「呢道係高針~」繼續有珮琳教我織頸巾...

『哦哦...』但我就好唔專心...

「等等...等等...呢道係低針~」唔專心到係咁錯...

『哦哦...』係咁要珮琳糾正我...

「哎丫~你點教佢都無用架啦~我由識佢到而家丫,佢都係咁笨手笨腳傻頭傻腦咁~點教都係唔識架啦~」Timothy勁唔耐煩咁既樣...



今日Timothy都喺道~

因為今日Timothy諗住拎假黎同珮琳行街睇戲食飯二人世界~

但因為珮琳怕我唔夠時間織起條頸巾,所以就用埋今日黎教我喇~

『我邊係笨手笨腳傻頭傻腦姐...係要用多D時間去學咋嘛…』唔好話你無耐性...

由我識你到而家丫,你都係咁性急架啦~



做少少野都好似趕頭趕命咁~

叫人起身又好似催命符咁~

中學既時候丫,要交Project丫,又係咁催人做好未做好未做好未做好未~

結果就俾佢催到記得做但唔記得帶!

默書測驗考試又係咁催人溫溫溫溫溫!



結果就俾佢催到溫錯晒!

而家出黎做野又係咁!

成日催人入倉執下D貨~又成日催人補下D貨上架!

催到人地成日都放錯貨!

好彩我地係做5cm咋~

如果係做H&M嗰D?一早就俾人炒左啦~

「哎呀呀~你仲好講架喎你~你知唔知呢排為左你請假黎學織頸巾,我幫你頂左幾多更丫?做死我咁制添呀!難得公司搵左兩個人黎頂下~可以俾我抖下~同珮琳二人世界下~點知又要同你惡補下!你話我前世係唔係欠左你架?!」Timothy面都黑晒咁...

珮琳摸一摸Timothy個頭:「乖啦~唔好咁啦~話晒人地都係第一次親手織頸巾送俾男朋友~係要花多D時間學架嘛~而家咪幾好~又唔駛出去同人迫~一陣我暈左喺出面咁點算先~你又可以陪住我地織頸巾~嗱~你睇下~我呢條係織俾你架~你都想快D有得戴架~係唔係先~」



Timothy扁扁地嘴咁,望住珮琳手上條頸巾~

Timothy真係好鬼似小朋友~

而珮琳就好似...一個大姐姐咁~

好似一個大姐姐氹小朋友咁~

唉~真係辛苦左珮琳~

不過講起上黎...又幾奇怪...

同Timothy相處咁耐,我又唔覺得要點樣照顧佢...



相反...好多時都係佢照顧返我轉頭...

老老實實,認認真真咁計一計...一直以黎,Timothy都真係幫左我好多...

尤其係我地單獨相處既時候...

點解會咁架呢?

我地總係好似...有D出入...

喺唔同既時間...身處唔同地方...對住唔同既人...

性格上…處事方式...都總係會...有少少出入...

唔係話好大分別...總係會有少少唔同囉...



人互人之間既相處...真係好奇怪呢...

「不過講開又講...」珮琳捉一捉住我隻手,摸一摸...

『下下?』俾珮琳突如其來既摸一摸,我都俾唔切反應...

「你今日好似...心事重重...神不守舍咁既?係唔係有咩諗唔通?」珮琳認真咁望住我...

「我...我...」點講好呢...

我真係有D心事既...

之但係又...又好似好難開口咁...



「唔駛問阿貴,都知佢一定係煩梗有關東日既事啦~做咩丫?人地終於都忍唔住,要將你既笨手笨腳講出口呢~~~」Timothy半帶恥笑咁望住我...

『緊係唔係啦!東日從來都唔覺得我係笨手笨腳囉好唔好!』係你先成日話我笨手笨腳咋嘛!
「從來都唔講出口姐~唔代表唔覺既~如果佢咁都唔覺,除非佢無感覺啦~」Timothy繼續恥笑住我...

『都話唔係咯!咁多人之中,得你一個成日話我笨手笨腳咋嘛!』我怒視住Timothy,指住佢!

