一定係𥄫到忍唔住要入去倉裏面J夠二百連發添～
唉～真丟架～
不過我咁樣同珮琳講...又會唔會唔係咁好呢...
會唔會影響到佢地之間既感情呢？
「哦～咁男人𥄫女都好正常既～」珮琳若無其事咁點點頭～
『你唔介意咩？』背住自己去𥄫其他女仔喎...
就算幾大方，都總會有少少嬲掛？
「𥄫女咋嘛～有乜好介意～男人丫～天生出黎就係鍾意𥄫野架啦～唔𥄫嗰個就真係唔正常喇～」珮琳仲係笑笑口咁～
真係咁架咩？
乜男人真係唔可以有女朋友就唔𥄫其他女仔架咩？
「而且佢J下其他女仔仲好添丫～唔駛下下搞著我丫～」珮琳淫淫一笑～
『J其他女仔你都無所謂？因為其他女仔而射喎...』咁同背叛有乜分別？！
「有乜所謂丫～又唔係真係插入其他女仔道～佢射左仲好添丫～等我唔駛勁攰既時候，佢又夾硬黎～」珮琳行到去床邊，瞓一瞓落床～
珮琳既思考模式真係特別過人～
唔怪得Timothy話有陣時真係估珮琳唔到啦～
『係呢～其實你...點解會揀同Timothy一齊既？』我都行到埋去珮琳張白色大床，坐一坐上去～
「哦？點解會咁問既？」珮琳坐一坐起身，打量一下我～
『無～只係...我都識左呢個死仔好耐，總係覺得佢無一可取咁～就係估唔到，佢會有一個好似你咁靚又咁有個性又咁特別既女朋友姐～』Timothy企埋去珮琳身邊，真係格格不入～
「哈哈～可能係鬼掩眼掛～其實有好多野...我都唔係好記得～不過...我就係唔會忘記同佢開心既回憶...第一次遇到呢個傻佬既情境～」珮琳甜絲絲咁笑一笑～
珮琳第一次遇上Timothy？
「嗰陣時呢～我每逢一至五，都會去Starbucks飲下野～食下野咁打文架～而有一日，當我如常買杯香脆糖鮮奶咖啡既時候，個傻佬呆下呆下咁拎錯左我杯咖啡喎～嗰陣時佢個樣真係好傻架～」珮琳又甜絲絲咁笑笑口～
Timothy幾時都係呆下呆下，傻下傻咁～
尤其係見到靚女既時候～
Timothy由中學時代開始，一見到靚女就好似中左定身咒咁～
好似前世未見過靚女咁～
唉～真係丟架～
「起初我覺得佢幾得意～不過就無話刻意去留意佢～點知個傻佬見我對面有位，就走過黎坐正喺我對面～不過佢又唔出聲喎～只係偷偷咁望住我～我就緊係扮晒唔為意，繼續打文啦～」珮琳笑得勁甜～
嗯～我諗一諗都諗得到Timothy望住珮琳個樣係有幾咁痴漢～
不過又奇怪...一個痴漢...唔出聲咁偷望住個女仔...咁變態既行為...除左話可以令到個女仔對你提高戒心之外...仲有D乜野可以吸引到個女仔留意呢？
「初初我以為只會見到一次...點知第二日又見到佢～又係坐喺我對面～又係一直留意住我～視線從來都無離開過我～一直都係～一直都係～一直Keep住三個月～直至六十多日後既一日，我打完成個故事既一日，呢個傻佬同我講...“小姐...其實我留意左你好耐...可唔可以...做個朋友？”，我見佢咁有誠意，就俾左個機會佢喇～」珮琳笑得勁甜～甜到塊面都紅卜卜咁～
『真係估唔到...咁都俾個死仔得米～～～』我恥笑一下Timothy～
「哈哈～咁係因為...其實喺嗰段期間，都有好多男仔追我架～有D喺網上識～有D係朋友既朋友～有D係我喺Starbucks打文時黎聊我～不過嗰D男仔追唔夠我一個星期...兩個星期...一個月見我無乜Feedback就放棄～而曾經有人同我講過...“肯留到最後既，就係對你最真，最愛你嗰一個。”～而Timothy佢...就係肯留到最後既一個～」珮琳帶住幸福既微笑，好認真咁點點頭～
肯留到最後既...就係對你最真...最愛你嗰一個...
