吼~~吼~吼!吼...”我一早就揸車返到黎公司既停車場...

“咇”鎖好車之後,望一望手上隻Piaget...

『咦?點解會比平時遲左五分鐘架呢?』我再望清楚隻錶...

又諗下係唔係今朝我自己校錶既時候校得唔準...

定係我頭先揸車返黎揸得有D慢呢?





唔緊要啦...最緊要都係無遲到。

“咇”拍一拍卡,一路行入公司...

「凌生早晨~」

『早...早晨...』一路同D同事講早晨...

「凌生早丫~」





『早...早...』一路心不在焉咁行過同事既位...

「早晨丫~凌生~」

『早晨...早晨...』其實我一直都有D心不在焉...

「凌生早晨丫~」

『晨...早晨...』其實由尋日開始,我就一直都心不在焉...





「早丫~凌生~」

『早...早丫...早...』因為...

「凌生早晨~HR嗰邊岩岩打左黎,話新入職既梁小姐上左佢地道簽梗約。大約十五分鐘會上黎~」我行到我間房前,Candy就同我匯報...

『哦哦...咁...咁等佢上到黎之後...你就帶佢去見Ivy...』就係因為Zoe...

一個同我老婆同一個英文名...中文名又差唔多…個樣直頭係倒模咁既女仔...

「下?直接帶佢去見Ivy?唔駛見左你先?」Candy提一提醒我...

『唔駛喇...直接帶佢去見佢既Team Leader就得喇...』我唔係心不在焉到唔記得規矩…

「哦...明白...」Candy好似有D困惑咁點點頭...





『嗯...』我就行返入房...

我唔係心不在焉到唔記得有新員工入職,係需要由部門既Director去親自指派個新人俾Team Leader…

而係我仲未有心理準備去再次見呢個同我老婆咁相似既女仔...

由尋日第一次見完Zoe之後,我一直都喺道諗梗佢...

唔係唔係…

我係一直都諗梗我老婆...

我真係估唔到...喺呢個世界上...真係會有一個人...會同我老婆...咁似樣...





不過就算有幾似樣都好,始終都唔係同一個人!

呢點我係可以話係絕對清楚!

電視又好...電影都好...呢D劇情都睇得多!

好多時個男主角遇到一個同自己死去既老婆生得一模一樣既女仔,好容易就將對老婆既愛投射左落去嗰個女仔道...

之後又係嗰D內心掙扎丫...糾纏不清丫...似是而非丫...若即若離丫...呼天搶地丫...生不如死丫既情節...

呢D劇情真係講出黎都覺得悶!

為免呢D咁悶既情節喺我身上發生...我都係避忌下好D...

之不過...口裏說不,身體卻很誠實...





其實喺我入左房之後,我連個工事包都無放低道,就喺個落地玻璃窗...喺D布簾掩護下,偷偷望出去...

望出去Office出面...留意住Office既大門...留意住Zoe幾時入黎...

我一路好小心咁,留意住出面有無人留意到我喺道鬼鬼祟祟咁留意出面既情況,一路鬼鬼祟祟咁留意住Zoe出現未...

我都好似等左好耐...好似唔止十五分鐘咁...

仲令我覺得自己好似個變態佬咁...

好變態咩?個個高層都係咁變態架啦~

只係我平時唔變態...今日先走黎變態咋嘛…





我一直都望下望下,望到見到Candy開始行去門口...

睇黎…Zoe應該上梗黎...

唔駛過一陣,就見Candy帶住Zoe入黎!

今日Zoe放左把秀髮落黎....著左條淺色既碎花長裙...

好清新...好脫俗...

就好似老婆一樣...一樣咁鍾意清新脫俗既形象...

只見Zoe帶住微笑,一步一步跟住Candy行去...行去Ivy嗰Team...

真係…好似…

不論係外表...就連行路姿態...神情...氣息都好似...

好似老婆...

我返一返埋位...坐一坐低...

望住老婆張相...望住老婆既甜美笑容...

世上點會有一個人...可以如此相似...

真係…真係…

『唉...唔好再諗啦~真係唔好再諗啦~再諗就變CCTVB架喇~』我鬆一鬆口氣~放一放鬆心情~

放鬆D~放鬆D~要好好做個好既上司~

要好好做個好既上司...