「唔係既話咁你煩D乜呢仲~你煩D乜呢仲~你煩D乜呢仲~你煩D乜呢仲~你煩D乜呢仲~你煩D乜呢仲~」Timothy恥笑住我,又係咁指住我!

『我...我...我我我我見到東日同第二個女仔一齊呀!哎呀你好鬼煩呀真係!!!』我拍打左Timothy個頭好幾下!

我一講完之後,大家都靜左一靜…

我諗...都有靜左…十幾廿秒啦...

過左十幾廿秒之後,Timothy就開聲喇:「唔...唔...唔唔...哈哈哈~~~東日佢終於都頂你唔順~要出去偷食喇~~~」

見到Timothy笑到見牙唔見眼咁既死人樣,我真就係忍唔住!

『仲笑!仲笑!好好笑咩而家?!我好認真架好唔好!』我一手就撳左Timothy落床,再騎住喺佢條腰道,隨手拎起個枕頭喪車落Timothy個頭道!

「救...救命...救...救命呀!!!」Timothy俾我騎住黎砌!

『笑呀喇?!仲笑呀喇?!笑得咁過癮呀喇?!』我就係咁起勢車!

「救命丫!!!珮琳!!!救命丫!!!珮...救我呀珮琳!!!」Timothy俾我車到係咁叫救命!

「哈哈哈~~~打佢打佢~幫我打多佢幾下~鬼叫佢成日都口不擇言丫~哈哈哈~幫我出力打多佢幾下~」珮琳拍晒手咁叫我出力打Timothy~

『呵呵呵~~~你死喇你~~~連你女朋友都叫我出力打多你幾下~~~無人救到你架喇!!!』我就起勢咁狂車!

我雙手拎實個枕頭,對住Timothy個死人頭瘋狂咁車埋去!!!

我要你知道,得罪女人係無好下場架!!!

「救!!!命!!!呀!!!!!!」

Timothy俾我用枕頭瘋狂咁喪車左好十幾分鐘後...

『嗄…嗄...嗄...』車到我雙手都無力...

「嗄...嗄...嗄...想...想攞我命咩...嗄...嗄...」Timothy瞓喺張床上面回一回氣...

『鬼叫你笑得咁樣衰丫?!』我再用個枕頭車多Timothy個頭兩野!

「哎呀哎呀!再車就車死人架喇!」Timothy擋一擋。

『你十足十隻曱甴咁丫!邊有咁易死丫?!』係咁易車得死你就好喇!

呢個世界就清靜得多喇!

「哈哈~岩架喇~係要教訓下佢架~」珮琳指住Timothy黎笑~

「連女朋友都唔救我...公平咩?!」Timothy喊晒口咁慘叫~

「鬼叫你成日講錯野又玩玩下無時真~」珮琳用隻食指篤一篤Timothy塊面~

「嗚嗚~我唔制丫~你地蝦我既~嗚嗚嗚~」Timothy就攬住珮琳條腰,扮晒喊咁既樣~

「喂~唔好攬啦~好痕丫~喂丫~」珮琳就俾Timothy攬到扭下扭下個身~

「嗚嗚嗚~~~唔制丫~嗚嗚嗚嗚~我唔制丫~」Timothy就攬到珮琳實一實~

仲攬下攬下攬到瞓埋落床...

「喂丫~唔好咁啦~喂~」珮琳好似欲拒還迎咁俾Timothy攬住喺床上扭下扭下咁~

我就坐喺側邊,睇住眼前呢對情侶喺床上纏綿...

唉~真係好葡萄牙~~~

點解佢地兩個可以咁纏綿架呢?

點解可以喺張床玩到好似無人之境咁架呢?

係咯…明明我就坐喺床邊...點解佢地可以攬攬扭扭到好似就快要搞野咁架呢?

佢地係唔係真係已經唔記得左有我喺道架呢?

係唔係真係咁忘我呢?

『咳咳...』我假裝咳兩聲,制止左Timothy拉起珮琳既白色大Tee既舉動...

