自從上次同Zoe食Lunch之後,都差唔多過左兩個禮拜。

喺呢兩個禮拜期間,我都係自己一個人食Lunch。

無計啦~大老細仲未返黎,係寂寞D架喇~

而點解唔繼續同Zoe一齊食?

咁人地唔係同男朋友食,就係同同事食~我就無謂阻住人啦~





不過話時話,我都未見過Zoe既男朋友係點既樣...

我最多都只係見過Zoe既男朋友揸車黎接佢...

只係見過Zoe上左一架黑色既Benz...

但就係見唔到Zoe既男朋友係乜野樣...

因為次次都係Zoe自己開車門上車...





佢男朋友就係識得坐喺架車裏面等Zoe上車...

一D風度都無...

落車幫女仔打開車門係基本禮儀黎架嘛!

咁都唔識...點做人地個男朋友架?!

仲話係做生意...做老闆...





睇佢唔係富二代就係暴發戶黎架啦!

真係為Zoe既未來擔心...

擔心?

做乜野要擔心?

我係唔係諗多左?

呃…都唔係既…

咁同事之間都可以好擔心架嘛…

尤其我係佢既頂頭上司...





佢有乜差池,都會好影響到我地成個Department既表現同運作架嘛~

我望一望檯頭...望一望住老婆張相...

絕對無私心~一D私心都無~

唉~都係唔好諗咁多喇~手上仲有好多工作要處理...

我呢幾個星期手腳都有D慢...

係時候要收拾心情趕工架喇!

『好!加油努力!』要做好本份!





正當我想開始專心工作之時...

“咇”電話既內線響起...

『喂?』我接一接聽。

「Ivy話想入黎見一見你。」電話傳黎Candy把聲。

『哦...好丫~請佢入黎~』Ivy好日都唔黎搵我...

平日唔係我有事Call佢入黎,都係以E-mail或者開會既時候先有機會交流下。

無啦啦咁早搵我搞乜呢?

“咯咯 咔”聲響,門就打開。





我就見到Ivy翹起對手...挺起個胸...行路扭下扭下咁行入黎...

我之前都無乜點講過Ivy添...

其實我一直都覺得Ivy都幾戰鬥格~

即係嗰D...為求可以搶到人地老公上位而不擇手段嗰種呢...

又有學識...仲要又靚女…又有身材...著到鬼咁惹火嗰隻呢...

但呢種女仔真係可以好做得野。

而Ivy又真係好做得野。





搞到當初公司話要升人既時候,我都唔知推唔推薦Ivy好...

你知架啦...好易令人誤會架嘛…

同事誤會我地有野又好...Ivy誤會我對佢有野都好...都唔係咁好架嘛…

不過好彩既係,當我推薦左Ivy上去之後,佢既表現都一直好好~

而且都無誤會我對佢有野~

就算係聽到其他同事話我對佢有野先薦佢上去,佢都立即高調咁話係因為自己既才能先坐到呢個位~

雖然話我地既Department裏面都有唔少閒言閒語...但無俾Ivy誤會到,總算係不幸之中既大幸架喇~

好喇講返正題...唔知Ivy今次黎搵我所謂何事呢?

只見Ivy好似嬲爆爆咁行到黎我面:「我就快俾嗰個Zoe激死架喇!」

哦?原來係關Zoe事?

『發生咩事丫?』我都知Ivy係一個要求高既人...

之但係...對新人既話,Ivy都算係最包容嗰個架喇喎...

如果唔係,我都唔會派Zoe去Ivy嗰Team啦...

「佢呢幾日丫,成日都失魂落魄咁!係咁做錯野!叫佢畫圖又畫錯!叫佢唔好用黃色,佢就以黃色為主!叫佢諗諗個奶粉廣告點設計,佢就諗左個奶罩廣告出黎!」Ivy谷到頭頂出煙咁...

『哦~好少事姐~新人丫嘛~新人總係會有D出錯既~』雖然我咁講好似有D牽強...

之不過Ivy入得黎,都係想我講D協調既說話姐~

「都唔會錯得咁離罩掛?佢今日丫!仲要將個初稿當係Final咁Send俾我呀!你話係唔係太過離罩呀?好彩我都一定會睇睇先姐!唔係既話就咁Send去俾個客?人地點諗我地呀?」“啪啪”Ivy嬲到拍左兩下檯...

『我就係知你會跟得足~先放心交個新人俾你睇架嘛~』有邊做阿頭唔Final Check架?

