「老公~起身喇~你又無校鬧鐘喇~仲要咁懶瞓添~仲唔起身就遲到架喇~起身!起身!懶瞓豬老公快D起身!」老婆騎喺我身上,搖下搖下我~

『唔唔...醒喇醒喇...俾我瞓多一陣...俾我瞓多一陣添喇老婆...』我仲係攬實張被,唔願落床...

「老公~你未拎衫褲入去~一陣又要赤裸裸咁行出黎著~好易冷親架~」老婆拎住我D衫褲行到入黎浴室~

『係喎~又唔記得左添~唔該晒老婆~』我就喺老婆面前除褲~

「老公~條麵包過左期架喇~你仲放入口~食壞個肚仔丫~」老婆拎一拎走我手上既生命麵包~





『係喎係喎~都無留意到添~咁飲奶好喇~』我拎一拎起盒紙包奶...

「包奶都過左期架喇~」老婆喺我手上拎一拎走盒紙包奶...

『咁咪無早餐食囉...』會餓死架喎...

「我煮梗麥皮俾你丫~好快有得食架喇~」老婆行一行去廚房~

『唔該晒老婆~』老婆真係入得廚房~出得廳堂~





「老公~你條領帶綁到成隻粽咁架~等我幫你打啦~」老婆行到埋我面前,幫我打一打領帶~

『唔該晒老婆~老婆打既領帶係最靚既~』我就望住老婆好用心咁幫我打領帶~

「老公~你又唔記得帶鎖匙喇~」老婆拎起條鎖匙,喺我面前Fing下Fing下~

『係喎係喎~真係大懵喇~哈哈哈~』我摸下摸下自己個頭,對住老婆傻笑~

「老公丫~你隻錶停左丫~我幫你校返岩個時間先啦~」老婆將我手上隻Piaget除一除出黎,校一校個時間...搖下搖下隻錶~





『係喎~擺低左都唔記得會停架添~』我又摸下摸下自己個頭,對住老婆傻笑~

「老公丫~電話無電又唔記得叉電~帶返個尿袋啦~」老婆拎一拎起個尿袋,幫我部iPhone插一插線~

『係喎係喎~尋晚瞓前仲記得叉~轉過頭就瞓著左,無左件事添~』我又摸下摸下自己個頭,對住老婆傻笑~

「老公丫~銀包都唔記得帶~大頭蝦~」老婆拎起個Burberry Black Label銀包拍一拍我個頭~

『係喎係喎~連銀包都唔記得帶添~好彩有老婆提點我咋~』我摸一摸老婆把秀髮~摸一摸老婆塊白滑幼嫩既面頰~

「我係唔可以時時刻刻都喺你身邊架...」老婆帶住無奈既微笑擰擰頭...

『可以架...可以架...可以一直都喺埋一齊架...』我係唔會離開你架...

只見老婆默不作聲,帶住無奈既微笑望住我...





『老婆...我唔會俾你離開我架...老婆...』我攬住老婆...攬到實一實...

我唔要你走...我唔俾你走...我唔俾你就咁離我而去...

我地仲有好多地方未一齊去過...

我地仲有好多事未一齊做過...

我地仲有好多好多日子要一齊過...

唔好走丫老婆...

老婆...





老婆...

『老婆...老婆...老婆...』當我再次睜開雙眼...

迷迷糊糊咁望一望...望一望個...天花板...

『老...天...天光喇?唔...唔...』我攬住左張被...攬到實一實...

我喺張床上碌一碌...再深呼吸一口...望一望床頭張相:『早晨丫老婆~我又喺夢中見到你~』

我又喺鬧鐘未響之前醒左喇~

好~要起身落床~唔可以咁懶瞓~

梳洗先!





我就拎定D衫褲,入去浴室梳洗~

好快手咁梳洗一下,著返套衫,我就行去廚房,拎一拎起條生命麵包...

『嗯~無過期~仲好新鮮~』

再喺個雪櫃裏面拎一拎起盒紙包奶...