唔...我諗Zoe岩岩先第一日返工,檯頭除左電腦同文具之外,應該就乜都無...

應該空空如也...咁咪好空虛囉?

好空虛...好空虛...

我望一望自己既檯頭...望一望盆仙人掌仔...

不如送盆仙人掌仔俾佢...當係歡迎佢入職啦~

大老細成日都話,要親民D架嘛~

更何況老婆都話要同同事融合D~

我都係聽老婆同大老細既話姐~絕對唔係有私心!

咁好啦~送盆仙人掌仔俾Zoe啦~

我就拎住盆仙人掌仔,一步一步咁行去Ivy Team嗰邊...行去Zoe個位嗰邊...

放鬆D~自然D~

當我行到去Zoe個位之時,我隱約見到Zoe望住部電腦...睇住個網頁...睇住我地公司既網頁...我地人事架構圖...

『早晨丫~已經見過Ivy喇呵?』我好自然咁輕輕放下一句。

要自然D...自然D...

「嗯~嗯~見過喇~」Zoe帶住燦爛既微笑望住我。

『嗯嗯~有咩唔明可以問Ivy~又或者直接黎問我都得架喎~』嗱!我絕對唔係以權謀私呀!

大老細成日同我地講,話我地做高層既能力越大,責任越大!

我地係唔可以坐喺道等下面班細做到死!

我地做高層係要全力幫助下面每層!

每層都要關我地事!

唔係既話,做乜要出咁高人工俾你呀?!(講就咁講...佢而家咪又係同梗佢老婆環遊世界風流快活梗...)

「嗯嗯~C-Moon就係有呢樣好~所以先有咁多人爭入黎C-Moon工作~」Zoe繼續Keep住燦爛既微笑點點頭~

『呃…都係既…』的確係既...

唔係大老細一直都主張親民,風氣都唔會咁好~

「係呢...你...做乜拎住盆仙人掌仔既?」Zoe八八卦卦咁望住我手上盆仙人掌仔...

『呃?丫!係丫係丫!我知你岩岩入職檯頭會空空如也~所以想送盆仙人掌仔俾你~俾你有D綠色野睇下嘛~哈哈...哈哈...』講下講下都差D唔記得添...

「係丫?多謝晒丫~我最鍾意就係仙人掌仔~」Zoe接過我手上盆仙人掌仔~

『你都鍾意仙人掌仔架?女仔唔係都怕會吉親...所以唔鍾意種仙人掌仔咩?』我打量一下Zoe。

「唔怕~玫瑰花夠有刺啦~咪又係咁多女仔鍾意~而且我鍾意仙人掌仔係因為佢夠易湊~生命力夠晒強~」Zoe拎住盆仙人掌仔望下望下~

『係丫…都真係幾易湊...咁我唔阻你喇~有咩唔明記得黎問我喇~』竟然...

「嗯嗯~多謝晒你~」Zoe拎住盆仙人掌仔同我揮揮手~

『嗯嗯~』我就轉身離開...

竟然...竟然係咁...

我一路行返入房,一直都喺道諗...

真係估唔到...估唔到Zoe會同我老婆一樣...

一樣會鍾意仙人掌仔...

其實當我打算送盆仙人掌仔俾Zoe之時,我已經喺道打量梗佢會唔會都係同我老婆一樣,一樣會鍾意仙人掌仔...

我就係想睇下,喺呢個世界上,係唔係真係有咁既巧合...

一個只會發生喺螢光幕裏既巧合...

而更巧合既係,Zoe竟然會講出一句同我老婆之前都講過既說話...

「玫瑰花夠有刺啦~咪又係咁多女仔鍾意~而且我鍾意仙人掌仔係因為佢夠易湊~生命力夠晒強~」

我仲好記得老婆岩岩買盆仙人掌仔返屋企既時候,我經常好唔小心咁俾佢吉親~

而我就好好奇咁問老婆:『點解你會鍾意仙人掌架?又多刺...個樣又奇怪...』

老婆就笑住口咁答:「玫瑰花夠有刺啦~咪又係咁多女仔鍾意~而且我鍾意仙人掌仔係因為佢夠易湊~生命力夠晒強~唔似得你咁丫~鬼死咁難湊~」

『老婆丫~我而家一D都唔難湊喇~而且仲好堅強添架喇~』我望一望住檯上張相...望住老婆既微笑...