乘機表揚一下自己姐~我懂的~

「問題係仲有幾日就過Probation喇!佢而家咁既表現,我都唔知份Appraisal點寫好囉~」Ivy講到好似唔係好想俾Zoe過Probation咁...

『今日係Zoe既生日~咁生日就自然會好容易分心架啦~尤其係女仔~唔係個個女仔都好似你咁強架嘛~好多女仔都好感情用事架嘛~你明架~所以呢~你都係大人有大量~俾下機會D細既~唔好咁介意啦~多D提點下~第時一定可以好好咁幫你手既~』我覺得自己好似湊女咁...

「既然你都咁講...好啦~份Appraisal我識點寫架喇~」Ivy陰陰嘴咁笑笑口...

『哦...』識點寫?

「無乜事我返番出去先喇~」Ivy轉一轉身,擺下擺下咁行返出去...

點解我...硬係覺得...Ivy今次入黎...好似...另有目的咁既...

點解我會覺得...Ivy入黎講左咁耐...好似係為左...想探下我口風咁既...

想探下我口風...睇下我想唔想...想唔想Zoe留低...

會唔會係我諗得太多呢?

諗得太多...

唉~仲話我唔係以權謀私喎...

唔好話Ivy會唔會有咁既誤會...就連我自己都覺得自己好似有D以權謀私咁...

之不過...Zoe係做得野既~

都係值得留低既~

我就唔好諗咁多~唔好理人點諗好喇~

我繼續專心返喺自己既工作~

做返好自己要盡既本份~

一做就做左成個早上~又到左Lunch時間~

我整理一下檯頭~幫老婆張相抹一抹塵:『我出去食飯先喇~』

我行一行出房之後,又好自然咁行左過去Ivy嗰Team嗰邊...

做乜我又會咁自然咁行過去Ivy嗰Team嗰邊架呢?

呢兩個禮拜都係咁...

一放Lunch又好…一放工都好...我都好自然咁行左過黎...

明明就預左Zoe已經出左去食飯...預左佢已經走左...

尤其今日係Zoe既生日,一定會同男朋友一齊食架啦...

咁我仲行過黎做乜呢?

我邊係想見下Zoe姐?!

我過黎係想睇下盆仙人掌仔咋嘛!

想睇下盆仙人掌仔仲健唔健在!

想睇下盆仙人掌仔健唔健康咋嘛!

唉~你地諗多左喇~

但當我行到差唔多去到Zoe個位之時,我就喺道諗...會唔會係我諗少左...

當我行到差唔多去到Zoe個位之時,我見到Zoe拎住盆仙人掌仔...拎住個噴水壺仔...好細心咁噴下噴下...

咦?Zoe無出到去同男朋友食咩?

今日係Zoe生日喎...身為男朋友...Lunch都好應該陪下女朋友丫...

點解就得返Zoe一個坐喺道架呢?

唔...好唔好開口問問呢?

唔...既然都行到過黎...開口問一問...關心下同事...都好合情合理姐~

好啦~就問一問啦~

我行到去Zoe身邊,好隨便咁開口問一句:『咦?仲未出去食飯既?』

Zoe又好似俾我嚇左嚇下咁擰過黎,再帶住一絲絲微笑咁講:「唔...本來...男朋友話盡量抽時間黎一齊食既~之但係...我又俾人放飛機Luu~」

嘩…女朋友生日都放得飛機既?

咩男朋友黎架?

就算真係幾唔得閒丫,都要留返D時間黎陪女朋友啦...

男人唔係只係得事業...另一半都好重要架嘛!

『唔...咁你唔出去食野先?』講真嗰句,就算人地個男朋友點衰都好,我都唔可以喺人地面前講佢男朋友壞話既...

唔係既話,好易令人覺得自己有機心架...

「無胃口...」Zoe擰一擰頭,繼續好專心咁打理盆仙人掌仔...

『無胃口都要食D野架喎...仙人掌仔都要噴下水啦~你又點可以唔食D野呢?』我真係有D好似湊女咁既口吻...

「唔...咁好啦...」Zoe扁扁地嘴咁點點頭...

Zoe就好似一個...一個要人湊既小妹妹...

其實喺呢一個月以黎,我都有留意過呢一點...

喺工作上,Zoe唔可以話完全可以靠自己完成工作...

更加唔好話可唔可以照顧到同事既需要...

咁樣係唔係真係適合留低?

我係唔係真係可以俾Zoe...過到Probation呢?