「正經D啦~」珮琳拍一拍Timothy隻手,坐返起身,整返好件大Tee。

「正經晒喇正經晒喇~」Timothy又扮晒正經咁坐定定。

好一對恩愛既情侶喔~

「係呢...你話你見到東日同第二個女仔一齊?究竟係點樣既一回事丫?」珮琳打量一下我。

『我...』講起上黎,我又內心一沈...

「我乜鬼丫?係唔係你眼花咋?」Timothy冷眼咁望住我...

『我緊係無眼花啦!我係好清楚咁見到個女仔由東日架車行出黎架!』我有帶眼鏡架!邊有可能眼花呀?!

珮琳諗左一諗:「係幾時既事丫?」

『就喺前日我跟你學完織頸巾之後,喺行去搭巴士既途中...見到東日架車經過...仲轉左入酒店...我有D好奇咪跟入去睇下囉...點知...我就見到有個勁靚勁有性格勁似明星咁既女仔,由東日架車行出黎,仲同東日入左酒店添!』我到而家仲歷歷在目呢!

Timothy立即笑到勁衰咁講:「都話頂你唔順要出去偷食架啦~嘻嘻嘻~」

『你仲笑?!你仲笑?!真係打得你少?!』我一個枕頭車埋去Timothy塊面道!

呢個Timothy呀!自從珮琳醒返同我有拖拍之後,就得戚左好多!

把口仲臭左好多!

人地話男仔經歷越多,就會越成熟~

但點解Timothy經歷越多就越幼稚架呢?!

我諗都係同俾珮琳照顧得太多有關~

珮琳拍一拍Timothy個頭:「Timothy唔好玩住先!」

Timothy又扮到乖乖咁坐定定:「知道~唔玩唔玩~」

珮琳再諗一諗:「唔...你肯定佢地係入左去酒店?」

『嗯!我係親眼睇住佢地入左去酒店!』我係睇得好清楚!

珮琳再諗一諗:「唔...咁你又有無見到佢地...上左去?」

『咁!咁我又無真係見到...我行到去酒店門口望入去,就已經唔見左佢地喇...』連影都唔見嗰隻...

「入左酒店姐...」珮琳都未將佢要講既野講完...

「實係去偷食架喇!一男一女去酒店唔係偷食,唔通觀光咩?!」就俾Timothy打斷左...

珮琳拍一拍Timothy隻手:「喂...可唔可以講D好聽D既野呀?!」

Timothy又擰擰頭:「講D好聽D既野又有乜用姐?最緊要係講事實姐!」

Timothy又講得好似好有道理咁...

Timothy再望一望住我:「老老實實,如果你唔係咁諗丫,你又駛乜咁煩丫?」

我...

Timothy都講得岩既...

如果我唔係都覺得東日同個女仔去酒店做埋D衰野既話...我又點會咁心煩...

「咁又唔係咁講既~」珮琳擰下擰下頭,「去酒店又真係有好多野可以做既~」

Timothy接住問:「例如呢?」

珮琳接住答:「傾野囉~」

Timothy接住問:「有乜好傾要走去酒店傾呢?」

珮琳又接住答:「傾好多野都可以去酒店傾架~」

Timothy又接住問:「點解一定要去酒店傾呢?」

珮琳又接住答:「酒店無咁多好似你呢D煩人喺道煩住晒囉~」

Timothy又接住問:「乜我而家好煩咩?」

珮琳又接住答:「都真係幾煩架~」

Timothy又接住問:「有幾煩先?」

珮琳又接住答:「最起碼我趕文既時候會煩到我無靈感啦~」

聽住Timothy同珮琳你一句又我一句咁...

真係咁?

去酒店真係有咁多野做架咩?

真係可以純粹傾野咁簡單?

真係因為酒店無咁好多似Timothy咁煩既煩人煩住?

講真嗰句...好多時我都覺得Timothy幾煩下...

但如果話要去酒店先可以靜靜地咁傾野...又未免...太過...阿Q精神喇掛...