『都無過期~可以安心食用~』

我就開著部電視,一邊睇下有乜新聞,一邊食返個簡單既早餐~

我一路食住個早餐,一路睇住水電煤加左幾多~隧道費又加左幾多~





喺香港生活都真係唔容易丫~

不過好彩...我地既老細都算係有良心既~

就算再艱難都好,只要繼續努力喺呢間公司裏面工作,我諗到退休既時候,都唔駛靠政府嗰D爛鬼退休保障既~

好啦~食完個早餐都差唔多係時候換衫~

我行到去衣櫃前,揀返好套西裝~襯返條領帶~對住塊全身鏡打下打下...打下打下...

好細心咁打到條領帶靚靚仔仔~

再喺床頭拎返起條鎖匙~袋好喺褲袋~

再喺床頭上拎起隻Piaget~校一校返岩個時間...搖下搖下隻錶~

帶好左隻錶之後,我再喺床頭上拎一拎起部已經充滿電既iPhone~甩一甩條電線~將部電話放好喺西裝褸袋入面~

再喺床頭上拎起埋個Burberry Black Label銀包~

Check一Check入面有無錢~有無帶身分證~有無帶信用卡~

確保帶齊晒所有野之後,就將個銀包放到入公事包入面...

再幫盤仙人掌仔淋下水~

每朝返工前都要淋一淋~咁先會快高長大~

幫盤仙人掌仔淋好水,放一放喺窗台上...

『呀!差D真係唔記得!』我打一打開個公事包,Check下有無帶到公司張證件先~

無帶既話,就連門口都入唔到架喇~

確保有帶到公司張證件之後,我就戴一戴上隻結婚戒指...帶望微笑咁望住老婆張相:『老婆~我返工先喇~今晚返黎再陪你啦~拜拜~』

『早晨~』帶住微笑同樓下既看更講聲早晨~

「凌生早晨~」

帶住輕鬆既心情行去停車場~

可能今日既天氣好掛~

可能係見到耶穌光掛~

就好似老婆喺天堂上一直睇住我~望住我~守護住我一樣~

有老婆守護住我,心情都會愉快D~

行到黎停車場…

行到黎紅色既Ferrari 488 GTB旁...

“咇”解一解鎖…

“咔”上一上車…

坐喺駕駛座上扣一扣好安全帶...

喺個軚盤上按下ENGINE START…

“吼!吼...”

『好~起程~』

由屋企揸車返公司,唔塞車既話...大約用上四十分鐘啦~(雖然話就話我係揸梗超跑...但我係一個好注意安全既司機~行高速公路都唔會超過時速六十公里~)

至於我返咩工可以揸得起Ferrari?

唔...

其實我係喺一間叫做“C-Moon”既廣告公司裏面做Creative Director既~

做得Creative Director既話,我咪好大年紀?

咁又唔係喎...

其實我都只係三十歲人。

三十歲人就可以做到一間廣告公司既Creative Director?!有無吹得再大D?!

講起上黎...其實都幾奇怪...

是咁的...

呢間公司其實都只係成立左四年,但規模就非常之大。一開始已經係一間過萬員工既公司。

生意涉及任何一種事業...任何一個媒體!

而我就係喺我老婆走左之後...即係公司成立第二年入去做事。

起初我都只係由創作部既小員工做起。

喺剛開始嗰三個月,我都仲係唔係咁做得野~

仲差D過唔到Probation添~

好彩既係…我一直都有好好記住我老婆同我講過既每一句說話...好好做好自己要做既事...

我一直都好專心咁做~好用心咁做~

由於我地公司有一條好奇怪既規條...就係“任何職級,任何員工都不能留在公司超時工作。”...

仲有一條比較常見既係“不能將公司財產帶離公司。”...

咁即係唔可以OT...又唔可以帶野返屋企做...只可以喺辦公時間內完成工作~

每日返工既時間,我都好用心又好專心咁做好自己要做既工作~

萬一有D時候無乜靈感...感到氣餒...感到沮喪既話,我都會望一望檯頭張相...老婆張相...

每當我望到老婆既甜美笑容,我都會好似充滿力量一樣,靈感爆棚~創意無限~

老婆就係我既動力呢~

我一直都好俾心機做~好勤力咁做~

直到有一日,有一個身影經過我個位...

個身影停左一停,企左一企…

「你畫架?」個身影望一望...

我望一望呢個身影...望清楚D...係同我差唔多咁上下年紀既男人...

『下?』一時之間,我唔係好明佢既意思...