Timothy肯為珮琳留到最後...
而我又算唔算係肯為東日留到最後呢？
「不過你千萬唔好同Timothy講返丫～佢而家問親我點解當時會揀佢，我都會扮晒失憶咁乜都唔記得架～」珮琳好認真咁捉住我對手...
『嗯嗯～放心放心～我一定唔會講俾Timothy聽～打死我都唔會講～』況且我記性都唔係好～轉個頭都唔記得啦～
講開又講，其實Timothy同珮琳既愛情故事都幾浪漫丫～
由相遇到相識～
又經歷過嚴重意外～
係喎～講起嚴重意外...
『係呢～你一醒返之後，Timothy有咩反應丫？』呢樣我一直都好想知～
我只係知喺珮琳昏迷期間，Timothy一直都陪住喺珮琳身邊～
嗰陣時Timothy一放工就仆到去醫院～
放假又去醫院等珮琳醒返～
我都真係估唔到～
估唔到Timothy個死仔會咁痴心情長劍架～
「佢丫...我仲好記得...當我一打開眼見到佢...佢喊到眼淚口水鼻涕都流晒出黎～仲要黐埋黎喎！幾咁核突丫～我嗰一刻都唔知幾想一手就將佢推開！可惜我乜力都無～」雖然珮琳講得好似好抗拒咁～但面上總係帶住甜絲絲既微笑～
呢D係唔係叫做“口裏說不，身體卻很誠實。”呢？
「不過講真嗰句...佢又真係幾好既～喺我岩岩醒返既期間，佢都一直喺我身邊...照顧我...同我做物理治療...扶持住我...我發脾氣，佢又俾我出氣～俾隻手我咬～我喊，佢又俾個膊頭我喊～我想食魚蛋粉，佢又第一時間撲出去幫我買～見我瞓唔著，又會講D白痴故事氹我瞓～呢個傻佬...其實都真係幾好既～」珮琳嘴角含晒春咁～
嗰段期間…我都好清楚...
為左照顧珮琳，嗰期Timothy請左成個月假～
本來公司就話唔得架喇～
不過我就話Timothy嗰份我幫佢頂埋～
上面先無野好講～當俾佢一次過清晒D假咁話～
好彩Timothy都照顧得珮琳妥妥當當～
咁我都總算無幫佢白頂啦～
「咁好啦～我地都係快D開始織喇～」珮琳拎出針線～
『嗯嗯～麻煩左你咁多次，真係唔好意思～』講下講下，差D都唔記得左黎搵珮琳既目的添～
「唔麻煩～唔麻煩～我要多謝你至真～好彩有你幫我約冬甩出黎交流下咋～我真係獲益良多丫～」珮琳好似好滿足咁～
『都係舉手之勞姐～都係舉手之勞姐～』其實我都無乜做過D乜～只係同東日講聲～而佢又得閒咁咋嘛～
「你知道嘛～我一直都諗唔到新故要點樣寫～一直都卡左喺道好耐好耐～直到你幫我約到冬甩出黎見面～傾左兩、三次姐～我D靈感就返晒黎喇～」珮琳對眼好似識發光咁～
『之但係，你係寫開科幻故，冬甩就寫開愛情故，兩者好大分別架喎～真係可以幫到你？』我又真係唔係好明～
兩者可以話毫無關係～
咁又點可以幫到珮琳呢？
「就係因為我一直都只係寫開科幻故～所以缺乏新元素～而冬甩就正正可以將佢既愛情元素，啟發到我有新元素出現～」珮琳對眼仲係發晒光咁～
『哦～』其實我唔係好明...
我知我自己都比較蠢...
一D好淺白既道理我都好難去理解得到...
更何況係作者既思維...
好彩東日都知我蠢鈍，平日都盡量簡單化咁同我溝通～
唔係既話，實頭痛死我都似～
「冬甩真係好了解女人～甚至比女人更了解女人～」珮琳諗下諗下～
『嗯...』都真係...
我相信除左我之外，都有好多女仔覺得東日係比女人更了解女人...
尤其係佢班以女性為主既讀者...
「嗯？了解女人唔好咩？點解你好似...」珮琳打量一下我...
『唔唔...唔係唔好～只係...好似...』好似太過了解女人...太過容易吸引到女人...