「喂~」可能係因為我太耐無出過聲,Timothy就叫一叫我,「咁你有無問下佢丫?」

『下下下?問咩丫?』一時之間,我都Get唔到Timothy問乜...

Timothy冷眼望住我:「有無問下佢係唔係同個女仔去左酒店呀!」

『我...』我諗下諗下,『我都有問過既...我有打去問佢喺邊...做梗乜...但佢就話仲喺電影公司同人地傾梗野囉...』

Timothy第一時間開口講:「死喇死喇!咁就死喇!佢講大話丫!你話佢唔係偷食咁係乜野丫?」

係咯…如果唔係偷食既話...咁東日佢…點解要講大話呢?

珮琳又諗左一諗:「我又真係唔係咁睇喎...」

哦?

Timothy冷眼咁望住珮琳:「唔係咁睇仲可以點睇呢?」

係咯…我都想聽下珮琳會有乜野睇法...

「唔…」珮琳摸住手腕上既Pandora手鏈諗左一諗,「我都唔知點講...總之就覺得東日唔係D會背住自己女朋友出去偷食既男仔~」

Timothy Keep住冷眼咁望住珮琳:「又係D女人直覺丫?」

珮琳回返一對冷眼俾Timothy:「唔係D乜野女人直覺~係同東日見過幾次面~傾過幾次傾~深入交流過幾次~喺佢既言談舉止之間,可以睇得出佢係一個好正經既男仔!我咁解釋夠唔夠清楚丫?」

Timothy好緊張咁追問:「深入交流?!你同佢深入交流過D乜丫?!」

係囉係囉!我一聽到珮琳話“深入交流”都覺得怪怪地架喇!

究竟珮琳同東日深入交流過D乜呢?!

珮琳冷眼咁望住Timothy:「咪交流寫故既心得囉!你又諗左去邊呀?!」

「呼~嚇死我~」Timothy鬆左一口氣~

呼~都嚇死我~

講到咁曖昧咁...等我唔知諗左去邊添...

諗左去邊?

係咯…我又可以諗得去邊呢?

珮琳唔會咁隨便架嘛~

咁即係話東日隨便啦?!

更加唔係啦!!!

東日都唔係D咁隨便既人!!!

咁我仲要擔心D乜呢?

Timothy鬆完一口氣後就繼續講:「唔係話諗左去邊丫~男人喎~就算幾正經都好,都係男人~男人就好似貓一樣~口咬一條魚~手撳一條魚~眼望一條魚~心諗住既,咪又係另一條魚~」

珮琳拍一拍Timothy個肚:「你估個個男人都好似你咁咩?!」

「咩...咩咩咩好似我咁丫?我點丫?」Timothy立即勁心虛咁~

珮琳再篤一篤Timothy肚皮:「你話呢~你話呢~」

Timothy Keep住勁心虛咁講:「我...我...我無無無...我咩都無囉...」

男人都好似貓一樣...

邊有貓唔食魚架?!

而且仲要有咁多魚喺佢身邊游黎游去...

再定性既貓,都會忍唔住口啦...

「阿儀~」珮琳摸一摸我隻手...

『下下?』又諗得太入神添...

我就係咁...總係唔可以一心幾用...

珮琳繼續摸住我隻手:「如果你真係唔放心既...咪試下Chok下佢囉~」

Chok下佢?

Timothy又搭嘴:「係咯係咯~我都覺得係要Chok下佢架~」

『但...點Chok呢?』呢D野...我唔懂架喎...

「好簡單架姐~嗱~」珮琳望住Timothy,手都放到Timothy既胸口上,「喺我昏迷期間,你有無搞過其他女仔?!」

Timothy當堂打左個突:「無無無!我邊有搞過其他女仔姐?!肯肯定無!」

珮琳一手就拍左落Timothy個胸口上:「嗱!你睇佢個反應鬼咁大,又心跳加速咁就知佢一定係心虛啦~」

Timothy攬住珮琳:「無呢...無呢...我真係無呢...我只愛你一個咋嘛…你知架...我真係無呢無呢...你信我啦...」

「喂喂…唔好攬...唔好摸我條腰丫喂!」珮琳又俾Timothy攬到瞓左落床...