「張圖。」個男人指一指住我貼喺Partition上張圖...

「係...係我畫...」我痴痴呆呆咁點點頭...

係我岩岩整好,但又好似差D野…唔交得貨既設計圖...

「幾好。」個男人放下一句之後,就行左去...

我望住男人既背影...睇唔透...

我喺間公司裏面做左個幾兩個月...都好似未見過呢個男人...

不過嗰陣時就唔理得咁多~因為都係起貨緊要~

而喺三日後,HR既經理就親自上黎同我講,話我升左上去做Creative Director!

當時我一聽到都嚇左嚇...心諗係唔係搵錯人?!

之後再講講下先知,原來係我地既大老細點名升我上去...

而喺我第一次上大老細房見大老細之時,先發現當日經過我個位既男人...就係我地既大老細!

嗰時我仲好傻咁問左一條白痴問題:『只係一張圖...你就升一個低級員工做Creative Director…會唔會太過...兒戲?』

當時大老細笑左一笑:「你覺得我真係會咁兒戲咩?其實我之前已經睇過你D圖...你D構思都好創新...同埋你都好有熱誠~好努力~我覺得你係一個適合既人選~」

嗰陣時聽完之後,我都唔肯定自己係唔係真係適合...

之但係,我都會一直努力做好我既工作~

一直一直...聽老婆既說話...一直好好咁做好自己本份...一直到而家~

吼~~吼~吼!吼...”好快我返到黎公司既停坐場。

“咇”鎖好車之後,望一望手上隻Piaget...

『同平時一樣,早十五分鐘返到黎公司~』無錯~係十五分鐘~

想早D都唔得~

因為我地公司仲有一條規條,就係“禁止比上班時間早十五分鐘返回公司。”...

話因為公司太多人,要確保準時既員工唔會因為有D早返既員工爭升降機用而遲到喎~(因為有D係返朝八晚四~有D返朝八半晚四半~有D返朝九晚五~有D返朝九半晚五半~有D朝十晚六~彈性上班時間嘛~)

所以就算早到,都係拍唔到卡入閘既~

講開又開,邊個諗D咁奇怪既規條出黎架呢?

“咇”拍一拍卡,一路行入公司...

『早晨~』一路同D同事講早晨~

「凌生早晨~」

『早晨~』一路行過同事既位~

「早晨丫~凌生~」

『早晨~』條路都有D長~

「凌生早晨丫~」

『早晨~』不過我都習慣每朝都同每一個同事講聲早晨~

「早丫~凌生~」

『早晨~』禮貌既一種丫嘛~

「凌生早晨~HR嗰邊今朝已經Send左份Sec In既應徵者既CV過黎~而且已經喺接待室等梗Sec In...」我行到我間房前,我既秘書Candy就同我匯報~

『嗯~五分鐘後叫佢入黎~』又會咁早既~不過都OK既~

Candy繼續有事匯報:「仲有既係...HR嗰邊話Michelle已經辭左職...由於未過Probation既關係,所以已經即日離職。」

『哦...咁...咁你叫HR嗰邊Send多個應徵者既CV俾我做Sec In...』原來係咁...

原來Michelle所講既“不拖不欠”...係指佢會...辭職?

「嗯~無問題~」Candy點一點頭。

『嗯~辛苦晒~』我都入一入返房。

入到房...放一放低個公事包...望一望住檯上老婆張相...

『我算唔算係害左個年輕女仔呢?』

不過算啦~人各有志~Michelle係一個聰明女~佢選擇得既,一定係對佢黎講最好既決定~

好~我都爭取時間,睇一睇應徵者既CV先~

我開一開著部iMac...

Check一Check返D E-mail…

開返HR Send過黎既信件...

係應徵者既CV...

今次個Sec In…就係得我一個Interviewer...

其實都無乜野既~

不過都講講我地平時係點In人啦~

平時首先都係要過左HR先啦~

然後都會係由部門既Director同大老細一齊In~

點解要搵D咁大粒既黎做Interviewer?

大老細話想可以見晒全公司上上下下既員工~

仲有就係希望各階級可以Close D喎~

大老細呢個理念的確係好完美~

但實際上係唔係真係咁完美?

你話呢?

而點解今次就係得我一個做Sec In既Interviewer?