時不時望下老婆張相工作...

好唔專心...

平時既我都唔會咁...

就算係點樣掛住老婆...點樣想念老婆...諗起同老婆相處既每一分每一秒都好,我都唔會咁分心...

之但係今日...我真係好分心...

我之所以分心喺老婆身上,係因為唔想分心喺Zoe身上...

我好怕...好怕又諗起佢...

我係唔應該諗起佢...

Zoe只不過係一個好似我老婆既女仔...同事...

我個腦係唔應該成日都有佢既出現...

咁樣對Zoe...對老婆都好唔公平...

我要專心D...專心喺老婆身上...喺老婆身上...

我好專心喺老婆身上咁工作...工作...再工作...(即係唔專心咁工作...)

有好多野本來係要喺今朝完成,但當然就完成唔到啦...

不過好彩~好彩既係大老細去左同佢老婆風流快活梗~唔係既話,一定一早就俾佢召左上天堂照肺~

“咇”電話既內線響起...

『喂?』我有小小心虛...

硬係覺得會係大老細打入黎召我上去咁...

「凌生~Ivy話為歡迎Zoe加入C-Moon既大家庭,想同成Team人請佢食返餐Lunch喎~唔知凌生賞唔賞面一齊食呢?」電話傳黎Candy把聲。

但當然,大老細又點會無啦啦返番黎丫~~~

『嗯~好丫~預埋我丫~你都一齊去丫~』原來不知不覺之間,都已經差唔多到左Lunch Hour~

「嗯~咁我同佢地講聲~同埋改一改返我地既Lunch Hour~」Candy好細心咁交一交代返。

『嗯~有勞~』

同同事一齊食Lunch,其實真係無乜幾何~

平時唔係同大老細,仲有幾個高層食,就係自己一個人食~

始終我地呢D高層,總係會令到D細既有一種無形既壓力~

而且都要俾D時間...俾D空間佢地,講下公司既是非~

所以話,大老細既理念有幾好都好,要實行其實都唔係咁有可能~

之但係點解今餐會叫埋我?

有無聽過“有大食大,無大就食老差!”呢?

搞掂埋D手尾之後,我就同Candy一齊去公司附近間Buffet~

我同Candy一入到去Buffet入面,就已經見到Ivy嗰Team人坐左喺張長檯傾梗計~

「France~黎左喇?」Ivy向我揮一揮手~

『嗯嗯~唔好意思~遲左少少~大家可以唔駛等我~去拎野食先架嘛~』我就坐到去“主席位”~

「要等埋你致詞先得架嘛~」Ivy古古惑惑咁同我打左個眼色...

『嘩~原來要講野架?我無準備喎~哈哈...』呢個Ivy...我總係覺得佢特別多鬼主意...

「幾句姐~難你唔到既~」Ivy仲係勁古惑咁...

『OK~OK~呃...好歡迎Zoe加入我地C-Moon既大家庭啦~我地大家都好似一家人咁既~大家都無分彼此~所以唔駛就住就住~尤其係對住你上司~大老細成日都話“職級只有責任既輕重,並唔包括身分地位!”所以呢~Ivy~千萬唔好嚇親人丫~』我望住Ivy,恥一恥笑佢~

「哈哈哈~」在場一班人都笑得好開心~除左Ivy~

Ivy扁住嘴咁望住我...

鬼叫你整我在先丫?真係丫...

不過我講既野係唔係真係咁好笑?定只係純粹俾面?我就真係唔知喇~

反正做我地呢D位,好多時知又好~估到都好~都唔駛太過上心既~

唔係既話,真係好無癮~又好灰心~

做人唔好太執著,係我老婆教既~

“下屬俾既反應係唔係最真心都唔緊要,最緊要係自己對下屬真心!”就係大老細教既~

雖然大老細既理念總係好似唔係好合乎呢個社會既遊戲規則...

正常一間大公司既靈魂,如果係咁...不切實際既話,呢間公司應該好快就倒閉先岩...

但我地C-Moon...確實可以一直運行得好好...越做越好...

仲一路都有錢賺...越賺越多…

或者...一切都係因為...同眾所週知既都市傳說...有關掛...