不過好彩既係,Zoe同同事都算夾得黎~

同Team人做起野上黎都算順利~

呢一點都可以話係可取之處黎既~

Teamwork丫嘛~有良好既Teamwork都算係一個好重要既Point~

我諗以呢個Point黎俾佢過Probation既話,應該唔會遭人詬病既~

等到Zoe拎埋個手袋仔之後,行出公司門口~行到去商場~行去上次我同Zoe一齊食嗰間法國餐廳~

當我地都坐低左之後,Zoe就拎住份Menu睇下睇下...

好似樣樣都唔想食咁...

睇黎Zoe真係好無心機...無心機都連胃口都無...

『不如叫返上次嗰D好嘛?』我俾一俾D提議...

「嗯...」Zoe扁扁地嘴咁點點頭後,放一放低份Menu,拎一拎部電話出黎...

『唔該~我想要...』我就同個男侍應落一落單~

點好晒野食之後,我就望一望Zoe...

只見Zoe對住部電話甜絲絲咁笑笑口...

『做乜對住部電話傻笑丫?』我隨便咁問一句~

見到Zoe笑返,我都放心返D~

「我男朋友話今晚有時間陪我食飯~」Zoe放一放低部電話,但仲係甜絲絲咁既樣~

『咁咪好囉~食晚飯都仲未過今日~總算係同男朋友一齊過啦~』我都明女仔好著重節日既~

最想都係可以同到自己深愛既人過每一個重要既節日~(對女仔黎講,有乜野節日係唔重要?!)

「唔?點解你會知...今日係我生日既?」Zoe帶住困惑既眼神望住我...

係喎…Zoe無講過佢幾時生日架喎...

死喇!唔覺意漏左口風添!

我應該點答好呢?

我應該點答先唔會令Zoe誤會呢?

『係咁既…我之前睇你既CV既時候有留意到...而且你既生日日期咁易記...』我尷尷尬尬咁摸摸頭...

都係老老實實咁講個事實出黎好D...

唔係既話,只會越解釋越似掩飾...

「嗯...就算係易記...咁又點...都會有人唔記得...」Zoe又好似悶悶不樂咁既樣...

『其他人記唔記得都唔重要~最重要都係重要既人記得丫嘛~我係指你男朋友...』我絕對唔係話梗我對Zoe黎講係重要丫...

「佢就係唔記得...係我提佢先記得...」Zoe直頭係失望咁既樣...

『呃...咁...至少佢都抽到時間黎陪你食晚飯丫~做生意既人...都真係好多野要記...又好忙架...其實佢對你都唔錯架喇~』我講完都覺得自己講得有D唔係咁有說服力...

「係咩…」Zoe眉頭深鎖咁放下一句...

身為男朋友竟然可以唔記得女朋友既生日...已經係死罪...

仲要女朋友提既話,真係死足一百次都唔夠佢死...

之不過...人地既感情事...我又真係無乜資格俾太多意見既...

最多都只可以緩和一下Zoe既心情...

『黎黎黎~有野食~食野要開心D食先得架~唔係既話就唔尊重食物架喇~』當個男侍應放一放低頭盤之後,我又氹一氹Zoe...

「嗯~食野先~」Zoe就帶住微笑咁開餐~

『嗯~咁就乖喇~』我真係覺得自己好似...好似湊梗女咁...

一直氹住Zoe食野~

「係唔係真架?」Zoe既心情都好似好左好多~

『聽就係咁聽返黎啦~』我一直都係講下D有關公司既八掛新聞~

「你地D高層邊會收到咁多風丫~」Zoe都好似唔係好信咁~

『你又唔好以為員工之間既閒談唔會傳到我地耳邊先得架~』我就無再提起有關Zoe既男朋友喇...

「咁你D風又喺邊道收返黎架?」Zoe好似好有興趣咁追問~

『之唔係就係喺廁所囉~』既然Zoe好似好有興趣咁,我就再講多D啦~

「喺廁所?點收丫~我唔信~」Zoe半信半疑咁擰擰頭~

『真係架~D人好鍾意喺廁所講秘密架~我地喺廁格裏面都聽到唔少架~嗱~我地絕對唔係有心架偷聽架!係你地講得大聲咋!』我好認真咁望住Zoe點點頭~

「下?真係架?咁我都唔好再喺廁所裏面講是非...」Zoe撳一撳住自己個嘴仔~

『嘩~你入黎做左一個月都唔夠,咁快就有是非要講?』我古古惑惑咁打量一下Zoe~

「唔係唔係~無丫無丫~無乜野是非講丫~」Zoe尷尷尬尬咁擰擰頭~

『有乜是非講?係唔係講我既是非?快D講!』我好強硬咁對住Zoe!