因為大老細請左三個月大假~話要同老闆娘去環遊世界咁話喎~

唉~有錢就是任性~

而呢一個應徵者,其實喺佢寄信黎HR應徵既時候,我地都已經好留意...

尤其係我地既大老細...

我打一打開個應徵者既CV...

『蘇穎霖...Stella...』一個喺呢兩三年開始成名既畫家~

“咇”電話既內線響起...

『喂?』我接一接聽。

「應徵者已經黎左。」電話傳黎Candy把聲。

『請佢入黎~』我就Check一Check自己既儀容有無問題先~

“咯咯 咔”聲響,門就打開。

我就見到Candy扶住個用兩枝腋下拐杖攙扶既少女行入黎。

而我就上一上前,幫Stella拉一拉張凳:『慢慢~請坐~』

「唔該晒~」Stella好小心咁坐一坐低,再好小心咁放一放好兩枝腋下拐杖喺旁邊~

『早晨~我係呢間公司既Creative Director~我姓凌~你可以叫我做France~要你咁早上黎Interview真係唔好意思~』我都返一返埋自己個位。

「唔緊要~係我心急想早D黎~所以先要求喺早上Interview~係我唔好意思先真~」Stella帶住天使一樣既微笑點點頭~

『唔緊要~唔緊要~』其實我都真係唔知邊個提出~只係禮貌上都要講聲唔好意思既~『係喇...其實今次Sec In我就無乜野要問架喇~因為我地已經決定請你~所以今次想請你上黎係問下你有無乜野問題想問我地?』

「下?!已經...決定左請我?」Stella有D愕然。

『嗯~其實由你一寄封求職信過黎既時候,我地既大老細已經好高興有你賞識我地間公司~我同佢都好希望可以請到你入黎幫手~』的確係咁~

當大老細一知道Stella黎應徵,佢就已經問可以唔以立即請佢入黎~

無奈因為公司有公司既規矩,先要過咁多關姐~

「之但係...我對腳...雖然話就話有返知覺...可以行得到...但仲喺康復當中...始終都仲係...」我無等Stella繼續講落去...

『呢個唔係問題~唔會影響到你既創意架嘛~我地一早就已經有留意過你既作品~呢兩三年間既作品,都係我地公司需要既珍貴寶物~』呢D都係我同大老細既心聲~

「嗯...明白~多謝你地~」Stella微笑點點頭~

『唔多謝~一切都係你既努力~咁你仲有無乜野想問?或者有無乜野特別需要?我地都會盡力配合~』我再問一問Stella有乜野需要。

「唔...我想問我可唔可以喺一個月後先開始上班?因為過埋呢個月既物理治療既話,我既進展會好好多~」Stella尷尷尬尬咁問~

『當然可以~咁就下個月既一號先上班~』一個月都無問題既~大老細交低過話Stella有乜野要求都要盡力俾佢~

「嗯嗯~咁我都無問題喇~」Stella好滿足咁點點頭~

『不過呢...我地仲有一個問題...係關於你既...Salary...』差D唔記得我地既大老細仲交低左一句俾我...

「Salary…」Stella諗左一諗...

『我地覺得你提出既Salary都有D...低...所以我地決定要將你既Salary提高多一倍~』無錯喇~大老細話Stella提出既Salary太低,要提高返一倍喎~

「一…一倍?!」Stella有D驚訝。

『係丫~增加多100%~因為我地大老細覺得你應該值得擁有更多,所以就決定將你既薪金提高多一倍~佢臨走時係咁樣千叮萬囑咁吩咐我...唔...佢唔係死左丫~只係去左旅行姐~哈哈哈...』講到大老闆好似講遺言咁添...

「哈哈哈~原來係咁~真係好多謝你地既錯愛呢~」Stella笑得好燦爛~

『唔多謝~唔多謝~咁如果無問題既話,我地就下個月既一號正式成為同事架喇喎~』我伸一伸出右手~

「嗯嗯~無問題~下個月既一號正式成為同事~」Stella同我握一握手~

『嗯~咁等我送你出去~』我就行去幫Stella開一開門~

「唔該晒~唔該晒~」Stella好小心咁拎返起兩枝腋下拐杖攙扶住,慢慢行下行下...行下行下...