「我都明既～之不過...總好過一D都唔了解女人丫～總好過好似Timothy咁～成日都唔知女人幾時想～幾時唔想～」珮琳摸住手腕上既Pandora手鏈，無奈咁擰擰頭～
『哈哈哈～算啦～由中學識佢開始就係咁～一D都唔了解女人～』可能因為喺Timothy身邊只係得我一個女仔Friend掛～
唔係唔係…佢都唔當我係女仔架啦～
女兄弟丫嘛～
「唉～講下講下又講起佢添～都係唔好再理佢咁多～等我睇睇你織成點～」珮琳向我示意拎條頸巾俾佢睇～
『嗯嗯～嗱～』我就喺個大袋道拎左條織左三分一既頸巾出黎，交到去珮琳手～
「唔...你呢道開始...就要再織過喇～」珮琳指一指住我條頸巾...
『下？！喺道開始？！咁咪差唔多同無織過無分別？』
「嗯～無辦法啦～唔拆左佢再黎過，你後面嗰D都係掉轉晒～」
『下？！我織得好辛苦架...』
「唔緊要啦～快D拆左佢～快D再織過～好快就織起架喇～」
『下...』
就係咁...我又要拆過再織過...
「呢道係低針～」喺珮琳既指導下...
『哦哦...』我好小心...
「呢道係高針～」聽住珮琳既指引...
『哦哦...』好耐心...
「力度要平均D～」
『哦哦...』
織下織下…織下織下…
織下織下又織左成大半日...
老老實實...織頸巾真係難過砌模型多多聲...
「嗯嗯～咁你返去記住我教你點織喎～」珮琳送一送我出門口～
『嗯嗯～打搞晒～』我向珮琳鞠一鞠躬～
「唔打搞～後日見啦～」珮琳向我揮揮手～
『嗯～後日見～』我再向珮琳揮揮手後～
「拜～」
『拜～』
係時候返去喇～
喺下午呢個時候，又未到黃昏～
陽光唔算猛烈～
而且仲有D風～
我一個人喺馬路邊行下行下，行去巴士站既方向～
行下行下，望下望下～
望下望下...我望到有架白色既Mini Cooper喺我身邊駛過...
呢架Mini Cooper…之唔係…係東日架車？！
我睇清楚D個車牌…的確係東日架車喎！
點解東日會喺呢個時間...駛左入去...
『酒店？！』我望住架白色既Mini Cooper轉左入去酒店嗰邊！
點解東日會喺呢個時間...轉左入去酒店...
我鬼鬼祟祟咁跟住架Mini Cooper…
駛到入黎酒店既路上，車速都比較慢...
我可以好容易咁跟住車尾...鬼鬼祟祟咁跟住東日車尾...
我一路跟...超級鬼祟咁跟...
跟到東日泊左架車喺酒店門口...
跟到見到東日落左車...
見到東日開一開另一邊車門...
見到有個著住白衫黑褲既女仔落車！
呢個白衫黑褲既女仔...短髮...好靚女...好似明星一樣...但總係有D...冰冷咁...
只見東日同個女仔行左入去酒店裏面...
我就急急腳咁行過去...行到去酒店既玻璃門前，望下望下...
望入去酒店裏面...已經見唔到東日同個女仔既蹤影...
點解東日會同個女仔一齊架？
點解東日會同個咁靚既女仔黎酒店架？！
唔係話同電影公司嗰邊D人傾野架咩？！
點解傾傾下會黎左酒店架？！
唔...都係打個電話俾東日問下先！
我一拎出個電話，好快手咁打俾東日！
「嘟...嘟嘟...嘟嘟嘟...嘟嘟嘟嘟...喂～阿儀？」等左幾耐下先接聽...
『喂～你而家喺邊丫～做梗咩丫？』探下口風先！
「我...我仲喺電影公司同佢地傾梗野咋嘛～你...你搞掂喇？」東日口震震咁...
講大話！
『係丫～我搞掂喇～你幾時走得丫？』明明就喺酒店道！
「我...我無咁快丫～搞掂再打俾你啦～」東日仲係口震震咁...
『嗯～咁好啦～我等你電話啦～』
「嗯嗯...拜拜...」
『嗯～拜～』
點解要講大話呢？！
東日點解唔認同左個女仔黎酒店呢？！
東日同個女仔黎酒店又做乜呢？！