睇黎真係好Work咁喎...

你睇下Timothy個心虛樣...

話唔定…都真係Chok到D野架喎…

不過咁單刀直入...又會唔會太過明顯呢?

東日佢又會唔會覺得我對佢無信心呢?

我係唔係應該對東日有信心D,唔好諗咁多呢?

「你都唔好咁無自信喇~」

情性...

係我對東日無信心?

定係我自己太無自信?

唔...

帶住滿懷心事既心情跟住珮琳織頸巾...

「高針~高針~」

『哦哦...』

我都仲係雞手鴨腳咁...

「好悶丫~~~你地仲要織幾耐架~~~好悶丫~~~」Timothy成個小朋友咁...

「你唔好煩住晒啦~去斟橙汁俾我地~」珮琳就好似個媽媽咁~

織下織下…織下織下…

「嗯~」珮琳拎起我條頸巾,「都差唔多架喇~只要再織多一、兩日就起到貨架喇~」

『嗯嗯~搞左你咁耐真係唔好意思~』我尷尷尬尬咁望珮琳鞠一鞠躬~

Timothy立即插把嘴:「你都知你搞住我地好耐呢?」

「你唔好多事啦!」珮琳拍一拍Timothy個頭,「唔駛理佢架~再唔明記得問我丫~」

『嗯嗯~麻煩晒~麻煩晒~咁我走先啦~』再搞住佢地既話,Timothy真係會殺左我...

「咁好啦~慢慢行喇~拜拜~」

『拜拜~』

同珮琳仲有Timothy揮個手道個別後...

我就拎部電話出黎,打一打俾東日~

「嘟...嘟嘟...喂~阿儀~你走得喇?」東日好快就接聽~

『嗯~搞掂晒喇~你而家喺邊丫?』問一問東日喺邊先~

「我岩岩想去買餸~你而家喺邊丫?我過黎接你啦~」東日好似行得好急咁~

『我...我都係喺附近咋嘛~咁我自己過黎同你買餸啦~』我緊係唔會話你知我喺珮琳屋企附近啦...

「哦...哦好丫~咁我喺百佳等你~」東日好似有D疑惑,又好似好快無晒野咁...

『嗯嗯~一陣見~』

「嗯~一陣見~」

為左唔好穿崩,我快快腳咁走去搭巴士~

一落巴士又快快腳咁走去百佳~

我一行到去百佳門口,就見到東日企左喺道~

「咁快既?」東日拖一拖住我隻手~

『係丫係丫~我...我喺呢頭幫迦迦搞D野咋嘛~』我係唔會唔記得今朝係話出黎幫迦迦搞結婚D野~

「係丫?後日都結婚架喇喎~仲有咁多野未搞好咩?」東日摸一摸我隻手…

『係丫係丫…後日都結婚啦~都仲有咁多野未搞喎...哈哈哈...』係咯...迦迦後日都結婚啦...仲邊有咁多野搞先得架?

「係丫?咁而家搞掂晒喇嘛?」東日捉一捉實我隻手...

『搞掂晒~乜都搞掂晒喇~哈哈哈...』仲唔搞掂就真係唔駛搞喇...

「係丫?你心跳得咁快既?掌心仲咁多汗添...你無事丫嘛?」東日打量一下我...

『無事無事~邊有事姐~行得急左D咋嘛…哈哈哈...我地都係買餸先啦...』死...心虛到心跳加速...掌心出汗添...

都係保持冷靜...保持冷靜...

「嗯~咁我地買餸先喇~想食D咩丫?」

『無所謂~無所謂~哈哈哈...』

「真係無所謂?咁...蒸條魚?」

『好丫好丫~哈哈哈...』

「仲有…梅菜肉餅?」

『好丫好丫...哈哈哈...』

「你個心真係跳得好快喎...」

『無呢無呢...哈哈哈...」

「唔係喎…真係跳得好快喎...」

『邊有呢邊有呢...哈哈哈...』