我一路送Stella搭升降機~一路送到佢落樓~又一直送到佢去大堂~

「多謝晒你送到我落黎~我男朋友行梗過黎接我~我OK架喇~」Stella指一指住正喺大堂行梗過黎既男人~

『哦~好好~咁你小心D喇~咁就下個月既一號見喇~』我同Stella揮揮手~

「嗯下個月既一號見啦~拜拜~」Stella同我揮揮手~

『拜拜~』我就望住Stella個男朋友扶一扶住Stella,同我點一點頭~

「點丫?順利嘛?」Stella個男朋友扶一扶住Stella問一問~

「順利丫~你唔好扶到我咁實啦~我行唔到喇~」Stella話一話佢男朋友~

「咁人地緊張你丫嘛~」Stella個男朋友都仲係扶到Stella實一實~

「做咩丫~驚我識行識走就走左去唔要你丫?」Stella嚇一嚇佢男朋友~

「唔好唔要我丫~~~」Stella個男朋友扮晒慘咁~

「我又點捨得唔要你呢~」Stella錫一錫佢男朋友塊面~

「我一世都唔會離開你~」Stella個男朋友又錫一錫Stella塊面~

睇住呢對情侶離開大堂...

真係好恩愛既一對呢~

我諗...佢地都應該一齊左好耐...有過好多好多難忘既經歷...有佢地感人既愛情故事~

目送住Stella同佢男朋友離開之後,我都要返番上去喇~

搭一搭升降機上Office...

好細心...好體貼...好溫柔咁...照顧最深愛既人...

見到Stella既男朋友咁照顧Stella...又令我諗起...有老婆喺身邊既時候,就只有佢照顧我...

我一直都係咁大頭蝦...

唔好話可以好好照顧老婆...就連自己都照顧唔好自己...

到我識得照顧自己...識得照顧別人...但老婆已經唔係身邊...

點解...我地總係唔可以及時把握機會?

點解...我地總係要不斷咁錯過?

點解...人生總係要帶住有一、兩件抱憾終生既事過活呢?

『老婆...我又想你了...』

“叮”上到黎Office,行返去房...

「凌生~HR嗰邊岩岩Send多份Sec In既應徵者既CV過黎~而且約好左喺今日下午三點鐘黎Sec In~」Candy同我匯一匯報。

『哦~好丫~唔該晒~』又會咁快既...

我地間公司既HR又會唔會快手得制呢?

不過唔好話HR,我地公司每個部門都係咁快手~

或者呢D就係喺良好既制度、工時及工作環境下工作既應有效率啦~

工作得開心D,效率都高D嘛~

我入一入返房...開一開返個E-mail...睇下HR嗰邊會Send一個點樣既人黎俾我In先~

當我一打個HR Send過黎既E-mail,我呆左一呆...

我呆晒咁望住個應徵者張相...

呢個應徵者...係一個女仔...

而呢個女仔既樣貌...極之似...我...

『老婆?!』我望住Mon裏面張相輕聲咁講...

真係好似…

不論係五官...髮型...面形輪廓...皮膚膚色...都同老婆生得一模一樣...

我再睇睇呢個女仔既個人資料...

呢個二十三歲...中文名叫梁靄怡既女仔...同我老婆既中文名...劉凱怡有D近似...

而且呢個女仔既英文名...同我老婆一樣...都係叫Zoe!

又會咁岩...又會有咁巧合...

又點會有...咁巧合...

老婆...老婆...老婆...

我望住個女仔張相...一直喺道諗...一直喺道發呆...

發左好耐呆...呆左成個早上...

成個早上都無做過D乜...

完全唔知時間正喺道流逝梗咁…

就連過左Lunch都唔知...連餓既感覺都無...

“咇”電話既內線響起...

『喂...喂?』我嚇左一嚇...

我真係嚇左一嚇...完全回唔到魂...

「應徵者已經黎左。」電話傳黎Candy把聲。

『哦哦...請...請佢入黎...』請佢入黎...請佢入黎...

其實呢一刻我自己都唔知道...

“咯咯 咔”聲響,門就打開...

我就見到Candy打開道門...門外有個女仔入黎我房既一刻我先知...原來我仲未做好心理準備...