「無丫無丫~乜你有好多是非俾人講咩?」Zoe古古惑惑咁打量下我~

『我行得正~企得正~有乜是非俾人講姐?不過你地就係鍾意搵我地黎講架啦~唔係仲有乜野話題丫~』我冷眼望一望住Zoe~

「嘻嘻嘻...」Zoe傻笑幾聲~

『好喇~都差唔多要返上去架喇~』我舉一舉手,叫一叫埋單~

「嗯嗯~都差唔多~」Zoe喺個手袋仔想拎個銀包出黎~

『呢餐我請你啦~』呢個傻女~而家仲興AA架咩?

呢個時候,你應該係話要去補補妝~

「點好意思丫?又要你請~」Zoe連個銀包仔都拎埋出黎~

『當係請你食生日飯啦~』點都好啦~要女仔AA真係唔係咁好睇囉~

「咁就多謝晒喇~」Zoe縮一縮膊,尷尷尬尬咁笑一笑~

『我既榮幸~』

其實喺上個星期,我都諗梗好唔好請Zoe食餐生日飯...

又諗過好唔好買份禮物送俾佢...

之但係...做咁多無謂野只會俾人講閒話...

我唔想去去下廁所又聽到D男同事講我對Zoe有野囉...

你知架啦,傳聞呢家野真係會越傳越難聽...

由初初傳你對人有意思...傳下傳下就話你上左人地屋企...再傳下傳又話上左山車震...又話喺公司房入面啪啪啪啪啪啪啪啪啪啪啪啪啪啪啪啪啪...

我俾人講都唔緊要丫...(反正之前都聽得唔少...)

但Zoe係女仔黎架嘛…仲要咁年輕...咁樣俾人講一講,真係會好唔開心囉...

所以...最後都打消左請Zoe食飯同買禮物送俾佢呢個念頭~

但又勢估唔到,又會咁岩得咁橋,有呢個機緣巧合之下,可以請到Zoe食返餐~

機緣巧合...定係天意?

如果真係天意...又會唔會係天意弄人呢?

喺呢個世界上,天意弄人既案例實在太多太多...

而我,亦都唔想再俾上天作弄多一次...

一次...

一次已經抱憾終生...

「多謝晒你餐生日飯~咁我返去做野先喇~」返到上公司,Zoe客客氣氣咁向我點點頭。

『唔駛客氣~唔駛客氣~俾心機D做野喇~』我都講返幾句客套說話~

「嗯嗯~」Zoe轉一轉身,行一行返埋位...

我望住Zoe既背影...

唉...

講真一句,如果Zoe再唔俾心機D既話,我都真係好難做...

望就望Zoe生生性性啦~

唉~

我返一返入房,望一望住老婆張相...

唔...

Zoe同老婆...真係有好多地方都相似...

好似話外貌...身材...衣著...習慣咁...

但係再深入對比既話...Zoe比起老婆...係需要照顧多D...

由同老婆相識嗰一日,我一直都係由老婆照顧...

事無大小都要老婆為我操心...

我就好似一個小朋友一樣...

一直都好依賴老婆...

就算係我好想照顧老婆...到最後都係要老婆提點返我...幫我執手尾...

之但係Zoe既話...

我覺得佢好似一個需要人照顧既小妹妹多D...

我唔係話佢做乜都做唔好,要搵人幫佢執手尾...

而係...當有感情問題出現之時,Zoe就會唔能夠專心喺工作上...

總係會俾情緒影響到...

可以話係一個...好易受情緒影響既女仔...

不過都係既~好多女仔都係咁~

就算係Ivy都係一樣~

唔好睇Ivy咁強~佢一同男朋友鬧交嗰期,真係乜都搞唔掂~

點解我會咁清楚?因為次次都係我幫佢執手尾囉~

起初我都有打聽下~收下風~

得知Ivy係因為感情事而影響工作,我都有同佢傾過既~

但係女人...係唔可以用理性去傾感情事...

慢慢...我就唔理佢咁多…最多都係自動自覺幫佢執手尾算~

『嗱~所以我唔係只係在意Zoe架~我係個個同事都好關心架~老婆你可以放十萬個心丫~』

同老婆匯報完,我都係時候專心工作~

要好專心咁工作...唔好再諗Zoe咁多...