『好喇~大家都餓架喇~去拎野食先~』講兩句都講到有D口乾添~

「嗯嗯~拎野食~」幾個舊人就陪住新人出去拎野食~

Candy起一起身,問一問我:「凌生~想食D乜野?等我幫你拎~」

『得架喇~我等陣自己拎就得架喇~』我點一點頭~

「嗯~咁我去拎野食先~」Candy就行出去,同一大班同事拎野食~

我飲一飲啖水,望住班同事拎野食...

望住Zoe拎野食…

望住Zoe好活潑咁行下呢邊拎一D~又行下嗰邊拎一D~又走去呢邊拎一D咁~

喺人群之中既Zoe,都好似特別有朝氣咁~

好似老婆咁...就算病左...都總係好有朝氣...好有活力...好精神...

就算係最後既日子裏面...最後既時間裏面...

「凌生~凌生~凌生~」當我又諗起我老婆之時,我好似聽到老婆把聲...

『下…下…係係係!』我回一回個神,先發現原來Zoe已經拎左D野食返黎,望住我揮揮手...

「你唔去拎野食既?出面有好多好野食喎~」Zoe帶住微笑咁指一指佢面前碟野食。

『嗯嗯...一陣去...一陣去...係呢...你都拎左幾多野返黎喎~』我望一望Zoe隻碟,載到滿滿咁。

「係丫係丫~我呢...一見到想食既野食就忍唔住手拎左先~仲會唔分先後,想食就食架喇~」Zoe尷尷尬尬咁點點頭~

『係丫?其實我都係架喎~一見到想食既野就拎左返黎先~唔理佢係餐前小食定係甜品~』唔止我...

「係丫?原來你都係咁架?我幾驚你會覺得我唔識規矩~」Zoe面紅紅咁摸摸頭~

『點會呢~最重要都係食得開心姐~我出去拎野食先~』最緊要都係食得開心...

「嗯嗯~」Zoe點一點頭後,就開始開餐~

而我都起身行去拎一拎野食...

其實唔止係我...老婆都係咁...

同老婆去食自助餐,佢都係好鍾意拎勁多野返黎~樣樣都有D~唔理係餐前小食定係甜品~總之想食就食~

老婆話咁先食得開心喎~

無錯呢~最緊要都係食得開心~

拎滿左隻碟返黎~

食完又出去拎過~

拎左幾轉~嘆下杯咖啡~

「多謝凌生~咁我地返上去先喇~」Ivy就帶住佢Team人同我道過謝後就離開~

呢D咪就係“有大食大,無大就食老差!”囉~

話就話羅漢請觀音~

實質我唔黎既話,呢餐就係Ivy請架喇~

『Candy~你都返上去先~』我飲一啖咖啡~

「嗯~咁我返上去先~」Candy都轉身離開。

我就離遠望住Zoe既背影...

望住Zoe同班同事有講一笑咁...

睇黎都算得相處融洽...應該無問題既~

我嘆多陣咖啡~埋埋張單~都返番上公司做野~

話就話返上公司做野,其實我都仲係好唔專心...

喺咁唔專心既情況之下,又點會做到野丫?

而唔知點解,你越係唔專心,時間就過得越係快~

一轉眼,就已經到放工時間...

『好啦~都係留返聽日先做啦~』我就執好D野,準備離開公司~

當我一離開間房,我好自然咁向住Ivy嗰Team既方向行過去...

Ivy嗰Team俾我都早放工,正常都已經走晒...唔會再有人...

但當我行到去Zoe個位之時,我仲見到佢坐左喺道...

仲未走?唔…

我就行過去,同Zoe講聲:『仲未走既?你夠晒鐘放工架喇喎~你唔會唔知道,我地公司係唔俾人開OT架嘛?』

我就係怕你唔知,所以先行過黎睇睇你~

Zoe好似俾我嚇左一嚇咁:「嗯!嗯!我知~我知~我拍左卡架喇~我只係...等梗我男朋友黎接我...我走架喇~我走架喇~」

我再望一望Zoe個位...的確真係執好晒野,等梗走咁既樣...