我望住呢個著上一身黑色套裝...裙下係一對黑絲美腿...紮住一條高馬尾既少女...真係好似...好似老婆...

見到真人...就覺得根本就係老婆企喺我面前一樣...

個女仔企喺我面前,帶住微笑望住我...

『丫…係係…老...坐坐...請坐...』我呆到就連請個女仔坐都唔記得...仲差D叫左佢做老婆!

「唔該~」個女仔怕怕羞羞咁坐一坐低...

都...都係我唔好...

我喺道發乜野呆呢?

搞到人地一個女仔企左喺道咁耐...

『呃...你係...劉...梁靄怡...Zoe丫呵?』我扮晒望住個Mon...睇梗佢既資料咁...

事實上係我唔敢望住佢真人太耐...

因為我好緊張...

我個心跳得好快...

我仲感覺到我塊面有D熱...應該開始紅梗...

「嗯嗯...我係...午安...」Zoe怕怕地羞咁點點頭,捽下捽下隻手指...

捽手指...

係…好緊張嘛?

老婆緊張既時候...都係...好習慣咁捽手指...

『呃...午...午安...我...我係呢間公司既Crea...Creative Director...我姓凌...你可以叫我做France...今次Interview主要都係想問下...問下你...假如我地請左你...你可以點樣幫到我地公司?』我緊張到走埋音添...

「唔...雖然我係Fresh Grad…但係我知道貴公司係需要一D新鮮既思維...而我呢個Fresh Grad出黎,正正就夠晒新鮮~因為喺我個腦入面,無舊有既思想~可以好天馬行空咁發揮創意~」Zoe帶住微笑咁點點頭...

『的確...』的確好似老婆...

面前既Zoe...笑起上黎...真係好似老婆...

好似老婆笑得一樣咁甜...笑得一樣咁溫暖...

「凌生?凌生?France?」老...Zoe喺我面前揮揮手...

『丫…丫!係丫…係丫…的確係咁~我地公司係好需要新鮮既思維~哈哈...』又諗老婆諗到失晒魂...

不過Zoe都講得岩...

我地之前之所以會請Michelle,都係因為佢係Fresh Grad~可以為我地公司帶黎新鮮既構思~

咁而家請Zoe返黎替Michelle個位既話,都可以話係合情合理~

唔算係有私心姐~

『咁好啦~你可以幾時返工?』我諗就算係大老細返黎問起,我都可以好理直氣壯咁同佢解釋既~

「下?」Zoe好似好愕然咁...

『係喎…都未傾Salary添...』掛住快快手請佢返黎,都唔記得要傾Salary...『你開出既Salary...比較低...我會加返50%俾你,你有無問題?』

點解而家D人見親工都係Set到個Salary咁低架呢?

咁樣真係會搞到我地好唔好意思...

「仲…仲有得加50%咁好?無問題~無問題~」Zoe好似好開心咁~

『嗯~假期就同銀行假一樣~病假就每個月六日,可以累積既...到你第一日上班就會有份詳細既合約俾你睇返~到時你可以再睇下O唔OK~』有乜唔OK都可以同我傾架!最緊要都係你黎我地公司工作姐...

「嗯嗯~好好~咁即係...你地請我架喇呵?」Zoe好似懷懷疑疑咁。

『嗯嗯~請你架喇~咁你幾時可以返工呢?』合乎晒條件,又點會唔請呢?

「隨時都可以~」Zoe好心急咁~

『唔...』我望一望個日曆,『聽日就係一號...就聽日有無問題?』

「無問題~無問題~」Zoe笑得勁甜~

『嗯~咁聽日返黎就去人事部先啦~聽日見~』我伸一伸出右手~

「嗯嗯~聽日見~」Zoe同我握一握手...

我一握住Zoe隻手...

呢種力度...呢種溫度...

「咁我...」Zoe疑惑咁問一問...

『丫...丫!我叫秘書送你出去~』我撳一撳部電話,『Candy~幫我送劉...梁小姐出去~』

我又...我又諗起...老婆...

“咯咯 咔”聲響,Candy入一入黎:「梁小姐~請~」

「有勞~有勞~」我望住Zoe既背影...望住Zoe行出門口...

我再望一望返檯上張相...老婆張相...

『老...婆...』