『嗯~咁就唔好留咁耐架~俾HR知你拍左卡都唔走會好麻煩架~拜拜~』我同Zoe揮揮手~

「知道~知道~」Zoe帶住微笑同我揮揮手~

我就慢慢行出門口~

真係唔係講笑~如果俾HR嗰邊發現,真係出Warning Letter都似~

我行到黎停車場…

行到黎紅色既Ferrari 488 GTB旁...

“咇”解一解鎖…

“咔”上一上車…

坐喺駕駛座上扣一扣好安全帶...

喺個軚盤上按下ENGINE START…

“吼!吼...”

『返屋企~』

正當我駛到出公司門口之時...我望一望...我望到Zoe企左喺的士站邊...

Zoe左望望...右望望咁...好似等梗車咁...

乜Zoe個男朋友係揸的士架咩?

我就駛架車去Zoe身邊...停一停低...

Zoe就好似嚇左一嚇咁,望一望...

我撳低隻窗:『Zoe?你男朋友仲未黎丫?』

Zoe尷尷尬尬咁點點頭:「佢...佢話突然有D事...黎唔到喎...」

有D事?有乜事重要得過接女朋友收工丫?

『咁...呢個鐘數無的士架~睇個天又好似就快落雨咁...不如等我送你返去啦~』我望一望個天,正有舊大黑雲黎梗...

「咁…咁…好似唔係咁好…咁好意思…」Zoe仲係尷尷尬尬咁…

我就落一落車,幫Zoe打一打開道車門:『上車先啦~』

「咁...咁就唔該晒...」Zoe就好小心咁上一上車,撳一撳住條裙。

我都上一上返車,望一望住個天空...突然黑晒既天空:『你住邊架?』

「我住...屯門架...」Zoe仲係好似好尷尬咁...

『哦~都順路丫~』我就開一開車...

“吼~~~吼~~~吼~吼~~吼~~~”

我呢頭開一開車...

“灑!”嗰頭就落起大雨黎~

『好彩你上車上得快~上慢小小都變落湯雞喇~』又會突然落起大雨黎~

「嗯嗯...我男朋友本來真係話黎接我...佢真係突然有D事黎唔到...」Zoe好緊張咁解釋...

『哦~嗯~明架喇~明架喇~唔駛咁介意~你男朋友做邊行架?又會突然黎唔到既?』我隨便問一問。

「佢...佢...」Zoe好似唔係好想講咁...

『哦~嗯~明架喇~明架喇~』唔想講都好正常既~

岩岩第一日返工…

我仲要係佢既上上司...

所以我都話大老細既理念係唔Work架啦~

喺呢個咁尷尬既氣氛之下,我都係...

“Fly me to the moon And let me play among the stars”

播下音樂好~

「咦?係Olivia Ong?」Zoe好似好雀躍咁~

『嗯~係丫~OK嘛?』我就喺濕滑既馬路上,好小心咁揸車...

「我係勁鍾意佢架~」Zoe好興奮咁~

『係?我都勁鍾意佢架~咁你鍾意佢邊首歌?』我又問一問Zoe~

「呢首“Fly me to the moon”就係我既首選~」Zoe笑得勁甜~

『我都覺得佢唱既版本係最好聽~』我點一點頭~

「仲有仲有~“我願意”又係超正架~」Zoe點晒頭咁~

『嗯~佢唱得無咁Sad~』我都點下點頭~

「嗯嗯~仲有呢~仲有呢~嗰首...」

喺落住雨既高速公路上,我同Zoe都一直談論Olivia Ong既歌~

直到我送Zoe黎到佢屋企樓下...

「唔該晒你送我返黎~不過...」Zoe又尷尷尬尬咁,「我既氣味可能已經沾左喺你既車廂入面...可能會令你老婆唔鍾意...你可以噴一噴空氣清新劑~清清地既都可以去走我既氣味架喇~」

『哦...你...點會知我結左婚?』我好奇咁問一問...

「因為你無名指上既戒指...」Zoe望一望我隻結婚戒指...

『哦...唔緊要既...』就算幾濃烈都好...都唔緊要...

「嗯...咁我返上去先喇~」Zoe解一解安全帶...

『出面仲落梗雨丫...等我遮你...』我仲未解得切安全帶...

「唔~唔駛喇~我自己返上去得架喇~拜拜~」Zoe就開一開車門,衝入雨簾之中...

我望住喺雨簾之中既Zoe背影...

呢種感覺真係...好親切...真係好親切...